روحت تاعبة .. ههه من وقتاش مانيش تاعبة انا ديما تاعبة
دخلت للكوجينة كليت و طلعت لبيتي سكرت الباب و طحت نبكي .. بكيت لين عييت .. بكيت على وجيعتي .. بكيت على روحي .. بكيت على حياتي .. بكيت ..
نحيت دبشي و لبست دبش الدار .. ديما مستانسة نلبس تريكو مفخفخ طويل و شورت قصير كهو .. ريڨلت روحي .. حطيت غناية warrior متاع demi lovato .. و مديت لام ..
اي لام .. شمرت التريكو و رسمت خطوط على فخاذي .. خطوط متعني شي كي تشوفهم اما بالنسبة ليا انا يوصفو وجيعة .. وجيعة في قلبي مباتش تتنحى ...
نسيت مقلتلكمش انا شكون .. انا بية عمري 22 و نقرا فاك .. نقرا طب .. و باش نختص في الطب الشرعي .. انا انسانة منعيفش جملة و نموت على حاجة اسمها دم .. نوصفلكم روحي .. بيضة شمعة و شعري اكحل طويييل ديما نحطو تحت الكابيش لاني طويلة لاني قصيرة .. بدني مزيان .. عينيا لون بلون عين كحلة و عين شهلة و حرجي في الاكحل .. غنجة .. منستعرفش بالماكياج و اللبسة .. نعشق ال converses و ديما بدجين و كابيش مخفخة متضهر شي من بدني .. ساك فوق ظهري و كيت في وذني و ديما يمشي ..منخالطش العباد جملة ديما وحدي ..
علاش انا هكا ؟! خاطر الدنيا سرقت مني ضحكتي .. رجع بيا مخي لوقتلي كان عمري 16 سنة .. فترة مراهقة و محتاجة لهوة خاصة بيا .. امي امريكية اسمها " ديانا " طبيبة شرعية في امريكيا و عندها كلينيك و بابا "محمود " تونسي و مدير اعمال غادي .. تربيت بين امريكيا و تونس بحكم بابا كان يحب تونس كنا ديما نمشيو .. اما نهار 11/03/2008 امي و بابا انا مروحين لدارنا اللي في الريف متاع مدينة دالاس اللي نسكنو فاهامن حفلة عملها صاحب بابا .. ليل مخر و بابا شد صحيح باش نروحو من غير شيفور و نقعدو في دارنا اذيكا خاطر فيها مناظر طبيعية محلاها و حب يرتح مخو شوية .. المطر تصب .. بابا و امي يحكيو و انا نغزر للمطر .. كنت نموت على المطر .. و الدنيا فارغة مفما حد في المنطقة اللي نسكنو فيها .. باش نوصلو للدار لازمنا نشقو قنطرة مش كبيرة برشا بالكرهبة .. تحتها بحيرة معروفة كبيرة برشا و غارقة .. في لحظة يمشي كل شي و الكرهبة تزلق و نطيحو في الماء .. اللي نتفكرو الكل اللي انا دخت .. فقت نلقى روحي في السبيطار .. و تضريت شوية مالاكسيدون .. و عرفت اللي امي و بابا ماتو .. اي ماتو و انا منعت .. كيفاش و علاش منعرش .. جاتني صدمة و قعدت شهرين منطقت حتى كلمة .. دخلت لمصحة نفسية ( rehab ) في امريكا لين تحسنت حالتي .. اما بعمري مخرجت من ال depression اللي دخلت فيها لتوا نقاسي ..
هزتني عمتي بعد متأكدت اللي انا لاباس .. هزتني باش نعيش معاها في تونس .. كملت العام اذاكا في عذاب .. و بعد دخلت نقرا و بحكم بابا الله يرحمو كان حارص على قرايتي برشا .. كان يعملي دروس خاصة في العربية و زيد يقريني قراية تونس بخلاف قرايتي في امريكا .. كاينو حاسس باللي مش يصير الله يرحمو .. دخلت نقرا و الناس الكل توشوش عليا و انا مانيش لاهية بيهم .. وقتها انا جسد بلا روح ..
فقت بروحي سارحة تنهدت و قمت مسحت الدم اللي فالقاع و على فخاذي .. وليت نضرب فخاذي خاطر معادش فما بلاصة في يديا .. خبيت اللام و طيبت قهوة و قعدت وحدي .. نسيت مقلتلكمش اللي. عمتي بعد ما جابتني عشت 3 سنين معاها هي محامية و راجلها صحفي و يكرهني منجمتش نعيش تحت يديه .. شريت برتمان و عايشة فيه وحدي ..
نوقس التاليفون نلقاها آية .. هذي صحبتي الوحيدة .. نعشقها هي طرف مني و الله كي كنت نجي مع امي و بابا لدار عزيزي كانت ديما تجي غادي هي بنت جيرانهم كنت نرتاحلها من دون الصغار الكل و هي ترتاحلي كبرنا و قعدنا مكبشين في بعضنا اما هي توا تقرا في المانيا عندي برشا مريتهاش كل ليلة تكلمني نقعدو نحكيو سكايب .. هزيت و حليت الكام .. نلقاها تاكل :
- ديما تاكل كي العادة !!
- و عليكم السلام .. وهف متوحشتنيش !!
- لا هههه
- اي اي ماو ميسالش نسأل عليك !!
- لا هههه
- حتانا هاني نشاور فيك .. بية !!
- شبيك
- طحت على راسي
- القاع لاباس ؟!
- تي يزي ممسطك نحكي بجدي
- كيفاش احكيلي
- تتذكرو اشرف اللي حكيتلك عليه التونسي اذاكا اللي يقرا معايا
- سايي تكربصت !!
- اووووه راو يهبل
- هههههه مهبولة و زغرطولها في وذنها
- بية مازلت في عوايدك
- اما عوايد
- تبدل شوية امان قريب 6 سنين و انت هكا .. لا يزي ( قصيت علاها )
- آية حكينا فيه الموضوع هذا عيش اختي
- انتي اللي عيش اختي فيق .. راك لا يزي قاعدة تضر في قلبك لا يزي قاعدة تضر في بدنك ..
- ....
- بية توحشتك
- حتانا آية .. محتاجتلك
- افففف ايا اقلب الصحن نمشي نكلم شرشوفتي و نرجعلك
- ههههه سعوود من غير مترجع تاعبة بش نرقد
- هههه باهي حبيبي تصبح على خير
- goodnight babe
..علقت مشيت تمديت في فرشي حطيت الكيت و سرحت مرة اخرى .. ربي يهنيها آية فرحتلها .. قلبي عصر عليا كي خممت اللي هي ممكن تعرس نهار و معادش تتلهى بيا .. انا وقتها بالحق حسيت اللي انا نكره الدنيا ..
عاهدي بروحي نخمم رقددت من غير منشعر .. قمت الصباح .. حضرت روحي و مشيت نستنا في الكار .. وصلت للفاك نلقاه مزال بكري قعدت في الجردة و مديت كتاب نقرى فيه .. انا انسانة نعشق الكتب .. دخلت مبعد للكور و كالعادة قعدت وحدي بعيدة عليهم الكل ..
