أوهام الحب

الحلقة الأولى
كان مركز على الأوراق اللي قدامو في البيرو وقتلي نوقز تليفونو .. مانتبهلوش وقعد يكتب ، قص شوية ورجع ينوقز .. هزو وغزر للنومرو ، نحى مراياتو حطها فوق الطاولة وتبسم
- اهلا ياتحفونة تي وينك والله توحشتك ؟؟
- انت اللي وينك كيف مانكلمكش انا ما تكلمنيش وليدي
- ههه خدمة خدمة .. والله يا ناجية الغالية مبلع للفم هالليامات
- ربي يعينك وليدي اش حوالك ؟ اش حوال يوسف ؟ لاباس عليكم
- حمدالله والله حمدالله هالساعة وانتم اش عاملين ؟
- انا بيدي لاباس نسهلو كان عليك انت .. والله قلبي مهموم كان عليك ياوليدي .. توحشتكم وتوحشت طلتك عليا .. راهي بالدنيا يا عيوني..
- علاش يامي مهمومة راني لاباس حمدالله ( وتنهد ) هاني قريب نجي بحذاك تو تشبع بيا وبيوسف .. تو نهزك ونفرهدك ونشيخك يانجوتة .. ههه
- وشخص وليدي ... ( سكتت شويا ..) حبيت نقولك على حاجة ..
- انشالله خير ؟ ....هاناجية شبيكي ؟ ...
- لقيتي راجل عوض بابا ؟ هههه
- ديما ببلادتك انت .. مالا هاني لقيتلك مرا ليك انت ..
- يامي مأيستيش ؟ مازلتي تلوجي لتو ؟ ماني قتلك ها الموضوع انسيه ؟ وبدا يغزر من الشباك فادد
- لا مشني مأيسة .. ياوليدي راني مرضت على خاترك وعلى خاتر هاك الطفل (وبدات تبكي كيما كل مرّة ) .. نحب نتهنى عليك قبل منام عيني .. نحب هاك الوليد يتربى بين ام وبو .. ام تحن عليه موش كل مرة وهو يقلب في الوجوه .. كل مرة وانت جايبلو وحدة تتلها بيه ولا وحدة عمرت معاه ... علاه هكا علاه ؟ تحب تقتلني بغصتي ؟
نفخ بقوة وعدا صوابعو على شعرو كيما كل مرة يتوتر فيها .. ماهيش باش تسيبو .. كل ما تكلمو تجبدلو عالعرس .. ولا هارب من تليفوناتها .. ماعادش يحب يكلمها بالرغم اللي روحو وعقلو في أمو .
- ومنين تعرفيها هالمرا اللي جبتيها المرة هاذي ؟
- في الحمام ... ريتها في الحمام ..
- في الحمام ؟ ( وقام يضحك ) ها ناجية طتلعشي الحارزة ههه هذاك اللي ما زال تو ؟
- يا شومي ..؟ انا باش ناخذ الولدي المزيان المثقف حارزة لاه ؟ .. والله يا وليدي طفلة تعشّق أصل .. بدن وطول وزين .. وعقولية ..الله احد عليها وهاك التربيةاللي فيها ... وين نمشي للحمام ماتخلي ماتعمل معايا وتبدا تعاون فيا وتحكلي .. والله ماشتهيتها كان تكون ليك انت وليدي ..ياول... قص عليها
- ماعنتها نمشي ناخذ مرا خاتر تعاون فيك في الحمام ؟ ههههه هذيكا لازم سمعتشي عندك وليد يخدم في الخارج بدات تقففلك فماش ما تاخوهولها ؟
- لا لا مافيبالهاش ولا حكينا فيه الموضوع جملة .. والله ماتعرفك ولا سمعت عليك جملة ...
- باهي شتحبي انت تو من الاخر ؟
- يا وليدي يرضي عليك والديك.. يرضي عليك والديك رتحني .. ياوليدي نحبك تعرس ونتهنى عليك .. على خاتري ..على خاتر مميمتك .. هنيني عيش وليدي
- باهي ..باهي .. ياناجية باهي .. هاني قريب نهبط لتونس وتو نحكيو فيه الموضوع
وعلّق تليفون .. قعد على بيروه ويدور فيه ويخمم .. ثلاثة سنين ونص تو ملي ماتت كريستين .. حب حياتو .. ماتت وهي تولد في يوسف .. جو .. من وقتها نسا حاجة اسمها عرس ... قعد بعدها عام وهو ميت موش حي .. .. يحب ينسى وما نجمش ينسى .. كريستين كانت الحب الكبير .. كانت العشرة الطويلة .. يعرفها من وقتاللي جاء لفرنسا يكمل في قرايتو .. وقفت معاه وساندتو ووفرتلو كل شي ..كان حبهم قوي برشة .. هو طفل من قرية صغيرة في تونس .. ناجح في قرايتو وهذاك اللي خلاه يكملها في فرنسا .. وتوا ولا رئيس مدير عام متاع شركة كبيرة اختصاص هندسة عندها برشة فروع .. في اليابان وألمانيا وجنوب افريقيا .. ومازالت تزيد تكبر ... ولدو دجو تو عمرو ثلاثة سنين ونص .. لا فهم كيفاش يربيه ولا اش يعملو ؟ .. يهزو ساعات لدار مماتو الفرنسوية .. ام كريستين اما حتى هوما يسكنو بعيد موش في باريس .. مانجمش يخليه بعيد عليه .. هذاك اللي بقالو بعد كريستين .. ولدهم .. اللي كانت طايرة بالفرحة وهي حبلة بيه .. هو يحبو برشة ..اما ما عندوش الوقت باش يقعد معاه ويتلها بيه ... يجيبلوكل مرة مربية تطلع موش في المستوى .. فد وروحو طلعت .. لا ينجم يبعدو عليه .. ولا ينجم يتلهى بيه .. حل الكام .. وقعد يغزر .. من كثر ما ليعوه المربيات .. وقتلي كان يوسف صغير ما ينطقش .. كا ن يروح ساعات يلقى خدو احمر ولا شفتو مفلوقة .. كل مرة بيه حاجة .. من وقتها قرر باش يحط كاميرا في الدار مربوطة بالمكتب متاعو وبالتليفون زادة .. وولا يعس عليه ... شاف ولدو يبكي وقاعد في القاعة .. اففففف .. هز الفيستا متاعو وخرج مروح لدارو .. هاي مربية أخرى تو باش يطردها..

....................
الحلقة الثانية
تعدات جمعة عالحكاية مع أمو .. في الليل كا ن ساهر هو وولدو في الدار ... كان يوسف جايو النوم وهو يرقد فيه .. نوقز تليفونو .. يلقاه من دارهم .هز
الووو؟ ناجية ؟ -
- لا سناء اختك اش حوالك ؟
- حمدالله وانتوم




الحلقة الأولى
كان مركز على الأوراق اللي قدامو في البيرو وقتلي نوقز تليفونو .. مانتبهلوش وقعد يكتب ، قص شوية ورجع ينوقز .. هزو وغزر للنومرو ، نحى مراياتو حطها فوق الطاولة وتبسم
- اهلا ياتحفونة تي وينك والله توحشتك ؟؟
- انت اللي وينك كيف مانكلمكش انا ما تكلمنيش وليدي
- ههه خدمة خدمة .. والله يا ناجية الغالية مبلع للفم هالليامات
- ربي يعينك وليدي اش حوالك ؟ اش حوال يوسف ؟ لاباس عليكم
- حمدالله والله حمدالله هالساعة وانتم اش عاملين ؟
- انا بيدي لاباس نسهلو كان عليك انت .. والله قلبي مهموم كان عليك ياوليدي .. توحشتكم وتوحشت طلتك عليا .. راهي بالدنيا يا عيوني..
- علاش يامي مهمومة راني لاباس حمدالله ( وتنهد ) هاني قريب نجي بحذاك تو تشبع بيا وبيوسف .. تو نهزك ونفرهدك ونشيخك يانجوتة .. ههه
- وشخص وليدي ... ( سكتت شويا ..) حبيت نقولك على حاجة ..
- انشالله خير ؟ ....هاناجية شبيكي ؟ ...
- لقيتي راجل عوض بابا ؟ هههه
- ديما ببلادتك انت .. مالا هاني لقيتلك مرا ليك انت ..
- يامي مأيستيش ؟ مازلتي تلوجي لتو ؟ ماني قتلك ها الموضوع انسيه ؟ وبدا يغزر من الشباك فادد
- لا مشني مأيسة .. ياوليدي راني مرضت على خاترك وعلى خاتر هاك الطفل (وبدات تبكي كيما كل مرّة ) .. نحب نتهنى عليك قبل منام عيني .. نحب هاك الوليد يتربى بين ام وبو .. ام تحن عليه موش كل مرة وهو يقلب في الوجوه .. كل مرة وانت جايبلو وحدة تتلها بيه ولا وحدة عمرت معاه ... علاه هكا علاه ؟ تحب تقتلني بغصتي ؟
نفخ بقوة وعدا صوابعو على شعرو كيما كل مرة يتوتر فيها .. ماهيش باش تسيبو .. كل ما تكلمو تجبدلو عالعرس .. ولا هارب من تليفوناتها .. ماعادش يحب يكلمها بالرغم اللي روحو وعقلو في أمو .
- ومنين تعرفيها هالمرا اللي جبتيها المرة هاذي ؟
- في الحمام ... ريتها في الحمام ..
- في الحمام ؟ ( وقام يضحك ) ها ناجية طتلعشي الحارزة ههه هذاك اللي ما زال تو ؟
- يا شومي ..؟ انا باش ناخذ الولدي المزيان المثقف حارزة لاه ؟ .. والله يا وليدي طفلة تعشّق أصل .. بدن وطول وزين .. وعقولية ..الله احد عليها وهاك التربيةاللي فيها ... وين نمشي للحمام ماتخلي ماتعمل معايا وتبدا تعاون فيا وتحكلي .. والله ماشتهيتها كان تكون ليك انت وليدي ..ياول... قص عليها
- ماعنتها نمشي ناخذ مرا خاتر تعاون فيك في الحمام ؟ ههههه هذيكا لازم سمعتشي عندك وليد يخدم في الخارج بدات تقففلك فماش ما تاخوهولها ؟
- لا لا مافيبالهاش ولا حكينا فيه الموضوع جملة .. والله ماتعرفك ولا سمعت عليك جملة ...
- باهي شتحبي انت تو من الاخر ؟
- يا وليدي يرضي عليك والديك.. يرضي عليك والديك رتحني .. ياوليدي نحبك تعرس ونتهنى عليك .. على خاتري ..على خاتر مميمتك .. هنيني عيش وليدي
- باهي ..باهي .. ياناجية باهي .. هاني قريب نهبط لتونس وتو نحكيو فيه الموضوع
وعلّق تليفون .. قعد على بيروه ويدور فيه ويخمم .. ثلاثة سنين ونص تو ملي ماتت كريستين .. حب حياتو .. ماتت وهي تولد في يوسف .. جو .. من وقتها نسا حاجة اسمها عرس ... قعد بعدها عام وهو ميت موش حي .. .. يحب ينسى وما نجمش ينسى .. كريستين كانت الحب الكبير .. كانت العشرة الطويلة .. يعرفها من وقتاللي جاء لفرنسا يكمل في قرايتو .. وقفت معاه وساندتو ووفرتلو كل شي ..كان حبهم قوي برشة .. هو طفل من قرية صغيرة في تونس .. ناجح في قرايتو وهذاك اللي خلاه يكملها في فرنسا .. وتوا ولا رئيس مدير عام متاع شركة كبيرة اختصاص هندسة عندها برشة فروع .. في اليابان وألمانيا وجنوب افريقيا .. ومازالت تزيد تكبر ... ولدو دجو تو عمرو ثلاثة سنين ونص .. لا فهم كيفاش يربيه ولا اش يعملو ؟ .. يهزو ساعات لدار مماتو الفرنسوية .. ام كريستين اما حتى هوما يسكنو بعيد موش في باريس .. مانجمش يخليه بعيد عليه .. هذاك اللي بقالو بعد كريستين .. ولدهم .. اللي كانت طايرة بالفرحة وهي حبلة بيه .. هو يحبو برشة ..اما ما عندوش الوقت باش يقعد معاه ويتلها بيه ... يجيبلوكل مرة مربية تطلع موش في المستوى .. فد وروحو طلعت .. لا ينجم يبعدو عليه .. ولا ينجم يتلهى بيه .. حل الكام .. وقعد يغزر .. من كثر ما ليعوه المربيات .. وقتلي كان يوسف صغير ما ينطقش .. كا ن يروح ساعات يلقى خدو احمر ولا شفتو مفلوقة .. كل مرة بيه حاجة .. من وقتها قرر باش يحط كاميرا في الدار مربوطة بالمكتب متاعو وبالتليفون زادة .. وولا يعس عليه ... شاف ولدو يبكي وقاعد في القاعة .. اففففف .. هز الفيستا متاعو وخرج مروح لدارو .. هاي مربية أخرى تو باش يطردها..
....................
الحلقة الثانية
تعدات جمعة عالحكاية مع أمو .. في الليل كا ن ساهر هو وولدو في الدار ... كان يوسف جايو النوم وهو يرقد فيه .. نوقز تليفونو .. يلقاه من دارهم .هز
الووو؟ ناجية ؟ -
- لا سناء اختك اش حوالك ؟
- حمدالله وانتوما
- اسمع برك .. راهي أمك متوحشاتك ياسر وقاتلك ايجا طل عليا ..
- هي ويني هي هات نكلمها ؟
- راهي مريضة ما تقدرش ..
- مريضة ؟ (تفجع ) وشبيها ؟
- والله السكر والدم فرعسولها بدنها
- سناء بربي لاباس ماهو ؟
- والله لاباس ماتتفجعش .. غير مستاحشاتك انت ويوسف ..
- باهي باهي .. غدوة نقص ونجي انشالله
- عيش خويا ربي معاك
بعد نهارين كان قدام دارهم ... يوسف كان متقلق وتاعب وهو شادو من يدو واليد لخرى الفليجة متاعهم .. حلت سناء اختو الباب وبدات تبوس فيه وتعنق
- خويا محمود؟ مرحبا بيك مرحبا .. امي زغرطي زغرطي هاو لعريس جاء ..
- يابنتي يزي بلا فضايح ؟ اش فما ؟
وخرجت امو من الدار تبوس وتوشحل .. قعدت معنقتو وتبكي ..
ياوليدي توحشتك .. توحشتك
-تي هاكي لاباس ؟ علاش فجعتني عليك ؟
- والله كنت مريضة ( وشدت يوسف تبوس فيه وحضنتو بالقوي) تو وين تذهنت شوي .. كيف سمعت بيك جاي
ودخلو للدار فرحانين بيه وامو مرّة تبوسو ومرة تبوس ولدو ..كانت أمو وأختو سناء عايشين وحدهم بعد مامات بوه .. سناء مخطوبة وعرسها في الصيف .. هو ولدها البكري .. عمرو 37 سنا هو واختو بيناتهم 11 سنا امو جابتها بعد ما كبر هو .. هاكا علاش يحس روحو مسؤول عليها ..
عشية كاملة وهوما هر هر .. وهو يدكك علىى امو وعامل عليها جو .. سناء هزت يوسف فطرتو ورقدتو .. يوسف كان طفل عاقل ما يتكلمش برشا .. مزيان .. شعرو اصفر لامو وعينيه شهل وكبار لبوه وقشرتو قمحية زادة لبوه .. الحاسل طفل يتاكل ماكلة .. اما ديما منطوي على نفسو ...حتى في الحضانة ماعندوش اختلاط بالصغار .. يمكن بحكم انو متربي وحدو .. وحتى المربيات اللي يجيبهوملو مايحكيوش معاه .. كان بالنسبة ليهم خدمة .. يدخلو بالوقت ويروحو بالوقت . ما فماش مشاعر ناحية هاك الطفل الصغير وليتيم ..
سألتو ناجية امو:
-اش عملت في هاك الموضوع الليحكينا فيه ؟
ا-انا موضوع ؟
-هاوليدي بلاهي لا تهبلني ؟ مانا حكينا فيه ؟ ياخي ليمتا تقعد هكا بال مرا ؟ راك كبرت ..
ضحك وغزرلها .( هو بلا مرا ما يقعدش .. يعني عندو علاقات .. برشة علاقات عملهم مع النساء ... اما حتى وحدة لا ملاتلو الفراغ متاع مرتو .. كانت علاقاتو سطحية .. أساسها رغبة واحتياج برك .. )
- ربي يهديك ها ناجية جايبتني من غادي لهنا .. فجعتيني عليك باش مبعد نعرف اللي هي خطة منك باش تعرسيلي .. وزيد بنتك مستقبلتني من الباب هاو لعريس هاو لعريس جاء ... والله صحة عليكم .. زلبحتوني الزوز وخليتوني نسيب خدمتي واموري ونجي.. اشكوني ها المرا اللي تحكي عليها بربي؟
- ياعنبو زين ولدي (وضحكت وباستو ) بنية عاقلة بنت عمك صالح اللي كان يخدم في البوستة .. طفلة يتيمة .. عايشة مع مرت بوها موريتها شر الشعف .
- ناجية .. (قص عليها ) ياخي انا حالل ملجأ للايتام .. اش يهمني فيها انا ؟ ياخي عرس هذا راهو موش لعبة
- لا لا وليدي نعرف .. اما هي ذاقت اليتم وما يحس باليتيم كا ن اللي ذاق حتى هو هاكي علاش شتهيتهالك وليدي .. هذيك هي اللي باش تربيلك ولدك وتتلها بيه ..
- ياخي هكة هي الماخذة ؟ يابنتى راني نحكم في شركات .. ماتعرفيش قيمة ولدك ولا شنوة ؟ باش ناخذ مرا اللى تجي هكاكة ؟
- هاك خذيت وحدك المرة الأولى .. وحدة قاورية لا طقناها ولا طاقتنا .. كنت حتى كيف تجي قبل ماتجيش معاك .. وما تحبش اصل تشوفنا .. ماك جربت .. وخذيت اللي بالك فيها .. تو اسمع كلامي عيش ولدي .. راني امك وما نغرش بيك ... ماخيرش من عربية تصونك وتصونلك عرضك وتحافظ عليك وعلى ولدك .. اخي انت باش تعملها بورتوكلي في يدك ؟ هاويني تقعد في دارها مع ولدك وانت برة اعمل اللي تحب .. ما شادك حد..
وقعدت عشية كاملة وهي تقنع فيه .. في هاني باش نموت .. في نحب نتهنى عليك .. لين كسرتلو راسو ووافق....

الحلقة الثالثة
قعدت خديجة تبكي في بيتها وغامة على راسها ... غايذتها روحها ..يحبو يعرسولها لواحد مرتو ميتة وعندو صغير .. مرت بوها الكلبة ماصدقت لربي تحب ترتاح منها .. لا شاوروها لا سالوها .. حيوان هي عايشة في ها الدار.. جاء بوها البارح في الليل قالها فما شكون يحب عليك وباش يجي غدوة يخطب .. هكاكة لا تعرفو .لا شافتو . لا حكات معاه . وزيد يقلها ارمل وعندو ولد .. علاه؟ يحب يدفنها بالحياة .. يدفنلها شبابها مع واحد كبير .. اش عملت؟ ااااااااااااااه يامي وينك ؟... كان جيت حية ما يصيرش فيا هذا الكل لا يزي اللي عاناتو من صغرتها وزيد باش تزيد تعاني ...
دخلت عليها مرت بوها تصيح وتعيط
لتو مازلتي باركة ؟ قومي الناس عدها جاية ؟ قومي وانت تنوحي يراه على راسك انشالله .. ميبان فيك شي خرشية ... احمدي ربي اللي فما شكون جاء خطبك وحدة كيفك ..الفقر والفرعنة .. حتى كي مشيتي تقري عملتينا الفضح ... بره يكب سعدك انشالله اكثر ماهو مكبوب .. وزادت قربتلها شدتها من شعرها وهي تصيح وتبكي
-قومى البسي ماكانش والله لاما نمررلك عيشتك اكثر ماهي مرة .
وخرجت وخلاتها تغفص في دموعها .. هزت روحها بالسيف ولبست القفطان اللي رماتهولها في الفرش .. قفطان خايب قديم متاع وحدة أكبر من عمرها .. عمرها 25 سنة ما شافت فيهم حتى نهار حلو .. كان العشرة سنين لولانين وقتلي أمها حية ... بعد ولات تذوق كان في المرار .. سب وضرب وشتيمة لين بدنها حلّف واستانس .. كاينهم يعاقبو فيها على جيانها للدنيا .
مسحت دموعها ومشطت شعرها الطويل لاكحل ولمتو كعكة .. غزرت لعينيها في المراية لقاتهم ذابلين وحمر . ما عندهاش ماكياج باش تنحي التحويق اللي في عينيها .. وجهها تاعب من قلة النوم وبدنها مدقدق من الضرب .. حتى راسها ما قصرش بالوجيعة .. تي خير خلي كي يشوفها الشايب اللي جايها يهرب .. خلي تجي منو خير ..
غزر محمود لحيط الدار .. كانت خايخة وقديمة بعد غزر لامو كاينويلوم فيها ..
-ربي يهديك يامي .. تو انا باش الناسب ناس كيفما هاذم ؟
تبسمتلو امو وهي شادة يوسف بين يديها .. ما زالو كيف هبطو من الكرهبة 4×4 متاعو .. كان مخليها في دارهم . باش كيف يروح لتونس يلقا باش يدور ..
- وليدي احنا اش يهمنا فيهم .. ما ك باش تهز مريتك وتمشي ياخي باش تسكن معاهم انت؟
- تي انا مريتي يا ؟ انا مريتي ؟ والله ربي يهديك .. اففف
دقوا الباب خرجتلهم وحدة ظاهرة من وجهها شمطة .. قعت باهتة فيه تغزرلو . وتغزر لولد و.. مشوار وهي تثبت لين نطق
- يا مدام ننجمو ندخلوا عيشك ؟
- اااه .. أي بالطبيعة سامحوني ووه الحشمة
دخلو يلقاو زوز رجال قاعدين معاهم مرا كبيرة أخرى الحاسل ماكانش مركز مع حد .. بدا يفد وقعدت امو هي اللي تحكي وهو شادد يوسف بين ساقيه ويقلب في الدار ..ملا حالة .. وملا هم ؟ وين حطيتني يامي ربي يهديك ..
هكاكا وتجي الشختورة .. خرجت درا منين.. كانت لابسة حاجة لا علاقة وراسها مطبس وعاملة شاربة فوق راسها ... موش مدينة اما راميتو رميان فوق شعرها ماشافش وجهها وما حبش يشوفو DEJA اللي شافو يكفيه .. كيف رات امو مشات تعنق فيها وتبوس
-امي ناجية عسلامة ؟ اش تعمل هوني ( كانت باهتة )
-باستها امو وعنقتها
هاني جيت نخطب فيك لولدى محمود مانيش باش نلقا ماخير منك ..
(-شكوني اللي ماتلقاش خير منها تي وجهها كيف اللوحة هاوينو .. وينو الزين والعين والبدن اللي تحكي عليهم امو ؟ يامي راك باش تورطني راهو .. )
تلفتت بالشوية لقاها تغزر ليوسف .. وكان هو يغزرلها .. تبسمت .. تبسملها ... اما كيف تبسمت شاف حاجة في وجهها ..كانت عندها غمازات في خدودها ...ضحكتها حلوة برشة .. عينيها مطبسة تغزر لولدو ما شافهاش .. مدت يديها ليوسف ياخي قدملها .. ومشى لحضنها .. كاينو فما مغناطيس يجبد فيه ليها .. قعدت معنقتو وتحكي معاه .. سهرية كاملة وهو فوق حجرها ويضحك معاها .. عمرو ما شاف ولدو يتصرف مع وحدة بالتلقائية هذي .. وتذكر كلام امو كيف قالت ليتيم ما يفهو كان ليتيم اللي كيفو ... وهذاك اللي خلاه يأخذ قرارو .. كانت مصلحة ولدو هي اللي تعنيه .. حتى على حسابو هو .


الحلقة الرابعة

قعدت تغزرلو وهو في الكرهبة .. مرة يكونكتي بالتليفون ومرة يتلفت لولدو راكب من تالي ... يضحك هو وياه .. محلاه ومحلا ضحكتو ... كان شعرو فاتح شوية وعينيه شهل كبار .. قشرتو قمحية ... طويل .. خشمو مشنقل لفوق.. صغير .. .. خلاتو يظهر متكبر .. وهو بلحق متكبر .. تحسو يغزر للعباد من فوق .. وما عاجبو شي ... الوحيدين اللي يتصرف معاهم بطبيعتو هوما عايلتو .. بالطبيعة موش هي .. ههه هي ماحكا ش معاها جملة يمكن كلمة ..كلمتين ..موش متذكرة ... ااااااه .. كيفاش باش تعيش معاه هذا .حاسة روحها مفروضة عليه فرضان .. امي ناجية لصقتها بالكول ههه.. اما ولدو محلاه ومبنو بتاكل ماكلة .. تحسو منطوي على نفسو برشة .. ما يحكيش ما يعبرش عاللي في قلبو .. ذكرها بروحها .. وبحياتها اللي عداتها مرار .. وهذاكة اللي خلاها تتعلق بيه .. وتحبو . وهو زادة حبها وتعلق بيها عكس بوه ..
-اش رايك في هذي تقتل ؟؟ تلفتت لسناء وهوما في بوتيك يشريو في الجهاز ..
-وه ؟ عريانة ياسر .. والله تحشم ...
- أي هذاكة المطلوب (وضحكت ) هبليه ...هبليه .. ههه .. مالا عروسة اش تحبها تلبس ؟
وحططت nuisette على جنب وبدات تختار في اخرين وخديجة وجهها احمار وهي تتخيل في روحها لابستهم قدامو وزادت خزرتلو ..وهو قاعد يستنى فيهم في الكرهبة مع جو .. زعمة كيفاش باش تكون علاقتو بيها ؟ زعمة حنين ؟ حست بكرشها تدغدغ فيها وهي تتخيل .. ياميمتي ..عمرها ماكانت تتخيل في حياتها باش تأخذ واحد كيفو .. ملي راتو طاحت على راسها .. كانت تسخايلو راجل كبير ... ومعديتها ليلة كاملة وهي تنوح.. وتتخيل فيه ياخي طلع شباب يهبل .. وهاك الشمطة مرت بوها باش تموت من القهرة كيف راتو ..حستها هبلت وموش مصدقة .. ولات تعامل فيها بالباهي هالليامات ..وعينيها مليانة بالحسد والبغض .. الله يرحم والديك يامي ناجية ..
كملو شراو هي وسناء ..سناء عملت على كيفها وشراتلها المهدع الكل ... ماخلاتها تشري 2بيجاما كان بالسيف .
اش تعمل بيهم ؟
- وه؟ ياخي باش نقعد عريانة نهار كامل ؟ ههه وكيف هو يمشي للخدمة اش نعمل ؟
- باهي باهي تو نزيدو نشريو des survetements للدار صحيح عندك الحق .. ههه فاتتني هاذي
ركبو في الكرهبة ..سناء ركبت من قدام . وهي ركبت من تالي بحذا يوسف وقعدت تبوس فيه وتضحك ..
-شريتو كل شي ولا مازال ناقصة حاجات ؟ يسال في اختو ماغزرلهاش جملة
-لا مازالت شوية حاجات برك
اففف انت كان نسيبك على كيفك ضاهرلي ماكش باش تكمل ؟ لواه هذا الكل ؟ ياخي باش توفا الحوايج ؟ تو كيف تمشي غادي تشري اللي تحب !!!
يحكي عليها كايني موش موجودة اصل !!! وقعدو ثنية كاملة وهوما يتناقشو وسناء تقنع فيه وهي شادة يوسف حاطتو قدامها وتحكي معاه وتغزرلمحمود بالسرقة .. وهو متوتر وفادد كاينو الموضوع هذا ما يعنيهش جملة .. كاينو ماهوش عرسو ..
تعداو الايامات فيسع .. ومحمود كان مزروب يحب يرجع لفرنسا .. وجاء نهار الصداق .. بوها دهن الدار واستدعى العايلة الكل .. وهي مشات للحجامة ومعاها سناء ... الحجامة بعيدة شوية اما معروفة وسناء وصاتها باش ما تصبغش شعرها خاتر خوها ما يحبش الصبايغ
- هههه كلي هو شافني ولا مركز معايا .. تي حتى لون شعري مايعرفوش اصل خوك .. والله ماني عارفة علاش جاء خطبني ؟
امي ناجية هي اللي تحب تاخذني موش هو ..
-اش عندك فيه ؟ هو راهو هكاكا ..تحسو ما يركزش اما هو مركز على كل شي ... وموش انت لولا ولا لاخرى اللي تأخذ ماخذة تقليدية .. تو بعد تستانسو ببعضكم .. موش باش يلقى خير منك راهو .. محسوب هاك القورّة اللي يخالط فيهم يبردو على القلب هوما؟ .. هههه يابنتي العربي وحدو هههه ؟
حشمت وضحكت
يعطك دا يا سناء ديما ببلادتك ؟ -
كاشخة فيها ..
- يعطيك دودة محلاك طلعت .. هاكي باش تهبليه بلحق اليوم ههههه
- قعدت الحجامة تضحك وهي بدنها فور من الحشمة ماعادش فيها ...تسمع في التزمير البرة . وهي وين تلقاها .. قلبها ولا يدق .. يدق .. ويدييها ترعش ... لبها العرق...شدتها سناء من يدها وخرجو .. وهي تحرك في ساقيها بالسيف ..
كا ن واقف بحذا الكرهبة ... كان متلفت يحكي مع امو وتحسو متيقر .. غزرتلها امو وبدات تزغرط .. تلفت معاها ...حست عينيه وساعت وهو يغزرلها ... السخطة محلاه وما شبو .. لابس كوستيم في النوار وكرافات papillon طويل وكتافو عراض ... عسل عسل عسل .. يتاكل الحاصل ... غزرلها لعينيها .. وهي غزرتلو .. قعدو واقفين مقابلين بعضهم ... ماعادش تسمع في حتى حس وهو يغزرلها .. اول مرة تغزرلو لعينيه وهو اول مرة يثبت فيها ... قاعد باهت .. باهت في عينيها ... كحل في لون الليل وكبار .. فمها .. مدور وصغير .. خشمها .. دقنونتها ... الغمزات اللي في خدودها .. وين كان مخبي هالزين هذا الكل؟ ولا زعمة الحجامة قلبتها ...؟؟ اشبيه مانتبهش قبل ؟ بدات امو تجبد فيه من يدو وتضحك
- هاوليدي ؟ باش تقعد واقف برشة .. هاي عاد هز عروستك
تلفت لامو ورجع غزرلها .. كان وجهها ابيض برشة احمار انتبه اللي هو باهت فيها وشلق على روحو .. امو وسناء شادين الضحكة بالسيف .. بعد من الباب وحلهولها قالها
-تفضل ..
ركبت وركايبها ترعش .. وجهها مطمطم .. وقلبها تحسو باش ياقف من الحشمة .. وهو ركب بحذاها . ريحة البارفان متاعو دوختها ... مبنها ومحلاها ريحتو .. ركبت امو من قدام .. ويوسف في حجرها .. هزت راسها وضحكتلو
-tu es belle قالها بالشوية وهو يغزرلها وبعد غزر لبوه ومدلو يدو حب يجيه ..
هزو بوه من عند مماتو وحطو بيناتهم ... جات يدها في ايدو وهوما يلعبو معاه الزوز .. حست بالكرون ضربها بعدت يدها فيسع .. وهو قعد يغزرلها .. متفاجئ... كاينو حس بحاجة هو زادة الوقت هذاكة ...