اكاكا و دخل طفل دوب مدخل الناس الكل سكتو انا هزيت راسي نلقاه طفل بدن و اكتاف مسكل اسمر و طويل و عندو لحية خفيفة و عينيه خضر و شعرو ارطب يهبل .. سرحت فيه اما فيقتني من حلمتي طفلة جرات و عنقتو غزرتلها نلقاها لبسة و مكياج طبست راسي نخنتب في الورقة و تبسمت على جنب .. لا مجال للمقارنة بيني و بينها ..
جا قعد قريبلي شوية .. هزيت راسي غزرتلو تلفت غزرلي و تبسم .. ضحكتلو ضحكة صفرة و تلفتت اما حسيتو بقى يغزرلي .. حسيت روحي متلبكة و قررت باش نتلهى بالكور .. كمل الكور و خرجنا الناس الكل .. جيت مروحة خرجت قدام الفاك فما طين عثرت اما ما طحتش اما تفرتت الكتب اللي في يدي ... افففففف ملا تبهذيلة يا ربي شمرت على يديا و بديت نلم فيهم و ما حسيت كان بصوت ورايا ..
- لاباس .. سايس روحك ؟!!
- لاباس مصار شي ..
هبط يلم معايا في الاوراق و الكتب .. وقفنا مديت يدي باش ناخو الاوراق .. اما هو را البلايص اللي في يدي .. بلايص الضربات .. حشمت هبدت يدين الكابيش و هبطت راسي .. خذيت الكتب و قتلو عيشك و جيت ماشية .. شدني و جبدني .. شمرلي يدين الكابيش و باسلي يدي .. باسلي البلايص اللي في يدي .. بوسة كلها حنية .. عينيا زغللت بالدموع و هربت نجري .. المطر تصب و انا نجري في المطر حاسة في بدني طاقة اول مرة نحس بيها نحب نصيح اما المرة هاذي مش مالفدة .. المرة هاذي حاسة شعور اخر عمري محسيت بيه .. مشاعر مخلطة بين الخوف و الفرحة ... انا نجري و كرهبة وقفت بجنبي تحل الباب نلقاه هو وقفت باهتة ..
- اطلع نوصلك
- لا عيشك تو نروح وحدي
- يا بنتي اطلع مطر تصب و انتي منفخة
طلعت .. منعرش علاش اما طلعت .. تبسملي و مشى بالكرهبة .. ماشي و انا سارحة .. مكلمنيش و مقليش وين ماشية .. اما انا زادة مقتلوش خليتو يهزني وين يحب ..
- اسمي محمد ..
- بية
كي قتلو على اسمي عينيه وساعت و خزرلي
- اسم امي .. الله يرحمها
- الله يرحمهم الكل
حسيت في قليو وجيعة حسيت بيه رغملي محكاش برشا اما حسيت بيه ... سكتنا .. وصلنا قدام عمارة كبيرة ..
- اهبط
- وين على خير
- داري
- دارك ؟! ماو لاباس جايبني لدارك
- متحبش نحكيو
(انا طلعلي الدم لراسي كيفاش يا بية تخليه يعملك هكا .. معناها عندو عادي يجيبك لدارو .. مسكين .. مزال ميعرفنيش )
- قتلي باش توصلني مش جايبني لدارك ولا خليها عندك مزيتك
- شبيك ياخي !! مقتليش وين تحب تمشي ياخي هزيتك انا على كيفي .
- تحكي بجدك !! ( وليت نعيط ) ياخي نرمال تعمل لطفلة هكا !! ياخي ترضاها في اختك !!
- اختي راجل ...
- (قصيت عليه ) ايا باهي كي خذات بلاصة خوها ..
و مخليتوش يتكلم حليت الباب متاع الكرهبة هبطت و سكرتو بالقوي و مشيت .. نسمع فيه يعيطلي طفيتو و خذيت تاكسي و روحت ..
( محمد يحكي )
نرجس اخت محمد: اهلا بمومو ههه شبيك كالفلوس منفخ ماهزيتش الكرهبة ليوم ؟
- هزيتها.
-مالا شبيك ! انطق شبيك مفرعس ماتفجعنيش
-شي..
-برحمة بية كان نعز عليك احكيلي ياخي مانيش وخيتك انا ؟ شفما تعاركت انتي و صاحبتك ؟
- تي لا يا بنتي.. تي طفلة ليوم ريتها محلاها و محلا ضحكتها.. اما معبيا وجيعة و قهرة..
-اييه وصل ! حكيت معاها ؟
-ريتها تجري فالمطر وقفتلها كبشت فاها باش نشيعها.. ركبت اما مالحشمة كلمة لا اصل عطاطتني اسمها بالسيف.. بديت نمشي اما مقتليش وين نهزها حبيت نهزها نشربو حاجة و نتعرف علاها تلفتلها نلقاها اعضم مالفلوس ههه وليت جبتها قدام الدار قلت تحكي معاها انتي و تتعرف علاها و تعطيها تبديلة و نخرجو نتفرهدو و نعملو قهوة ..
-اسمع ا سيدي اك طلعت تعرف تكمبس ا ولد بية ههههه
-ههه.. (تفكر امو يرحمها عطاها تنهيدة تفجع اصل)
-. هيه كمل شباها مطلعتش معاك ! متقليش تستنا فالكرهبة !
-لا.. تي فهمتني بالغالط مشا في بالها جبتها لداري باش نستغلها..شعلة فيا و ماخلات فيا شي .. اصلا لغلطة مني ماك تعرفني بهيم.
-لا عااد ماكش بهيم حاشاك اما ساعات تعمل فازات لبهيم بيدو مي يخممش يعملهم ههههه
- اووووووه شو ممسطها لعزا !
الطفلة عجبتني انا برجولية حسيتها عويقلة و عندها قليب هه نحب نشوفها و زيد نحب نفهمها لحكاية بالضبط
- حتانا هاني نغزر لعينيك لكلها قلوب هههه ايا عاد ويني اك الضحكة !
-تي اخطاني ماعيني في ضحك
-مومو ! تضحك والا والله لا كلمتها الطفلة و نخليك فالحشمة tongue emoticon
-نياهاهاها هههه باهي هكاا ؟
- ههههه باهي باهي نعمبو زينك نكلم حميدة تحضر العشا مدام انت دوشت و ركحت روحك دبرت فيلم فتوق ..
- باهي ..
طلعت لبيتي و دوشت و ريڨلت روحي و ترميت فوق الفرش .. بية .. محلاها و محلا وججها كي تبكي .. اما كيفاش طفلة كيففها ملايكة عاملة في روححها اكاكا .. نموت و نكلمك يا بية .. انتي يا محمد تطيحك طفلة متعرف علاها كان اسمها .. على اسم امي .. الله يرحمك يا مميمتي .. انا محمد 26 سنة نخدم رئيس تحرير في اكبر جريدة في تونس امي ماتت عندها عامين و بابا معرس و معاود حياتو و مسألش علينا اصلا خسارة فيه كلمة بابا ... انا انسان عرفت برشا بنات في حياتي اما اول مرة نحس روحي ترفضت .. اول مرة تسحرني نظرة طفلة .. شعور اول مرة نحس بيه ... قعدت نرحي في الدخان حتى كي عيطتلي نرجس حقرتها .. لازمني نوصللك يا بية ..
( بية تحكي )
روحت للدار نادمة و متغششة و فرحانة .. مبكيتش كي دخلت لبيتي .. اول مرة منبكيش .. اول مرة منلوجش على لام .. قعدت ناكل في روحي على اللي قلتهولو .. محقنيش عمتلو اكاكا .. لا يستاهل كرامتي قبل كل شي مانيش دغفة انا باش وين يهزني لدارو نمشي كي التڨو .. هاو قال امو ميتة اكيد راهو وحدو مالا .. باكش عندو خواتو .. اففففف بية يزي ملازمكش تخمم في طفل للدرجة هاذي.. اما شبيه كي شاف يدي باسها .. حاجة بدلتني اول مرة تصيرلي فازة كيف هكا .. حطيت الكيت و تكيت و قعدت سارحة لين هزني النوم .. قمت غدوة الصباح و مشيت نقرى
نمشي فالكور و حاطا الكيت كالعادة و سارحة و على هزت راسي تعدا بجنبي طفل يجري تلفت نشوف فيه يجري تقول درا شكون ماتلو انا اكاكة و يدحم فيا طفل اخر كان يجري وراه طيرني زوز ميترو و طحت علا راسي نغزر لدنيا فلو و راسي يوجع .. جيت باش نقوم منجمتش قعدت متربعة عالوطا نغزر قدامي الطفل الي دحم فيا فز نفض دبشو خزرلي هزني و حطني بعينيه و دار جا ماشي جاتو طفلة تقولش علاها ملايكة اصل وجها ابيض يلمع و عيناها زرق و شعرها اصفر طويييل لابسة كابيش روج طويلة و كالسون نوار و كونفيرس روج اما وجها مقلوب نخزرلها شدتو و بدات تعيط عليه انا وقته مزلت نسمع فالتزفير في وذني مالطيحة بعد شويا بدات تتنحا الوجيعة و فقت بالي صار و جيت شنقوم نمرمد الطفل لطيحني و مخسرش عليا حتا كلمة سامحني انا اكاكا و خزرتلي الطفلة كي فقت تبدل وجها و ضحكتلي و بعد رجعت تخزر لالطفل نسمع فاها
-شبي سماك ياخي متحلش عينيك و تغزر قدامك ؟
-سكر فمك و لم قدرك . تي شدخلك انتي من اصلو
- و تزيد تحل في كشختك ! الله الله !
-تي برا فوتني عاد شبيك كبشت انتي ؟ شتحب عندي ؟
-شنيا شنحب عندك ! اكاكة الطفلة شعرة لقتلتها ! ي ماو حل حبوبك و دل و اقرا لبلايك يا عجبكشي توا بالك نخدمو عند السيد الوالد احنا ! و فوق هاذا الكل متنجمش حتا تشوفها لاباس والا لا ؟ مالا فروخ و مالا مجتمع كرهتونا في عيشتنا..
دموعي هبطو احيار اما فرحانة.. نبكي و فرحانة خاطر اول مرة نشوف انسان يدافع عليا كيما اكاكة اصلان ملي كنت باش نفز نمرمدو كي سمعتها رتحت و بركت قعدت نسمع فاهم و نتفرج انا و الحضبة لتلمت
-على شكون فروخ ؟ اكاهاو حتانا ما ناقستني كان ملهط باش الطيحلي قدري والله باش نشد ..
هوا جا ينتق و تجيه بونية من عند طفل على خشمو نخزرلو يطير خلط عليه الطفل و كركرو.. ما نعرش شكونو عاطيني بضهرو ماريتش وجهو
جاتني الطفلة ل كانت تتعارك معاه مسحتلي دموعي و نفضتلي شعري مالتراب و انا كل بيبي نخزر لعيناها اللهم صلي عالنبي زرق كاينهم بحر اصل
- لاباس تنجم تقوم ؟
-مانعرش.. اي..(قمت بالسيف نحس في روحي رزينة)
-شد فيا و سايس روحك. اي نمشيو اغسل حالتك و برد وجهك اخطانا من هالبلاصة هام فيسع تلمو علينا كالكلاب اللطف
- عيشك..
-ماعندي ما عملت
-بلحق عيشك والله لا ننساهالك
-هههه اي اسكت لا نطيشك
خزرنا لبهضنا و ضحكنا هزتني لل بيفات غسلت حالتي و بليت وجهي بالماء
-بداتش تتنحا الدوخة ؟ تحب نهزك تعدي ؟
-لا لا اي تنحات قعدت شويا وجيعة فالبلاسطة لطحت علاها كاهاو
- هاي باهي .انا نرجس
-بية و يعيشك عيش اختي والله مرمدتو كيما حبيت انا بالضبط
-... (وجها تقلب حسيتها تكونسات)
-شبيك شفما نرجس !
-اسمك بية ؟
-اي. ياخي شبيه اسمي شبيه ليسمعو يتصدم ! يا ولادي راو اسمي بية موش مصيبة !!
- حشاك مالمصيبة عزيزة اما .... تي شعلينا فيها حكاية حولة .. احكيلي انتي شكون هاني منعرفكش .
- ههه ميعرفني حد تهنا انا انسانة منتراش لنكلم حد ليكلمني حد
- و علاه
- كي سالتني حسيت غصة في قلبي و تفكرت برشا حاجات في ثواني ملقيت منين نفسر ولا كيفاش نبدا .. تخلطت برشا حجات .. عينيا دمعو
- سامحني نرجس لازمني نروح تاعبة و زادت عليا الضربة متاع راسي حاستو باش يتفلق ..
كالعادة مخليتهاش تتكلم و قمت كاييني هاربة .. منعرش علاه .. انا اكاكا نمشي و نتلفت و نفر كان بحاجة دخلت فيا .. مريتش شكون و طرشقت نبكي و نعيط كايني كنت نستنا فيها
- ياخي شبيكم اللي هذا داحم فيا ماو لباس .. منتراش انا ؟؟ مانيش عبد اناا ...
- لا حشاك اما تحسك وليت تهرب برشا هليمات
- انا سمعت الصوت و تلفتت نلقاه محمد .. دخلت بعضي
- انا ؟؟ شن.. علا.. تي شك..شكوون قاللك نهرب
- لبارح وقتلي طحت هربت كي المهبولة .. زادة كي خليتني مبهم فالكرهبة و هربت .. و توا هاك تمشي و تتلفت تقول يجري وراك كلب .. هههه ضاهرلي الكلاب ديما تجري وراك
انا تفكرت فازة البارح و النار شعلت فيا .. نقبل اي حاجة الا انو طفل يلعب بيا ولا يخمم انو يلعب بيا وقتها انا نولي قوية و نقتلها بية الضعيفة
- بنا وجه جاي تكلم فيا ؟؟ و شدخلك فيا ؟؟
- تحبلك شوية تربية انتي مقالولكش اللي لازمك تحترم اللي اكبر منك و خاصة كي يضال راجل
- اشومي وين ترا فيه الراجل ؟
عوجت فمي زعما مستغربة و دورت جيت ماشية حبدني بقوة لين لسقني لكلي ليه .. حسيت لعبت عليا الدوخة و خفت منو و محبيتوش يسيبني في نفس الوقت .. اما لازمني نكون قويا قدامو .. اخر حاجة حاجتي بيها طفل يلعب بيا يزي مالدنيا لعبت بيا كيما حبت و اشتهات لازمني نشد روحي ..ذبل عينيه غزرلي و قرب فمو لوذني
- اما انتي طلع راسك صحيح انا نكسرهولك متخافش .. منيش باش نسلم كان لازم نجري وراك ..