الحلقة الخامسة
مشاو للبلدية والكراهب في جرة بعضهم حاسة روحها في حلمة .. كل شي تعدى فيسع .. ايدها ترعش وهي تصحح على صداقها .. حاجة ماتتوصفش انك تولي مرت راجل .. راجل ما تعرفوش .. ما تعرفش طبيعتو .. ماتعرفش حتى خدمتو شنية .. حست بالندم .. بالخوف .. بالرعب .. وهو يصحح غزرلها .. موش عارف اش عمل .. شكوني هاذي اللي ولات مرتو ؟ وحدة ختارتهالو امو... شافتها في الحمام .. هو اللي عاش معضم حياتو في بلاد أوروبية ..هو اللي شرب منهم وخذا منهم والطبع على طبعهم .. في اللخر يرضخ لامو .. وياخذ وحدة ماعندو بيها حتى علاقة ... وحدة ريفية جاهلة .. ماهيش من مستواه لا الاجتماعي ولا الثقافي .. اما ولدو حبها وهي حبتو ... زعمة هو خير مصلحة ولدو على حساب حياتو ..؟ واللي حسو قبيلة وقتلي شافها خارجة من الحجامة ؟ وقتلي جات يدو في يدها وهوما يلعبو مع يوسف؟ .. هي مزيانة هذا ماينكروش .. بون موش مزيانة برشة .. عادية .. وزادتها الحجامة شوية زين ... اما هو ماتسهويش النساء اللي من نوعيتها .. هو يحب المراء اللي عندها شخصية .. المرا اللي تبني روحها وتكافح .. المرا اللي تكون ند ليه .. مرا زادة تكون شقراء وعينيها ملونة .. كيما كريستين .. اااه كريستين .. قداش توحشتك .. حتى مرا ما تنجم تأخذ بقعتك يا عزيزتي ...
بعد البلدية روحو للدار وكملو العشوية غادي ... تعدات عشوية حلوة .. شطيح ورديح وجو .. سناء بدعت هي وخطيبها .. وامها ترس فيها ... سناء بنية تحفونة .. محامية تخدم وخطيبها زادة طارق كيفها .. طفل تحفون .. عاقل ومن عايلة ميسورة كيفهم ... قرواو مع بعضهم وحبو بعضهم .. عرسهم في الصيف انشالله ... مرت بوها باش تموت من القهرة وهي ترا في دار حماتها والهيلمان والناس الاكابر.. عيشتها في الغم والهم من صغرتها .. تحرش عليها بوها اللي شخصيتو ضعيفة قدامها .. يشدها حية يسيبها ميتة .. انشالله ربي ياخذلها حقها منهم .. تعبوها وحطموها ..ماخلاوهاش حتى تكمل قرايتها اللي تحبها برشة ..
طبست عليها سناء وهي قاعدة على الكرسي
هيا عروسة .. وقيت تبدل حوايجك وتمشي انت وراجلك .. (وضحكت ) صحة عليك .. وقتاش انا وطارق يسهل علينا ربي ههه ؟
حشمت وهي تغزرلو .. تلقاه واقف مع طارق .. ماعلى بالو بشي ... حاط يدو في مكتوبو ويشرب في كاس .. الله اعلم اشفيه هاك الكاس؟ هه مانظنش كان الروزاطة متاعنا .. طلعت لبيت نومها هي وسناء .. ساقيها ترعش .. حاسة روحها رزينة بالروبة .. خلطت عليها امو ومرت بوها يزغرطو ... وحدة فرحانة ووحدة بالغزول .. باستها امو من جبينها وقعدت بحذاها
-انت من ليوم بنتي موش كنتي .. والله الحمدالله اللي تمنيتو لقيتو .. ملي ريتك وانا نقول مصابها لولدي مصابها لوليدى . الحمدالله ياربي .. انشالله ربي يهنيك معاه .. ولدي راهو باهي برشة وحنين برشة .. اعرفي انت برك كيفاش تتعاملي معاه .. تكسبيه .. وتحطيه في مكتوبك .. الرجال راهم كيف لولاد الصغار ... يحبو كلمتهم هي اللي تمشي .. يحبو لمرا تدللهم وتجري في حضوضهم ... اعملي اللي يقلك عليه يحطك في عينيه واكثر ...
- عيشك امي ناجية ( طبست راسها حاشمة ) انشالله ربي يقدرنا الزوز.. انشالله ما ترا مني كان الخير
ضحت مرت بوها ضحكة صفراوية
- تهني الا ناجية بنتي متربية وعاقلة . هامالا واشي انا راني اللي مربيتها .. انشالله ماتهنيك كان هي على ولدك وولده زادة
غزلت وهي تسمع فيها . تلفتت وباست خد حماتها وعنقتها .. قداش حضنها حنين .. ومحلاها .. تفكرت حضن أمها وبدات تبكي ... شدتها حماتها وسناء وعنقوها الزوز
يزي من البكاء عيش بنتي موش باهي .. ربي يهنيك ويفرحك .. وغزرت لمرت بوها غزرة متاع وحدة في بالها بكل شي
هيا نخرجو احنا الا فاطمة خلي تبدل حوايجها لعروسة
خرجو لكل وقعدت وحدها ..شافت روحها في المراية .. تلقى الاكحل لكل هبط على عينيها .. ههه ولات عبيثة .. قعدت قدام المراية وبدات تمسح في المكياج ..
لقات حوايجها محطوطين في الفليجة خملتهملها سناء .. وحطتلها فوق الفرش سروال اكحل وسورية bleu تهبل .. نحات روبتها وبدات تلبس في حوايجها .. تسمع في حس قدام اللبيت مشات تجري سكرت الباب بالمفتاح لا يدخل عليها وهي عريانة .. تسمع فيه يحكي بالتليفون en français يمكن مع جماعة خدمتو .. وبعد تسمع فيه يضحك ويحكي مع واحد بالعربي
- ههه ياولدي وحلة كلبة وحلتها .. هاكا ناجية مالقات ماتعمل ... (بعد سكت شوية يسمع ) اش يهمني فيها ياخي هي كانت تحلم أصلا بواحد كيفي .. وحدة جاهلة .. نهايتها واصلة للثالثة ثانوي كان موش اقل ... تي ماهو جو حبها .. مانعرفش علاش ههه درا شنوة اللي را فيها ... (سكت يسمع ) وي وي هايكة تتلهى بيه عبارة جبت مربية لجو .. هههه اما تكلفتلي صداق .... وبعد بعد شوية وكمل يحكي ... وهي فشلت ... قعدت فوق الفرش وشدتها غصة البكاء ... اما مابكاتش .. يزيها من الدموع .. يزيها من الوجيعة .. هو حب مربية ليوسف ؟ عندو الحق .. هي جاهلة ؟ الغلطة منو هو اللي ماحاولش يعرفها .. اما باش يتمنيك عليها ويضحك عليها مع صحابو؟ ... هذا اللي وجعها .. وبعمرها ماهي باش تسامحو عليها ...وتو يشوف التقوعير والجهل على قاعدة ..

الحلقة السادسة
غزرت لروحها في المراية .. كانت لابسة السروال النوار والسورية .. نحاتهم وحلت الفليجة .. قعدت تقلب فيها حتى لين لقات مريول وjupe موش متناسقين مع بعضهم حتى طرف .. لبستهم ومشات جبدت بيجاما وحطتها في الفليجة وسكرتها ... دق الباب وهو يكلم فيها
- هيا مازلت مدام ؟ ماعادش بكري راهو ( يكلم فيها وفادد ) هاي باش توريه الفدة على أصولها ؟ لمت شعرها الطويل كعكة من غير ترتيب وتنفست بقوة .. وحلت الباب ... تبسمت بتبهليل ... الصدمة اللي في وجهو وهويغزر لحوايجها ماتتوصفش .. كان لابس سروال دجين ومريول لاصق في بدنو .. مرايات النظر نحاها وعينيه وساعت .. شدتها الضحكة وهي تغزرلو .. كانت لابسة jupeللركبة ومريول طويل يوصل لشطر jupe وصباط طالون لا علاقة بالحوايج .. هههه حاسيلو قمة في التقوعير ...
- هـ ...هكة خارجة؟ (هز حواجبو ويهز فيها ويحط باشمئزاز ) قالب شواربو وفادد عاللخر
- امممم.. شبيني ماعجبتكش ؟ ( شادة الضحكة وهي تتكلم )
- ماعندي مانقول الحاصل (ولفت وجهو يغزر اللوطة ) ربي يهديك يامي وكهو .. كان يقول فيها بالشوية اماهي سمعتو .. و مازال ياسي المغرور ؟ ماعندك ماشفت .. .
هزت الفليجة وهبطت من الدروج .. لقات امو واختو قاعدين في الصالة .. هو سبق وقعد بحذاهم وجهو مقلوب .. سناء حلت فمها وهي تغزرلها .. مشاتلها تجري شدتها من ايدها
- وه ؟ شنية هذا اللي لابستو ياشومي ؟ ياخي موش قتلي خرجلي السروال والسورية الزرقاء ؟ اشبيك هكة ؟
تبسمت وجبدتها بالشوية ليها قالتلها –خوك منفوخ برشة يلزمو شوية فشان .. تو نحكيلك مبعد
غزرت سناء لخوها تلقاه مطبس راسو يلعب مع ولدو ووجهو باش يترشق بالغش .وعاودت غزرتلها باهتة
-احكيلي شفما ؟ فاتتني حاجة ؟ ..
- ماني قتلك تو نحكيلك ؟
تلفتت امو قالتلهم
اش توتوتو غادي ؟ سناء سيبي العروسة ماعادش بكري عليهم ؟
قعدت تمشي بالشوية وين وصلت بحذاه طبست ليوسف قعدت تبوس فيه وهويغزرلها بغزول ... عنقها يوسف وشدها من رقبتها ... تلفتت لسناء وسالتها ببراءة
ياخي فاليجة يوسف حاضرة ؟
حست سناء باش تدوخ ... وامو قالتلها
علاش ؟ ياخي باش يمشي معاكم ؟
أي بالطبيعة ؟ وانا ننجم نبعد على حبيبي ؟ SI NON مانمشيش
- والله احسن كلمة قلتها تو ( قام وحستو يتهز ويتحط بالغش ) موش لازم منها ها المشية كان علي انا ماعينيش فيها
- ياخي كان هزينا يوسف شنوة المشكل ؟.. ماهوش باش يقلقنا هو جملة ؟ ويزيد يوسعنا بالنا ويحس روحو مع عايلتو .. خليه يستانس بينا مع بعضنا ؟
- مع بعضنا أي؟ ( كان يتكلم بالشوية معنتها تو تعيا وانت تقبض وملفت وجهو عليها حاطط يديه في مكتوبو وتلفت لسناء) برا برا حضرلو دبشو خلي نمشيو في هالليلة الكلبة ..
سناء مبهمة ما فاهمة شي شدتها من يدها وجبدتها وهي شادة يوسف
-ايجا معايا نلمولو دبشو ..
مشاو للبيت سكرتها وتلفتت لخديجة وهي تحط في يوسف اللوطة يلعب
- تو تحكيلي اش صار ؟
- تنهدت وقعدت فوق الفرش وبدات تحكيلها اللي صار الكل .. بعد ماكملت سناء الطرشقت بالضحك
- هههه نتصوروا كيف راك وانت هكة اشصار فيه مسكين ههههه ؟ اههه ياميمتي اش باش تعملو ا توة ؟
- والله مانعرف ؟ كلامو عليا غزلني وقلبلي البرنامج الكل .. خوك يسخايلني جاهلة وقعرة ... ازح قداش مضروب في روحو ... رضيت بالمكتوب وقلت موش انا لولة ولا لخرة ناخذ ماخذة تقليدية .. وزيد كيف ريت يوسف فرحت خاتر حبيتو برشة .. محلاه ومعقلو ..قلت عادي تو بالعشرة نستانسو ببعضنا ... تو نفهمو بعضنا .. نلقاه جملة موش قابل أصلا الوضع .. وزيد يغزرلي من الفوق كايني حشرة .. والله حقرت روحي والله
- اللطف عليك وه ؟ خويا راهو مستانس من اللي هو صغير يقرا هوني والبنات تجري في حضوضو ... يابنتي هابطين عليه وهو على شكون يرضى .. استانس هكاكة .. عمرو ماجرا في جرة وحدة .. ولا تعب باش يوصللها .. ههههه اما تعرف عجبتني فكرتك .. ههه خلي نبدلو الروتين شوية .. وجهو تالمون مقلوب قبيلة باش يطرشق نحسو ... ماللي ريتك حاستك باش تبدل فيه حاجة خويا ..
- نبدل ؟ ههه تفدلك انت ؟ ياذنوبي كان باش نحركلو شعرة ؟ يابنتي ماهوش حاسبني اصل ؟
- لا ريت غزرتو ليك قبيلة وانت خارجة من الحجامة .. خويا ونعرفو .. عينيه لمعت .. عجبتو .. اما هو متكبر وما يعرفش يعبر .. بهيم .. ( سكرت الفليجة بعد ماحطت حوايج يوسف وضحكت ) اما رانا نساء وما يقدنا حد ... ربي ربي عزيزتي ويجعلكشي .. ربيه هو وولدو ...

الحلقة السابعة
وصلو للوتيل في سوسة مع العشرة متاع الليل .. كانت قاعدة من تالي هي ويوسف في حجرها .. رقد مسكين في حضنها وهي تعنق فيه ... ثنية كاملة وهوما ساكتين .. كلمة ما قالهاش .. وهي قعدت تلعب مع يوسف مرة يحسبو مرة يغنيو ساعة ساعة تهز راسها تلقاه يغزرلها من روتروفيزور ..... كيف رقد الصغرون بات الحس وكملو الثنية ساكتين .. كان صوت شارل ازنفور في CD في الكرهبة يغني .. هدالها عصابها وخرجها من LMODE اللي هي فيه ..
كيف دخلو للوتيل خذا يوسف من حضنها قربلها لين النفس متاعو جاء في وجهها ... هز ولدو ويديه مست فخذها وهو يهز فيه ... حست برعشة والدغديغ في بدنها الكل وخرت شوية .. وجات عينيها في عينيه شعرو هابط شوية على جبينو تمنات وقتها تعدي صوابعها عليه وتحطلو راسو في حضنها وتعنقو .. هذا راجلها ..حلالها ... متاعها هي .. علاش حاستو بعيد ؟ علاش خايفة منو؟ علاش مش حاسة روحها عروسة كيما العرايس الكل؟ راجلها يبدا فرحان بيها وباش يطير بيها طيران .. ويستنى وقتاش يدخل بيها للبيت ويبداو وحدهم .. طول عمرها وهيا تأخذ في حاجاتها من الدنيا بالسيف ... ديما وهي تحارب وتجاهد.. ما شافتش نهار باهي .. تلطش فيها الدنيا على الايمين وعلى اليسار .. ورغم هذاكة كانت تحلم كيف البنات الكل بنهار عرسها وبالروبة البيضة وبالراجل اللي جاي عالحصان الأبيض .. راجل يحس بيها ..يحبها ..يخبيها في حضنو ويسكر عليها .. وينسيها في اللي شافتو الكل ... راجل حنين ..حضنو دافي .. موش راجل باردة مشاعرو كيف اللي قدامها ... كان هاز ولدو وسابقها .. وهي تمشي وراه ..كان يمشي كاينو هارب .. حاستو مستعار بيها .. وعندو الحق .. الناس الكل اللي قاعدين كانو يغزرولها ويغزرولو .. ههه بحوايجها هاذي مستحيل كان يفكرو اللي هذيكة تكون مرت هذاكة .. حشمت وعملت روحها مولا الدار موش هوني وطلعت معاه في الاسونسور .. وجهو كيف العادة مقلوب وما غزرلهاش
- مازال ..مازال راقد يوسف ؟
- اممممممممممم .. يجاوب فيها بالسيف
- مسكين تعب حتى هو اليوم
- امممممممممممممم
سكتت .. حاستو مايحبش يحكي .. وصلو لبيتهم .. كانت كبيرة ومزيانة برشة .. حط يوسف بالشوية فوق الفرش وكسل يديه وهي قعدت واقفة في الوسط .. موش عارفة اش باش تعمل .. خلط عليهم الراجل جابلهم فاليجاتهم .. حل محمود وحدة منهم .. جبد منها حوايج وقالها
-هاني داخل ندوش .. وانت اش باش تعمل ؟
طبست راسها .. حست بفوارة طلعت لراسها والدم الكل خرج من وجهها وولا احمر كيف الطمطومة .. انقذوني .. ههه مازالت موش مستوعبة لتو اللي هي معرسة وباش ترقد اليوم وبحذاها راجل .. وموش أي راجل .. يا ميمتي .. راجل يدوخ .. ههه راجلها ... قعدت تعاود فيها في مخها الكلمة لعلى تستوعبها ..
- ب..اش .. باش نبدل ليوسف حوايجو .. ب..بعد ندخل ندوش بعدك ..
- اوك
ودخل وهي قلبها بالدقداقة .. بدنها لكل سخن .. اللي تعرفو ومتاكدة منو انو ماش باش يصير شي بيناتهم اليوم .. لا يزي يوسف معاهم .. لا يزي حاستو هو بارد جملة من ناحيتها .. لا يزي هي حاشمة وموش عارفة اش تعمل ..؟ لكن هذا مامنعهاش من التخيل .. هههه .. حلو برشة التخيل .. موش كل يوم تبدى قاعدة مع واحد مغري ... ومغري باتم معنى الكلمة كيف راجلهاet surtout كيف خرج من بيت البانو .... اممممممممممم ياميمتى .. ريحتو تفحفح .. شعرو مبلول ولابس شورت وخلعة .. قداش شاهية تنقز عليه وتلعب بهاك الصدر المعبي بالشعر .. اووف .. افكارها ياسر منحرفة ولات .. هههه. ياربي كيفاش باش تكملها هالليلة الكلبة .. هو ماعلى بالو بشي .. يتصرف عادي .. بالطبيعة هو مستانس ما يقلقوش باش يخرج حتى عريان قدامها ... كملت بدلت اليوسف وهو راقد ... باستو ورجعتو في الفرش .. دخلت لبيت البانو وخرجت لابسة بيجاما مصور علاها هالو كيتي .. سروال وسورية طوال .. مايبينو شي .. تي هي هكة وحاشمة ... حلت شعرها الاكحل .. كان طويل .. يوصل لتحت ضهرها .. ملى بدات تقرا في الليسي ما قصتوش .. طويل وغزيروارتب من عند ربي ... حمدالله ما تعبهاش لا جبدان لا تكسير راس ..قعدت تمشط فيه بالشوية قدام لمراية .. وتشوف في روحها ... عينيها كبار كحل .. حواجبها خشان .. بيضة برشة .. وفمها صغير .. كيما يقولو فيها غنجة .. زين عربي باتم معنى الكلمة .. اما هي موش حاسة بيه الزين متاعها .... كان تشوف في روحها عادية واقل من عادية .. ماتملالوش عينو

..
كيف خرجت هي من بيت البانو ومشات بحذا المرايا ..كان هو متكي عالفرش يكونكتي بالتابلات متاعو .. ماغزرتلوش .. حسها مربوثة من مشيتها .. مطبسة راسها .. هههه لابسة هالو كيتي نهار عرسها ؟ .. حال روضة ضاهرلي .. يوسف من هنا وهي من غادي .. يلعن بو هالعرس المحنون هذا .. اما كي حلت شعرها .. حط التابلات وشرد فيها .... طووووويل واكحل كيف لون الليل ... محلاه .. يديها مزينيين بالحرقوس وهي تمشط فيه .. بيض كيف الشمعة وهاك الحرقوس زايد فيهم الشطر .. يغزرلها وباقي يقنع في روحو اللي هي موش من النوع اللي يجبدو .. هو يحب الشقراء .. الجريئة ... اللي ترمي روحها عليه وتشيخو .. موش الحشامة اللي تستنى حتى لين هو يبدى المبادرة .. يحب المرا اللي تثيرو وتحركلو غريزتو .. بانوثتها ودلالها ..موش اللكزة اللي قدامو ....مغطية روحها منراسها لساقيها .. محسوب هاك البدن الهايل اللي تغطي فيه ..؟؟ تو يدوخ هو كيف يراه .؟. تي ملا راحة بنقس .. محسوب ناقص نساء هو .. ؟؟ كيف يحب تويجيب احلى وحدة ... كان تقعد غادي دهرها ما يتلفتلهاش ...
- انت وين باش ترقد ؟ (سالها ويغزرلها بتمقصيص)
- ت..تو نرقد عال canappé هنا ( جاوبتو من غير ما تغزرلو )
- اوك على كيفك .. أيا بون نوي
حط التابلات على جنب الفرش ونحى lunette النظر من عينيه واتكى بحذا ولدو ورقد .. تلفتتلووالدم طلعلها لراسها بالغزول ... ماعبرهاش جملة... ههه يعني شنية متوقعة ؟ باش يجيها يجري ويقلها محلاك يامرتي ؟ ههه تحلم.. مشات اتكات .. لقاتها واسعة شوية .. يابسة .. قعدت تتقلب ليلة كاملة .. ماجاهاش النوم وهي تسمع في النفس متاعو .. ساعات يتحرك .. تهز راسها تلقاه يتقلب كل مرة على جنب .. صحة عليه شايخ في الفرش .. وهي ... هي قاعدة لهنا تبكي على سعدها المكبوب ..

الحلقة الثامنة
تحس في يد تمس فيها من خدها .. مانجمتش تحل عينيها ... زاد مسلها شعرها .. اممممممممممم . حلت بالشوية لقات يوسف واقف قدامها .. هه مبنو ومحلاه ... كان واقف قدامها .. والدنيا ضاوية .. متعرفش على روحها كيفاش رقدت البارح .... قعدت ساهرة ساهرة لين داخت بالنوم –بون ذور ( قالها يوسف وبالطبيعة يحكي بالفرنسية ) ذيعان ...
تبسمتلو وقامت هزتو في حضنها تبوس فيه
يعنبو زينو الذيعان ياربي
وتلفتت مالقاتش هاك اللي يتسمى راجلها في البيت .. بقعتو فارغة
-وينو papa؟
خرذ مالكيتوث
-باهي عزيزي نمشيو ننظفو حالتنا بعد نطلبو لفطور اوك ؟
- اوك طلبت لفطور في التليفون وبدلت ليوسف ولبست هي سروال دجين وبودي .. ضهرولها بدنها بالباهي .. المرا هاذي من غير تقوعير .. موش على خاترو ..اما باش لعباد ما يقعدوش يغزرولها غزرة دونية .. خاتر الوتيل مذخم تلقى فيه كا ن الكعبة واختها ..كان عليه هو يتفلق. بعد نصف ساعة كانت تلعب هي ويوسف في البالكون وسي الشباب دخل ... كان لابس شورت ومريول وسبادري .. ودبوزة ماء في يدو .. lunette شمس ترعب عليه .. نحاها وغزرلهم .. طبست راسها . ويوسف مشالو يجري يبوس فيه .. قام يضحك..
- قمت يا قطوس ؟ بو زينك وباسو من خدو وتلفتلها
فطرتو ؟
- وي يوسف جاع طلبت باش يجيبوه هوني
كانت واقفة شعرها محلول .. ونسمة خفيفة تلعبلها بيه . وجهها صافي كيف وجهbb لابسة دجين ومريول ظهرولها طولها ...قعد يهز فيها ويحط ... عراها من غير ما يعريها .. ياميمتي ملا غزرة عليه . وماصحها تذوب اصل ... وهو مافاق بروحو اللي هو شرد فيها الا ما شاف وجهها احمر وطبست راسها ....
- ب..باهي نمشي نعمل دوش بعد نخرجو

اول مرة يلقى روحو مربوث ومالقاش ما يحكي .. هاي طلعت مزيانة وبدنها حلو ؟ اما.. اما ماهيش ستيلو ... أي ما هيش ستيلو ... شنوة وين يتكلم كلمة وجهها يحمار؟ ياخي باش ترجعو لجو مراهقة ؟ ههه مالا كان يمسها اش باش تعمل ؟ وحس ببدنو سخن وهو يتخيل فيها بين يديه ..لا ما يعصرها عصران ... لا لا ما يقرمشها ... شنوة يامحمود الأفكار هذي ؟ ياخي موش قلت ماتعجبكش وقعرة ؟ أي اما هي مرتو تو .. كاتب عليها الصداق .. وهوراجل .. يعني يستحق مرا في حياتو .. حتى كيف ماتت كريستين .. ماقطعش علاقاتو مع النساء .. كان يخرج من علاقة يدخل في أخرى .. وتو اش باش يعمل .؟ باش يخونها ؟ وهي اش باش تعمل ؟ هي مازالت صغيرة يعني باش ترضى تعيش معاه من غير ما يصير شي بيناتهم ؟ اكيد راهي كيما أي مرا تحب تعمل علاقة ؟ هو مايعرفش عليها حتى شي .. مايعرفش عملت علاقات قبل العرس ولا لا ؟ هو أصلا ماعندوش فكرة عليها جملة ... شنية تحب شنية تكره ؟ تي حتى نومرو تليفونها ما يعرفوش ؟ يمكن جية يوسف معاهم جات بصلاح .. خليه يسترجع افكارو .. يفهم روحو ويحاول يفهمها .. هاذي عشرة عمر باش تكون بيناتهم موش نهار ولا اثنين .. وحتى كان امو دزتو دزان للماخذة .هو موش صغير ووافق عليها .... اكيد امو شافت فيها حاجات ماشافهومش هو .. هه هاكا ناجية راهي خبيثة وتعرفو ... اكيد مالكدتهالوش بلاش هكاكة هههه
خرج من الدوش يلقاها واقفة قدام المراية تلم في شعرها
- خليه محلول ( قالها من غير مايشعر )
غزرتلو مستغربة
- نعم ؟
- زاد قربلها حتى لين حست بالنفس متاعو تخلط بالنفس متاعها .. شعلت فيها النار ... وبدنها بدا يفور .. جاء هز يدو كاينو باش يمسو ... بعد عاود هبطها ...قعد يغزرلها .. غزرة ما فهمتهاش .... غزرة ذوبتها .. دوختها ... دخلتها في عالم فيه كان عينيه ... عينيه اللي تشوف فيهم في وجهها tellement صافيين ...سرحت معاهم ونسات كل شي .... زاد قربلها .. لصقها .. بدنها رعش بكلو غمضت عينيها وشفايفها رعشو .. حست روحها باش تترشق ... كان صدروعريان وواقف قدامها ... قداش تمنات في اللحظة هذيكة تحط راسها غادي .. قداش تمنات تغطس في وسطو وتخليه يلعبلها بشعرها ... من اول مرة شافتو فيها وهي تحلم تكون ليه .... حبتو .. حبتو حبتو ... تو تاكدت من مشاعرها .. حبتو .. ماهيش هاربة من مشاكلها وحياتها وقتلي وافقت عليه ... وافقت خاتر حبتو .. خاتر هو الراجل اللي تمناتو حياتها كاملة .. حتى وهو يغزرلها غزرة دونية .. حتى وهو حاقرها ... حتى وهو يستعار بيها ... تحبو ..حست بصوابع يديه فوق شعرها .. وذابت .. كاينك حطيت كورنو قلاس فوق النار ... ذابت وسخنت .. هزلها شعرها بين صوابعو وقربو لخشمو وقعد يشم فيه
- محلا ريحتو ومحلاه شعرك ..( كان يحكي بالشوية كاينو يوشوش )زاد قربلها كاينو باش يعنقها وهي تكبست وزادت غمضت عينيها .. ريحتو دخلت في خناخشها طول .كتافو كبار وواسعين . هزلها راسها بالشوية وهي ترعش كيف الفروج .... طبس راسو لين قربو شفايفو لشفايفها ...و..
- Papaماناش خارجين ؟

الحلقة التاسعة

غزرلها غزرة متاع لوم (كاينو يلوم فيها على جيبان يوسف معاهم) وبعد شوية خلاها النفس مقطوع عليها .. غمضت عينيها وحست بساقيها الكل ترعش .... وهوطبس على ولدو وباسو .. هاك البوسة كانت باش تاخذها هي وتحرمت منها ... ااااااااااه ياربي علاه ؟ هز راسو وعاود غزرلها وتبسم كاينو متشمت فيها ... ولا يجبد عليها بالمرتاح ههه ... حس اللي هي باش تموت حسها متشوقة لبوستو .. ولكل شي .. ههه يعرف روحو مايتقاومش ..( ياعيني عليك يا محمود كيف تبدا تعبر)
_ هانا خارجين صغروني نلبس ونخرجو ...
هز حوايجو ودخل لبيت البانو باش يلبس .. خلي يلبس لهنا خير ماتدوخلو ... تي هي هكاكة ووجها ولا كيف كعبة الطماطم .. خلي كان ينحي حوايجو قدامها ... هههه .. اما محلاه .... محلاه وجهها .. قداش توحشها ... الحشمة عند المرا قداش توحشها .. ليه برشة ... برشة ..تي سنين ماراهاش .. خلطتو بالنساء الاوروبيات نساوه فيها ... ضحك وهو يمشط في شعرو.. حك لحيتو واستواها ... حس روحو فرحان .. فرحان .. مايعرفش علاش ؟ ههه كان ماجاش يوسف معاهم راهي تو ولات مرتو .. موش عارف اللي حسو معاها .. وموش فاهمو .. ؟ رغبة ..رغبة قوية جاتو وهويغزرلها .. كيف راها واقفة في البالكون وشعرها يطاير وهي تضحك .. مانجمش ماياقفش ويغزرلها .. شاف وقتها اللي شافتو امو فيها .. شاف الحلاوة والزين والبدن اللي حكاتلو عليه ناجية ...شاف البراءة وشاف الحشمة .. شاف الانوثة اللي كانت مخبية في الحوايج الخايبة اللي تلبس فيهم ET SURTOUT حوايج البارح اعععععععععععع يرعبو ... خسارة ناقصة شوية اناقة .. وناقصة ثقافة ... هههه اما فما حاجات أخرى يعوضو .. كيما قال ناجية ماكش باش تحطها بورتوكلي وتدور بيها .. خلي يشوف اخرتها مع الحشامة هاذي ... وين باش توصل معاه ؟ الله اعلم اش مخبيتلو الايامات ؟
قعدو في قهوة في القنطاوي .. ويوسف بدا يجري ويلعب بين الطواول ..كانت لتو حاسة بقلبها يدق بالقوي ..كانت تلهي في روحها بيوسف باش ما تغزرلوش .. وهي حاستو يلعبلعها باعصابها ويضحك عليها وفاهمها ... حاستو فاهم اللي يدور في مخها الكل ... فهم اللي هي كانت متشوقة لبوسة منو .. عندها الحق سناء كيف قالت النساء تجري في جرتو والطايحة اكثر من الواقفة ؟ ياربي ... قد ماتحلفت البارح وقدما تغششت ... بصبعو بركة طيحني ؟ ياربي اش باش نعمل تو ؟ ياربي عينيه يهبلو .. ياربي نحبو ومانحبش نضعف قدامو ... ياربي قويني .. قويني .. مانحبش نكون حاجة ساهلة بالنسبة ليه ياخذني وقت ما يحب ؟ نحبو يتعب باش يوصللي .. نعرف اللي انا في اللخر باش نكون ليه .. اما نحبو يقدرني .. يحس بقيمتي ... مانحبش نكون مرا كيما أي مرا بالنسبة ليه .. نحب نكون مميزة .. نحب ليلتي الأولى معاه تكون مميزة .. نحبو ... نحبو يحبني .. ولونو صعيب انو يحبني ... لكن يحترمني عالاقل .. ااههه يا قلبي .. قداش باش تعاني ..
- اش تحب تشرب ؟ سالها وهويغزر لولدو .. لابس LUNETTEشمس .. تحسو موش يغزرلها .. اما هو مركز معاها ... ويتبع فيها
- اللي يجي ..
- اممم .. طلب SERVEUR جيبلنا JUS وقهوة وعيط ليوسف .. يا يوسف اش تشرب بابا ؟

- جاء يجري يتكعبر .. قعد بحذا خديجة . عنقتو وحطتو عالكرسي .. تلفتلو بوه يضحك
- شنوة احنا معادش نضحيو ؟ ههه عندك الحق .. حتى انت وليت تحب التعنيق كيف بوك ؟ ههه
ذابت وحشمت .. تلفتت تلقى زوز كوبلوات قاعدين بحذاهم ولاو يضحكو .. وهو تبسم .. هو يعمل بلعاني باش يشوف وجهها يحمار .. يشيخ كيف يشوفو هكاكة ...
ذيبلي ذي –
- باهي بابا .. نجيبلك مالا لا
قعدو يلعبو مع يوسف ويضحكو معاه وعداوها قريب نصف نهار وهوما يلعبو فيه في الماناج .. تفرهدو وشاخو وضحكو .. أي واحد يراهم يحسهم عايلة فرحانة .. اما الدخلاني يعلم بيه كان ربي
- ياخي ناجية منين تعرفك ؟ سالها وقتلي هوما يتمشاو بحذا البحر ويوسف يمشي قدامهم ( يعرف اما يتبهنس يحب يسمعها هي اش باش تقول)
- في ... فال.. (تربثت ) فيالحومة .. كنت ديما نراها في الحومة وفي ..
- امممم فهمتك .. اما هي تحبك برشة .. نهار الكل وهي تشكرلي فيك وتمجد لين فلقتلي راسي ...
- هه امي ناجية الناس لكل تحبها لسانها حلو وطبيعتها محلاها .. ربي يخليهالك انشالله ( وتنهدت) طبست راسها وهو غزرلها والسيقارو في يدو
- قداش عمرك وقتلي ماتت امك ؟
- 11 سنة .. كان عندها .. عندها المرض الخايب .. خطفها خطفان .. الله يرحمها
- الله يرحمها ..حتى انا باب مات بيه .. هذيكة الدنيا .. اما .. اما نحس مرت بوك صعيبة معاك ؟
- هه هي صعيبة برك .. تي حياتي ردتهالي جحيم .. تي .. (وسكتت)
- أمم نسمع فيك اش كنت باش تقول ؟ وقفت وغزرتلو .. كان لابس مراياتو ماشفتش عينيه اما حستو يغزرلها
- مانحبش نكسرلك راسك بحكايتي .. احنا جينا باش نتفرهدو .. مانحبش نتفكرها ولا نحكي عليها
حط السيقارو في فمو وعاود جبدو .. كان مركز مع وجهها .. شعرها عاملتو ظفرة على جنب .. زاد حلاها .. ردها كيف الطفلة الصغيرة ..جاتو برشة احاسيس وهو يغزرلها .. حب يبوسها من عينيها ..هههه ..عينيها يجبدو محلاهم .. رموشهم طوال .. قد ما قعد يقنع في روحو اللي هو يميل للشقراء لقا روحو مايللها من غير ما يشعر .. موش باش يقول حب خاتر مازال ماوصلش لدرجة الحب .. اما ..اما إحساس رقيق ناحيتها ... يمكن خاتر هي مختلفة عاللي شافهم .. مختلفة على كريستين .. تي هي النقيض متاعها موش مختلفة برك .. حاجة جديدة مازال ماعرفهاش ..نكهة جديدة يحب يذوقها ... فاكية حلوة يحب يحس بطعمها في فمو ... ههه وزيد على هذا الكل هي مرتو ..مرتو . .. مرتو اللي باش تربيلو ولدو وتعيش معاه ... ماقص على افكارو كان صوت التليفون .. موش تليفونو ..تليفون مرتو .. هزت التليفون وهو مركز معاها ويغزرلها ..
- اشكون ؟
- س..سناء
مايعرفش علاش حس بنخزة في قلبو كيف نوقز التليفون .. التليفون اللي هو ما يعرفش نومروه .. وقداش ارتاح كيف عرف اللي هي سناء اختو .. موش حد اخر...

الحلقة العاشرة
هزت التليفون و غزرتلو
-ننجم نكلمها؟
-بالطبيعة تو هذا سؤال؟
قعد واقف وهي بعدت شوية اتكات عالحيط متاع السور وقعدت تغزرلو يلعب مع ولدو ويجري وقلبها بالدقداقة
- الو سناء !!!
- الو ياسخطة !تي وينك نكلم فيك من قبيلة؟
- كنا نتمشاو عالبحر انا وخوك وجو
- اممم ماتقليش وليتو صحاب ؟
- يا سناء اش باش نحكيلك ؟
- احكي احكي ظاهر فيك طحت على راسك؟
دورت وجهها باش ماتقابلوش خاتر راتو مركز معاها
- ياسناء اش باش نعمل تو ؟
- فاش؟
- خوك حاستو ناوي على حاجة ...نعرفش اما ..اففف هبلني والله
- ههههه البارح تحلف وتتكتف ..زايد يابنتي ...خويا ما يقوى عليه كان ربي ..هههه
- سناء جيت نحكيلك وليت تتمقعر ...ماص..ار شي بيناتنا راهو ...اما ..اما جاء باش يبوسني اليوم ...كان موش يوسف راني مشيت فيها
- اي شنية المشكل ياخي راجلك هو باش تعملو شي في الحرام انتوما؟
- اففف يا سناء افهمني ؟ياخي نسيت لكلام اللي قالو البارح ؟
- هههه موش انا اللي نسيت ؟ انت ظاهر فيك نسيت وسلمت ( وقعدت تقلد في صوتها) هاو باش يبوسني ..هاو دوخني ..وانا نكلم فيك فيبالي بديت تخدم في خدمتك وتربي ههههه ياخي هاو طيحك وبالكاوو زادة هههه!!!!
- امان سناء تتمقصص؟ نعرف اللي هو خوك ...اما انا ماعندي حد كان انت امان ...ماعنديش لشكون نحكي ...انت اللي تعرف كل شي عليا ..امان عاوني ...( حست روحها باش تبكي) سناء مانحبش نضعف ...مانحبش نكون ساهلة بالنسبة ليه حتى ولوكان مرتو... عاوني .اش نعمل امان ؟
- ياخي شبيك مكبرتها الحكاية خدوج ؟ وه عادي راهو ...ياخي راجلك راهو ؟ باش تمنع روحك عليه ؟ تي ناجية مرجتني مالصباح وهي تطلب... اسالها اش عملت ؟ تهنات ولا لا ؟ ههه ماك تعرف عاد النساء القدم ..
تلفتت تلقاه واقف بحذاها
- لاباس سناء ماهو ؟
تربثت...موش عارفة من وقتاه واقف بحذاها.. اما حستو ما سمع شي
- لا..لاباس تحب تكلمها؟
- هات ..هز التليفون ..غزرلو ماهوش تليفون من النوع الغالي ...تي ارخص ماركة عندها ..الحاصل ما جاء شي ..اهلا نسنوس cv اشبيك شديت بالحديث اش فما ؟ امك لاباس ؟ اشبيها مالصباح مارجتني بالتليفونات ؟ اش تحب ؟ ...وقعد يسمع ....بعد شوية وقعد يحكي معاها ....مشوار ورجعلها مدلها التليفون
- شد سناء تحب تكلمك !وبعد شوية وقعد واقف
- ماتبطاش عاد باش نمشيو نفطرو ؟
-اسمع (قالتلها سناء) تحب تسمع كلامي ؟
-اي بالطبيعة ؟ كانت تتكلم بالشوية وتغزرلو وهو السخطة ما حبش يتحلحز
-باهي ....وقعدت تحكي معاها وتفسرلها اش باش تعمل وتوصي فيها باش ما تضعفش قدامو ...وهي تسمع وتستوعب ..وتدعي باش ربي يقويها ...

قعدو يفطرو وهو يغزر لعينيها اللي تهرب فيهم وماتحبش تغزر ناحيتو هو ...حسها مربوثة ...خايفة ...ملي مشات تحكي مع سناء تقلبت ....ههه ما يعرفش علاش قلبو ما قايلو خير ...قعدت تلهي في روحها وتوكل في يوسف وهو يلعب بالمغرفة ويفك يحب ياكل وحدو
-هههه تبدل الحلوف ولا يحب يعمل على روحو ( قالها وهو يجبد فيها بالحديث فماش ما يفهم حاجة )
-كبر خاترو المزيان وقعدت تبوس فيه وهو يضحك شايخ ...
-هههه صح عليه جو ..شبع بوس وتعنيق !!!!! ههه
يستفزفيها باش يشوف حمورية جهها ..حاستو عامل جو وماعلا بالو بشي...وهي تاكل في روحها ..
رجعو لبيت لوتيل .. قعدت حط يوسف اللي رقد من التعب فوق الفرش وتلفتلها وهي قاعدة فوق il canapé
اش نعملو تو ؟ ...وجاء قعد بحذاها ..قعد يغزرلها ويتبسم ...وهي ...هي وين تلقاها ...ياميمتي اجريلي اجريلي ..حط يدو وراء ضهرها واتكى بضهرو ..حل التلفزة وهز ساقيه حطهم فوق الطاولة ...كل حركة يعملها تشعل فيها النار ...وتضعفها ...كل تبسيمة منو ..تهزها بعييييييد ...وقتلي عرفت اللي هي تحبو ...حست بروحها ضعيييفة ...حساسة برشة .. كل شي في حركاتو ولا في تصرفاتو ياثر عليها ...يزيد ها محبة ليه وعشق ...بدنو ..عينيه .. رجوليتو الزايدة ...لحيتو اللي تتمنى تعدي صوابعها فوقها ...خشمو المشنقل الفوق وزادو زين على زين ...اما كلامو اللي سمعتو وقتلي يحكي عليها مع صاحبو وجعها ...وجعها برشة ...( هاني جبت مربية لولدي اما كلفتلي الصداق....وحدة قعرة وجاهلة ....) لتو مازال يرن في وذنيها ...لتو ...ودمعت عينيها ..تلفتلها محمود يغزرلها باهت
- لاباس خديجة ؟اشبيك؟ وقربلها باش يمسها ...بعدت شوية ...هز حواجبو مستغرب ..وهي قامت تجري لبيت البانو ...خلط عليها يدق في الباب
- خديجة اشبيك ؟ فهمني اشبيك ؟ من الصباح وانا نرا فيك موش قد بعضك !!!ياخي اش فما ؟
كان يدق في الباب وهي قاعدة تبكي بصوت ضعيف ..ما تحبش تسمعو ...تبكي موش فاهمة علاش تبكي ...من شيرة تحبو ومن شيرة تحبش يمسها ..من شيرة تحب تتمتع معاه وتعيش دور العروسة ! ومن شيرة كيف تتفكر نظرة الحقرة متاعو من اول ما راها ومعبرهاش حتى بشطر عين ...ماخذاش بخاطرها .ولا حاول يتقربلها ويفهمها ...وتو جاي يترهدن ويحب يبوس ويدحنس كاينو ما صار شي !!ههه تحلم يا سي محمود ...كان انت يزينك وبغرورك تسخايل روحك تنجم تملك كل شي ...انا ...انا خديجة ..البنية الضعيفة اللي لا حول ولا قوة ليها باش تاقفلك وباش تتصدالك ...وباش تقلك لا ...لا موش كل شي تحب عليه باش تلقاه يجيك بالساهل ...

الحلقة الحادية عشر
شعل سيقارو وبدا ينفخ ومخو سرح بعيد ..نسمة باردة قشعرتلو بدنو ..تلفت للبيت يلقاها راقدة في الفرش بحذا يوسف ..لابسة حوايج البارح ومتغطية بكلها ..وفي سابع نومة ...ههه صحة عليها ...هرب عليه النوم ...مانجمش يرقد ...كا ن ممني روحو بسهرية تعشق اليوم ...كان ناوي باش يطلب فرش اخر لولدو ولا حتى يبدل البيت ..ويرقد معاها فرد فرش ..ياخي قصتلو قصة عربي ....هو محمود بن رمضان ..اللي يشاور على اي مرا تجيه ..مرتو ...مرتو تقلو لا...تفكر كلامها قبيلة وقتلي خرجت من salle de bain...كان يغزرلها باهت وهي خارجة بنفس البيجاما متاع هالو كيتي ...ياخي ماش باش تنحي دينمها هذي .ًلصقت فيها ..ًكانت مربوثة وراسها مطبس وهو ساكت مكتف يديه واقف بكل ثقة في النفس ...شعرها مبلول ريحتو بنينة ...قعدت عاelcanape مشا قعد بحذاها ...عدا صوابعو على شعرها ...وباسها من جبينها ...هزلها راسها ...عينيها يسحرو ...نحى lunetteحطها فوق ااطاولة وطبس راسو..طبست هي راسها جات شفايفو فوق شعرها ..ههه ملا حشامة هذي ...زاد هزلها راسها
- ياخي شنوة تو ؟قداش باش تقعد حاشمة ؟
- اما..ن ..حسها تبلع في ريقها بالسيف وهي تكلم فيه ...حتى هو ريقو ناشف ...حس برغبة قوية ...حتى هو عندو برشة مادخلش في علاقة الوقت والخدمة ولهوتو بيوسف ماخلاولوش وقت باش يعرف مرا ...وهو من طبعو مايحبش اي مرا ...يحب يختار النساء اللي يعمل معاهم علاقة ...اول مرا هذي مايختارهاش هو ...اما ...اففففف... مش عارف ...مش عارف الي حاسو ناحيتها شنوة ؟..رغبة ...احتياج...امر واقع يلزم يتعايش معاه ..مرا موجودة ...تستنى فيه باش يثبتلها رجوليتو ...واكيد هو موش باش يخذلها ...اما اللي قالتو مبعد صدمو ...
- امان سي محمود ..ننجمو نحكيو شوية ؟
تبسم وغزرلها ...كان حاسها شادة روحها بالسيف اما ميسالش مازال الليل طووويل
- ههههه شنوة سي محمود هذي ؟
- اي ...اي سي محمود( وبعدت شوية ) اللي نعرفو عليك اللي انت سي محمود
- وراجلك ...قالهالها بالشوية ..هزت عينيها الحلوين وحس فيهم وجيعة
- اي صحيح .. اما ما نعرف عليك شي ...فيبالك ما نعرف عليك شي ...(ووقفت) شنوة تحب شنوة تكره ...شنوة خدمتك ..وين تسكن ؟ حتى شي حتى شي ...وانت زادة كيف كيف ...ماحاولتش تعرفني في الشهر اللي تعدى الكل ...لا حكيت معايا ...ولا...ولا..حاولت تفهمني ...ماكسرتش راسك معايا جملة ...حاستك تعمل في حاجة بالسيف عليك ...حاجة مفروضة عليك ..حاجة ...قص عليها
- والله مانيش نرضع في صبعي انا راهو ...واشبيك تو تحكي في هذا الكل ؟ وقام قربلها شدها من يديها باسهم بشفايفو ...حسها تفغم اما قاعدة تقاوم ...نحات يديها وزادت بعدت
- محمود ...مانحبش نعمل علاقة مع واحد مانعرفوش !!!
- نعم ؟ غزرلها باهت ...شنوة ماتعرفوش ؟ ( وحس كرامتو تهانت ...عمرها مرا حكات معاه هكا علا صوتو شوية ) مافهمتكش عيشك فهمني؟
- يعني ...وتنهدت وقربتلو ..يعني احنا الزوز مانعرفو على بعضنا حتى شي...خلينا....خلينا نتعرفو على بعضنا ...مازال الوقت قدامنا طويل ...انا ما نعرفش طبيعتك وانت زادة ...خلينا نفهمو بعضنا بالباهي ..ممكن ماتنجحش العلاقة بيناتنا ...ممكن ماتحبنيش مع الوقت ولا انا ما نحبكش ( كلمة ما نحبكش فورتلو دمو ) ...قص عليها
- معنتها انت تحبنا نتعرفو على بعضنا باش تكون علاقتنا كاملة؟ اوك ...ما فما حتى مشكل ....بالنسبة ليا انا ما يقلقنيش ( وهو باش يموت) عادي ..تحب نتعرفو نتعرفو ...وكيما قلت مازال الوقت طويل ماعنا علاش مزروبين ...وعطاها بضهرو .باش مايضهرلهاش اش يحس ...
- تنجم تمشي ترقد في الفرش بحذا يوسف ..تو نرقد انا هوني .
- محم...ود...حسها باش تقول حاجة بعد بطلت ...تصبح على خير ...
- اممم اوك

ومن وقتها وهو قاعد في البالكون يرحي في الدخان ويخمم .. احتياج بدنو لمرا ..خلاه يغزل من كلامها ..خاتر في الوقت هذاك كانت غريزتو مسيطرة عليه ...ولاقيها قدامو ..بدا السيناريو الصباح ...وحب يكملو في الليل ...مشاعرو مختلطة وموش فاهم روحو اش يحب ....يحب يرقد معاها خاتر عجبتو ولا على خاتر مستحق يفرهد بدنو .؟ ..يمكن كلامها صحيح ...حس روحو تسرع برشة معاها ...ماحاولش يعرفها في الشهر اللي هوما مخطوبين فيه ...ما حاولش يفهمها ...كانت مسيطرة عليه فكرة انها انسانة جاهلة وقعرة ووو .ً اما الفرق اللي شافو فيها بين البارح واليوم كبير ...البارح كان برا فيها نوع ...واليوم الصباح ..ًهههه .اليوم الصباح كيف راها ...كانت انسانة اخرى ...انسانة مختلفة عاللي حاططها في مخو من نهارت اللي مشاو لدارهم باش يخطبها ...انسانة عندها مشاعر حلوة .. في عينيها حاس وجيعة كبيرة ...في عينيها برشة براءة وبرشة طفولة ....في عينيها برشة كلام ...برشة كلام ماقالتوش بفمها ....في عينيها برشة حلاوة وبرشة عذوبة ...في عينيها ....وتبسم ...هز يدو عداها فوق شعرو ولحيتو ...وعاود تلفت ...كانت معنقة يوسف ...هز روحو ومشا اتكى فوق elcanape حط يديه ورا راسو وغمض عيينيه ......في عينيها برشة حاجات يحب يكتشفهم .....ميسالش ...يستحقو انو يصبر ...يصبر شنية المشكل؟ هو محمود بن رمضان ...اول مرة يترفض من عند مرا ....وشكوني المرا ...مرتو ....مرتواللي كا ن مستهين بيها ومقلل من شانها .. اما طلعت مش ساهلة . .هههه مش ساهلة حتى طرف...

الحلقة الثانية عشر
تعداو ثلاثة أيام كيف الحلمة بالنسبة ليها .. حوصو دارو تفرهدو ... شاخو شاخو ... والضغط النفسي اللي كان جاثم عليها اتنحى .. وقتلي حكات معاه ارتاحت ... بون مارتاحتش برشة ... وقتلي قاتلو نتعرفو على بعضنا قبل ما نعملو علاقة ...حستو تغشش اما ماضهرش.. فرحت ..موش على خاتر تغشش ..اما على خاتر حست في عينيه اللي هي تعجبو .. يعني ..يعني الراجل كيف يعمل علاقة مع مرا لازم تبدا عندو رغبة ناحيتها .. ههه تعرف اش تمنات وقتها .. تمنات يرفض ويقلها لا .. ويبوسها .. تمنات يعنقها ويقلها شنوة هالكلام التافه اللي تحكي فيه ويهز يرميها فوق الفرش .. هبلت ..اما هذاكة اللي تمناتو بلحق .. اما سناء قالتلها راهو كرامتو فوق كل شي .. كيف ترفضو مرا مايرميش روحو عليها .. بوزينو .. ياسر بخشمو السخطة ... اما حتى هي زادة بخشمها والكلام اللي قالو باش تندمو عليه .. ويجي نهار ويعرف كل شي .. كل شي عليها ..
امو كل يوم تكلم فيهم في التليفون ...تحسو يتلف فيها ... ههه اليوم باش يروحو .. ثنية كاملة وهوما يغنيو ويضحكو ... حستو تبدل معاها.. ماحكاوش مع بعضهم برشة .اما ..اما يوسف كسر جبل الثلج اللي بيناتهم ... وقت كامل وهوما يحكيو معاه وعليه ...وزادت تعلقت بيه الصغرون .. يدخل روحو ..هه وقاعد يتعلم في الكلام بالعربي ..يضحك ..
في دارهم امي ناجية حضرتلهم عشا قمقوم ... كسكسي عربي يعمل ستة وستين كيف .... حكاو وضحكو .. في الليل هزت يوسف باش ترقدو ..طلعت معاها سناء وهو قعد بحذا امو ...
-اه اش قولك يارجال ؟
- فاش ؟ ( وضحك .. حط راسو على ساقيها واتكى ..قداش يموت عليها الرقدة هذ ي وقداش يتوحشها )
ضربتو على راسو بالشوية وضحكت
-دا على لونك !!! في اللي خارتهالك امك ؟
- ااااه .. وقعد يتبهنس وبعد جاوبها والله مازلت ماذقتش السلعة ههههه؟
-وه ؟ (قعدت تغزرلو باهتة ) .. اشبيكم لاباس ؟
هز راسو وشدلها يدها لاباس اناجية لاباس .. ياخي تحبي شقو دقو .. الطفلة مازلت مش خارطة عليا وانا ندخل عليها طول ههه
-بلاهي يزيني بلا ترهدين ..مالا احنا كنا قبل نتعرفو على بعضنا؟ ملا حكاية جايبها
-ههه هاناجية ضاهر فيك خمجتيها مع بابا من الليلة لولة ههه
ضربتو على راسو وتضحك حاشمة
-يزي احشم والله لاك متربي.. احكيلي اشصار ؟
-ماو قلنا عاد تحب تتعرف هههه هاي طلعت حشامة .وعاللخر زادة ههه زادت هزت يوسف معانا اش تحبيني نعمل انا ؟ نشدها بالسيف ؟
-أي حشامة مالا تسخايلها كيف هاك الرقع اللي تعرفهم انت ؟ ولاه تشد فيها بالسيف الطفلة حسيتها فرحانة ؟..باش تموت بالفرحة ملي خطبتها
- ههه نعرف نعرف .. اما ماني قتلك حشامة وضاهر فيها ضلمة زادة ..هاني نسايس فيها ..موش مشكل ماعندي مازاربني ... اما ناجية .ملا سلعة بصراحة ههه ماصدقتكش من لول ..اما تو هاي بدات تبان ههه
-ماني قتلك ماتحشمش والله ..ههه هاي برك نحبك تتهنى وراس ولدي لاك باش تندمها جملة ..راني امك وقاريتك قراية .. ياخي مانعرفكش اش تحب انا ؟
- هه لا تعرفيني تعرفيني .. تعرفيني ريقتي سايلة ... نذوقو السلعة بعد تا نحكيو ....

في الليل مشا دوش ... ودخل يبدل حوايجو ..كان لابس منشفة في حزامو ... وصدرو عريان ... كانت شادة الفرش ... على حرف الفرش لابسة سروال قصير في الروز وبودي عليه تصويرة باربي ههه هاو بدا شويا تحسن ..ضهرو ساقيها شوية ههه .. حس وجهها طمطم وهي تغزرلو هكاكة ... طبست راسها مالحشمة وهوعمال يزيدها في الدوزة .. قربلها ... شعرها كان ملموم ببوند ... حط يدو بالشوية وجبدها ..هبط كيف الشلال على وجهها ..غمض عينيه .. حط خشمو على راسها وباسهولها وزاد قعد بحذاها ..قالها بالشوية
-موش قتلك ماعادش تشدو شعرك ؟ خليه ديما محلول نحبو محلول ..محلاه وهو محلول ..
قعدت مطبسة ..يحسها تبلع في ريقها بالسيف .. حاسس اللي يدور في مخها الكل ..خاتر نفس الإحساس عندو هو تو ... اما مستحيل يفرض روحو عليها .. يعرف اللي هو بصبعو تو ينجم يخليها تحتو وملكو .. اما هو يحترم قرارها .. يلزم يشد روحو .. يحب وقتلي تبدا معاه تكون زادة هي مستعدة للحظة هاذي ... بعد شوية وقام باش يجبد حوايجو من الخزانة .. حسها تتنفس بالشوية ..هزت ساقيها وعنقتهم بيديها وقعدت تغزرلو بالسرقة .. مشط شعرو وعمل شوية بارفان ومشى اتكى بحذاها .. حسها قاعدة لابدة في بقعتها ماتحركتش .. ضحك ..
- ياخي باش تقعد هكا برشة ؟
حسها مربوثة وخايفة .. مرعوبة اكثر تواتي
لا ..ها.هاني باش نرقد
اتكى على مرفقو وجبدلها يدها بالشوية .. غزرتلو باهتة ..عينيها وساعت يدها كانت باردة وترعش ... حط يدو عليها وجبدها ليه بالشوية وهو يتبسم ..
ماتخافش ..موش باش نعملك شي ايجا ارقد؟ بدات تتزرزح بالشوية بالشوية لين قربت بحذاه .. حسها صغرونة وخايفة ...ماحبش يزيد يخوفها اكثر .. حطلها راسها فو كتفو ورما الغطاء عليهم ..تنهد .. وقعد يلعبلها بشعرها وهي جامدة ماتحركتش .. لاعرفت تغمض عينيها ولا تحلهم ... حس بدنها الكل يرعش وبارد ... تلفت باسلها جبينها وزاد كبس عليها
-ماتخافش .. ماني قتلك مايصيرشي .. ارقد ارتاح .. ارقد على كتفي .. مانيش باش نعملك شي كيما وعدتك ... justeنحبك ترقد عندي ... موش تحب نستانسو ببعضنا ؟ عملتلو براسها أي وهي تغزرلو وهزت يدها بالشوية حطتها على صدرو .. هزتها كايني لسعتها حاجة وبعد عاودت رجعتها .. تبسم وغزرلها وشبك صوابعو في صوابعها
-ارقد عاد ..ههه ارقد خير مانبدل راي راهو ؟
تبسمتلو وغمضت عينيها .. وهو يعلم بيه ربي كيفاش شاد روحو عليها ... اما ميسالش .. الموقف هذا ماتعرضلوش في حياتو .. محلاه إحساس انك تحس روحك انت اللي مسيطر على العلاقة .. انت اللي تسير فيها .. انت اللي تحكم وانت الي تاثر..انت الراجل .. وهي الانثى ..