- انا وقتها لحمي لكل قشعر تبسمت تبسيمة صفرة و قربت فمي لوذنو و قتلو
- انتي قلتها بفمك الكلاب ديما تجري ورايا
- بعدت عليه نطرتلو يدو و مشيت ...
( محمد يحكي ) صدمتني ... اول مرة طفلة تعملي هكا .. محلاها كي تضال قريبتلي .. لسانها طويل اما انا نقصهولها .. منين طلعت هالكعبة ...
- نرجس : - هاي طلعت عندها لسين
- منين طلعت انتي زادة
- و الللهي كان صدقني ربي انا قدام الفاك اللي نقرا فيه .. انتي شمجيبك
- شدخلك .. كنت مادة وذنيك اكيييد
- اباباب مالا نلعبو خاصة كي تضال تحكي معا صاحبتي
- صاحبتك ؟؟ تعرفها و متقولش ؟؟؟؟
- اسكت عليااا ماهيش صاحبتي صااحبتي اما ليوم طفل ضربها و حتى كلمة سامحني مقلهالهااش عادة انا ما تعرفني اختك باربو مسحت بيه القاع
- اسمع متجهلنيش توا توريني الطفل و الله لما نحفرلو قبرو
- اااه اااه هادد على شكون ؟؟؟ تي واحد فرخ شيهمك فيه ... توا تحكي بجدك ؟؟
- لا نفدلك .. كان مجاتش هيا و طفلة اخرى قالتلي اكاكا راك شفت العرض اما يحرزلها .. والله يا نرجس خطفتلي قلبي و مخي و مانيش مفلتها ..
- ايا باهي بركا شادية و عبد الحليم .. بوك سئل عليييك
- بوك وحدك معنديش بو انا
- شنواا سيناريو العادة ؟؟ الحكاية تعدات و امي مسكينة خلصت و يبقى بوك متنجمش تنحي خشمك من وجهك
- اسمع نرجس الموضوع هذا تسكر و قتلك معنديش بو ابعدني يرحم بية مانيش ناقص
- باهي باهي روح بياا انتي صرفت صرفت
- اطلع لا يعطينا مايغلبنا
- حمدوديي رااك
- اااي شد اكاكا ههههه
- ههههه مسقطك حاسيلو يااا ربي بية تنحيلك الزيت القديم
- خليها تجي بركا كان لازم تنشحني اصل
خدمت الكرهبة ثنيا كاملة و نرجس تحكي متسكتش و انا دازز على " اي " و مخي سارح في بية .. صوتها .. دموعها .. قربها .. ريحتها .. شعرها .. حتى لسانها الطويل و صحة راسها .. اااه يا محمد .. غلبتك ...
خلطنا لدار طول دخلت سكرت على روحي البيت و شديت فرشي نخزر للحيط و سارح..اول مرة تعمل فيا هاكا.. كان مزالت باش تكمل هكا نجبد روحي خير.. كارامتي قبل كل شي..
فزيت ندور فالبيت و نخمم كيفاش باش نحكي معاها.. كيفاش باش نفهمها لحكاية .. تي لازمني نربطها و نقعد نحكي معاها و شوف و شوف يا حليلي مطول لسانها 😬
(بية)
شديت بيتي و ترميت على فرشي باش نموت بالندم.. محقنيش كثرتلها.. مسكين محبيتش نزلعو، الله غالب مانيش ناقصة هم على همي.. تي يمشي يزمر
اما محلاه.. دافي. ريحت لبارفان لتوا في خشمي..
مانيش فاهمة روحي شنحب و اش منحبش .. نعرش شلازمني نعمل .. نضحك و فرحانة اما نادمة مفهمت شي.. اما اول مرة نشد فرشي فرحانة 😀
انا راقدة و نسمع فالتالفون نوقس . نومرو منعرفوش
نشالله خير هزيت.
-الو بية ؟( صوت مش غريب.. صوتها صوت طفلة كانت تبكي)
-الو . شكون معايا ؟
-آية..
-آية ! شبي عزاك لاباس ! ستنا نومرو تيليكوم ! آية وينك !
-اني بحذا لحماص لقدام البرتمان. اهبطلي فيسع امان
-لحظة.
علقت، لبست شلاكتي و هبط نجري .. آية قدام لباب . كيفاه ! علاه ! وقتاه جات من المانيا !
حليت لباب نلقا آية تقص فالكياس و تكركر فالفاليز عرضتها في وسط الكياس طيشت الفاليز و سيكانها و قعدت محملتني في وسط الكياس و دموعها تجري عيناها حمر مالبكاء و حالتها حليلة . كثر تزمير لكراهب لفالكياس وليت هزيتلها سيكانها و جابت هيا الفاليز و طلعنا لبيتي نسمع فالحس ورايا تلفت نلقا آية طيشت الي في يداها لكل و جاتني تجري عنقتني و قعدت تبكي -بية ماني اختك كان نعز عليك عاوني بالله
-اية عيش اختي هدي روحك و فهمني شبيك ! وقتاه روحت و شعملت في قرايتك ! تي شبيك مقتليش الي انتي جاية !
-منين باش نبدالك شباش نحكي و شباش نخلي
-ايا اقعد قدامي و فهمني انتي حالتك ما تعجبش
-اشرف يا بية.. اشرف عملها فيا و غدرني
كيفاه ؟ ملتقليش..
-اي والله عطيت فيه ثيقة اكثر مالي تتصورو في مخك.. وصلت نبات معنتقتو و ما يخممش يمسني.. نهار جبدلي عالحكاية شعلت فيه لين تنرفز و خرج و كي روحت انا نلقاه محضر لعشاء و طلب مني السماح عادي بروحي نتعشا.. فزيت لقيت روحي مرمية بجنب لفرش دبشي مقطع والدم فالوطاء تصدمت و فهمت شصار.. نهار كامل و انا قاعدة في نفس لبلاصا نصيح و نعيط على طول صوتي..لين دخت حليت عنايا نلقاه دموعو تجري و يتكلم بالسيف آية سامحني والله لا كنت في عقلي منعرش شعملت
-اخرج من قدامي
-اية انا نحب نصلح غلطتي و نروحو ليوم نخطبك و نعرسو
-قتلك اخرج من قدامي ! حيوان متخلف اخرج اخرج عليا لا نقول فاها وووووووه اخرج
هز روحو و خرج مشيت نجري لميت دبشي و مشيت قصيت تيكي و هاني قدامك . بية جيتك انتي خاطر انتي اختي الي ما جابتهاش امي . اختي الي عمرها ما سلمت فيا و ديما واقفة خير مالراجل في جنبي . حتا دارنا فيبالهم الي انا نقرا
- اسمعني هدي روحك بدل دبشك و ارقد ارتاح مينفعكش لبكا توا ...
- امان بية متمشيش تقرا غدوة اقعد بحذايا راني باش نموت ..
- تهنا ا روحي منمشيش و نخلي حبيبي وحدها ..
- بية !!
- روحها !!
- ميفيد فيها كان بار توا
- ااااه !!