الحلقة الثالثة عشر

كيف حلت عينيها الصباح تسخايل روحها تحلم ....لقات وجهها غاطس في وسط صدرو .. وهو معنقها .. موش معنقها مكبش فيها .. تسمع في دقات قلبو في وذنيها ..هزت راسها شوية وقعدت تغزرلو ..كان يتنفس بالشوية .. وجهو مرتاح وهو راقد ..ريحتو بنينة .. عدات صوابعها على صدرو بالشوية .. هه موش مصدقة .. والله لاهي مصدقة ... بلحق كانت تسخايل روحها تحلم .. هي قالت للراجل هذا مانحبش نعمل علاقة معاك؟ هي حرمت روحها من الحنية متاع صدرو ؟ هي حرمت روحها من تعنيقتو .. من تبسيمتو .. من يديه اللي حضنوها ؟ هي حرمت روحها من بدنو الدافي ؟ من شفايفو الحلوين ؟ اهههههههههههه ياميمتي ؟ يا ميمتي قداش حنين ؟ قداش حنين ..قداش حنين !!! قداش هو رقيق .. بعمرها ما تصورت في حياتها انها باش تقابل واحد كيفو .. اول مرة ..اول مرة في حياتها تحط راسها وترقد وهي حاسة بالأمان .. اول مرة ماتباتش خايفة .. ماتباتش وهي دموعها على خدها ... محلا صدرو .. محلا يديه ..تبسمت وموش حاسة بصوابع يديها اللي قعدت تمشي وتجي فوق صدرو ...حست بيدو شدتلها يدها .. هزت راسها مفجوعة .. جات عينيها في عينيه ... هزلها صوابعها وباسهم
-صباح الخير ..رقدت مليح ؟
- اممممم .وطبست راسها حاشمة ...وفرحانة ..فرحانة...فرحانة ... عاودت حطت راسها فوق صدرو وتبسمت مع تنهيدة .. حست صدرو يتهز ويتحط ... كان يضحك ..
- باش تقعد لاسقتني كيف البقة ؟ ولا باش تقوم تحضرلي الفطور ..حاسس روحي جيعان ..
عاودت هزت راسها غزرتلو .. كان يضحك شايخ عليها .. وجهها احمار وهو غمزها وشدلها خدودها بين يديه بدا يغفص فيهم
- هههه في بالك البارح رقدت احلى نومة .. اما هاوك ملتزم باتفاقنا ؟ في بالك اللي انت حلوة برشة كيف تقوم الصباح؟ وقرب شفايفو .. وهي بدات ترعش وغمضت عينيها ..ساي ماعادش فيها .. اللي يصير خلي يصير .. حست بشفايفو فوق خشمها.. ههه باسها من خشمها .. وقام بالشوية بعد .. حست بالبرد بعد الدفاء متاع ليلة كاملة .. غمضت عينيها ورمات راسها عالمخدة .. ما تحبش تفيق ... ماتحبش تفيق من الحلمة ..ما تحبش تمسح الاحاسيس اللي في بدنها الكل .. هو يعرف كيفاش يتحكم في روحو .. يعرف يسيطر .. المشكلة فيها هي .. بدنها .. بدنها شعل ... هو محافظ على الاتفاق وهي ماعادش فيها ... قام من الفرش حستو ..ما شافتش عينيه اللي شاعلة رغبة .. كان شادد روحو بالسيف اول مرة يحس بالطريقة هذي .. اول مرة قلبة يدق بالقوي ... المشاعر هذي يسخايل روحو نساها وكبر عليها .. اما يلزمو يصبر...يصبر موش على خاطرها هي برك .. على خاطرو هو زادة .. يلزم يفهم مشاعرو ويستوعبها .. برشة حاجات حسها تصبت مع بعضها .. ما عادش فاهم روحو.. بلحق ماعادش فاهم روحو .... قداش رقيقة وحضنها حنين ودافي .. كان يلقى يقعد معنقها نهار كامل ...اما خايف .. خايف لاما يشدش روحو ويفسد كل شي ... هي تحب تكون ليلتهم مميزة .. تحب ليلتها لولة معاه تكون مميزة وهو باش يحققلها اللي تحبو ..تلفت يلقاها مازالت مغمضة عينيها ومغطسة راسها في المخدة .. تبسم .حاسس بيك والله حاسس بيك والفرصة اللي طلبتها مني انا مستحقها اكثر منك تو .. طبس عليها وشوشلها في وذنها
- هيا يا بخيلة قوم عاد .. نحب فطور الصباح من يديك انت !!!
حلت عينيها وقامت تجري .. حسها مربوثة وداخلة بعضها
-بالطبيعة نحضرلك احلى فطور .. نمشي نشوف يوسف .. ونحضرهولك .
كيف دخلت للكوجينة ..لقات سناء وحماتها قاعدين يفطرو في الفيراندا .. كانت الشمس شارقة ودافية .. زادت عطاتها شحنة إيجابية .. هي بطبيعتها حاسة بنشاط .. نشاط قوي .. كان تلقا حيط تكسرو .. كانت تتبسم .. تلفتتلها سناء لقات وجهها مورد عاطي عالغوز .. غمزتها بعينيها .. كايني فايقة باللي صار بيناتهم .. تلفتت حماتها ضحكتلها
- اهلا بالعروسة صباح الخير يا بنيتي .. هي ايجا افطري معانا هي ؟
مشاتلها باستها من جبينها وغزرت تلقى يوسف يلعب في الجنينة بايباتلو ..
-لا امي ناجية عيشك .. محمود ..محمود يحبني نحضرلو لفطور .
سناء الطرشقت بالضحك وامها قحرتلها
-أي بنتي حضري فطور راجلك مالا لا.. هاوك كل شي قدامك في الكوجينة .. الدار دارك ودار راجلك ..اعملي اللي تحبي
عاودت باستها
-عيشك امي ناجية ربي يخليك
ومشات بدات تحضر في الفطور .. جات بحذاها سناء تغسل في كاسها
- أيا عروسة احكيلي اش صار يا لفعة ؟
ضحكة بحشمة
-ما صار شي
-اممم ماصا رشي ؟ باهي موش وقتو تو ..عندي محكمة .. اما كيف نجي باش تحكيلي بالتفصيل مفهوم ؟
خرجت سناء وقعدت هي الطيب في القهوة .. يوسف جاء يلعب بحذاها حلت الراديو تلقى غناية فيروز " حبيتك بالصيف " قعدت تغني معاها .. ماحست كان بيدين جبدتها من حزامها من تالي
- شكون اللي حبيتو في الصيف وفي الشتاء ؟ وباسها من رقبتها ..ريحة الجال دوش مبنها وبدنو مدفاه
بدنها رعش ولخلخ
محمود محمود امك قاعدة امان ؟
بعد عليها وتلفت لامو يلقاها تضحك .. هز يوسف باسو ومشا
لامو باسها من جبينها
نجوتة الغالية نعنبو زينك ..والله وحدك في الوهرة ياتحفونة
-ههه هي هي زلبحني زلبحني ياطحان .. ( قالتهالو بالشوية ) الكلام الحلو ولا لمرتك
- هههه يا مغيارة .. مافما حتى وحدة تأخذ بقعتك .. انت الأصل والباقي تقليد ..ههه
جات بحذاهم خديجة حطت الفطور وهو يغزرلها ويضحك .. ما بن هاك الضحكة وما حنها ... قعدت توكل في يوسف .. وهو يشرب في القهوة
- اممم بنينة القهوة يعطيك الصحة
- لا عاد موش ابن من قهوة امي ناجية ؟
- اممم قهوة ناجية ماتجي كيفها حتى قهوة وغمز امو
- لا حتى مريتك مقدية وبنت دار على قاعدة .. ربي يهنيكم وليدي .. وربي يفرحكم
قعدو يحكيو ويضحكو بعد شعل سيقارو وبدا ينفخ
- خسارة والله باش نتوحشها هاللمة !!!
- لاه وليدي انشالله ديما ملمويين ؟
- انشالله انشالله ..اما كهو وقيت عاد .. يلزمني نرجع باش نقعد شاددلك ركايبك هنا ههه.. هملت خدمتي برشة والله
- اوووه يا وليدي راجع
وهي حست قلبها هبط وتفجعت .. نسات اللي هو يخدم البرا واللي حياتو الكل مربوطة غادي ..هز راسو غزرلها .. حس بالخوف في عينيها .. شدلها يدها حب يطمنها
- أي وقيت يامي .. يلزمني نرجع .. باش نهز مرتي وولدي ونمشي ..
وضحكلها ضحكة حط فيها الحنية متاع الدنيا الكل .


الحلقة الرابعة عشر
دخل محمود لبيروه ... دخلت السكرتيرة في جرتو .. في يدها كاس القهوة .. كانت تعرف طبيعتو .. يحب يرا كاس القهوة فوق الطاولة دوب ما يدخل ...ماكانش ينجم يخدم من غير مايشربها ... اما تو ليه جمعتين مللي رجع طبيعتو تبدلت ... ماعادش يعارك ويصيح على اقل غلطة .. اخلاقو تحسنت مع الخدامة .. ههه حتى القهوة ولا يشربها قبل ما يخرج .. كانت تحضرهالو خديجة . تقوم قبلو وتحضرهالو .. وتحضرلو فطور قمقوم . يعبي كرشو لين يحس بالتخمة .. يقعد شبعان لين يروح ... الدار متاعو رجعت فيها الروح ... وقتلي وصلو لفرنسا ماكانش ينجم يأخذ كونجي باش يهز يفرهدها .. خاتر الخدمة كانت مكدسة وتستنى فيه .. رجع يخدم طول ووعدها في اقرب فرصة يأخذ كونجي ويهز يفرهدها ويوريها فرنسا .. وهي ماعارضتش مسكينة .. كانت راضية وقنوعة .. كل يوم يروح للدار يلقاها دافية .. العشاء طايب .. وصوت ام كلثوم يشرقع .. كانت مغرومة بام كلثوم .. بون هو ماكانش يسمعها ياسر ولا يركز معاها .. اما من كثر ماهو وين يدخل يلقاها حاطتها تغرم بيها حتى هو .. كانت تطيب العشاء على صوتها .. وتغني معاها .. صوتها كان دافي كيما بدنها .. ههه كل يوم ولا يروح يجري باش يقعد مع عايلتو ... عايلتو أي .. خدوجة رجعت الفرحة للدار .. عوضت ولدو على فقدان امو لدرجة انو ولا يعيطلها ماما .. صحيح الوقت اللي قعدو معاها شوية .. اما كل يوم معاها يحسو وقت طووويل .. مازال ما صار شي بيناتهم .. مازالت حشامة وخوافة .. ومازال هو يسايس فيها .. كل يوم ترقد في حضنو .. وكل يوم يعديه احلى من خوه ...وكل يوم يزيد يستانس بيها .. وكل يوم تدخل في قلبو كيف السوسة ... وكل يوم يزيد يتعلق بيها ... موش عارف شنوة اللي يحس فيه تجاهها .. بلحق موش عارف ... اما كيف تغزرلو بعينيها الكبار اللي في لون الليل (واللي بعمرو ماكان يسخايل روحو باش يعجبوه نهار من النهارات) يرا الخوف فيهم وقتلي يعنقها ..يرا البراءة .. يرى فيهم البنية الصغيرة اللي تمرمدت وقاسات وهي صغيرة .. يحس بمسؤولية كبيرة تجاهها.. يحب يحطها في صدرو ويخبيها .. يحميها ويخبيها ... تنهد وحل الدوسيات وبدا يخدم .. بعد نصف ساعة كان غاطس في الأوراق ويدخل عليه صاحبو توفيق
- بونجور معلم CV؟
- حمدالله هاك تشوف ؟
قعد مقابلو في الكرسي
-ياخي وقتاش باش تستدعينا لدارك ؟ الجماعة لكل يسالو فيا هنا مرجوني راهم ؟
-هههه ماو لاباس جاينيي ؟ وهز راسو يغزرلو ..نحى مراياتو وكتف يديه
- تي انا مالقيتش الوقت لروحي حتى باش نخرج عايلتي تتفرهد ؟ تي هاك تشوف فيا مللي جيت وانا غاطس ؟
ضحك توفيق وغزرلو
- أي أي هاني نفهم فيك .. قول ماتحبناش نشوفو مرتك !!هام الجماعة يحكيو قالو قمبلة متاع زين مرتك ؟
هز حواجبو وغزرلو مستغرب وحس الدم طلعلو لراسو .. حك لحيتو وعدى يدو على شعرو كيما كل ما يبدا متوتر
- توفيق ؟ ياخي واعي على شكون قاعد تحكي انت ؟ هه مرتي راهي اللي تحكي عليها ؟
- تربث توفيق وبهت فيه
- صاحبي ههه ياخي انا شقلت ؟ والله مانقصد شي ؟ ياخي اشبيك محمود ؟ نسيت وقتلي كلمتني في التليفون نهارت عرسك ؟ موش قتلي وحدة قعرة وو.. قص عليه وهز يدوباش ما يكملش يحكي
- CV CV ماعادش تكمل انا الغالط اللي نحكي معاك ؟
- ياخي اشبيك محمود لاباس ؟ والله مانقصد شي يا ولدي ؟ماتقليش وليت ..؟ شنوة محمود ؟

شعل سيقارو .. حس روحو متوتر .. توفيق صاحبو ملي هوما في تونس .. مهندس كيفو .. وقتلي شد الخدمة جابو معاه .. هو الوحيد اللي يعرف عليه كل شي .. والوحيد اللي يفهمو .. نفخ السيقارو وتكى راسو على الكرسي
ضاهرلي طحت على راسي يا توفيق .. الطفلة مافيها حتى عيب ههه .. صدقني وليت نفركس في العيوب باش مانتعلقش بيها .
- هههه ضاهرلي خالتي ناجية جابتك للثنية المرة هاذي هههه .. أيا مبروك مبروك ياخويا ... مبروك رجوعك للدنيا ... مبروك عليك كيف رجعت تحس وتعيش الحب كيفنا .. انا ملي رجعت فقت بيك متبدل .. ههه ياولدي ساعات نشوفك تبدا قاعد معانا وتتبسم وحدك نقول شبيه هذا ؟.. ماحبيتش نسالك .. قلت تو تجي بطبيعتها ..
- ههه كنت نسخايل روحي كبرت على الحكايات هذي .. ياخي هاني رجعت كايني مراهق والله
قام توفيق من بلاصتو وقالو
-امالا لازم نتعرفو عليها هالمرا اللي قلبتلك حياتك ... لازم نعملو une petite fete في دارك ونجيب انا حياة وهشام باش يتعرفو عليها
- ياخي انت ولا حياة محتاجين مستاذنات باش تجيو تطلو .. جيبها وايجا وقتلي تحب .. اما الحفلة عندك الحق الخدامة الكل يستناو منى في الخطوة هذي تو نتفاهم معاها وقتاش ونعملوها
-بون ملال نخليك تو .. ربي يهنيك كيما يقولو فيها هههه
خرج وخلاه يكمل في سيقاروه .. هز تليفونو وكلمها .. نوقز شوية بعد هزت
- الووو وينك اش عاملة ؟
- ضحكت وجاوبتو cv !! هاني نطيبلك في الماكلة
- أمم بنينة ريحتها هه
- وصلتك الغادي ؟ ههه
- وصلتني ؟ تي كل يوم في خشمي ههه نشم فيها كل ليلة
سكتت حسها حشمت وقعد يتخيل فيها قدامو وهي وجهها احمر وهو يبدى يتمقصص عليها ويغش فيها بالكلام وهي كيف البوهالية ماتفهموش ههه تبدى الطاوع فيه لين تحصل .. يولي عادد وجهها احمر وتتربث وهو يبدى شايخ عليها
- وق..وقتاش مروح اليوم ؟
- انشالله نحاول بكري .. وين نقول بديت ننقص نلقى شي اخر يستنى فيا ؟
- ربي يعينك ... موش مشكل هاو يوسف معايا يونس فيا
- ههه صحة عليه يوسف مبنك شايخ في ها البرد راكش .. حتى الحضانة معادش يحب يمشيلها الحلوف .. يحب يقعد بحذاك
- ههه خليه .هاني نقري فيه انا في الدار والله موسعلي بالي .. تعرفني نحبو برشة
- اممم تحبو هو كهو ؟ وضحك
- محمو..د .. وسمع تنهيدتها بالشوية .. خلي نمشي نشوف الماكلة
وعلقت التليفون خلاتو يضحك وشايخ يغزر للتليفون وسارح .. حس روحو مراهق صغير في اول بداياتو يتعلم في الحب ..
تذكر الكاميرا اللي عاملها في دارو من وقت اللي بدا يوسف يكبر .. ماللي جاء من تونس ماحلهاش وما تفقدش الدار .. يمكن خاتر متهني بمرتو ونساها جملة .. ضحك وحلها .. كانت راكزة في بيت الصالة الفوق مايفيق بيها حد .. وحصّل بيها برشة مربيات وطردهم وقتلي شافهم كيفاش يعاملو في يوسف .... حط يدو على لحيتو وقعد يتفرج ... اتكى على البيرو وهز ستيلو في يدو .. من الأول الصالة كانت فارغة ... شوية وشاف ولدو يوسف يجري ويضحك ... بعد شافها هي خالطة في جرتو ... عينيه وساعت وتصدم ... اكثر كلمة تنجم تتقال وقتلي راها ... تصدم ...

الحلقةالخامسة عشر
بلحق تصدم ...وخر لتالي بكرسيه وقعد يتفرج..كانت لابسة شورت دجين tres et tres courteوبودي بروتال لاصق في بدنها ظهرلها صدرها .....كانت تجري في جرت يوسف وتضحك وشعرها محلول بتطاير وراها وهي تجري ....قد ما كان يتخيل مشاهد في مخو عليها عمرو ما تخيل المشهد الي شافو ....قد ما شاف نساء قدامو toute nu عمرو ما شاف بدن كيما الي قدامو ... كان ابيض كيف لحليب ....صافي وكامل ....كامل لدرجة ماتشوف فيه حتى غلطة ....حط يديه على فمو ...عاود نحاها وقعد مركز ....ماحسش بيديه ترعش ....بدنو الكل ولا يرعش ....عمرو ما حس برغبة قوية تجاه مرا كيما حسها وقتها .. حتى كريستين ...ماكانش مصدق اللي المرا الي يتفرج فيها هي مرتو . .مرتو اللي ترقد في حضنو كل يوم ...مرتو اللي يبات معنقها وخايف عليها من روحو ....عدا يديه على شعرو وهز سيقارو اخر ....يدو كانت ترعش وهو يشعل فيه ....كانت تضحك وتدغدغ في يوسف ...ومش حاسة بالنار اللي شعلتهالو في قلبو ....حاسو باش يخرج من بلاصتو ...كاينو عمرو ما شاف مرا ولا رقد مع مرا ....عينيه زغللت ...رغبة قوية جاتو مانجمش يسيطر عليها ...اول ردة فعل عملها ...انو سكر الكام وقام من بقعتو ....مشا للشباك وحلو ..خرج راسو لعلى النسمة الباردة تبردلو بدنو اللي شعل ...محمود .محمودمحمود...ههههه فيق ...فيق راهي مرتك ....مرتك ....حلالك ...ملكك...متاعك.ً.حاجتك ....علاش حارم روحك منها ؟اليوم يلزم يفصلها !!! اليوم يلزم تكون مرتو بلحق ...ماعادش ينجم يشد روحو عليها !!! كيفاش مازال باش يمسها وهو يتخيل في بدنها اللي شافو ....بدنها اللي هبلو ....هذاك علاش ناجية قتلو اشتهيتها ليك انت كيف شافتها في الحمام ....هههه كل يوم يكتشف فيها حاجة جديدة وصفة جديدة ....كل يوم تدخل في قلبو كيف العسل ...كل يوم تحتل مخو وحياتو وتنسيه في الماضي الكل ...اما بدنها ....قد ما تخيل عمرو ماتخيلو يالزين هذاك الكل ....اهههه ياربي !!! كانت كل يوم تغطي فيه عليه ....المشكلة ...والمشكلة الكبيرة انها موش حاسة بروحها ....مش عارفة اللي هي مغرية ....اللي هي عندها انوثة فايقة ....ماقصلو على افكارو كان دخول السكرتيرة ..جابتلو دوسيات جدد باش يشوفهم ....قعدت تغزرلو ...كان وجهو مقلوب....وعينيه سارحة ...حطتهملو فوق البيرو وخرجت .وهو حط يدو على رقبتو ...ورجع البيروه ..في الوقت اللي هو يتمنى انو يمشي للدار وياخذ حقوقو الزوجية من مرتو ...

الحلقة السادسة عشر
حست بيدين يمسولها في خدودها ... عداهم على يديها ...حلت عينيها بالسيف ... كانت حاسة بالدفاء ... يديه معنقتها من تالي وراسو مغروس في كتفها من تالي .. بدات تفيق بالشوية .. لقات وجه يوسف قدامها .. بدات تستوعب اللي صار ... تفكرت ليلة البارح ... دارت شوية حست بوجيعة من اللوطة .. منجمتش تتحرك .. محمود كان مكبش فيها مسكرلها على يديها ..ويوسف واقف قدامها يغزرلها بكل براءة ...
- ماما خديجة ماكث باث تكوم ؟
- أي.ا..ي هاني قايمة ياروحي ..هاني قايمة ..
تربثت .. كانت تغزر لروحها لقات روحها عريانة ...والشي تحتها مرنخ .. وجهها حمار وسخنت .. البارح من التعب مانجمتش تتحرك ... زادت غطات روحها وبدات تعيط بالشوية
-محمو..د ؟ محمود ؟ محمود قوم ... بدات تتحرك بالشوية وهوباقي راقد في سابع نومة .. مستانسة تقوم قبلهم الكل وتحضر الفطور ..اليوم صبحت تاعبة وحتى محمود تعب .. تنهدت بالشوية ودارتلو ويوسف مازال واقف يغزلهم ويحب يطلع فوق الفرش ... شدتو من وجهو وبدات تفيق فيه
-محمود .. فيق عاد ماعادش بكري ؟
بدا يحرك فيراسو ..حل عينيه بالشوية وبدا يستوعب .. هز يدو عداها على شعرو وعاود اتكى
-قداش الوقت تو؟
-نعرفش اما ظاهرلي قمت مخر ؟
عاود تلفتلها وتبسم .. ضحكتو كانت شريرة و...وحنينة ..شدها من خدودها وعنقها
- شكون السبب ؟ اه ؟ شكون السبب ؟ مش انت ؟ وبدا باش يطلع فوقها .. يسمع في ضحكة ولدو تلفتلو وهي بدات الدز فيه مربوثة ..ووجهها يمشي الوان ويجي الوان.. حاشمة..موجوعة .متقلقة ..تلفت هو الولدو وضحكلو
- اش تعمل انت هوني ياكعبة ؟
- ولدو يسخايلهم يلعبو جاء باش يطلع فوقهم يلعب هو زادة
شدتلو يدو كبستلو عليها
- محمود محمود شدو امان .. شوف انا عريانة و..و.والفرش ..الفرش ممسخ .. شدو لا يطلع ... ( وطبست راسها وجهها احمر وهزت الغطاء عاللخر )
- ضحك نفس الضحكة الشريرة وهبط من فوقها .. لبس البوكسر متاعو ومشاء هز ولدو يعنق فيه ويرمي فيه الفوق ولاخر شايخ بالضحك وعاود تلفتلها وهي مغمضة عينيها ماتحبش تشوفو عريان ..طبس عليها ووشوشلها
- هاني راجعلك .. نمشي نحطلو حاجة يتلها فيها ونرجعلك ..اقعد هكاكة .. نحبك هكة كيف نرجع ...
هو خرج منا وهي قامت تجري منا ... تحس في بدنها لكلو خفيف وشوية وجيعة مقلقتها ..غزرت للفرش تلقى شوية دم تحتها .. بدنها لكلو رعش وتكهرب وهي تتفكر في ليلة البارح .. اللي عمرها ماشافتو في حياتها شافتو البارح .. هبلها هبلها هبلها .. هبلها وهبل عليها .. ههه ..جبدت روب قصيرة شوية وسليب ومشات لبيت البانو ..دخلت تحت الدوش ... الماء يصب عليها وهي بكلها ترجف ... سمعتو يعيطلها .. وبعد حل بيت البانو ودخل
-موش قتلك اقعد في بقعتك ماتتحركش ؟
وحل باب الدوش ودخل بحذاها ... اهه .. وين تلقاها ؟ بدا يهز فيها ويحط وهي ذابت موش عارفة شنوة باش تغطي وشنوة باش تخلي ...طبست راسها وبدنها لخلخ واحمارت
محمود ..اما ..ن ..اخرج ...امان ..
عينيه زغللت وقربلها .غطس معاها في البانو وعنقها ... هبط راسو وقربلها وبدا الماء يصب عليهم الزوز .. حست ببدنها الكل كهرب .. كورون قوي ضربها .. وهويمس فيها بالشوية اطراف صوابعو تمشي وتجي على ضهرها وراسو غطس في عنقها .... حست بالدغديغة في كرشها من اللوطة وبدا النفس يضياق عليها ... عاود هز راسو وغزرلها في عينيها .. حطلها وجهها بين يديه ولصقها في الحيط ..
- دين واليدك هبلتني ..هبلتني .. ماخليت فيا حتى طرف عقل !! راني هبلت من البارح لليوم كان يتكلم كاينو يوشوش في وذنها
غرست راسها في صدرو وهو تنهد
- ياحشامة .. وزاد كبس عليها عنقها .. ياحشامة في بالك عديت البارح احلى ليلة ..احلى احلى ليلة في حياتي ؟... في بالك النساء اللي تعداو في حياتي الكل فسختهم وانا راقد معاك ؟.. في بالك اللي انت ابن مرا ؟ فرحت وهي تسمع فيه ..فرحت فرحت فرحت .. ماهيش مصدقة اللي تسمع فيه .. هزت يديها ودورتهم على ظهرو .حستو تنطر وتوجع .. هزت راسها وغزرتلو ..كان الماء هابط على شعرو ووجهو ولحيتو زادتو زين واغراء حط يديه الزوز على الحيط وحسرها بيناتهم
- شبيك محمود ؟ موجوع ؟
- ضحك وغزرلها وزاد قرب حط شفايفو على شفايفها
- يالي ماتعرفش تبوس !!!ههه.. قداش باش نعلم انا؟ البارح كليتني بطريحة في بالك ههه .. ظهري لكلو يوجع صبح من صوابعك
عدات يديها بالشوية على صدرو وبدات تقرب فيه ليها وعنقتو
- سامحني ... وجعتك ؟
- هههه الكلمة هاذي normalement نقولهالك انا؟ ومسلها خدها ..وجعتك انا البارح .سامحني انت وهزها بالشوية صب عليها الشامبو وبدا يفركلها في شعرها كيف الطفل الصغير ..وحط جال دوش وبدا يعدي فيه على بدنها وكل مايعدي يدو في بلاصة يبوسها.. لين دوخها وقطع عليها النفس .. وعاود سيناريو الليلة اللي فاتت 
بعد نص ساعة كانت في الكوجينة تفطر في يوسف ...كانت لابسة روب نوار قصيرة شوية ...شعرها محلول ومبلول ...وحالة فيروز وتغني هي ويوسف معاها "بكتب اسمك ياحبيبي" وهي باش تطير بالفرحة ..دخل محمود لابس حوايجو متاع الخدمة ...شعرو مبلول ..وجهو يضحك ومرتاح ..ريحتو تهبل ً..تعشق ...غزرلها مرة اخرى برغبة وقربلها ..باس ولدو وقعد بحذاها...قعد ياكل فيها بعينيه وهي لابسة الروبة وجها زاد احمار وحشمت السخطة ملا عينين عليه !! يعريوك وانت في بلاصتك..طبس وشوشلها
-نحبك ديما تلبس تلبس هكا قدامي وماذابيك اقصر من هكا زادة وتبسملها ومشا باسها من رقبتها وتنهد
- والله لا عيني باش نمشي ياروحي ...نحب نقعد معاك ....نحب نعنقك ونبوسك ونشبع بريحتك ....اففف ..
ضحكت وشدت يوسف هبطتو ..مشا يجري يلعب في الصالة وهي مشات تسخنلو في القهوة ..كانت مربوثة وطايرة من الفرحة ...قد ماباش توصف اللي تحس بيه ماتنجمش خاتر ما يوتوصفش ....يتحس برك ...بدنها ومخها وقلبها الكل ملكو هو ...ملكو وحدو...ماعادش تنجم تتحكم في روحها ...وين يمسها تولي بكلها ترعش وماذبيها تغطس فيه وماعادش تخرج ....في لحظة تطورت الامور بيناتهم...في لحظة قلب الموازين الكل ...في لحظة سيطر عليها وردها مدام بن رمضان ...وجهها ولا عاطي عالغوز ..وحست برعشة ...وهو كان يشوف في تعببرات وجهها ومركز معاها ...وقف وجاء وراها ..جبدها ليه وعنقها وقعد مغطس راسو يشم فيها ...يبوس ويدحنس ..مشا قعد فوق الكرسي وحطها بين ساقيه وقع معنقها ..كابس عليها وحط دقنونتو في ظهرها ...وغمض عينيه ..حست ببديه الكلها ترعش وهو يكلم فيها وصوتو زادة فيه الرعشة
- ماعادش ننجم نسيطر على روحي ....ماعادش ننحم نشد روحي عليك ....مانحبش نخدم ..مانحبش ..نحب نقعد معاك وحدي ...نحب نشبع بيك ..خديجة اش عملتلي ؟ اش عملتلي؟ خديجة بدنك سيطر عليا ...هبلني ...مانشبعش منو ...مانشبعش...منين طلعتلي ؟ منين؟ ناجية جابتلي احلى حاجة في حياتي ...انت احلى حاجة تعدات في حياتي ...كلامو دخلها بعضها ...مانجمتش تشد روحها ...تلفتتلو ..قعدت قدامو ..في حجرو ...بدنها يرعش ..شدلتو راسو بين يديها وحطتو في صدرها وكبست عليه
وبدات دموعها هابطة ...هز راسو وغزرلها...كانت في عينيه رغبة ...حنية ...حب ...خوف ...اي خوف ...خوف من المشاعر القوية اللي حسها تجاهها ... شدلها خدودها وتبسم
- بكاية زادة ؟
- لا...لا ما..مانيش نبكي ..ا..ا..
هزصوابعو وبدا يمسحلها في الدموع ويبوسلها في خدودها بالشوية وتنهدوقالها
- محلا دين امك وما بنك ...وعاود شدها ليه وكبس عليها ...والدين الخدمة باش نبطلها والله لاني ماشي
قامت تضحك وقلبها يدق في 100
-ويوسف اش باش تعمل فيه ؟
وقف وباسها بالقوي لين قطعت النفس
- باقي ماتعرفش تبوس ههه هذي الحاجة لولة اللي باش نعلمهالك اليوم ...وبعد شوية ..يوسف هاني باش نهزو للروضة ونرجعلك ..
- وه باش تهزو تو ؟
- باش نهزو ونرجعلك نبرد قلبي فيك من غير مايقلقني حد ...باش نهريك بوس اليوم
وخرج يجري يعيط ليوسف ..خلاها واقفة مبهمة تغزرلو...