... غلبتني اية و برولتني بكلمتين هزتني معاها
شدت صحيح باش نلبس روبة و تالون محبيتش لبست دجين مقطع و تريكو hip hop نوار طويل و converse نوار و لميت شعري pony tail و غسلت وجهي بالصابون و خرجت كانك من اية لبست روبة ميني في الروج و طالون نوار و عملت روج في فمها و نوار في عينيها حسيلو حربتها اما طلعت محلا زينها ..
وصلنا للبار خذينا بلاصة و قعدنا و انا مانيش مرتاحة و زيد اللي هذا يهزني و يحطني على لبستي .. بدات اية تشرب بغل .. اكيد من فازة اشرف .. اية مالنوع اللي ميوريش ضعفو اما ساعات ينهار .. اما انا محبيتش نشرب عمري محطيتو في فمي و مانيش باش نحطو .. قمت و مشيت للتواليت باش نغسل وجهي حسيت روحي دخت مالحس و الضو و الروايح نلقى باب دخلت طول ندريش عليه شنوا .. ااخي طلعت تواليت الولاد .. متت بالحشمة خرجت نجري كالمهبولة ..
(محمد يحكي )
انا ندور كي الزربوط و ينوقز تاليفوني ..
- الو ..
- بوحميد .. يا ولدي وينك ..
- اسمعني كدماكش بش تقنعني اللي انتي تسال عليا .. انطق شحاشتك ..
- شوف كي يشعل .. ايا تجي
- لوين زادة
- بار *** اني غادي انا و الاولاد تي ايا دز فازتك و ابجا و الله جو فتوق .
- تي و الله تاعب اني مازلت كي خذيت كونجي تاو نفرح بيك مرة اخرى
- وييين خوك راجع لفرنسا بعد غدوة ..
- ا ولد الكلب متقوليش ايا مالا اقعد فما اني جاي
- مشات معاك صحيبي ..
بدلت دبشي هزيت مفتاح الكرهبة شفت الوقت نلقاها 11h متاع الليل .. وصلت للبار نلقا الجموع غادي قعدت شويا معاهم و بعد قمت ماشي للتواليت انا وقفت قدام الباب و نفر كان بطفلة حلتو وخارجة تجري و طمبجت فيا شعرا لطاحت شديتها جات بين يديا ...
- بية !!
- مح..ح..حمد ؟!؟
- اي محمد .. شتعمل لهنا ؟!
- و الله اول مرة نعفس بار و الله خاطيني اية و الله ..
- يابنتي شبيك تقول باش يقصولك راسك .. هههههه زايد دينا هاربة و مطمبجة فيا ههههه
- هههههههههه
- يا معلم طلعت تضحك
- ها ها ها و انتي طلعت تتكولف
- ايوااه اي بداات .. بية ميسالش نحكي معاك حاشتي بيك اكيد ..
- اخر مرة مشيت معاك نلقى روحي قدام باب دارك لمرة الجاية ندرا فين نلقا روحي
- في قلبي ..
- نعم !! و الله لا سمعتك ياسر حس ..
- ( عليت في صوتي ) قتلك هذاكا موضوعنا ايا نقعدو ..
- نعيط لصاحبتي اية مكانش تو تتغشش ..
- لا لا جيست نقولك كلمة و نقعدو بحذاها ايا نخرجو ابرى احنا ..
- باهي اما منبطاوش
- باهي. ..
خرجنا قعدنا في الكرهبة ..
- بية .. نحب نحكي معاك في موضوع ..
- نشا الله خير
- نهارت اللي هزيتك لداري والله قصدي شريف كنت باش ندخلك لاختي تعطيك تبديلة و نهزك انتي وياها نشربو قهوة و نحكيو انتي فهمتني بالغالط اما و الله مقصدت شي .. انا انسان يا بية عرفت بنات قد شعر الراس ياما عديت ليالي مع البنات و عمىها وحدة متقولي لا ديما اللي حاجتي بيه ناخذو و بسهولة .. حياتي معقدة و برشا حجات صارو خلاوني الانسان هذا توا .. عمري محبيت و عمرها طفلة ما جلبتني .. اما انتي جيت و قلبت كل شي كي غزرتلي اول مرة حسيت حاجة مختلفو حاجة جديدة عمري ما ذقتها حسيت بيك من عينيك قوية اما خايفة .. ضعيفة و الدنيا ظلمتك لين سلمت اما زادة ريت حاجة اخرى .. ريت امل في عينيك ..رست طفلة صغيرة مازلت بريئة .. ريت بية اللي سحرتني .. ااي يا بية من نهارت اللي جات عيني في عينك مافرقتش تفكيري .. اول مرة باش ننطقها و عمري ما تصورت روحي نقولها .. اما ... نحبك
تلفتت نلقى بية دموعها هابطة و تغزرلي ...
-بية شبيك تقلبت !
- .. شي
-تي شبيك تبكي !
-نبكي ؟ تعرفني بكاية انا
(حليت باب لكرهبة و هبط خلط عليا يجري و وقف قدامي)
-امان بية بالله قلي علاه تبكي ؟ جرحتك ؟ قتلك حاجة خايبة ؟
- تي بارا زمر قلو نبكي تي شعرة دخلت لعيني !
والطرشقت بالبكاء فالحظة هاكي جبدني و حملني و كبس عليا ، ماغير ما نشعر حطيت يديا ورا ضهرو و فحمت بالبكاء و هوا متكلمش و ماتحركش جملا، بكيت بكيت لين دموعي بدات تشيح و بديت نسمع فدقات قلبو .. محلاه..محلا عينيه و مدفاه و محنو..هزيت راسي بالشويا و خزرتلو لعينيه ضحكلي.. ضحكتو رجعت فيا الروح .. حسيت الي انا كنت ميتة و وقتها فقت..
بية لقوية لعمرها ما طاحت غلبني بضحكة..
خزرتلو و حبيت نتشجع.. حبيتو يقعد معايا طول عمري..ياقف معايا خاطر فديت وحدي..تعبت.. تمنيت نحطو في جيبي و نروح بيه و وين نمشي نهزو معايا نخليه ليا وحدي . متاع بية كهو..
- ن .. نن.. نحب..
-اه ؟
-نحبك..
تصدم وجهو تقلب 360° ههه ولا كيف وجه البيبي تشوف فيه الفرحة و البراءة.. هه محلاه اكازي..
- انتي ملي ضحكتلك عجبتك انا عجبتني ملي دخلت للفاك نهارتها..
- لا عاد.. مالا علاه تعذب فيا و تزلع اا سخطة راني ملي ريتك و انا نخمم فيك ٢٤\٢٤ ! هوا كي تجي تشوف اذاكا لخلاني نشد صحيح..
-ههههه ماو ما حبيتش ن.. آية نسيتها !