الحلقة السابعة عشر
فيقها صوت التليفون ...شدينوقز ينوقز ماحبش يسكت ..تلفتت وراها لقات محمود مش في بلاصتو وسمعت صوت الدوش ...غزرت للتليفون وعينيها شطر مغمضين -الو؟
-ا..الو ..تليفون سي محمود؟كان صوت راجل ويتكلم بالعربي ...هزت راسها وركزت معاه
-اي اي تليفونو .انا مرتو!
-اهلا مدام...سامحني قلقتك ...اما سي محمود ماجاش يخدم وما تكلمش ...في الحقيقة تحيرنا ...هو يتكلم ومحمود خرج من الدوش ...لاف منشفة صغيرة على حزامو ومنشفة ينشف بيها في راسو ...هزت التليفون واعطاتهولو قتلو بالشوية وهو يسال فيها بعينيه
-الخدمة الخدمة
هز براسو وخذا التليفون...-الو ...قعديحكي ويغزرلها ...تبسمتلو.وهزت لغطاء عاللخر ..حشمت عاللخر وهو يهز فيها ويحط ..حتى وهو يتكلم موش مخليها...
- ماتكلمتش نسيت .. تلهيت فما مشكل؟...وقعد يسمع وطبس عليها باسها من جبينها ..ودزها شوية قعد بحذاها...كانت ريحتو تعشق ...وبدنوسخون ويشهي هههه....
- اه والله نسيت ياتوفيق!!!باهي باهي ..مانيش جاي اليوم
- .......
- اش يهمك في ولديا انت ؟وتلفتلها شدها راسها وغرسو في صدرو ...قعدت تشم في ريحتو وغمضت عينيها وكمل يحكي ...تسمع في الضحك في التليفون وهوتبسم
- باهي اش تحب انت تو؟مانجمش نقعد مع مرتي انا من غير ما يقلقني حد ؟يزي عاد فديت ماللى جيت وانا نخدم !!خليني نرتاح نهار!!.
- .....
- باهي تو نتفاهم معاها ونقلكم باهي ..ايا سيبني تو عندي مانعمل !
علق التليفون وتلفتلها ...هزلها راسها وباسها ..
- سامحني تعبتك ...وتنهد ...نعرف روحي تعبتك وما خليتكش ترتاح !!! عضت على شفتها وطبست راسها وهو ضحك
- حاس بيك موجوعة ...اما الله غالب مانجمتش نشد روحي عليك ...مانجمتش ...تي حتى عندي اجتماع نسيتو جملة يا بو قلب ..والله نسيت كل شي...وغزرلها في عينيها بكل شوق وحنية
- ضاهرلي باش نبرك بحذاك هوني ماعادش متحرك من جنبك ؟
- محمود ؟ تبسمت بدلال وحشمة ..يزيتشي تو؟
وقف وهو يتنهد ...عدى يديه على شعرو ونفخ
- الحاسل ما عادش فيها ...هيا هيا قوم نخرجك شوية ..نفطرو البرة وبعد نتعداو ليوسف نروحو بيه
قعدت تغزرلو والفرحة باس تتنطر من عينيها
-بلحق محمود ؟ باش تخرجني؟
حل الخزانة يجبدفي حوايجو وتلفتلها
-بلحق..وقوم فيسع خاتر منظرك هكة يغريني ويخليني نخمم باش نبدل رايي؟
قامت تجري وهي لافة الملحفة على بدنها ...من الجري ادعثرت ...وهو ولا يضحك ....ميت بالضحك عليها ...
قعد يدور بيها في البلاد وهي حالة فمها وباهتة في البني والشوارع ...هزها للشونزيليزي ..قعدو في مطعم ...كانت لابسة سروال دحين نوار وتريكو نوار وكبوط ازرق وبوني نوار ...خاتر الطقس بارد ..شعرها محلول تحت البوني ..قعد يتغزل بيها وهوما قاعدين في الطاولة ....شد تليفونو وبدا يصور فيها وهي تضحك
-محلاك ...قداش وتاتك البوني ...وقربلها باسها من شفايفها ...حشمت وطبست راسها
-وه محمود الناس تتفرج !
-ههههه ياخي تسخايلنا في تونس .؟ لهنا كل شب جايز وحد مالاهي بحد هههه
- اي ...ولو ...انا ..انا نحشم...
قربلها يعنق فيها
- كان باش نتبعك انت ماعادش نمسك بلكل .هههه..يابنتي اسكت وخليني نتصرف ...راك مرتي ..تعرف اش معنتها مرتي ؟يعني عندي الحق باش نبوس ونعنق ونرقد معاك وقتلي نحب ووين مانحب ؟ واضح ؟
- لا انت ظاهر فيك هبلت ؟
- هبلت هبلت وباسلها خدها ...هبلت بيك .هههه.هيا نروحو؟
قحرتلو وعينيها وساعت
- محمود؟
- ههههه نفدلك نفدلك
وتلفت عيط lserveur وطلب ماكلة وقالها اش تحب؟

تلفتت هي لserveurوقعدت تسال فيه بالفرنسية وطلبت اش تحب ...وهو قعد يغزرلها باهت ...كانت تحكي بالفرنسية كايني تحكي بالعربي ماعندهاش مشكل ....هو عمرو ما سالها على نيفو متاعها ...خاتر ما حبش يحرجها ...من الاول كانت مقلقتو الحكاية ...بالطبيعة قبل ما يعرفها ..كان يخمم كيفاش باش يهزها معاه وهو يعتبرها جاهلة وماهيش قارية كيفو هو ...يعني هو دكتوراه في الهندسة ...ياخذ وحدة ما ...اما مبعد ماعرفها ..وشافها ماعادش مقلقتو لحكاية ..تو بالشوية بالشوية تتعلم وتتلنصى ...المهم ...المهم هي اكثر مرا حس بيها و...وشيختو...شيختو عاللخر زادة ....كريستين ...مرتو ..كان يحبها ..اما كان حب متاع صغر ..تعرف عليها وهما صغار الزوز ويقراو ....كانت ند ليه وهي اللي عرضت روحها عليه وهو ما مانعش ...يعني وافقعلى العلاقة ...وماكانتش vierge اما تقبل الحكاية وعادي المهم كانت مخلصة لعلاقتهم واستانس بيها وحبها وقتلي حبلت بيوسف قررو باش يعرسو ...ووقتلي ماتت خلات فراغ كبير في حياتو ...وتنهد وهو يغزر لمرتو وهي تدور في وجهها وتتفرج ...كانت مرتاحة وراضبة وفرحانة ....تعرف على برشة نساء بعد كريستين ودخل في برشة علاقات ...اما اللي حسو مع خديجة ....واو ...حاجة ماتتوصفش ....حشمتها وقلة خبرتها وانوثتها والخوف من العلاقة اللي راه في عينيها حسسوه برجوليتو ....رجعوه للماضي ....ذكروه باللي هو راجل شرقي ..يحب مرتو تكون ليه هو وحدو ...وهو اول واحد يمسها واخر واحد يحط يدو عليها ..واللذة اللي ذاقها معاها بعمرو لا ذاقها ولا باش يذوقها مع وحدة اخرى ..
قعدو يدورو بعد في وسط البلاد ...شاددها من يدها وهي كيف الطفلة الصغيرة ساعات كيف تشوف حاجة تعجبها تولي تنقز وتضحك
- يا محمود محلاها؟
تعرف فما برشة بني وبرشا بلايص يشبهو لبقايع في تونس؟
هز سيقارو وشعلو وبدا ينفخ
-اي ماهوبرشة بلايص في تونس بني فرنسا قعدت كيما هي !
-امممم صحيح !ووقفت تلفتتلو ..نحب نمشي لمكتبة !
-مكتبة ؟بهت يغزرلها
-اي مكتبة !...نحب نشري شوية كتب ..انا نقعد وحدي نهار كامل ..نفد ..نحب نشري شوية كتب نوسع بيهم بالي ..
شدها من يدها كبس عليها وعقد حواجبو باهت
-باهي لالا نهزك للمكتبة !
هزها لمكتبة كبيرة فيها كتب عربي وفرنسي ...قعدت تدور وتقرى في المواضيع ...واللي بهتو انها ما تلفتتش للكتب العربي ...كانت تهز في كتب فرنسية متاع ادباء صعيب يقرالهم اي حد ....خذات زوز كتب ..واحد لماركيز مترجم ومسرحية لموليار ...والي بهتو اكثر انها خذات كتاب يحكي على فن الهندسة والمعمار
قعدو عشية كاملة وهما يحوصو ويدورو ..وهو مكبش فيها معنقها ...وهي طايرة من الفرحة ..طايرة طايرة طايرة ...مشاو جابو يوسف وزادو تعشاو البرة ...روحو في الليل تاعبين ..مدشدشين ...وقتلي حلو الباب خطرتلها فكرة حلوة باش تفاجء بيها راجلها قاتلو
-امان محمود ترقد انت يوسف ؟بدلو حوايجو ورقدو خلي نمشي انا ندوش ؟
طبس عليها باسها
- باهي لالا انت تامر وانا النفذ ! تو نرقدو يوسف هو بطبيعتو راقد
طلعت الفوق دخلت لبيت البانو ..دوشت وصبت على روحها اابارفان ...وقفت مقابل المراية..وهي تتبسم مشطت شعرها وعملت ماكياج دوب اللاش ..اليوم باش تهبلو ...ديما ياخذها على غفلة مايخليهاش تحضر روحها ....هههه هو بطبيعتو هابل خلي تكمل عليه هههه ...تسمع في باب بيت النوم تحل ...قلبها ولا يدق وبدنها رعش ....تسمع فيه يحكي في التليفون ..لبسن النويزات متاعها وهي باقي تغزر لروحها وتثبت فماش حاجة ناقصة ...وجهها احمار وهي تتخيل فيه ...هبطت شعرها وريقلتو بلقدا ...خذات نفس وحلت الباب بالشوية ....كان قاعد فوق الفرش بحوايجو..يتكلم في التليفون ويضحك وهز راسو ....اول ماشافها..حستو تصدم ....عينيه وساعت وهبط التليفون من الربثة ...كانت لابسة2piecesفي الروج ونويزات كحلة كلهت دانتال قصيرة ...وجهو احمار ولخلخ وهي واقفة بكل اغراء ...بكل انوثة قدامو ..غزرلها فمو تحل وعاود غزر للتليوفون عاود هزو ووقف
-اي اي اي يا ناجية ..!ولدك ساي مشا فيها
هي تربثت ...صار يكلم في امو ؟ولات تندب في وجهها من الحشمة ..ورجعت تجري لبيت البانو سكرتها على روحها ...خلط عليها وبدا يدق وهو باقي يكلم في امو
-ايا باي تو ناجية ماعادش فيها ... علق التليفون وبدا يعيطلها
-حل الباب !
-لا مانيش حالة
- حل الباب يابنتي ماعندك وين هاربة اليوم لابسة هكاكة وتحبني نسيبك ؟
-هكاكة تحكي قدام امك ..والله فضحتني ..يا ملا حشمة ؟
ولا يضحك وهو باقي يدق .
- يا بنتي انا فضايح ؟تي تو كان ما تحلش الباب باش تشوف الفضايح على حق !حل فيسع
- باهي ابعد
باقي يضحك باهي هاني بعدت .

الحلقة الثامنة عشر
حلت المفتاح بالشوية وطلت ...تلقاه واقف قدامها ...بدا يحل في سوريتو ...عينيه لمعت وجبدها ليه...عنقها بقوة وحشا راسو في كرومتها يشم فيها حستو شعل عاللخر وهبل ...
-هاربة ؟قالها وصوتو بكلو يرعش ..وين عندك تهرب ...ما تهرب كان لحضني انا راهو ...مابنك مابنك مابنك ...وبعدها عليه شوية وقعد يثبت في بدنها وعينيه الكل باش ياكلوها ...هزها بقوة ورماها في الفرش ...قول طيشها هههه...ورقد بحذاها وبدا ينحيلها في نويزات ويبوس فيها ...ولات تضحك ..شددتلو يدو وقاتلو بدلال
محمود ...امان ..نبدا نحضر في روحي ساعة تجي انت في دقيقة تنحي كل شي ؟
هز راسو وغزرلها برغبة قوية وضحك
- دقيقة ؟سكوندة ...سكوندة وحدة ويتنحى كل شي !!
وعاود رجع يجبد فيها وهي تضحك وتقاوم فيه .....
بعد ساعة ...كانت متكية على صدرو ومعنقتو وهو شاد سيقارويتكيف ويكونكتي
...هزت راسها وقاتلو
- هكاكة قبيلة تحكي امي ناجية؟اش باش تقول علينا بربي؟
- ياخي تحكي بجدك انت؟ ياخي ناجية وقتلي خذاتك ليا ..عارفتك باش تلعب معايا الكارطة !؟ياخي خارجتلي هكاكة تحبني نقعد في عقلي ؟ وطفى السيقارو وحط التليفون وlunetteبحذاه وتلفتلها ..هبط وجاء مقابلها شدها من يديها وحطها فوقو وباسها من خشمها وهبط لفمها .وقالها بالشوية
- ماعدش تخمم في حد وانت معايا .... خمم كان فيا انا ..انا كهو ..وطفى الضو ....
في الصباح وهي تحضرلو في الفطور قالها على الحفلة
- جماعة الشركة الكل يحبو يجيو للدار ويتعرفو عليك ...هذا تقليد عندنا ...يعني كيف واحد يعرس ولا يشري دار يستدعي جماعة الشركة ...بون موش الكل اما المسؤولين الكبار
حطتلو القهوة قدامو وقعدت
- مافما حتى مشكل ! وقتاش باش تستدعيهم ؟
- مانعرفش وقتلي يساعدك ؟ تحب الويك اند الجاي مثلا ؟
- باهي اش تحب نحضر ؟
- قعد بشرب في القهوة وضحك
- ماتحضر شي حضرلي كان روحك الامور هاذي فما مختصين يجيو بالذمة ...اما ...مانعرفش باش نهزك ونشريو حوايج للمناسبة
- لا لا من غير ماتشريلي ..عندي ...حوايجي لكل جدد مازلت مالبستهمش..
غزرلها وشد باسلها يدها
- كانك عليا انا نحبك بلاش اهههه ياقلبي
ضحكت وقامت فيسع تلم في الطاولة
- برا لخدمتك برا ...ظاهر فيك باش تعاود سيناريو البارح هههه
عنقها من تالي وباسها
- ماذبيا ...اما الله غالب عندي اجتماع مهم اليوم ماكانش الله لا نفلتك ؟
مشا للخدمة وهو يحس في طاقة كبيرة في بدنو ...راحة البال والاستقرار ...حاجة جديدة في حياتو ...محلاه العرس الحاصل ..محلاه محلاه وخاصة العرس بعربية .بنت بلادو ..تفهمو تقدرو وتصونو ..وتطاوعو وتتلهى بيه ...حاسس روحو اسعد راجل في العالم ...يسوق في الكرهبة ويغني ...حتى هو ولا كيف مرتو تقضي وتغني ...وصل لبيروه ...تلمو الخدامة وبدا الجتماع ...توفيق يغزلو ويتبسم
- اا عروس ؟تفرهدت البارح ؟
طبس عليه كلمو بالشوية
- ياولدي اش يهمك في ن***ي انت ؟ نهار كامل وانت مارجني بالتليفونات والمبساجات اما والله لما نرجعهالك ؟
قام توفيق يضحك ...وبدا الاجتماع وبدات الخدمة ....
وجاء نهار الحفلة ...كانت تحضر في روحها فرحانة ...جبدت حوايجها وحوايج يوسف ...كانت تحب محمود يتشرف بيها ...تحبو يفتخر بيها قدام الناس اللي يخدمو عندو ...ماكانتش تعرف اللي من الحفلة هذيكة باش تتقلب حياتها ..والسعادة اللي عايشتها محمود باش تولي تعاسة ...تعاسة ..واوهام ...اوهام الحب ..

الحلقة التاسعة عشر
في الجمعة اللي قبل الحفلة تعرفت خديجة على توفيق صاحبو ومرتو حياة وولدو هشام عمرو 15سنة ...فرحت كيف عرفتهم كانت عايلة دافية ...توفيق كان ظاهر صاحبو عالخر ومرتو حياة مرا تحفونة برشة ...طبيعتها بشوشة ..كانو شلة مع بعضهم قراو مع بعضهم الثلاثة هذاكة علاش هي تعرف عليهم برشة حاجات ...ارتاحتلها خديجة في هاك الجمعة ولاو يخرجو مع بعضهم يقضيو ..يفطرو ..دورتها في برشة بلايص ...ومحود ارتاح كيف ولاو صحاب باش ما يقعدش حاسس بالذنب خاتر ما عندوش الوقت باش يخرجها ...خلى المهمة هاذي الحياة ...
في صباح الحفلة نهار السبت ...جات l’équipeعلى بكري وبداو يحضرو في الدار يزيدو وينقصو في الاثاث...قامت بكري حضرت فطور يوسف ..فطرتو وخلاتو يلعب ...طلعت الفوق باش تفيق محمود ..لقاتو فاق ويحجم في لحيتو في بيت البانو
-صباح الخير ...وباستو من خدو ..رجعلها البوسة وخدو الكل بالجال تاع الحجامة مسخلها وجهها ..قامت تضحك
صباح الخير عزيزتي .ورجع يغزر للمراية ....نظف لحيتو ودخل يعمل دوش ...وهي قعدت تنظم في البيت ..خرج لافف منشفة على حزامو ..جاهامن تالي عنقها وباسها من رقبتها يتبسم
-تعرف اش شاهي تو؟
-اممم اش شاهي ؟
لفتها ليه غزرلها في عينيها وطبس يوشوش في وذنها
-شاهي نعمل واحدهههه
بهتت وبعدت روحها وقعدت تقحرلو
-ياخي الحشمة ما تعرفهاش انت ؟
-هههه مانعرفهاش ..اما نسمع بيها ؟
-يا؟تو نورمال انت ؟ الدنيا تغلي اللوطة وانت تخمم هكة ؟
باسها مم شفتها وبعد مشا يجبد في حوايج من الخزانة
-نورمال !ياخي انا نعمل في العيب انا ؟..تو كان جيت عيني ما يمنعني حد راهو !
وقفت قدامو وعضت على شفايفها وهي تعرف اللي الفازة هذي تهبلو وتشعلو ..بدات تلعب بشعرها بصوابعها وهو وقف مبهم يغزرلها .ههه حستو يبلع في ريقو بالسيف وعينيه زغللت
-يعني انت تو ماعينيكش ؟قاتلو بدلال
طبس على شفايفها ...تنهد وغطس راسو في رقبتها وبدا يبوس فيها من كل بقعة ...حست بالسخانة في بدنها لكل ..بدات تبعد فيه .
- ههههه يامهبول ريض لعباد اللوطة وه؟
سيبها ومشا سكر الباب بالمفتاح ورجعلها هزها وحطها فوق الفرش ورجع يبوس وهي باقي تدز
- جبتها لروحك ..قالها وهو ينحيلها في حوايجها ...جبتها لروحك كنت قاعد رايض ..بديت تغري فيا تحمل مالا
- وعاود طبس راسو ..كلاها ماكلة من لحمها الكل ...دقدقها ....
في العشية لبس محمود الكوستيم متاعو ...وهي لبست يوسف كسوتو وقعدو الزوز يضحكو عليه شايخين ...ولا كيف الراجل القصير وهو يتكعبر ...هزو بوه يبوس فيه ويمشمش
-محلا زين ولدي ...ايا نهبطو خلي ماما تحضر روحها ...وتلفتلها ..ياخي لتو ماوريتنيش اش باش تلبس راهو ؟
ضحكت ودزتو البرة
- مانيش موريتك ..ماو قتلك تو تشوفني مبعد !
هز صبعو وغزرلها
-اي ماتفاهمنا عاد زادة ..لعرا والقرا لاواضح؟
-واضح واضح ..وعاودت دزتو ..حافظة درسي !!
بدات تحضر في روحها ...كملت شعرها ..عملتلو بابليز ...وبدات المكياج ...تسمع في صوت الناقوز ...وبدات العباد تجي ...بالطبيعة هي باش تخرج بعد ما يوصلو الناس الكل ...حاسة روحها هي نجمة الحفلة ...سمعت دقان الباب وبعدت دخلت حياة تضحك
-عسلامة ياعروسة !!مازلت؟
سلمت عليها فرحانة ...قعدت بحذاها فوق الفرش وقعدت تغزر للروب
-يا تفتق محلاها!منين شريتها ؟
- من تونس ..شريتها انا وسناء
-اخت محمود
- اممم
-صحة صحة تهبل وانت تهبل الله احد عليك ههه عندو الحق محمود يهبل هههه
وجهها حمار وحشمت عاللخر تبسمتلها حياة وقربتلها
-قالي توفيق الراجل ولت يضحك وحدو في الخدمة وعلى قد ماهو كان صعيب مع الخدامة ..ولا نهار الكل يوزع في الابتسامات هههه
ولاو يضحكو الزوز ...وقعدت حياة تعاون فيها على لبسا ن الروبة ..كيف كملو قعدت تغزرلها وتصلي عالنبي
- ضاهرلي محمود باش يطردنا نهار اليوم هههه
- هههه لها الدرجة ؟
- والله تباركالله عليك ربي انشالله يهنيكم ...ايا خلي نهبط انا ...كمل انت واهبط وحدك عاد ..ولا تحب نعيطلك محمود؟
قالتلها براسها لا
- تو نهبط وحدي ..اما ..اما قلو ياقف بحذا الدروج باش يعرضني خاتر نحشم قدام عباد مانعرفهاش
- باهي عزيزتي باهي
- عيشك ياحياة ربي يخليك
كملت ريقلت روحها وقعدت تغزر وتثبت فماش حاجة ناقصة ...هزت البوشات متاعها وخرجت بعد ماسمات بسم الله
قعد محمود واقف بحذا الدروج كيما وصاتو حياة ...وغمزت راجلها وقعدو واقفين قراب ليه باش يشوفوه كيف تخرج مرتو ...الدار كانت مليانة بالضيوف ..شراب وماكلة شايحة ودخان ...الدنيا تغلي ..بدا يتلفت ويتبسم للعباد ..وهز راسو ...حل فمو طاقة ...بهت ...حس بسخانة وبرد فرد وقت وهو يغزرلها هابطة من الدروج ...الجوجمة الكل تنحات من مخو ...قعدت كان هي في عينيه ...كانت لابسة روب في الروج للركبة ..ساتان ومن فوق دانتال ...يديها دانتال ..لاصقة في بدنها ...سكسي ..عاللخر سكسي حتى وهي موش قصيرة كيما وصاها لكن كانت مغرية ..مع بيوضية بدنها ...واتاتها برشة ....شعرها الاكحل بوكلي هابط على ضهرها كيف الغجرية ....عينيها ...عينيها الكبار زادهم المكياج زين على زين ....مرتو ...مرتو...ترعب ...حس قلبو باش ياقف وهي عمال تقربلو وتتبسم ...حس الصالة لكل سكتت وهما واقفين يتفرجو فيها كيفاش هابطة ...حس روحو قريب يبكي ...حس دمعتو قربت وعينيه زغللو . ..يحبها يحبها ...يحبها ...المرا اللي قدامو يحبها ...كان تطلب عينيه يعطيهملها ...حس بيدها الصغيرة فوق يدو ...قعد كاشخ ماتحلحزش من بقعتو ...فيقو صوتها وهي تضحك
-محمود ؟ شلقت على روحك راهو !وطبست عليه باستو من خدو بالشوية ...وريحة البارفان متاعها اثارتوزادت شعلت فيه النار ..كان الروج متاعها يلمع ...حس روحو باش يتقطع عليه النفس وهو يغزر لشافيفها...تلفت يلقى لعباد مركزة معاهم ..وتوفيق ومرتو باش يموتو بالضحك وهوما يغزرو لردة فعلو ...وجهو احمار ..بلحق شلق على روحو ....كل يوم تزيد تعطيه وجه اخر عمرو ماشافو ...عاود تلفتلها ..كان يلقى يسيب كل شي ويهزها يطلعها الفوق ويدخل معاها في عالم اخر ..شدها من ايدها وهو بكلو يرعش ...
طبس يوشوشلها في وذنها
- ليوم قاتلك قاتلك ماعندك وين تهرب...نحس في النار شاعلة فيا وراس ر***ك لا نعديهالك بالساهل
تبسمت للعباداللي يغزرولهاووشوشتلو
- ماعندي وين نهرب ياروحي ...اعمل فيا اللي تحب ..اقتلني ًاذبحني..كولني ...ههه انا كلي ملكك
حستو شاد روحو بالسيف وهي تجبد عليه بالدم البارد ..اثارة قوية حسها لين ماعادش ينجم يتحرك ...غمض عينيه بالشوية يحب يسترجع قوتو...لعباد الكل مركزة معاهم بلزمو يشد روحو ..منعو صاحبو توفيق قربلو وهو يضحك شدو من كتفو وشوشلو
- يا معلم يامعلم ..شلقت على روحك ..شد روحك ماكانش باش تفضحنا ههه
وشدلها يدها باسهالها
-مرحبا بيك مدام ..تباركالله عليك ..هيا نعرفك على جماعة الخدمة متشوقين يعرفوك
وبدا يدور بيها ويسميلها في اساميهم وهي في غيبوبة تخمم في محمود وفي ردة فعلو ..وجهها احمر وهي تدور من واحد لواحد ولكلهم يبوسولها في يدها باعجاب والنساء في عينيهم الغيرة ...والحسد ...بدات تحس بالدوخة من الجوجمة ومحمود شاد كاس ويشرب ويعاود ويغزرلها من بعيد ..حست بنارو شاعلة ...حاسة بيه ..ههه ياميمتي ليلة زرقة الليلة هههه

-عسلامة خديجة ...
تلفتت بالشوية ..حست الصوت تعرفو ...لكن الصدمة انو كان واقف قدامها ...الانسان اللي دمرلها مستقبلها واللي كان سبب في حرمانها من قرايتها ...معز ...معز واقف قدامها بشحمو ولحمو ...ويتبسم...


الحلقة العشرون

- معز ؟ اش تعمل هوني ؟
حست بالعرق يلب في بدنها الكل ... فجعة .. فجعة قوية وهي تراه فيه قدامها .. يدها ولات ترعش وتلفتت شيرة محمود تلقاه يغزرلها ومركز معاها وهي واقفة مع معز ... تبسمتلو باش ماتضهرلوش اللي هي متوترة وعاودت تلفتت لمعز
-ماقتلش اش تعمل هوني ؟
شرب من الكاس متاعو وحط يدو في مكتوبو.. كان طويل واسمر وعينيه كحل يلمعو كيف شافوها ..ماتبدلش .. ههه كيما خلاتو لقاتو غير نظاف شوية في هندامو
- انا نخدم في الشركة اللي يحكم فيها راجلك ...وهبط الكاس وغزرلها بحسرة وتنهد اما انت تبدلت وزينت ...زينت برشة ... ماصدقتش وقتلي شفتك ...حست بوجيعة في كلامو ..صحة عليه راجلك ...متمتع بالحاجة اللي كان من المفروض انا نتمتع بيها ..
عينيها شعلو بالغش وقحرتلو قحرة متاع موت ...
- ماعادش تجبد الموضوع هذا حتى في احلامك ..فاهم ولا لا ؟
- سامحني خديجة سامحني ! سامحني ماوقفتش معاك وقتلي ستحقييتني ... كنت وقتها صغير وماعنديش مستقبل .. خفت .. كان يتكلم بالشوية ومطبس راسو يوشوشلها !
- عينين راجلك باش تاكلنا ماكلة .. هاو بدا يقرب ..
طبست راسها وريقها نشف ..ماحبتش تتلفت باش ماتشلقش على روحها .. وحست بيديه جبدوها ليها وعنقها من كتافها ..وقحر لمعز وعاود طبس باسها من خدها
- تعرفت على مرتي سي معز ؟ كان يكلم فيه بغزول وحست اللي الكورون موش متعدي بيناتهم جملة
- أي سي محمود تعرفت عليها ..وتبسملو تو كنت نقول للمدام اللي انت محظوظ برشة
زاد كبسلها على كتافها وغرسلها راسها في صدرو ..خباها في حضنو ..
-بالطبيعة محظوظ عندك شك في هذا ؟ وضحكلو ضحكة صفراوية وطبس باسها من شفتها .. حستو متوتر وريحتو بالشراب ..هزت راسها لقات معز يغزرلهم بحسد .. تبسملها وهز الكاس كاينو يحي فيهم وبعد ..
بعدت روحها عليه بالشوية ووجها احمر مطمطم من الحشمة
- ياراجل ياخي هبلت ها النهار ؟ الناس تتفرج راهو ؟
- تعرفو معز ؟ سالها بمباغتة
تربثت وقعدت تغزر لعينيه كانو يتشاعلو بين الرغبة والغش والشهوة وبرشة احاسيس أخرى ...
- وه ؟ من...منين نعرفو انا؟
- لا خاترك قعدت تحكي معاه برشة !
- ههه وين ترا فيها البرشة ... لقيتو تونسي قعد يكلم فيا بالعربي حكينا شوية وبرا
قعدت عينيه تدور في بدنها الكل وهو معنقها وعاود غزر لوين واقف معز وقالها
-لا خاتر مانحملوش جملة انا هذاكة ... وزيد قاعد يغزرلك في غزرة ماعجبتنيش ... وعدا يديه على شعرها ويديه ترعش
-مانحب حد يغزرلك كان انا .. انت ملكي انا كهو .. ندمت اللي عملت الحفلة .عينين الرجال الكل باش تاكلك ...حاسس روحي باش نرتكب جريمة في ها الليلة الكلبة وقتاش توفا ؟
تبسمتلو وزيد هاك الغمازات بانو اكثر وحطتت يدها على قلبو كان يدق بالقوي ... ماكانتش حاسة بالعباد اللي واقفين في الصالة يغزرولهم ويوشوشو ويتبسمو ..
- ماعاد مامازال عزيزي ..تو توفا وزيد انا مايملالي عيني في الصالة هاذي الكل كان واحد برك ...وضحكت وهي تغزر اللوطة .. واحد اسمو يوسف ههههه وطبست هزتو في حضنها وهو جاي يتكعبر وعنقها
- محلاك ماما ديذة ..محلاك
- ههه وانت زادة احلى راجل في السهرية هاذي
جبد روحو منها بالسيف ...وقعد يدور في الصالة ويحكي مع العباد وهومخو فيها هي .. يغزرلها ويتبع فيها ... عينيه مانجمتش تبعد عليها حتى ولدو غار منو كيف شدها وعنقها هههه يارسول الله حالتو ولات متعبة اصل ...
معز كان واقف يعس عليها زادة .. كان يستنى في فرصة أخرى باش يحكي معاها ..اما عينين راجلها كيف الصقر يعسو عليها وين تمشي ووين تجي ... استغل فرصة انو هو خرج مع واحد يوصل فيه للباب وهو مشالها .. كانت واقفة مع كوبل وتحكي معاهم شدها من ايدها ودورها ليه بهتت وجبدت ايدها
-وه ؟ نحي كسرتك هبلت ؟
-سامحني اما ..اما مانجمتش نحكي معاك ..راجلك يعس عليك في عسة صحيحة ..خديجة اعطيني نومروك خلي نكلمك لازمنا نحكيو راهو ؟
- امان معز امان ؟ يزي اللي صار من جرتك وبطلت قرايتي !جايني تو زادة تحب تخرب عليا ؟
- علاش نخرب عليك ؟ ياخي هاني ماقلت حتى كلمة قدام راجلك ؟
-ياخي اش عندك باش تقول ؟ وبدات تصيح بالشوية
-ياخي اش بيناتنا احنا باش تحكيه ؟
- بيناتنا حب عمرو أربعة سنين .. أربعة سنين ياخديجة مانسيتهمش وماتنحاوش من بالي
- ههه كنت نسخايلو حتى انا حب ..اما ملي عرفت راجلي حسيت اللي بيناتنا لعب ذر ... انا خذيت راجل ..راجل باتم معنى الكلمة موش غشير تخلى عليا في اول موقف صارلي .. وبعدت شوية عليه وتو سامحني نخليك ...ماعاد عنا مانحكيو
-خديجة ... وبعد كيف را محمود عاود دخل للصالة بعد ...
وفات السهرية .... وبداو الناس يخرجو .. معز قعد يلوج على فرصة أخرى شي .. مانجمش يكلمها ولا يدور بيها ... كانت واقفة هي وراجلها قدام الباب يسلمو على العباد ..كان معنقها ومكبش فيها وهو يغلي من داخل.. غاضتو كلمة غشير كيف قالتهالو وغاضتو كيفاش هي ملك واحد ..واحد يكرهو ويغير منو ..
محمود سكر الباب ..وتلفتلها يتبسم .... قعدت واقفة في الوسط ...عينيه كانو يتشاعلو .. خافت منو هههه بدات توخر بالشوية بالشوية وهو يقدم .. في الللخر نحات التالون وهربت تجري وتضحك ... خلط عليها وقفلها قدام الدروج وحسرها بين الدرجة والعرصة ... كان يلهث وهي زادة ....
-مالا شقتلي قبيلة ؟ شدلها راسها بين يديه وطلعو الفوق وطبس عليها حط خشمو على خشمها (تعلمو تعلمو البنات الرومنسية ههه)اه ؟ قتلي كولني ...مشمشني ...اقتلني
كان كل كلمة يقولها بالشوية ويبوسها ..كل مرة في بلاصة ... غمضت عينيها وسلمت روحها للاحساس القوي اللي عايشتو معاه ... نحى الكرافات ورماها .. نحى كسوتو وبدا يحل في سوريتو ... وهي حاسة روحها في غيبوبة غطست راسها في صدرو وحطت شفايفها على قلبو .. كانت تسمع في دقاتو .. دقاتو القوية حاستهم يدقو على خاترها .. باستو وهوتنهد بالقوي وشدلها راسها كبس عليها وزاد غرسهولها في صدرو
-اوعدني محمود ...اوعدني يقعد القلب هذا يدق ليا انا برك وزادت دورت يديها على ظهرو اوعدني مهما يصير ماتتخلاش عليا ... اوعدني محمود ...باش تخليني بجنبك وتحميني .. حست بدموعها على خدها وهي تحكي معاه ... هزت راسها وغزرتلو في عينيه اللي تعشقهم ..عينيه اللي ذوبوها ... عمري ماحسيت روحي مزيانة كان كيف غزرت لعينيك .. شفت روحي في عينيك .. عينيك هوما مرايتي ... هوما القوة متاعي .. هوما اللي عطاوني الثقة في روحي ... هما اللي خلاوني خديجة اللي انا فيها تو ... عينيك هوما اللي حسسوني اللي انا مرا ..حسسوني بانوثتي ... خلاوني عاشقة ... اوعدني تقعد تغزرلي ديما هكا ..وعدات صوابعها على شعرو وعلى خدو .. مسحلها دموعها بشفايفو والنفس متاعو في وجهها ...عينيه زغللت بالدموع ...هبط على ركايبو قدامها ... حط وجهو في كرشها وعنقها ..تنفس بالقوي وهو مكبش فيها ..قعدت معنقتلو راسو وزادت غرستو في كرشها ... هبطت بالشوية لين ولات مقابلتو ..قعدو معنقين بعضهم فوق الدرجة متاع الدروج ..حاطتلو راسو على صدرها وهو معنقها ... وبعد عدى يدو على بدنها الكل وهو يتنفس بقوة رقدها على يدو وهبط شفايفو على شفايفها ..كلالها شفايفها برغبة قوية وشهوة...هزها بين يديه ووجهو احمار وقعدت هي غارسة راسها في كتفو وطلع بيها الدروج حل باب بيت النوم دخلها وسكر الباب...

الحلقة الواحدة والعشرون
تعدات اياماتها مع محمود احلى من العسل ...كل يوم حب...كل يوم حب ...نسات مقابلة معز ولا حاولت تتناساها ...ماعادش تحب تفكر فيه ...كل لحظة تزيد تعشق راجلها وتتعلق بيه ...وهو تحسو ماذابيه يحطها في عينيه ويسكر عليها ...وكل ما يتعلق بيها اكثر تزيد غيرتو عليها اكثر ...حتى كيف تخرج هي وحياة باش يقضيو قضيات ولا يحوصو بيوسف لازم يتفقد حوايجها قبل ...ويبدا يخرنن عليها ويمرجها باش تروح ...وفي الليل ...ههه يرضيها وينسيها كل شي ...محمود مرة في الخدمة عامل اجتماع ..كان معز قاعد في الاجتماع ...هو من اول مادخل للشركة ماهضموش ...وزاد غزل عليه من نهارت الحفلة ...حسو يغزر لمرتو ...غزرة ما عجبتوش ...ماهيش بريءة..فد وهو قاعد معاهم ...تلفت لتوفيق وقالو
-اففف ها المخلوق هذا ماذابيك معادش تجيبهولي في الاجتماعات ...ماعندو علاش قاعد معانا !!
-تي ماهو لمينا المهندسين الكل متاع الشركة باش كل واحد يقدم مشروعو ...وباش ندرسوهم ونشوفو اناهو اللي انسب وهو قدم دوسييه قلت خلي نعطيه فرصتو
عقد وجهو وهو يقحرلو من تحت لتحت
-تي بهيم بهيم من غير ما تشوف شي من عندو .ًقداش ليه يخدم معانا تو ؟ تي انا كيف قبلت دوسيه قلت مهندسين شباب خلي نعطيهم فرصتهم وزيد عربي وولد بلادي وتعرفني نحب نعاون ولاد بلادي ...اما هو ماعطى حتى اضافة ...حاول باش تسقدو خاتر انا فديت منو ...اعطيه هبوطو !!حطو في شركة اخرى ؟المهم يبعد على وجهي !!
-باهي تهنى ..تو نتصرف
بعد الاجتماع دخل محمود لبيروه وقعد ..جابتلو السكرتيرة القهوة ...قعد يشرب فيها وحل الكام يتفرج في مرتو في الدار ...ولات هاذي هوايتو المفضلة ...كل مايقعد وحدو يحل ويقعد يتفرج فيها ..حاسس روحو ما ينجمش يشبع منها ..كل ما يزيد نهار كل يتعلق بيها اكثر وكل ليلة كيف يبدا مروح يحس روحو متوحشها عاللخر ...كانت تقري في يوسف وتلون معاه ...بعد هزت كتابها وقعدت تقرا فيه ...سمع الباب دق
- تفضل!!
ودخل سي السما معز
- صباح الخير سي محمود
- صباح الخير..تفضل
- سي محمود حسيت الخدمة متاعي ماعجبتكش ...ضاهرلي حتى قبل ماتشوف مشروعي ؟
تكى يديه على الطاولة وقعد يلعب بالستيلو
- والله مانيش انا المسؤول على المشاريع .فما مجلس ادارة هو اللي يقرر
- نعرف سي محمود اما نعرف زادة اللي الكلمة لولة ولخرة ليك
شد سيقارو وشعلو وقعد يغزرلو ...ومعز من داخل يغزل وفادد وماذابيه يطرشق عليه
-لا غالط ..انا مانيش دكتاتور هوني القرار ياخذوه اعضاء مجلس الادارة الكل وكيما قتلك اذا كان مشروعك مخدوم مليح مافماش علاش نرفضوه ...
تلفت معز على غفلة لقا في الكام خديجة في الدار قاعدة ...قلبو ولا يدق ...وماحبش يشلق االي هو شافها ..خاتر محمود نساه محلول وهو يحكي مهاه ...محلاها خديجة صحة عليه ...عندو الزهر في كل شي ...كان قلبو معبي بالحقد عليه ..غل وغيرة ...قام من الكرسي وقالو
-بارك الله فيك سي محمود انشالله يعجبكم مشروعي المرة هاذي وماتفقدش ثقتك فيا !!
اتكى محمود على كرسيه وباقي يلعب بالستيلو وقالو اي براسو من غير مايتنازل ويكلمو حس بالذل والاهانة ...وصل قدام الباب وبعد تلفتلو
-سلملي على مدام خديجة بربي!!
وقتها قام محمود يجري من بلاصتو وحس الدم طلع لراسو قحرلو بغزول
-والله مافهمتكش؟ شمعنتها نسلملك على مرتي ؟ياخي انا كيف نروح باش نقعد نحكي مع مرتي على جماعة الخدمة ..والله عنا حاجات اخرى نعملوها من انا نحكيو عالخدمة ..
سامحني سي محمود مافيباليش الكلمة هاذي باش تغششك ..!!!في بالي عادي نسلم على بنت بلادي راهو ..وتبسملو وخرج ..خرج وخلاه يتهز ويتحط...عدى يديه على شعرو بتنرفيز وعاود رجع قعد ...غزر للكام يلقى الصالة فارغة ...افففف نساه محلول والطحان كان هوني ..جاب ربي ماهيش موجودة .
في الليل بعد ماحطت خديجة لعشاء عيطتتلهم باش يتعشاو هو وولدو ...كانو قاعدين الزوز في الصالة يتفرجو ..باسها من جبينها وبدا ياكل ويتبنن وهي توكل في يوسف وساعات تحطلو قدمة في فمو وتضحك ...
-حقا محمود امي ناجية كلمتني اليوم تتشوكع !!
-اشبيها زادة ؟نهار كامل وهي تتكلم تقول لاصقة في التليفون !!
-هههه لا لا اما عرس اختك قريب مازالو شهر راهو وهوما وحدهم غادي مساكن يهزو ويسبطو وسناء عاملتلي ليسة طويلة عريضة باش نشريهالها من هنا ...الحاسل باختصار يحبوني نهبط باش نعاونهم !!
حستو قريب يشرق بالماكلة ...هز كاس ماء شربو وتلفتلها
- نعم للا؟ تمشي بحذاهم ؟وانا لشكون تخليني ؟
ضحكت وباستون خدو
- ياخي عرس اختك هذا راهو ...شكون باش ياقف معاها ؟
- مايهمنيش !!مازال عندي بروجي نعملو فيه ..نكملو بعد نمشيو مع بعضنا
ضحتلو بدلال وعنقتو
-امان حبي امان..عيب راهو ..المفروض نكون معاهم تو ..والله تسخف وحدها وامك مرا كبيرة
باسها من شفتها بوسة خفيفة
- حتى انا نسخف ...باش تخليني وحدي وتمشي..وانا شكون بيا ؟؟مانجمش نقعد في الدار وانت موش فيها ..من غير ماتبدا انت الدور وتغني ..نحب كيف ندخللها نرا وجهك قدامي يضحك ..نشم ريحة العشاء والدار تبدا دافية وفرشي يبدا دافي وسخون ..وصوت فيروز الصباح وام كلثوم لعشية ...لا لا مافماش مشي انسى ...
جاتو من تالي وعنقتو ..باستلو رقبتو وغمرت راسها فيها
-با روحي ياروحي وشوشتلو في وذنو باش مايسمعش يوسف ..ياخي انا نحب نمشي تسخايلني ؟تسخايلني نحب نبعد عليك ..؟تي انت روحي وممو عينيا !!! اما هاذي حاجة لازمة راهو ! عرس اختك كيف ماناقفولوش احنا اش كون باش ياقفلو ؟
وقف وهو يمسح في يديه وغزرلها وعينيه بكلها عشق
-هاني باش نرقد يوسف ونرجعلك ...اذا كان تحب تمشي يلزمك تعوضلي الايامات اللي باش تغيبهم الكل واضح!؟ قىرصتو من خدودو وباستو على طرف شفتو
-واضح واضح واضح
في الصباح دوب مادخل لبيروه ..لقا السكرتيرة متاعو متقلقة ..سالها اشبيها قالتلو راهو معز جا ء متغشش ويسال عليه ...هي مازالت تحكي معاه وهو جاه ودخل من غير ما يشاور كانت عينيه تتشاعل وكشاكشو خارجة
-عملت اللي في مخك سي محمود ؟حبيت تتخلص مني وعملت اللي تحب ؟
هز يدو وقربلو باهت
-نعم فاش تحكي انت ؟لاباس ماهو ؟نخدم عند جد بوك الكلب انا جاي عالصباح تعيط ...وقربلو يصيح عليه وبدا يدز فيه ...السكرتيرة كيف حستها باش تلحم مشات تجري تعيط لتوفيق خاتر كان هو اللي يهديه ..ومعز قعد يعيط
-المشروع ...المشروع متاعي رفضوه ...وباش يخرجوني ..عارف ..عارف اللي انت عندك يد في هذا الكل ..انت من اولك موش حاملني ..وزيد تو كيف ...كيف ...
-كيف شنوة اه ؟ كيف شنوة ؟تكلم حل ر** فمك !!اش تحب تقول ودزو من كتفو وبدا يصيح - انت انسان فاشل ..وانا اللي رفضتو مشروعك ..وباش نخرجك من الخدمة ..كيما عطيتك فرصة من الاول انا تو باش ننحيهالك وريني اش تنجم تعمل تره؟
- اش ننجم نعمل ؟ههه (وضحك بغزول ) برشة حاجات ننجم نعملها وكان تسخايل روحك قوي وعندك نفوذ راهو موش معايا انا ...
دخل توفيق يجري يلقاها لاحمة بيناتهم وباش يتضاربو شد صاحبو من كتافو ودز معز بعدو
-صلي عالنبي محمود رانا في الخدمة ماناش في الشارع ؟؟؟
-هاو الطحان جايني عالصباح يتهدد عليا يسخايل روحو راجل !!وعاود غزر لمعز وقالو -تو تخرالي فيه مالا هاني طردتك برا ارجع منين جيت يا سارح ..
وقتها معز خطرتلو فكرة باش يذل بيها محمود ... ،لازم يذلو ويكسرلو شوكتو ...وخديجة هي الحل !!!...مشا يجري ركب في كرهبتو ومشا طول ...لدار محمود...
-


الحلقة الثانية والعشرون 

قعد توفيق يهدي فيه .. وجماعة الشركة بداو يتلمو ..شطرهم موش فاهمين لحديث خاترهم قورّة اما عارفين اللي عرفهم متغشش عاللخر ...مشات السكرتيرة تعملو في قهوة وهو شعل سيقارو ويديه ترعش .. سكر توفيق الباب وقالو 
-هدي روحك تو.. ماهو عملت اللي مخك ؟.. البارح مشيتلو لبيروه وقتلو اللي احنا ماعادش حشتنا بيه فهم اللي الحكاية جات منك انت هذاك علاش جاك الصباح هايج 
-هايج ؟ هايج على دين والديه ؟انا يجيني واحد كيفو هو يطيحلي قدري ؟ والله لاما نكلفهالو غالية ؟ فرنسا لما نحرمها عليه الشلاكة .. مازال مايعرفنيش ؟ 
قعد يرحي من داخل ومن برا وقعد توفيق يهدي فيه ... جابتلو السكرتيرة القهوة وهو بدا يهدى بالشوية ....بعد ساعة بدات ترجع فيه الروح ورجع للخدمة ... وتفكر اللي هو باش يحضر الباسبور متاع مرتو وولدو باش يروحو ويقصلهم التساكر .. زاد فد .. كيفاش باش يقعد وحدو في هاك الدار وتولي ماعادش فيها حس الضحك متاعهم... حل الكام لعلاش كيف يشوفهم يتفرهد وترجع فيه الروح ... من الأول ما استوعبش !!!! بهت ..ههه كلمة بهت ولا تصدم ماتافيش بالغرض ؟ لالالا ... كان معز واقف مع ...مرتو في وسط الصالة وظاهرين يتناقشو وهو يعيط عليها ..وقف ..بدنو الكل حسو ملخلخ...وتفجع ..اول مرة يحس بالفجعة والخوف ... الطحان مشا لدارو ؟ مشا لدارو ؟ اش يحب يعمل ؟ هز مفاتحو وخرج يجري ... مايعرفش على روحوكيفاش هازتو ساقيه ولا وين واقفة كرهبتو ؟ يهز في التليفون ويكلم فيها ..زاد تفجع كيف ماكلمتوش...ياربي !!!والله كان يمسها هي ولا ولدو لاما يقتلو ويدفنو في بلاصتو الكلب ..الكلب ... بدا يجري في الكياس ويضرب على الفولون بغش ..ليوم لاما نقتلك يامعز الكلب ..
وقتلي حلت خديجة الباب اخر واحد كانت تتصورو ياقف قدامها هو السخطة معز !! 
-لاباس في مخك انت ؟ جايني لهوني اش تحب عندي ؟ 
ووقفت قدامو باش مايدخلش .. كانت عينيه تتشاعل وفيها غل ..دزها ودخل طول للصالة وهذا كان الهدف متاعو .. لقا ولدو يتفرج في التلفزة زاد غزل وغزرلها وهي مفجوعة 
-في بالك ؟ في بالك راجلك طردني من الخدمة ؟ الكلب ذلني كيما حب وسمعني ما نكره ؟ 
مشات خديجة تجري ليوسف هزتو وهو يغزر للراجل باهت قاتلو باب اطلع لبيتك العب خاتر فما حاجة تكسرت في الدار وعمي جاء باش يصلحها ؟ 
طبس راسو ومشا يجري لبيتو .. تلفتت لمعز وبدات تصيح عليه
- علاش يطرد فيك ؟ سمع بالحكاية ؟ كانت ترعش وخايفة 
- هه هذاك اللي همك انت ؟ لا ماسمعش ..هو من اصلو ما يهضمنيش وحتى انا نكرهو !! راجلك متكبر وضاربو في روحو وعندو لعباد تفش .. الحيوان قصت عليه تصيح 
- ماعادش تقول حتى كلمة على راجلي فاهم ولا لا ؟ انت هو الحيوان ..راجلي خير منك واشرف منك ياكلب ..اخرج من داري اخرج !!
شدها من كتافها وبدا يخض فيها 
- دارك وراجلك ؟ تو ولات دارك وراجلك ؟ وتربي في الكبول متاعو ..اللي من المفروض راهو تو عندنا ولد قدو كان عرسنا .. علاش خديجة علاش ؟ علاش كرهتني ؟ نسيت هاك الايامات ..نسيتها ؟ 
جبدت روحها وهربت وهو خلط عليها زاد شدها بالسيف .. ماحبتش تعيط باش ماتخوفش يوسف بدات تكلم فيه بالسياسة 
- سيبني معز سيبني ..عيشك سيبني ..اش تحب عندي ؟ اش مدخلني انا في خدمتكم ومشاكلكم ؟ 
سمع حس كرهبة قربت ووقفت قدام الدار وهي من الخوف من الربثة ماسمعتهاش ..سيبها وبدا يبعد ..غزرلها وعينيه بكلهم وجيعة 
- سامحني خديجة ..سامحني .. المرة هاذي زادة باش نوجعك .. وباش نتخلى عليك .. الله غالب جيت انت في الوسط ..
- اش ..اش تقصد ؟
مازالت ماكملتش كلمتها والباب تحل ودخل محمود يجري ... لقاهم واقفين في وسط البيت .. خديجة حالة فمها من الصدمة ومعز يتبسم بحقد ... مشا لمرتو يجري سالها 
- اش عملك الكلب كلمني ؟ خديجة عملك حاجة ؟ 
وتلفتلو شدو من خناقو وضربو ببونية وبرك عليه ..
-ياطحان ..يا ولد لحرام جايني لداري ياكلب يامسخ ...اش تحب من عندي ومن عند مرتي يامي***؟ 
وهو يغزرلو بشماتة قالو 
- مرتك هذيكة نعرفها قبل ماتعرفها انت يا... هه سي محمود 
سيبو وبعد شوية وقعد يغزرلو نظرة متاع تساءل وغزر لمرتو يلقى وجهها احمر وترعش بكلها ..عملتلو براسها لا وغزرت لمعز ودموعها هبطو ...
-اش تقصد؟ 
بعد شوية لشيرة الباب وقالو وهو في قمة الشماتة 
-انا ومرتك كانت عندنا علاقة لمدة أربعة سنين .. وعرضت عليا باش نعرس بيها وانا رفضت .. ههه خليتهاك ليك انت ياسي ..محمود ... وخرج ..خرج وحس روحو هكاكة انتقم لروحو .. حس روحو تفرهد ... خرج وخلاه واقف في بلاصتو كيف المشلول ... حس بدنو الكل تخدر ويبس ..قعد كلامو يزن على راسو وهو موش مستوعب اللي سمعو ..موش مصدق !حس حياتو لكل نهارت في اللحظة هذيكة .. اللي بناه الكل مع مرتو طلع وهم .... طلع عايش في وهم ..وهم .. الحب اللي عطاتهولو الكل وهم .. طلعت تحب واحد اخر وكذبت عليه ... هو محمود اللي عطاها قلبو وعقلو وسلملها في حياتو الكل وامنها على شرفو طلعت تكذب عليه ؟؟؟طلعت تخدع فيه الوقت هذا الكل؟ ... مافاق كان على صوتها وهي تكلم فيه بالشوية 
-اما..ن ..امان محمود خاللي نفسرلك ؟ مانجمش يتلفتلها ..مايحبش يشوفها ... مايحبش يضعف ... كان صوتها يرعش بالخوف .. شدتو من يدو ...وكان يعقل ..دزلها يدها وتلفتلها من غير مايغزرلها ..عطاها الكف لول والكف الثاني .. حس بغل كبير في قلبو وضياق النفس عليه ..كركرها من شعرها وبدا يصيح 
-في داري ياكلبة ؟ في داري ؟ امنتك على شرفي ياكلبة ..يافاجرة وبدا يضرب ويصيح ماهوش واعي ..فقد السيطرة على روحو ..طيحها على Lcanapé وبدا يضرب يضرب يضرب .. على قد ماحبها على قد ماكرهها في اللحظة هذيكة ..بدات تصيح وتعيط مارحمهاش ...مافيقو كان صوت ولدو وهو يصيح 
- ثيبها ثيبها نكرهك نكرهك ثيبها ماعادث تزربها ثيبها .. وشدتو هستيرية متاع بكاء ... ماحسش بروحو اش عمل كان كيف سمع صوت ولدو ... كان وجهها مدمدم والدم خارج من فمها ومن خشمها .. سيبها ... هو سيبها وهي مشات تجري ليوسف تعنق فيه وتبكي 
-لا مضربنيش ماضربنيش ..بابا ماضربنيش .. انا .انا طحت وهو شدني ماتخافش .. وقعدت تعنق فيه وهو يبكي ويغزر لبوه 
-لا زربك زربك ريتو زربك ..؟ نكرهو انا نكرهو .. زادت عنقتو .. وقعدت تمسح في الدم بيديها ... وتسكت فيه وهويغزرلهم ..حتى ولدو كرهو ..؟ حس بوجيعة قوية في قلبو ... كل شي انهار في لحظة ... هبط على الكرسي وحط وجهو بين يديه ... كانت يديه مسخة بالدم متاعها وبدنو الكل يرعش .. حس روحو مازال مابردش قلبو فيها ..مازال يحب يضربها ... موش يضربها يقتلها .. يقتلها كيما قتلتو هي .. مازال موش مستوعب الليي صار .. كايني منامة خايبة يستنى وقتاش يفيق منها !!! نحى lunette متاعو رماها بحذاه وقعد يعدي في يديه على وجهو وعلى شعرو .. قعد يسمع فيهم يبكيو الزوز وهي تسكت في يوسف وتريض فيه ... مانجمش يهز راسو ويشوف نظرة الكره في عينين ولدو ... عينيه تملات بالدموع .. مايحبش يبكي مايحبش .. ماتستاهلش حتى دمعة يهبطها على خاطرها ... هز مفاتحو وخرج يجري وطربق الباب وراه ..
خديجة بدنها الكل يوجع ... كانت مكبشة في يوسف وتبكي .. تبكي عليه وعليها ... كل اللي بناتو في لحظة تحطم قدام عينيها .. في لحظة تهدم كل شي ... ويوسف من الفجعة بال على روحو ...
-ماما ديذة .. اندك دم ..اندك دم .. املك دم بابا .. 
قعدت تبوس فيه وتحاول باش ماتضهرلوش ولات تضحكلو 
-لا بابا ماضربنيش .. ماضربنيش .. انا طحت وراس ولدي طحت .. بابا يحبنا راهو .. مايضربناش ؟ 
قعد يضرب بساقو على القاعة ويصيح 
-زربك زربك نكرهو نكرهو ... 
حست بدوخة ووجيعة في كرشها .. وجيعة بدات تقوى .. حاولت تهز روحها قدام يوسف .... كركرت روحها لتوالت نظفت وجهها من الدم ..كان خارج من كل بلاصة ووجها تنفخ من الكفوف ... لتو من الصدمة موش مستوعبة اللي صار ؟ موش فاهمة ..علاش صار هذا الكل ؟ علاش هي بالذات ربي ما يحبهاش ؟ علاش وين تسخايل روحها قدمت خطوة تلقى روحها رجعت عشرة خطوات لتالي علاش؟ علاش ديما هي اللي تخلص ؟وقفت قدام المراية... شدتها هيسترية متاع بكاء .. هبطت على ركايبها وبدات تبكي تبكي لين حست الدموع نشفو من عينيها ..ويوسف مكبش فيها ماحبش يسيبها .. حستو خايف عاللخر ... لازم تقوم وتشد روحها على خاطرو .. هزتو لبيتو بدلتلو حوايجو وقعدت معاه فوق الفرش ترقد فيه وحطت راسها عالمخدة بحذاه وغمضت عينيها من التعب ...