دخلت نجري ل آية خاطر خليتها بدات ادوخ مالشراب نلقاها قاعدة هيا و دفلة اخرة في وسط 6 اولاد شايخين علاهم مشيت نجري نجبد فاها كبشة قتلي خليني هنا سيبني خنتفرهد و انتي اعضم من مماتي كان لكبي اجا تفرهد بديت نفد و مالقيت ما نعمل انا اكاكة و فزلي واحد مالجماعة الي قاعدين قلي اجا اقعد معا صاحبتك تو نفرحو بيك و انتي بالذات كان تحب تنجم تخطار الليلة بقداه.. فديت و دار بيا الدجاج لكحل حسبت روحي مسمعتوش خاطر خايفة و طبسطة نفزز ف اية .. جا من ورايا شدني و لسق فيا تكونسيت و خفت انا جيت شنصيح و هوا بعد يديه و عيط بالقويي تلفت نلقا محمد شادو ركح فيه ضرب وجهو فسدهولو كلو دم قتلو تستاهل تلفت لأية جبدتها بالقوي فززتها و جيت باش ندور نخزر لجماعة الي كانت قاعد معاهم فزو لكل و الي نحا لفاسة و الي كسر دبوسة شراب و تفكرت الي ل يضرب فيه محمد صاحبهم .. قلبي طاح باش نموت علي بالخوف دموعي ولات تجري وحدها و صحت فرد صيحة
-محممممممد!
جبدني واحد من ورايا بلقوي و انا شادة اية جبدتها معايا خزرت نلقا طفل قدامي طاح يجبد فيا من يديا لين خرجني انا و اية و انا عينياا مرشوقة ف محمد و في مخي كان محمد مانيش فايقة بالي قاعد يصيرلي اصل لين دورلي الطفل وجهي.
-برا اركب انتي و صاحبتك فكرهبة محكد منتالي اني محلولة تو شويا اخرة يجيكم
-محمد..
-متخافش محمد راجل معاه رجال
دخل و خلانا فالكرهبة نسمع كان فالعياط و حس تكسير لبلار.. مخي و عقلي في محمد يا ربي كان تصيرلو حاجة انا نموت.. يا ربي تسطر .. يا ربي خرجو من هالمحنة.. دموعي تجري لين تبلة لكابيش و تعداو درجين اطول من حياتي لكل و انا ندعي و نبكي لين تخنقت حليت لباب و هبط نخزر ل محمد خرج يلبس في مريولو و وراه صحابو خارجين يضحكو و واحد شاد راسو يجري بدم .. فاللحضة اذيكا تنجم تقول كيف ريتو خرج دموعي زادت الدوبل و حسيت روحي اسعد انسانة فالعالم و عرفت اللي ربي سبحانو يحبني .. منجمتش نستناه لين يوصلي مشيتلو نجري و دموعي تتطاير كي قربتلو عثرت جيت في حضنو عنقني و قالي شبي حبي تبكي وقفت على ساقايا و قتلو حبك ؟ و طحط نضرب فيه علي سدرو و هوا يضحك تقول ندغدغ فيه صحابو قالولو انستك باها و مشاو لكل قعدت كان انا وياه
-علاه شمتلك زح رعبتني و خليتني خايفة علااه تضرب فيه تي خليتني نمرمدو انا شبيك بهيم تو كان ضربوك بحاجة تي ماصدقت لربي لقيت حاجة نحبها في هالدنية تحب ترزيني فاها
-هههه يزيتش توا ! يتبولدلي على مرتي تحبني نسكتلو !
-اي اسكتلو !
- سكر ! باهيشي توا ،
- محمد توا هاذيكا نيتك انتيي عامل حرب و دم و ..
طبس راسو شويا و قربلي عاللخر انا تقطع عليا النفس .. قرب فمو لفمي سايي باش يبوسني ! انا ترخفت ماعاش النجم حسيت روحي فعالم اخر نستنا فيه.. تعدا لوذني و قالي نحبك.
محلاها.. اول مرة نسمعها و تعجبني..
حسيت الي انا اسعد انسانة فالعالم.. روح بينا مهدي و قعد يستنا فينا لين دخلنا للبرطمان و بعد روح..
فالصباح فزت اية كالمهبولة الصباح تسأل فيا شسار لبارح حكيتلها علي كل شي و كملت حكيتلها على محمد
- ريت ريت كي نقلك امشي معايا ؟ اني دبرتلك عريس ههه
- سكر وهف يهزك نشالله ! الراجل شعرة لا مات في جرتك ا بنت لحرام
- في جرتي ؟ سامحني كي هوا مغيار و مايحملش فيك شدخلني انا !
-تي مش.. تي ماو.. تي كلها جرتك ولا شهزنا احنا اصلا !
-هههه شو وجها كيفاه حمار و باش يترشق عهعهععهع
.. قعدنا شهرين كل يوم نخرجو انا و آية و محمد و نرجس اختو هه تزدمت اول ما عرفت الي هيا اختو اك الطفلة حليلتها فدلاكة و عاقلة و صاحبت جو و زيد لسانها كي لساني ههه انا و محمد تعلقنا ببعضنا برشة و اية نسات اشرف و تعرفت على واحد من صحاب محمد يخدم مقاول اسمو امير ،ستيل كراهب و لبسات و تحبو اما انا مش عاجبني كلي نحسو خبيث و الكلمة يدورها 7 مرات في مخو قبل مايقولها و زاد فددني ضربة ضربتين يجي يهز اية مالدار نهار شديتها
- اية عيش اختي تمشيش تعمل نفس الغلطة مرتين !
- تي ابعدني قتلو غلطة يهديك ابعد ابعد خنركح شعري
-وين على خير ؟
-امير جايني باش نخرجو نسهرو راس راس
- تسهرو ؟ اية لحداش متع اليل توا وقتاه باش تمشي و وقتاش باش تجي ! اسمعني مفماش مشي
- شنيا مفماش مشي ! تحب تحرم عليا ؟ ياخي لالحد غايرة مني ؟ ابعد ابعد هاو يتلب تقريب يستنا فيا لبرا.
عوجت فمي و غزرتلها و قعدت مسدومة .
اية تحكي معايا هكة و تقلي غايرة مني ؟ لا عاد !
فزيت الصباح نلقاها مرمية عالفرش عين مغمضة و عين محلولة مزالة لابسة الطالون عرفتها ساهرة لصباح و عطاتها بالشراب لين ماعادش.. سخفتني جيت نبدللها فدبشها نلقاها سخونة قريب تشعل بالسخانة انا اكاكة و تاليفونها نوقس شفتو نلقاه امير علقت عليه مرة ثنين تلاثة فددني هزيت
- شبيك شتحب
-..بية معايا ؟
-اي بية معاك تفضل شحاشتك باها اية ؟ شمزلت باش تعمللها ؟
-شبيك تحكي هكا انتي اي خليك بقدرك راني حاط محمد بيناتنا. عديلي اية حاشتي باها
- تو مروح بالطفلة لفجر ريحتها ناتنة بالشراب و السخانة تقلي فاها باش تموت تتنفس بسيف شمزلت تحب ! اخر علقت عليه و سكرت تلفون اية و طلبت محمد قتلو الي اية مريضة باش يجي يهزنا لسبيطار قلي هاني جاي .
انا لاهية ب اية نبردلها في حالتها و الباب دق مشيت نجري حليت
-صار هوا انتي !
- امان بية بالله خليني ندخل نشوفها و نطمان علاها
سخفني جاي مفجوع قتلو ادخل ايكا في بيت النوم و مشيت انا للكوجينة نصبلو في كاس عصير و حاطا لكيت في وذنيا نشوف كان في يد شادة طبة و حطتها على فمي شديت النفس و محبيتش نتنفس درت منا درت منا شي جهامة عليا و شادلي يديا ماخلانيش نتحرك اصلو تسد عليا النفس ماعاش النجم تاقف بدني رزن حتا باش نصيح ما نجمتش لساني منجمش نحركو من اصلو طاح يضرب فيا و يكركر فيا من شعري طلعني دروج كامل و هوا يكركر فيا و انا دموعي تجري طيشني فوق الفرش و قطعلي دبشي و عمل فيا لحب قاعدة ندعي و راسي مايل علي جنب يا ربي شعملت انا باش يجرا فيا هكا حياتي كاملة و انا نتعضب يا ربي هز امانتك و ريحني يا ربي.. انا اكاكة و نشوف ف خيال واحد فالباب طل وقف شويا و مشا . محمد اذاكا ؟ زعمت نستخايل ؟ لالا كان جا هوا راو خربها الدنية..
حليت عينيا نلقا اية تبخ فيا بالماء و انا بدني مدڤدڨ منجمش نتحرك جملا ما حاولتش نتكلم اصل الفرش لكلو دم و انا مطيشة عالحيط و دبشي مقطع غمضت عينيا و سرحت عاودت حليتها نخزر لدنيا فلو و ضو ابيض بدات التصويرة توضاح و بجنبي الطبيب غزرتلو قلي حمدولة على سلامتك مادام
-مادام ؟ ههههه قول **** مش مادام
يا ربي ارحمني و خرجني ملي انا فيه يا ربي اخزرلي بعين الرأفة راني مضلومة يا رب..
-مادام عندك 3 اشهرة في غيبوبة من نهارت ل جابتك صاحبتك ما جاك حد تحبش نطلبلك امك ؟
- امي عند ربي ..
-ربي يرحمها . راجلك وينو مادام راك حبلة فالثالث
-خزرتلو و فحمت بالبكاء
يا ناري عليك يا بية يا ناري علي شرفي ياناري على روحي معديا 3 اشهرة في كوما و متلفتلي حد . كيفاه مزلت باش نخزر ل محمد و كيفاه باش يصدقني .. محمد ؟ وينو ؟ 3 اشهرة ما لوجش عليا ؟ ايي راجل اما وينك وقت غصرتي ؟ وينك تحلف برحمت امك
الي انتي ماكش باش تخليني ؟ وينك ؟
( محمد )
تعداو ثلاثة شهر و انا في سويسرا .. فادد .. كاره روحي .. شفتها بعيني تخون فيا .. بعيني شفتها معاه .. معا صاحبي .. لها الدرجة كنت غالط فيها .. حبيتها عشقتها اصل .. عطاتهالي ضربة تحت الوذن .. قتلتني بيها .. انا اكاكا نخمم و تاليفوني ينوقس ..
- الو !!
- محمد .. اجريلي ..
- شبيك نرجس لاباس .. شبيك تبكي انطق
- بابا يا محمد بابا ..
- شبيه !!
- مات ..
حسيت بفرحة و بحزن في نفس الوقت علقت التاليفون و قعدت نخمم .. رجع بيا مخي وقتلي امي مرضت .. امي مرضت بالمرض الخايب و بدات حالتها تتعب .. و بابا في عوض ياقف معاها يرميلها الفلوس و يمشي .. لين مرة امي تبعتو راتو يتقابل هو و طفلة طفلة اصغر منو ظاهرة تحبو على فلوسو .. قعدت امي فترة و هي مقهورة لين مرضت اكثر كي جات تحكي معاه تعاركو ضربها ضربة على راسها قتلها .. اااي قتلي امي .. من وقتها نسيت اللي انا عندي بو .. لميت فليجتي قصيت تيكاي و روحت لتونس .. مشيت لدار الميت عزيت و روحت تقول براني .. ماني نسيت مقلتلكمش اللي هو عرس بيها الطفلة و طلقها كي فاق بيها مصوحبة عليه .. روحت للبرتمان نلقاه فارغ نرجس اختي قعدت في دار الميت .. دخلت دوشت و اتكيت تلفتت نلقى تصويرتي انا و بية معلقة نحيتها و خبيتها في القجر .. اكاكا و تاليفوني نوقس نومرو منعرفوش ..
- الو ..
- الو ..
- تفضل شكون معايا ..
- انتي محمد !!
- ااي انا هو .. انتي شكون
- انا اية
- اهلا اية . بية لاباس !!
- لا باس اما انا نحب نشوفك توا حاشتي بيك ..
- باهي .. نتقابلو في ******
- بااهي
مشيت للبلاصة اللي بش نتقابلو فيها نغزر لاية جاية و في يدها اوراق سلمت عليها قعدت ..
- لاباس اية فجعتني !!
- لاباس محمد اما .. تتذكر وقتلي هزينا بية للطبيب ..
- ااي بيها حاجة !!
- مش قتلي انتي عس عليها و ااي حاجة جديدة قولهالي !!
- ااي .. انطق
- انتي ماو فيبالك بية جاتها صدمة نفسية خلاتها في الكوما 3 شهور ..
- اية قتلتني .. هذا الكل فيبالي بيه انطق جيب الصحيح
- ....
- ....
- بية حبلى يا محمد ..
وقتلي سمعتها الكلمة حسيت روحي جمدت في بلاصتي .. الدنيا دارت بيا و قلبي تجرح جرح مستحيل يبرى .. بية الانسانة اللي عشقتها .. تنفستها اصل .. الانسانة اللي رجعتلي الضحكة لحياتي و خلاتني نحس بالدنيا .. سحرتني و خلاتي نعيش في حلمة .. خانتني و طلعت حبلى .. حبلى من غيري .. حبلى من صاحبي .. روحت للبرتمان جسم يتحرك لا اكثر و لا اقل .. طرشقت بالبكاء .. عمري ما بكيت كان كي ماتت امي .. بكيت توا على بية .. قعدت ليل كامل نخمم مذقتش النوم .. في الصباح هزيت التاليفون و كلمت اية و قلتلها باش نتقابلو في نفس البلاصة ..
- اية حاجتي بيك في موضوع مهم برشا
- تفضل محمد ..
- اية نحب نعرس بيك ..
- ...
- اية بالحق نحكي .. نحبش زازا و حكايات .. جيست نكتبو الصداق و نعملو سهرية في الصالة و نلمو عيلتك و عيلتنا
- و بية ..
- بية انساها كايني ماهيش موجودة في حياتنا و عمرنا معرفناها ..
- معندي حتى حل اخر .. انا نحبك محمد ..
- ...
- نعرف اللي انتي مصدوم اما و الله نحبك و محبيتش نضهر خاطر صاحبتي بية ..
- باهي اية قص الحديث .. ابدى حظر روحك العرس بعد شهر ..