الحلقة الثالثة والعشرون
تعدات العشية موش عارفة قداش الوقت...رقدت رقدت لين تعبت من النوم ...ماحست كان بيوسف يتحرك تحتها متقلق ...عنقتو ياخي فاق ....غزرلها ولا يبكي
-دم دم ماما ديذة دم !!!
بدات تسكت فيه وهي تمسح في وجهها وتتوجع ..تحس في بدنها ماعادش فيه حتى عظمة صحيحة ً
-ماتخافش بابا وفا الدم وفا معادش فما دم ..هذاية من الطيحة قبيلة ..وعنقتو تلقاه عاود مسخ روحو بالpipi قامت تهز في روحها بالسيف طلت على المنقالة تلقاها الستة متاع العشية ...حست بدوخة قوية وقلبها غم عليها ..مشات تجري لتوالت ردت ردت حتى خرجت اللي في كرشها الكل ..ويوسف قعد بحذاها واقف يغزرلها موش فاهم شي ...مسكين قلبها دم عليه ...ماهوش مستانس يشوف في المنظر هذا ...كان عليها هي ستانست ...بدنها حلف ...من صغرتها وهي تاكل في الكفوف وتسكت ..ماتتكلمش...طول عمرها عايشة في الذل والاهانة ..ماعدش فما حاجة تقلقها ...حتى كيف ذاقت ايامات حلوة حسدتها الدنيا عليها ...فيقتها من المنامة الحلوة اللي عاشتها ورجعتها للكابوس ...هههه تي حتى هي من قوة الفرحة اللي عاشتها ماصدقتش وولات تستنى وقتاش باش تجيها المصيبة ومنين ؟ حسبي الله ونعم الوكيل فيك يا معز !! حسبي الله عللي عملتو !!!قتلتني بالحياة ومسختلي شرفي !!حطمتني انشالله تلقاه يا ساقط ...!!! هزت روحها والدوخة لاعبة عليها ...بدلت ليوسف وهبطت هي وياه الكوجيينة ..طيبتلو املات وبدات توكل فيه ...مسكين جاع ولا ياكل بالزربة ...بعد ماكملتلو حللتلو التلفزة وخلاتو يتفرج ....زاد غم عليها قلبها وعاودت ردت ...غزرت لروحها في المراية ..ماعرفتش روحها ..وبدات تبكي بالشوية ...وجهها ...وجهها اللي يبدى يتغزل بيه كل يوم !! وجهها اللي يحطو كل يوم في حضنو وما يرقد كان ما يغطسو فيه ....وحهها الكلو مدمدم ...الكلو منفوخ ...شفتها مفلوقة ...بلايص بلايص زرق في وجهها وفي رقبتها وفي بدنها الكل ...وهو لتو مافماش ريحتو ...ماالي خرج الصباح مارجعش وماتفقدش حتى ولدو االي يرعش عليه ..مشات قعدت في الصالة وتغزر للوقت ...اتكات وحطت يوسف بجنبها تلعبلو على شعرو .. جات الثمنية وجات التسعة وهو حتى خبر...بدا قلبها يتوغوش ...اي يتوغوش ...بالرغم اللي عملو فيها الكل هي عاذرتو .. هو ما سمعهاش ...سمع كان الكلام اللي قالو معز ...كيما حب يوصلو شماتة فيه ...باش يذلو بيها وهذيكة كانت خطتو كيف قالها سامحني جيت انت في الوسط ....يعرف اللي محمود يغير عليها برشة ....شافو كيفاش يتصرف في الحفلة معاها...عرف نقطة ضعفو وين وضربو فيها ...اما الكلب عمرو ما مسها ولا حط عليها يدو ...عمرها ما خلاتو ...كانت ديما محافظة على روحها للراجل الي يستحق ... في نهار من النهارات كانت تسخايل معز هو الشخص هذاكة ...كانت تسخايلو باش ياقف معاها ويحميها من بوها ومرت بوها ...ياخي هرب ....هرب وخلاها تواجه مصيرها وحدها ومكفاهش اللي صار زاد عمللها العملة هاذي !!!!
جات الحداش تاع الليل ومحمود ماروحش ....هزت يوسف لبيتو رقدتو وقعت تمشي وتجي في الصالة ....تفجعت وماعرفتش اش تعمل ....مشات تجري للتليفون وكلمت حياة
-الو حياة ؟سامحني كلمتك هالوقت ...راجلك في الدار بربي؟
- السماح وه توهذا كلام تقولو؟اي هاو في الدار ...علاش؟
-امان تقلو يكلم محمود يشوفو وين .. ؟ من الصباح خرج لتو لا رجع والله تشغشبت ؟؟
-وه شبيه لتو ؟توفيق قالي عمل عركة الصباح مع مهندس في الخدمة اما مبعد سكت وراض!! ياخي قعد يغزل على الحكاية ولا شنوة ...؟؟وانت كلمتو؟
تنهدت وقالتلها
-لا ماكلمتوش . حياة امان قصة طويلة ..تو ..تو نحكيهالك ...المهم قول لراجلك يشوفهولي وين يعاود يكلمني يفرحك !!!.-باهي باهي وعلقت التليفون .
قعدت شادة ومكبشة في التليفون وقلبها ولا يرعش ويدق ...شوية من الفجعة شوية من قلة الماكلة ...ماحطت في فمها شي من الصباح ...حتى لين غم عليها ...بدات تمشي وتجي ...تمشي وتجي ...حتى لين نوقز التليفون ..هزتو وايدها ترعش
-ا...الو ؟
-الو قالها توفيق ...اسمع هاني لقيتو محمود . اما ...
-اما شنية امان؟وبدات تبكي
-ما تخافش ماتخافش ...سكران خيط راهو ...حتى الكرهبة ما ينجمش يسوقها ...هاني باش ناخولو قهوة قوية تفيقو ونتلها بيه حتى لين يفيق ...برة ارقد انت على روحك واتهنى
-عيشك يا توفيق ...عيشك رد بالك عليه !!
-تهنى تهنى ! ماتخافش ..
علقت التليفون وقعدت تبكي ...

تبكي على سعدها المكبوب وايامها الحزينة ...موش عارفة اش باش تعمل في حياتها كان يخرجها محمود من حياتو ؟وين باش تمشي؟ علاش ياربي علاش ؟علاش ماسمعهاش ؟ علاش ماحاولش يفهمها ؟علاش عطى لفرصة لواحد ساقط وواطي يحقق اللي يحب عليه ؟ ...تعبت من كلمة علاه ..تعبت ..ماعادش عندها حتى القوة باش تخمم ولا تفكر... طلعت بالشوية ودخلت لبيت يوسف ...كان راقد كيف الملايكة ...حطت مخدة ورقدت بحذاه ...هزها النوم ومافاقت بشي ...حست بوجيعة في بدنها .حلت عينيها مفجوعة ...تلقاه واقف قدامها ...كان وجهو تاعب وعينيه حمر ...ماغزلهاش ....ملفت وجهو عليها ...
- قوم اخرج من البيت نحب نقعد مع ولدي شوية !!!
سخفتها حالتو ...كان من المفروظ في الوقت هذا يبداو راقدين معنقين بعضهم ...حست بالدوخة وبالبرد في بدنها ...طبست راسها وجات قايمة عاودت جاتها الدوخة ...جات باش الطيح لقفتها يديه...شدها ورماها في حضنو ...قعدت مكبشة فيه ...قداش حست بالدفاء والامان؟ ...قداش حضنو حنين ؟ .ياريتو يخليها عندو ويخبيها؟ ياريتو يحس بالخوف اللي داخلها ويطمنها ويقلها ماتخافش ؟ ...حست بيديه بداو يبعدو فيها ...ورجع بدنها يحس بالبرد ...النفس متاعو بالشراب جاء في وجهها وهو يكلم فيها بصوت ضعيف
-قتلك اخرج ...اقلب منظرك عليا ..نحب نقعد مع ولدي وحدي !!
هزت راسها وغزرتلو ....عينيه فيهم وجيعة كبيرة ...كي
ف غزرلها حستو بهت تصدم من الضرب الي في وجهها ...اما ملتكلمش ...تنهد ومشا بحذا ولدو وقعد يبوس فيه بالشوية ويعدي في يدو عليه بكل حنية ...حبت تفسرلو ..تفهمو ..وقفت بحذاه وقاتلو
-محمو...د !! محمود ..خلي...

هز راسو وعينيه كلها غل هز يدو وحطها في فمو معنتها اسكت وقالها-اخرج ..اخرج عليا تو خير مانكمل اللي بديتو قبيلة ....
خرجت تجري وتبكي ..دخلت لبيت نومها ووقفت وراء الباب وقعدت تبكي ...عنقت بدنها بيديها ومشات رمات روحها في الفرش وتكمشت على روحها ...ودموعها عباو المخدة ... تسمع في صوت يوسف يصيح ويعيط ويقلو دم دم ..نكلهك نكلهك ...مشات تجري تجري ....حلت الباب ودخلت تلقا محمود حاط ركايبو اللوطة ووجهو فوق الفرش ويبكي ...يبكي بالشهقة ...ويوسف يصيح وخايف ....مشات تجري عنقتو اطمن فيه ...وتغزر لمحمود وحالتو ...
-يوسف بابا يحبك راهو ...ماتعملش هكة لبابا عيش ولدي ؟
تعنكش فيها ماحبش يسيبها ويصيح
-بابا يزرب بابا .. زربك زربك ...
وقتلي سمع محمود كلام ولدو ...قام يجري خرج وسكر الباب ..

الحلقة الرابعة والعشرون
قعد محمود في الصالة يتكيف ...السيقارو وراء خوه ... يتكيف ويشرب ...ويتذكر في اللي صارالكل ...مازال موش مستوعب ؟ ..مازال عقلو رافض الحكاية .. وتذكر وجهها .. وجهها فسد من الضرب ...حط راسو بين يديه وبدا يحك في عينيه ...النار لتو مازال يحس فيها شاعلة فيه .. ماحبتش تبرد .. وهاك الكلب قد مافركس عليه مالقاهش .. فص ملح وذاب .. تخبى كيف الجبان ..اما ماعندو وين يمشي ؟ تو يلقاه .. وتو يحاسبو على كل كلمة قالها ...اربعة سنين مع بعضهم ؟ أربعة سنين ؟ وقتلي سالها في الحفلة قاتلو مانعرفوش ؟ .. بكل صحة رقعة .. تمنيكو عليه الزوز ؟ قعد يمشي ويجي في الصالة ..حتى بقعة ماهي حاملتو ..فادد ..فادد .. اكثر حاجة ماثرة عليه هي ردة فعل ولدو !!.ولدو كرهو ؟ تاثر وولا يخاف منو ... ولدو يخاف منو؟ ولدو ولا يشوف فيه غول ؟
عدى يدو على شعرو كيماكل ما يبدا متوتر ..وتلفت شيرة الدروج ..يسمع في الحثلة.. كان الضو ناقص ..زاد قرب وبدا يطلع الدرجات ... يلقاها قاعدة في اول درجة وحاطة ايدها على كرشها والايد لخرى على فمها .. حس فما حاجة ...قلبو ولا يدق بالقوي وطلع يجري وقف قدامها ... كانت مطبسة راسها وتإن بالوجيعة وتبكي طبس عليها ...مافهمش شبيها جاء باش يشدلها ايدها لكن تراجع ..هبطلها ..وسالها
- اشبيك؟ اشبيك جاية تنوح هوني ماهو لاباس ؟
ماجاوبتوش ..باقي مطبسة راسها ...من الغزول شدلها شعرها وطلعلها راسها .. هزت يديها وغطات وجهها لاشعوريا ..خايفة لا يعاود يضربها .. قلبو عصر عليه .. سخفتو حالتها لكن ماحبش يضهرلها .. ماحبش يضهرلها ضعفو ... ماحبش يضهرلها اللي هو يحب يعنقها ويعنقها ويعنقها وينسى كل شي في حضنها .. ينسى اللي صار الكل ويرقدها في حضنو ...سيبلها شعرها وقالها بصوت ضعيف
-ما تخافش ..موش باش نضربك ..
وجاء هابط ..شدتو من يدو جمد في بلاصتو وما حبش يتلفت
- مح..مود .. وجي..عة ..وجيعة في كرشي .. وجيعة امان باش نموت ... باش نموت ..
تلفتلها يلقاها تتوجع بلحق هبط راسو اللوطة ..يلقى قلتة دم تحتها .. تفجع ..حس الدنيا دارت بيه .. من غير ما يشعر هزها بين يديه وهبط يجري من الدروج .. تمهمش .. حتى مفاتح الكرهبة يدور بيها ويفركس وهي ولات تصيح من الوجيعة وتقلو
-يوسف ..يوسف ماتخليهش وحدو .. يخاف ..
كان يجري ويلهث
- تو وقت يوسف ؟..باش تموت وتحكيلي على يوسف ؟
- جيبو ماتخليهش وحدو جيبو
- باهي باهي .. ماكانش عارف اش يعمل .. حطها في الكرهبة وطلع جاب يوسف وهو راقد بغطاه حطو من تالي وطار بالكرهبة .. يسوق ويديه ترعش وهي تتوجع وتقلو باش نموت ..باش نموت ..
- ماعادش تجبد الموت ..اسكت هانا وصلنا ..هانا وصلنا .
. وهو في الطريق كلم صاحبو توفيق باش يخلط عليه في الكلينيك .. ماعرفش على روحو كيفاش وصل؟.. ولا كيفاش جاو هزوها الفراملة يتجراو؟ كان الدم تحتها ماحبش يكف ..دخلوها لبيت العمليات طول وهوقعد شادد ولدو في الكلوار وهو راقد .. مافاقش المرة هاذي .. من التعب واللي شافو اليوم مافاقش ..مايعرفش قداش قعد لين جاء صاحبو هو ومرتو ..دخلو يجريو
- اش فما ياخي ؟ اشبيها خديجة ؟
حياة كيف رات يوسف في يديه خذاتو من عندو وحطتو في حضنها
-اشبيها خديجة ؟ قبيلة كلمتني صوتها مبدل وتاعب سالتها قاتلي شي ..ياخي اش فما ؟
- كلمتك ؟ وقتاش كلمتك ؟ (بهت)
- قبل مانجيك انا لوين ساهر .(جاوبو توفيق) . ياخي انا وحيت وحدي اللي انت ساهر غادي ؟ ماهي مرتك تشغبت عليك كلمتنا .. قاتلي فركس عليه راهو ماروحش من الصباح !! كان وجهو اصفر كيف الليمونة وعينيه حمر من البكاء والشرب ..تلفت للبيت اللي دخلوها فيها وهوما الزوز يغزرولو ..
- تو نحكيومبعد ..كان صوتو تاعب ... خلي نطمان عليها بعد تو نحكيو ..
قعدو الثلاثة يستناو .. لين خرج الطبيب ..نقز يجري يسال فيه على مرتو وتوفيق معاه ..
لاباس دكتور ؟ اشبيها ؟ ( بالطبيعة بالفرنسية )
غزرلو الطبيب غزرة متاع لوم
- انت راجلها ؟
- أي انا ؟
- المدام على شعرة ..كانت باش تخسر الصغير اللي في كرشها
عينيه وساعت من الصدمة والمفاجاة
- صغير ؟ صغير ؟ م..مرتي حبلة ؟
- علاه انت ما فيبالكش ؟
- لا .لالا مافيباليش.. ؟ والله لافي بالي
- جاها نزيف من الضرب اللي كلاتو في بدنها الكل .. وغزرلو باحتقار .. على كل حال هانا وقفنالها النزيف وركحنالها الصغير وانشالله ماتصيرش مضاعفات .. يلزمها تبات تحت المراقبة الليلة ..
الطبيب مشا وهو دموعو هبطت بالوقت .. هز يدو وضربها عالحيط من الغل .. وتوفيق قعد يغزرلو باهت
- ياخي الطبيب قال باش تطيحو من الضرب ؟ ولا انا سمعتو بالغالط ؟ بالكشي ماعادش نفهم اللغة انا؟
تنهد تنهيدة قوية وتكى راسو عالحيط
-لا مافمهتش بالغالط... انا اليوم كنت باش نقتل ولدي .. كنت باش نقضي على روح بريئة مازالت ماخرجتش للدنيا ؟ وليت مجرم انا اليوم ..وحط ايدو على وجهو ..انا اليوم استجرمت !!! حتى ولدي كرهني وماعادش يحب يشوفني ... ولدي كرهني ياتوفيق ولدي كرهني ...
شدو من كتفو قالو
- هيا نخرجو نحكيو البرا وفهمني اش صار ؟
-نحب نشوفها .... على الأقل نطمن عليها .. وغزر لشيرة الباب لمسكر
- لا فايدة تو ..سمعت الطبيب قالك باش تبات ليلة غادي .. هانا قاعدين حتى لين يخرجوها .. خلي حياة تروح بيوسف معاها واحنا خلي نحكيو داكور ؟
هز راسو ومشا معاه وهو قلبو الكل في هاك البيت ....

- تو هذا كلام تحكيه ؟ ( بعد نص ساعة في القهوة متاع الكلينيك) ياخي هبلت ؟ قالو توفيق ... تشد مرتك تفشخها وقريب لاتطيحلها صغيرها خاتر جاك واحد كلب مايسواش موش راجل قالك كلمتين صدقتو ؟
كان يتكيف في السيقارو وعينيه سارحة
- اما هي مانكرتش ؟ ماقالتليش لا موش صحيح ؟
- انت خليتلها الفرصة باش تحكي ؟ قعدت معاها وسإلتها ؟ وحتى كان صحيح ؟ ماعندكش الحق باش تحاسبها على الماضي متاعها ؟ هي تو مع شكون ؟ هي حاسبتك مع قداش من مرا رقدت ؟
- مارقدتش معاه !! لا قص عليه وحس بدنو الكل يغلي .. مارقدش معاه ..انا...انا كنت لول في حياتها حتى حد مامسها قبلي انا ..
- RAION DE PLUS !!مالا على شنوة تحاسب فيها ؟ على علاقة صداقة ؟ علاقة افلاطونية تصير لاي طفلة في بداية حياتها؟ ..وهز يدو حطها فوق راسو .. فهمني فهمني ؟ مخك هذا شولى فيه ؟ ياخي طلعتلك شعرة سيدنا علي كان معاها هي ؟ الطفلة خنقتها ..نرا فيك راهو كيفاش تتصرف معاها.. تعس حتى على لبستها .. ياخي كنت هكا مع كريستين ؟ هاي كانت تمشي وتحوص وتسافر مع صوحابها ولا عمرك حاسبتها ؟ ويني لسبري متاعك ؟ جات في هاالمغبونة وولات حزارة ؟
- وقتلي سالتها في الحفلة تعرفو ولا لا قاتلي لا ؟ .. كذبت عليا .. كذبت عليا
- ماكذبتش عليك .
- شنوة تو تلقالها في المبررات انت ؟
- لا موش نلقالها خ..اطر واضح كل شي .. هي خبات عليك موش كذبت ..خبات خاتر راتك كيفاش تتصرف معاها .. خافت منك الطفلة .. وهاو اللي توقعتو صار ؟ دوبة ما سمعت الحكاية من طرف واحد فشخت دين أمها هكاكة .. لا فهمت ولا اطعمت ..
قعد مطبس راسو وساكت ..مشبك صوابعو في بعضهم ويحرك فيهم بتوتر .. قاعد يستوعب في كلام صاحبو .. قعد يتفكر اش صار نهارتها .. وتفكر كيفاش هددو معز .. تفكر نهارت الحفلة كيفاش يغزر لمرتو باش ياكلها بعينيه .. وهي ما عطاتو حتى اهتمام .. هي كان جات تحبو راهي حاولت تعمل المستحيل باش تقعد معاه ولا تقابلو .. هي ديما قدام عينيه ..حتى كيف تخرج تخرج مع حياة ولا معاه .. وفي الدار يبدى حاط الكاميرا ويتفرج فيها .. هي مافيبالهاش بالكاميرا .. وكان جات تحب تقابلو راهي كلمتو باش يجيها ... ووساعت عينيه وهويتفكر وقتلي جاه معز البارح يحكي معاه هو نساها محلولة !!! ضرب راسو على يدو ... اكيد ..اكيد راها ... راها وخطط لكل شي ... مشالها بلعاني للدار باش هو يراه ويجي يجري ... يعني وقتلي مشا كان يستنى فيه باش يقلو الكلام هذاكة ....وهو كيف البهيم طاح في الفخ متاعو .. وضربها ..ضرب حب حياتو .. ضربها وقريب لا قتلها وماخلهاش تفسر ولا تبرر شي .. غيرتو العمياء عليها خلاو عينيه تظلام وقتها .. غشو وقهرتو الكل فرغهم فيها هي ... وهي .. هي من طيبة قلبها حتى وهي مضروبة ودمها يجري مشات لولدو تسكت فيه وتقلو ماهوش يضرب فيا ... من حنيتها ومن صبرها ... تحملت الوجيعة نهار كامل وساكتة باش ما تزيدش تفجعو .. ماشكات الحد .. حتى كيف كلمت حياة كانت مشغوبة عليه !!! حتى بعد اللي عملو فيها تحيرت عليه .. تحيرت عليه خاتر تحبو هو .. تحبو هوبرك.. ..

الحلقة الخامسة والعشرون
حياة تمسحلها في وجهها بقطنة وتتحسر ..وهي راقدة عالفرش ...يوسف يلعب بحذاها ...ما حبش يبعد ..نهارين تو وهو لاصق فيها ...وما يحبش يكلم بوه ..بلي حاولت معاه شي ...
-بصراحة!!قالتلها حياة وهي تلم في الدواء والقطن ..هاني نعرفو محمود اكثر من عشرين سناء ..اما يعطيه كسرة في يديه ...وه ؟ حتى الحيوانات ما يتضربوش هكا ؟ اشبيه هبل ؟ والله لاعاد نعقلو وليت !!عمري ماتصورت يعمل عملة كيفما هكة!!!
تنهدت وتكات راسهاعالمخدة ...حست بالدموع على طراف عينيها ...ماعادش تحب تبكي ...يزيها ما بكات ...الحاجة الوحيدة الي تحمد عليها ربي انو صغيرها اللي في كرشها منع ...راسو راس هم كيف امو ...قد ماكلا على راسو قعد مكبش في الدنيا ...محمود نهارين ما شافتش وجهو ...حياة قالتلها راهو نادم وباش يموت بالندم وما عندوش وجه باش يقابلها ...هذيكة طبيعتو ...في عوض كي غلط يجي يطلب السماح زاد هرب وخبا وجهو ...يعني بالطريقة هذية باش يحلو المشكل؟ هو لتو لا سمعها ..يعني قعد كلام معز بالنسبة ليه هو الصحيح ...حتى كان ندم على ضربو ليها اما في مخو الفكرة مازال كيما هي بالنسبة ليه!!
-هاني حضرتلها كل شي ...غدوة الصباح انشالله تقصد ربي هي وجو لتونس
طبس راسو وقعد في كرسيه يلعب بالستيلو فو ق الطاولة ويسمع في صاحبو وهو موش معاه جملة
-تو مازال حسابك مع ناجية كيف باش تروحلها هكاكة ؟ قد ما داوينا مازال وجهها مدمدم!!
-افف امان توفيق ماتزيدش تكمل على مابيا انت زادة !!وزيد ثبتلي من الطبيب بخصوص السفر ..انا مستحيل نخليها تمشي كان فما حتى واحد بالماية خطر عليها !!
غزرلو توفيق بغزول – والله مافما خطر عليها كان انت!! خلي تمشي تنفس المرا فوتها ..تحب تروح تبعد من منظرك !!
ضرب عالطاولة بيديه بعصب وبدا يصيح – كلكم درتو عليا تو ؟كلكم وليتو تكرهوني ؟ ..توفيق راني عشير عمرك !! ولا لخرى مرتك ولات تدور وجهها عليا كيف تراني ..خلي عادة من ولدي وليت بالنسبة ليه الوحش اللي يقرا عليه في القصص !! علاش ماتحبوش تفهمو علاش ؟
شنوة تحب نفهمو شنوة ؟اه ؟ شنوة ؟ ضربتها خاتر غاير عليها ؟ ضربتها على خاتر لاخر جرحلك كرامتك كيف قالك نعرفها قبلك موش هكا ؟ رجعت وقتها الراجل الشرقي الي يحب يملك الانثى ليه هو وحدو ..مايلزمهاش تعرف لا قبلو لا بعدو ..ما يلزمهاش تعيش كان كيف تعرفو هو كهو ...تفكير ذكوري بحت ...اناني ..
- اي اناني ..اناني ...انا اناني ..نحبها ليا انا وحدي ..توفيق انا اللي علمتها كل شي ..تعرف شنية معنتها علمتها كل شي؟وحتى كان كبرتها في فمي ...حتى البوس علمتها انا كيفاش تبوس ...
طبس راسو ووطى من صوتو ...توفيق حس بوجيعة في كلامو
-توفيق الاحساس اللي حسيتو معاها بعمرو ..بعمرو لا حسيتو في حياتي ...كانت بين يديا كيف الطفلة الصغيرة اللي تاخذ في دروس ..حبيتها ...حبيتها وعاللخر زادة ..!! حتى كريستين ...كيف عرفت خديجة نسيتها جملة ..كايني ماكانتش موجودة في حياتي ..عشرة خمستاش سنا نسيبتها معاها ..ام ولدي نسيتها تي هو ولدي ..ولدي اللي خذيتها بالاساس باش تربيه وليت نغير منو ..تتصور ..نغير من ولدي ..كيف تعنقو ولا تتلهى بيه نغير ..نغير!! ..فماش اكثر من هكة حب ؟ فسرلي توفيق فسرلي اش تسميه هذا ؟ غطى راسو بيديه وقعد ساكت ...ماعادش عندو ما يفسر ..الي فما الكل قالو ..قعدو شوية ساكتين وبعد تكلم توفيق بالشوية
- هاني باش نحكيلك اللي صار وخليفتي على ربي !
هز راسو وغزرلو
- شنوة باش تحكيلي ..؟فما حاجة مانعرفهاش انا؟
- مع انو حياة حلفتني باش مانحكيش اما ...اما والله سخفتني ..حالتك تسخف بلحق
- تكلم ماتزيدش توترني .!! حلفتك حياة ؟ ولان عاملة حزب معارض حياة ؟
- هههه ...
- باهي احكي !!
-
-في بالك بمرتك قارية هندسة كيفنا؟ 
قعد يغزرلو باهت -شكون اللي قارية هندسة؟
-مرتك ..مرتك قارية هندسة كيفنا !! 
- اش تحكي انت؟ انا هندسة ؟ وقعد يتذكر نهارت اللي هزها للمكتبة والكتب اللي شراتهم ..وقتها قعد باهت فيها اما ما عطاش الامر اهمية ...وقتها موش مركز على الحكايات هذوكة ...كان تفكيرو هو وقتاش يروح باش يرقد معاها ...يا ولا احوال ...قداش طلع بهيم الزح ..عاود غزر لصاحبو وقالو 
-كمل توفيق كمل ...هاني طلعت مانعرف شي انا 
- والله هاذي موش غلطتها ..انت ماحاولتش تعرفها !!!
-نعرف نعرف ..كمل اش كنت باش تقول 
- تعرفت على هاك الساقط في الكلية ..اول مادخلت تقرى ...جاية ما فاهمة شي وزيد موش في بلادها ...هو حسسها بالامان ويعامل فيها بالباهي 
حس الدم طلعلو وهو يسمع فيه ..
- من غير تفاصيل ..احكي 
- لا ماتخافش ..ماهو نعرف تفكيرك انا ...مامسهاش بلكل !! ماهو هذا اللي تحب توصلو؟ ومن اصلو ماحبتوش ..هذا اللي حكاتو الحياة ...كانت تسخايل روحهاتحبو اما طلعت غالطة 
قعد يضرب على الطاولة بالستيلو وهو متوتر 
-حاصل من غير ما نطول ...بعد اربعة سنين مع بعضهم صوحاب ...بدات اللسانات والكلامات ..وفما جماعة من بلادها جاو يقراو بحذاها ..مشاو عاودو لبوها ...جاها كشاكشو خارجة وهي في عامها لاخر ...ضربها ..وبطلها من القراية .. وكانت هي حلمها انها تكمل القراية ..هذاكة كان املها باش تخرج من الهم اللي عايشتو في دارهم ...هربت للكلب معز ..طلبت منو يكتب عليها الصداق باش بوها ماعادش يولي عندو حتى سلطة عليها ...وتكمل قرايتها ...قالها على شرط نرقد معاك ...
- توفيق تو نرمال انت؟ تحكي على مرتي راهو ؟؟؟ ومن العصب والغزول تكسر الستيلو ما بين ايديه ..الساقط الكلب ..الحيوان .. 