( بية )
الفترة هاذي الكل عديتها وحدي بين لام و الدموع .. الوحم عمل فيا .. مريضة مانيش ناكل و ماني نعمل في شي .. نحب نموت .. اما منحبش نقتل بنتي .. الطبيب قلي اللي انا عندي طفلة .. عمتي ديما تكلمني .. هي رجعت لامريكا عندها شهرين توا .. محكيتلها شي .. تعدا شهر توا .. لا اية لا محمد سال عليا .. رجعت ناكل على خاطر بنتي
.. بنتي .. تمنيتو جا طفل باش نسميه محمد .. ااي بش نسميه محمد .. بش كل منعيطلو نتفكر محمد .. حب حياتي اللي خلاني و مشى .. توحشتو .. توحشتو علخر .. نتمنى نحكي معاه حتى شوية .. نقلو نحبك و منجمش نعيش بلا بيه .. نحكيلو على ولاد الحرام شعملو فيا .. نحكيلو على شرفي اللي ضاع .. مخيبها الدنيا .. خاااايبة كرهتها ... نهار انا قاعدة و نوقس تليفوني .. نلقاه محمد .. كلمني اااي كلمني .. حسيت الدنيا تحلتلي في وجهي مرة اخرى .. فرحت و خفت في نفس الوقت ..
- الو ..
- الو .. بية !!
- محمد .. ( طرشقت بالبكاء )
- بية نحب نشوفك نتقابلو توا في *****
- توا توا
فرحت فرحت فرحت .. محمد منسانيش مزال يخمم فيا .. مزال يتفكرني .. يااا ربي حمدلله يا ربي .. لبست دبشي و نشيت نجري .. وصلت نلقاه قاعد و يشرب في قهوة .. وقفت قدامو .. هز عينيه غزرلي .. ختى السلام مقلهاليش .. قعدت ..
- محمد .. وينك .. وين كنت .. علاش خليتني !! .. متعرفش شصار فيا بعدك !! اعلاش شعمتلك !!
- بية مانيش جاي بش نبرر اغلاط انت عملتها انا جاي بش نستدعاك ..
- لشنوا !!
- عرسي .. غدوة في صالة ***** نتمنى تجي ..
غزرتلو تبسمت قمت و مشيت قعدت نمشي على سقيا و دموعي هابطة .. وصلت للدار ترميت فوق الفرش و نبكي .. نبكي لين معادش فيا .. ليلة كاملة نبكي .. محمد نساني .. محبنؤش اصلا .. فيست عاود حياتو و بش يعرس .. علاش شعمتلو .. علاش قتلني هكا علااش .. نهارين ملوحة .. لا ماكلة لا شراب .. الليلة عرسو ...
( محمد يحكي )
الليلة دفينتي .. فادد .. اما معنديش حتى حل ... كلمتني اية قالتلي اللي هي في الحجامة .. قلتلها التسعة نكون بحذاك .. دخلت دوشت و خرجت انا نحظر في دبشي بش نلبسو و الباب دق .. حليت نلقى منير قدامي .. صاحبي اللي خانني .. دوب ما شفتو جنيت طحت نضرب فيه نضرب فيه لين يديا الكل ولاو بالدم ..
- محمد عندك الحق تضربني .. انا مرضت بالكونسار و ضميري مهنانيش نحب نحكيلك على اللي صار الكل .. بية معندها حتى دخل انا خدرتها و عملت فيها كل شي .. و طيشتها والله معملت شي .. بية اشرف مالشرف بيدو ..
- يا ****** .. والله منقتلك دمرتلي حياتي ... اخرج عليا اخرج ..
قام منير مالقاع و خرج .. سكرت الباب و شظيت راسي و بديت نبكي .. ضلمتها يا ربي ضلمتها و هي معندها حتى دخل .. بية مخانتنيش انا خنتها بية تحبني يا ربي علاش هكا .. توا فات الفوت الليلة عرسي ..
( بية ) قمت .. مسحت دموعي وقفت قدام المرايا .. و غزرت لروحي .. لازمني نكون قوية .. كان بش نمشي بش نغزلو .. مش نشطح و نشيخ و نضحك كاينو مش موجود .. مشيت مديت روبة روج ميني و تالون نوار لبستهم طلعو يفتقو على بدني .. عملت روج في فمي و ماكياج نوار حليت شعري طويل .. طلعت محلاني .. اول مرة نشوف روحي هكا .. شديت تاكسي و مشيت ..
( حتى حد ماهو يحكي )
وصلت بية للصالة ... دخلت تتبسم و تمشي وصلت لشطر الصالة .. هزت راسها بش تشوفو هو و مرتو .. تصدمت .. قعدت واقفة تغزرلو و مصدومة ... محمد مي شافها حس غصة في قلبو حس دموعو عدها هبطت .. كان عطى ربي راو شاددلها يديها هي تو .. اول مرة يشوفها مزيانة اكاكا .. اول مرة يشوفها لابسة كيما اكاكا .. بية تمشي و خطواتها ثقيلة طلعتلو للمنصة و وقفت قدامهم الزوز ..
- الانسان اللي نعشقو و صاحبتي اللي نحبها .. ههههههه
دخلت في هستيريا متاع ضحك .. هزت يدها و عزقت لاية كف الناس الكل سكتت حتى مل الفرقة قصو لغنا .. محمد يغزرلها و مقهور .. ناقم على روحو كيفاش ضلمها .. يحب يعنقها و يفهمها اما مش منجم .. يكمل الليلة هلذي و يدو ميحطهاش على اية شهر يطلقها و يعرس بحب حياتو .. هبطت بية مالمنصة و خرجت تجري .. تجري في جري ماسط .. خرجت مالصالة و خلات محمد واقف مقهور و معندو ما يعمل و اية طايحة في القاع تبكي .. و الناس الكل تغزر ماهم فاهمين شي .. هوما اكاكا و سمعو صوت كرهبة و صياح .. محمد حس اللي فما حاجة .. خرج يجري و الناس الكل وراه .. يلقى بية مطيشة في القاع غارقة في دمها و الناس تعيط و تطلب في الاسعاف هو دموعو هابطة.. عيط على طول صوتو و مشالها يجري بدا يعنق فيها و غرق في الدم معاها و يبكي .. " يا بية سامحني .. و الله نحبك .. نعشقك .. متخلينيش .. كان تحب توا نطلق و ناخذ روحي حبي .. نحبك يا بية و الله نحبك امااان ارجعلي متخلينيش .. " العباد الكل واقفة تغزر و اللي يبكي يبكي و اللي ساكت ساكت ...
تعداو عامين .. محمد قعد شهرين بعد موت بية ساكن في الجبانة يبات على قبرها و يبكي .. هبل و مرض .. دخل لمصحة نفسية تعالج و خرج .. توا عامين تعظاو محمد قاعد يلعب هو و طفلة صغيرة " بية " هي بنت بية اللي كانت حبلى بيها اسعفو البنية من كرشها و بالسيف انقذوها و اكيد محمد و نرجس تكفلو بيها و سماووها " بية " .. محمد حلف انو يغزر لانسانة اخرى غير حب حياتو اللي مشى عليه بش يربي بية الصغرونة رغملي مش بنتو اما هاكي من ريحة بية .. باللي بش يحاول ينسى اما جرح بية مزال في قلبو .. جرح مش ساهل يبرى ..
العبرة من الحكاية انو اذا وصلت حبيت انسان و باللي غلط معاك مدام تحبو و يحبك اعطيه الفرصة يحكي و افهمو و القالو الاعذار بش تخليه في قلبك مش كل يوم تلقى الحب و مش بالساهل تنساه خاطر بالحق تقعد وجيعة في القلب صحيح الوقت يداوي اما تتوجع كي تتفكر .. :')
شارك الموضوع