- اي نعرف انا قاعد نفسرلك راهو 
- باهي كمل 
- قاتلو نكتبو الصداق وبعد مانتخرجو نعرسو ..قلها مانصبرش عليك حتى نتخرجو ..حسها كايني غنيمة وجاتو ليديه ...فرصة واستغلها ...وعلى خاطر شرفها ..رجعت لدارهم وبطلت قرايتها وكلات السطاكة لين فدت ..
ماينجمش يفسر اللي حسو تو؟ الظلم اللي عاناتو ما يوتوصفش ...كانت صغيرة وحدها تواجه في الدنيا ...كانت مكبشة في شوية امل باش تنجم تعيش...وصابرة ...قد ماسطكتلها الدنيا وهي صابرة ...تو حس قداش ضلمها !!حط راسو على الطاولة ...حس بالفشلة ...بالتعب ..حس بانكسار كبير ...بجرح كبير عملو هو بيناتهم ...كان وقف دقيقة ...دقيقة وحدة سمعها فيها ...راهو ماصارش هذا الكل ...
وسافرت خديجة ...رجعت لتونس ...من غير ما تشوفو ..لا جاء شافها ولا سلم على ولدو ..كان مخبي روحو وما يحبش يواجههم ...وهي حبت تراه ...تعرف اللي هو باش يخلط لعرس اختو ...اما حبت تشوفو ...تشوف عينيه كيف يغزرولها ...عينيه هوما اللي يقولولها شنوة يحس وقتها ...حطت ايدها على كرشها وتبسمت .. ولدهم ..ولدهم اللي بناوه ببرشة حب ..مكبش في الدنيا ...تعرف الي صار بيناتهم شرخ كبير ...اما مع الوقت ...يمكن مع الوقت تتداوى الجروح ..
جمعة تعدات عليه بعد ما سافرو ..كل يوم يروح للدار ساق القدام وعشرة لتالي ...الدار مافيهاش مرتو مايحبش يدخللها ...كرهها ...دارو كرهها .. كان ملهي روحو بالخدمة ..مايروح كان ميت بالتعب ...يمشي طول يرمي روحو في الفرش ويرقد ...ناجية كلمتو وسمعتو مايكره
-يا ساقط يا واطي ...هكا ربيتك انا؟ تضرب مرتك ..تضرب مرتك ياهامل ؟ وبرشة كلام قعد يسمع فيه وساكت ..ماعندوش ما يقول عندها الحق ...ماهوش راجل هو ...ماهوش راجل ..كيف حط يدو عليها ..ظلمها ..كسرها ...ذلها ...ااحمدااله كيف قعد ولدو حي ... حاجة باش تربطهم مع بعضهم طول حياتهم ...قعد عالcanapeواتكي بحوايجو ...حل التلفزة وبدا يدور من قناة القناة ...قعد شوية ...وبعد قام ...مشا للشان قعد يغزر للcdههه مكثر متاعهم لام كلثوم ...ماكانش يسمعها قبل من وقت اللي جات خديجة وهو يسمعها ..الحاجة اللي تتغرم بيها مرتو يتغرم بيها هو زادة ...حط cdومشا اتكى مرة اخرى ...وقعد يسمع ...اول مرة يركز على كلمات الغناية اللي تقول
حيرت قلبي معاك وانا بداري واخبي قلي اعمل ايه وياك ولا اعمل ايه ويا قلبى ...بدي اشكيلك من نار حبي ...بدي احيلك علي في قلبي...واقولك عاللي سهرني واقولك عاللي بكاني ...وصورلك ضنا روحي ...وعزت نفسي منعاني ...عزت نفسي منعاني حس كايني لغناية تعبر على احساسو هو وقتها
بدات دموعو هابطة ...حط راسو بين يديه وقعد يبكي ...هز التليفون وتكلم ..قعد ينوقز ..ينوقز وبعد هزت قعد ساكت وهي ساكتة ..تسمع في بكاه وساكتة
- ناجية؟ (قعدت تسمع فيه ) ...ناجية توحشتها ...توحشت مرتي ...ناجية رجعهالي ...رجعلي مرتي .تعبت ..تعبت ...ولدك تعب يا ناجية ..تعب ..سامحني ..ناجية جاوبني ؟
- ما تبكيش !! جبت راجل انا ..ماتبكيش ...تحب ترجع لمرتك ؟ قص تسكرة وايجا بحذاها ...ايجا لعرس اختك واقف معاها ..مرتك وولدك يستناو فيك ...غلطت ..؟ الرجال كلها تغلط اما مرتك بنت اصل وشريفة ..انا امك موش صغيرة واللي تعدى على حياتي موش شوية ..وقتلي خطرتهالك ..خطرتلك الممو ..خترلك اللي تصونك وتصونلك عرضك في غيابك وفي حضورك ..ايجا كب على راسها واطلب السماح منها ..وتو تسامحك ...مرتك ماتخليكش ..
قعد يسمع فيها ويبكي ...كان محتاج لكلامها ...كلامها يعطيه القوة ...يعطيه الطاقة ..كلامها يرتحو ..يعرفو باغلاطو ..كلام امو يفيقو على روحو ... .

الحلقة السادسة والعشرون

قامت خديجة دايخة كيما العادة .. وخواطرها دايرة .. مشات طول لتوالات ردت .... حاسة بالبيبي قاعد يكبر كل يوم في كرشها .. مسحت على كرشها وقعدت في حافة الفرش ..تتفكرفي بوه ...تبسمت وحدها وهي تتفكر في لهفتو عليها.. عشقو وغرامو اللي يخرجوها من سينتها ..تتذكر لمست ايديه لحنينة وهي تتعدى على بدنها الكل...حست برعشة قوية في بدنها الكل وتزوغيبة ...قداش محتاجتو في الوقت هذا ؟ قداش محتاجة لحنيتو ولغزرة عينيه كيف يذبلهالها ...تدوخ ..هبطت دمعة من عينها مسحتها بصوابعها ... هزت يديها وعنقت روحها بقوة ..حست بالبرد ..مع انو الطقس ربيعي ودافي حست بالبرد .. ماتحبش تتفكر اللي صار ماتحبش ... تحب تمحيه من مخها .. تحب تفقد الذاكرة متاع اللحظة هذيكة ..تحب محمود يرجعلها .. يرجعلها محمود متاعها .. محمود لحنين اللي يخبيها في حضنو وينسيها في كل شي ... قامت تشوف في وجهها في المراية ..تو جمعتين تعداو على الحكاية وجهها ماعادش فيه حتى اثر متاع ضرب .. بدات جروحها تبرى .الا جرح قلبها مازال .. اللي في يديه الدواء ماجاش .. هرب حتى هو من المواجهة ....لا يحب يقابلها ولا يكلمها .. حتى كيف يسال عليها ولا على ولدو يكلم اختو سناء ..خاتر امو ماعادش تحب تهز عليه وهو خايف منها زادة .اول ماوصلت لتونس وجاو تعرضولها في المطار تفجعو كيف شافوها هكاكة ...امو قريب تندب وجهها وقعدت تسال فيها اش صار ماحبتش تجاوبها ... يوسف هو اللي حكالهم ... أي ههه يوسف فضح بوه .. قود بيه لامو ..وبعد حكاتلهم هي اللي صار الكل .. الحق امو وقفت معاها وكلمتو سخسختو وهو حاستو سكت ما جاوبهاش .... تعرف اللي هو ندم ..لكن شنوة الفايدة ؟ كانت باش تموت بين يديه هي وولدها ...كان موش يوسف وقتها راهي الله اعلم اش صارلها ؟
تسمع في دقان الباب وبعد دخلت سناء
-صباح الخير خدوج
- صباح الخيرياعروسة
- اش من عروسة بربي ؟ والله حسيتو مساط العرس ؟
قامت ومشات عنقتها
- علاش اللطف ؟ ماعادش تقول هالكلام موش باهي راهو ؟
- بربي كل واحد مطيش في شيرة والجو مكهرب .. حتى خويا الكبير اللي معملة عليه هاو هارب بعملتو !!
- تو يجي خوك ماعندو وين يمشي ..احنا بطبيعتنا حتى قبل ما تصير المشكلة متفاهمين باش نجي انا بعد هو يخلط .. تهنى ...
- انشالله والله انشالله .. هيا امي قاتلك ايجا افطر قبل مايبداو الحركة
هبطو مع بعضهم يلقاو امو وولدو قاعدين في الفيراندا .. من وقت اللي جات بحذاهم وهوما هازينها على كفوف الراحة ..حتى يوسف لاهيين بيه هوما .. جابو مرا بالذمة باش تتلها بالدار .. كل يوم دلال وشهاوي ولهاوي .. واموحاستها فرحانة بالحبالة اكثر حتى منها هي ..
- هاو الطحان باش يجي اليوم من السفر ..قالتلهم ناجية وهوما يفطرو .... (حست طول بفوارة قوية وبدنها سخن ورعش فرد وقت وقلبها ولا يدق ..يدق ..يديها ولات ترعش هبطتهم تحت الطاولة باش مايفيقوش بيها ..حست بريقها نشف ..شربت كاس ماء وراسها مطبس )
- يا بلحق ؟ فرحت سناء إياه تو فرحتي باش تكمل !!
- قال يوصل هوني مع الخمسة متاع العشية
- وقتاش كلمك هو ؟
- غزرتلها تقحرلها
- اش يهمك انت وقتاش كلمني ولا كيفاش ؟ واسمعوا هاني نقلكم ماتوريوهش اللي انتوما فرحانين بيه ؟
- يا؟ امي علاش تي ساعة والله متوحشتو وغزرت لخديجة وهي يعلم بيها ربي اش حاسة وقتها ؟ خوف مع الفرحة مع وجيعة ..كل شي تخلط مع بعضو ..
- أي ماهو نعرفك انت رهدانة ..باهي مانيش نحكي معاك انت انا ..نحكي مع اللي مدنقسة راسها من قبيلة !!
- معايا انا امي ناجية ؟ وهزت راسها غزرتلها وجها احمر باش يطرشق من الحشمة
- أي معاك انت !!.. اسمعي هو ماهو نادم عاللي عملو .. كلمني قالي يحب يرجعلك

عينيها زغللت بالفرحة وقلبها تحسو تنطر من بقعتو
- ماتفرحيش برشة ..قالتلها امو بعصب .. غزرتلها باهتة ..هاني انبه عليك باش يجي يزلبحك بكلمتين ويطلب السماح تمشيش ترجعيلو تجري كاينو لا صار ولا كان ؟
- وه ؟ ام..امي ناجية ؟ ياخي شوية اللي عملو هو ؟
- أي لا عليا انا الكلام هذا ؟ تي انت يبدى يكلم في سناء وانت نحسك باش تتنطري من بقعتك وتدخلي في وسطو التليفون ماني نعرفكم بنات تو ..باللي يعمل فيكم الراجل ..يجي يذبللكم عويناتو ترجعو كاينولا صار ولا كان ..!!
غزرتلها سناء واطرشقت بالضحك
- والله كلامها صحيح هههه!!؟ يامي خلي الطفلة ترجع لراجلها اش مكولفك انت
- لا دخلني !! وعاودت تلفتتلها .. بعد اللي عملو فيك يجي يدحنس عليك وتبيتيه عروس ؟ ماتت بالحشمة وطبست راسها..وقعدت تسمع فيها -ماترخصيش روحك .. هاني قتلك ... احقريه جملة باللي يكلمك ويقربلك ... مفهوم ؟
عملتلها براسها أي وهي ماتحبش من داخل .. افف تحبو يطلب السماح وترجعلو ..توحشتو توحشتو .. ياربي توحشتو ..اما كلام امو صحيح يلزمها تشد روحها .. أي يلزمها تشد صحيح ..
تلفتت لامو سالتها
- باهي ..باهي كيف يشد صحيح اش نعمل ؟
- ابعدي عليه ...اهربي من قدامو .. خليه هذاك داه عندي ..ماترجعيلو كان كيف نقلك انا ..سمعتيني ولا لا ؟
- باهي امي ناجية ..باهي .. ومشات بحذاها حطت راسها في صدرها وعنقتها ..ربي يخليك ليا انت امي والله ..كان جات وحدة أخرى راهي وقفت مع ولدها وجات معاه هو غالط ولا موش غالط ..
- انا مانحبكش رخيصة ...نحبك تكوني مرا فحلة .. يقدرك ويحترمك ويعملك الف حساب ..مايستسهلكش .. ويولي في كل مشكلة يحط ايدو عليك بسهولة وانت تسامحي .. لا ..ردي بالك ؟ هذا لمصلحتك ولمصلحتو عيش بنتي ..
تنهدت وزادت عنقتها وسناء قعدت تضحك وتدكك عليها
-أي أي تبع كلام ناجية تو تربح ؟ ههه.. تو يمشي يصوحب عليك وناجية مازالت ماقالتلكش ارجعلو هههه
وجهها صفار وهزت راسها تغزر لناجية تضحك
- بلحق امي ناجية ؟
- يابهلولة تصدقي فيها ؟ هو كان ماجاش يموت عليك ويغير عليك يصير هذا الكل ؟ تدكك هذيكة .. انا نقلك ولدي روحو وعقلو فيك اما يلزمو قرصة .. يلزمو ينحي التصعصيع متاعو ....مازال الوقت طويل قدامكم ..اذا كان في اول مشكلة ضربك هكة مالا كيفاش مبعد ؟ تهني موش باش نخليك برشة .. المهم اسمعي كلامي فهمتي عيش بنتى ؟
- اممم .باهي باهي ..
الخمسة ونص دخل محمود لدارهم يلقى الصالة فارغة .. دخل فاليجتو وبدا يعيط
-يا يا .. وينك؟
-خرجتلو مرامن الكوجينة قعدت تغزرلو باهتة .. مرا في الاربعينات هكاكة
- الا ناجية الفوق ترتاح راهي .. انت سي محمود؟
- أي انا .. ومرتي ولدي وينهم ؟
-خرجو مع العروسة يقضيو في قضيات من قبيلة ..تو عدك بيهم جاو ..
تنرفز وبدا يطلعلو لعصب
-يقضيو في قضيات ؟ علاه مافيبالهمش بيا جاي ياخي هوما ؟
والله مانعرف سي محمود ؟
-شكونك انت ساعة ؟
- انا جابتني الا ناجية باش نعاونها في الدار..تحب حاجة نعملهالك .. كانت تكلم فيه مربوثة ... قد ماتصورتو ماستخايلتوش مزيان لها الدرجة .. سبحان ربي اش خلق ؟
-لا شي .. طلعلي الفاليجة لبيتي هاني طالع لامي نسلم عليها
طلع الدرجات يجري كيف وصل قدام بيت امو وقف متردد وخايف ... ههه في 37 سنة و مازال خايف من امو ..دق الباب ودخل بالشوية .. يلقاها متكية في الفرش وتسبح ... هزت راسها وغزرتلو .. لا ضحكتلو ولا فرحت بيه كيما العادة قربلها .. جاء لفرشها وقعد مدلها يديه
- ناجية ؟ توحشتك ياناجية ؟ ماكش باش تسلمي على ولدك ؟
هزت يدها واعطاتو كف ... طبس راسو وقعد ساكت ..
- باهي بردتي قلبك تو ؟ قالها بالشوية وقرب لحضنها عنقها وباسلها راسها سامحني ياناجية سامحني نعرف روحي غالط
- غالط ؟ غالط ياطحان ؟ باش تقتل مرتك وولدك في كرشها وركبت بو صفير للطفل وتقلي غالط ؟ اه ؟ تكلم عاد حل فمك ؟
- ماعندي مانقول والله غالط ... خرجت من سينتي ياناجية الله غالب ... الكلب ضربلي على الوتر الحساس ..والغيرة عماتلي عينيا ..
هزت صبعها تهدد فيه
- اسمع هاني ننبه عليك ...والله مازلت تحط ايدك عليها لا عاد نخليك تشوفها حياتك الكل فاهم ولا لا ؟
- باهي كيفاش باش نمسها انا كيف مانحطش ايدي عليها .؟ . قالها يتبسم ويتمقعر
دورت راسها
-والله لاتحشمها ؟ مصح رقعتك .. هاني نبهت عليك ... مرتك بنت اصل ماكانش والله على هاك الدمديمة اللي الدمدمتها راهي شكات بيك غادي راهم دكوك في الحبس باش تشعف !!
- نعرف ..نعرف ياناجية والله نعرف ... بنت اصل وشريفة ونظيفة ...انا هو الساقط .. تي انا خسرت الناس الكل على ها العملة المشومة اللي عملتها .. الناس الكل كرهوني ..تي ابداها من ولدي ..لصحابي ..ليك انت ..الناس لكل دارت عليا !!
سمع حس ولدو يضحك وصوت سناء تعيط
- يا ظاهرلي محمود وصل ؟
غزرلامو وباسلها يدها
- امي باش نهبط نسلم على مرتي..قلي ربي معاك وارضى عليا يامي ؟
- برا ولدي ربي يسهللك... و يهديك
خرج يجري ساقيه اعلى من راسو .. هابط من الدروج وقلبو ولا يدق .. خايف .. خايف لا تولي تكرهو وماتسامحوش ... عرضتو سناء هي الأولى جات تجري تعنق فيه ..ترمات في حضنو تبوس فيه
- يا ..حمودة توحشتك توحشتك ... عنقها وعينيه تفركس على مرتو وولدو ... راهم واقفين وسط الصالة ..يغزرولو الاثنين .. ولدو شادلها يدها ومتخبي وراها وهي ...هي محلاها .... محلاها .. لابسة سروال دجين وبودي ازرق زاد حلاها شعرها محلول وطويل كيما يحبو ... حس بدنو الكل يرعش ومتشوقلها .. قداش توحشها ..توحشها ..باس سناء وهبط الدروج بالشوية وعينيه مغروسة في عينيها ...

الحلقة السابعة والعشرون

قعدت تغزرلو يقدم وقلبها الكل يرجف .....بدنها...بدنها بدا يخون فيها ويحن ليه ... بدنها ماذابيه يتنطر ويمشيلو .. توحشت صدرو ...توحشت غزرت عينيه ..لمست الحنية متاع يديه ...عينيها معلقة في عينيه قربلها .... قلبها من قوة الدقان حاستو خرج سايي ...
- شنية حوالك خديجة ؟ سالها بصوت رقيق وحنين نبرت صوتو فيها ندم وحسرة ...
- لا ...لاباس وتنهدت ... طبست راسها بلعت ريقها وتمهمشت مالقات ماتقول ... جبدت يوسف من يديه وحطتو قدامو ..يوسف ماتوحشتش بابا؟ موش باش تسلم عليه ؟ ...قعد يغزرلو بشوية خوف وشوية وحش ..صغير وينسى .. وعاود غزر لخديجة ... تبسمتلو وقاتلو براسها أي ...مشا لبوه وعنقو ... طبس محمود وقعد في القاعة وحطو في حضنو وقعد يبوس فيه ويعاود
- يارجال !!! بو زينك يا رجال .. توحشت بابا انت؟
- امممم توحثتو !!
- حتى انا توحشتك توحشتك ..
في الوقت هذاك هربت هي تجري .. دخلت لبيتها وخلاتهم مع بعضهم .. ماعادش تنجم تغزرلو ماعادش ... كل شي فيه يجبدها .. كل شي يخليها تنسى اللي عملو... اتكات عالفرش وبدنها لكلو موجوع من الاشتياق .. حطت راسها ..شوية وعاودت قامت .. بدات تمشي وتجي .. حست روحها هبلت ...اش باش تعمل تو ؟ اش باش تعمل ؟ تلفتت تلقى فاليجة محمود محطوطة على جنب .. حلت لخزانة تلقى حوايجو مصففيين ...صارهو ناوي باش يرقد هوني ؟ .. كاينو لا صار ولا كان ؟ ..من الغزول هزت يديها وبدات تفرغ في حوايجها وتخرج فيهم البرة ... دق الباب ودخل ... قعد يغزرلها وقربلها سالها
-فاش تعمل ؟
- نلم ..نلم في حوايجي باش نهزهم لبيت يوسف .. !!!

- علاش باش تهزهم لبيت يوسف ؟ قربلها لين حست النفس متاعو في وذنيها .. غمضت عينيها ...على شعرة وباش يمسها .. بعدت عليه شوية
- باش نرقد غادي .. ونخليك انت على راحتك
زاد قربلها وقف وراها ...ياربي !!ياربي معادش تنجم !! حط يديه على كتافها وبدا يعدي فيهم بالشوية عليهم .. تنهد وحط دقنونتو على كتفها ... وحط يديه على يديها من قدام . اععععععععععععععع
- شكون قالك انا باش نلقا راحتي وانتي موش معايا ؟ قالها بصوت ضعيف وواطي ... وتنهد ..انفاسو دغدغلها في وذنيها ... بدنها سخن سخن لين معادش ... دورها ليه بالشوية ووقف مقابلها وباقي شاددها ... هزلها راسها وهي تحس في ريقها نشف ووجهها ماعادش حاسة بيه من قوة السخانة والفوارة اللي طلعتلها .. قاعد يذبللها في عينيه .... يذبللها في عينيه !!! تذبيلة كلها حنية وشوق ...ياسر عليها ياسر ... هبطت عينيها جاو فوق صدرو ..كان لابس مريول اخضر والفلس متاعو محلولة ... قعدت عينيها معلقة غادي تغزر للشعر متاعو ... وهو..هو تبسم بالشوية كاينو فاهم الصراع والحرب اللي عاملتها مع روحها ..فرح ...فرح خاتر حس اللي هي متشوقتلو كيما هو متشوقلها ... فرح خاتر عينين مرتو نظرة الحب ماتنزعتش منهم .. باللي صار هي مازالت تحبو .. مايحبهاش ترجعلو خاترها بنت اصل وتأدي في واجبها معاه ..يحبها ترجعلو خاتر تحبو ..تعشقو .. تعشقو كيما هو يعشقها ..تنفس بالقوي وطبس عليها .. ريحتو ..ريحتو ... اههههه ... غم عليها قلبها ... بعدت روحها ومشات تجري للتوالات .. خلط عليها يجري .
. مفجوع ..يلقاها ترد ...
- اشبيك خديجة لاباس ؟
غسلت فمها وهي باقي مطبسة على اللفابو
-لاباس لاباس ... ريحة البارفان متاعك .. اه
-شبيها ريحة البارفان ؟ هذيكة متاع العادة اللي ديما نعملها ؟ وقربلها وقف بحذاها
-شبيها ؟ ماعادش تعجبك ؟ ماك كنت تموت عليها؟
مسحت فمها وخرجت وهي خواطرها تحس فيهم دايرين
- من..من الوحم ...برشة حاجات ولات تقلقني ...
- اه اه وي فهمت .... ظاهر فيه ولدي باش يتعبك ؟...قالهالها بالشوية وبصوت فيه برشة اغراء ...وزاد كمل على مابيها كيف قالها
- خاليني نمشي ندوش ونرجعلك ... ننحي ريحة البارفان ... ...حتى جال دوش مانعملوش كان تحب ...نخلي كان ريحة بدني اه اش قولك ؟ مع الاحاسيس الي حستها لكل حست زادا بالنفس ضياق عليها ...باش تتخنق ... قريب باش تبدى تعيط من الرغبة من غير مامسها .. لازمها تهرب لازمها ... بدات تتحرك ماشية للباب وجاوبتو
- و...وانا اش عندي فيك ؟ أ..أمورك ..تحب تغسل كيفما تحب وباللي تحب ؟
مشا يجري وقف قدام الباب وسكر عليها تفجعت
- محمود .؟ محمود فاش تعمل ؟
سكرو وغزرلها ..كانت عينيه تلمع وشاعلة كيما بدنو
-شنوة تو ؟ باش نقعدو نلعبو لعبة الفار والقطوس انا وياك ؟
-اش تقصد ؟ وبلعت ريقها الناشف
- نقصد اللي انا توحشتك ..توحشتك توحشتك .. يعلم بيا ربي كيفاش عديتهم الجمعتين هاذم بلا بيك ... يمكن جهنم ارحم منهم .. خديجة ماحبيتش نوريك وجهي ولا نكلمك ... نعرف العملة اللي عملتها خاية برشة ... نعرف اللي انا في لحظة شكيت فيك .. مع انو ماكارنيش نشك خاتر .. خاتر اناعارف ومتاكد اللي كل شي تعلمتوانت في العلاقة بين الراجل والمرا كان من عندي انا .. من عند راجلك ( وتنهد)...نعرف اللي انا وجعتك .. خنت ثيقتك فيا كيف وعدتك باش نحميك ..باش نحطك في عينيا .. وقتها عينيا تعماو ..تعماو على كل شي ..
شدتها غصة البكاء وبدات تشهق
- انت ماخلي..ت..ني..ش حتى ح..ت..ى نفس..رلك ... ع..م.ري ..م..ا تصو..رتك...با..ش ..تص..د.ق..ع.عل..يا.­.اي كلمة ؟
وغطات وجهها بيديها ودموعها تجري
قربلها شدلها يديها هبطهم وحطلها راسها في صدرو
- ماتبكيش خديجة ..(كان صوتو موجوع ) ماتبكيش ... ماعادش نحب نشوف الدموع في عينيك ...
- كنت نسخايل روحي نسيت الدموع .. كنت نسخايل روحي نسيت الوجيعة ... نسيت الظلم ...في لحظة رجعتهوملي الكل ... والمرة هذي حسيتهم اقوى من أي مرة في حياتي ... كانو منك انت ... (وهزت راسها تغزرلو وتبكي .. عينيه بالدموع وفيهم زادة برشة وجيعة ) منك انت ؟ انت اللي كنت قطعة من روحي ..قطعة من قلبي ... انت اللي عطيتك كل شي ... قص عليها
- ماعادش تقول كنت ماعادش تقولها ؟ ..مازلت وباش نقعد قطعة من قلبك ومن روحك .. كيما انت قطعة من روحي .
. انت روحي ..انت روحي ياخديجة .. وزاد كبس عليها عنقها !!
- كان جيت روحك راك... راك ماعملتش فيا هكاكة .. راك ما قتلتنيش بالحياة ؟
- اللطف عليك ..سامحني سامحني سامحني ....سامحني ...وهز يدو اللي كانت ترعش ... يدي هذي نقصها كان مازالت تضربك ... يدي هذي مانحطها كان باش تعنقك (وعنقها)... باش تمسحلك على شعرك (وبدا يمسحلها على شعرها ويبوس فيه) باش تهزك ...( وبدا صوتو يضعاف وولا يتكلم كاينو يوشوش) وهزها يد في كتفها وايد في ساقيها ... حطها فوق الفرش بالسياسة ... حطلها راسها عالمخدة وهي مازالت غارسة راسها في كتفو ...ودموعها هابطة ...بعدلها راسها بالشوية وحس مريولو تنفخ بدموعها ... قعد على ركايبو فوق الفرش قدامها وهي تغزرلو وعينيها مزغللة .. تبسملها ونحى مريولو ...حس عينيها وساعت ...وبدات تتحرك باش تقوم ...شدها رجعها ..وحط شفايفو على دموعها ...خرج لسانو وبدا يلحسلها فيهم ..لسانو دافي وسخون على وجهها كل ما يعديه على بلاصة تحس بدنها الكل تكهرب ... بدات لكلها ترعش وتإن وهو باقي مكمل على مابيها ..ماخلى حتى بلاصة ماعداش عليها لسانو..وذنيها ..رقبتها ..وجهها ...فمها .... ماعادش تنجم تتحرك ..جمدت ... وينك ياامي ناجية وينك ؟ ايجا منعني ... ماعادش نجم ..وكاينو ربي استجاب لدعاها ..سمعو الباب يدق
- مدام خديجة قاتلك اللا ناجية ايجاو باش تتعشاو
ماصدقت لربي بدات تتحرك باش تقوم وهو عاود رجعها .. حصرها بين يديه وبدا يوشوشلها
-نكملو عشانا هوني بعد نهبطو نتعشاو ...
بدات تدز فيه بيديها شي ..ماتحلحزش .. مالقات معاه حتى حل .. قاتلو بدلال وغش
-محمود ؟ .. مازلت موجوعة منك !! مازالت مابراتش جروحي ...
طلع فوقها وقعد يبوس فيها بكل رقة وحنية
- تاو نداويهملك ...(وهزلها يدها باسلها كفها بالشوية وعدى شفايفو على صوابعها وعاود هبط لرقبتها )وهز راسو
- كل جرح نداويهولك وحدو ..وكل وجيعة نبردهالك .. نوعدك ما يوفى الليل الا ما تكون بريت ...
غمضت عينيها وسلمت ... تنهدت ..مافماش فايدة ..ماتنجمش تقاومو اكثر من هكة ..
-هامدام خديجة ؟..هاسي محمود ؟..( رجعت تعيط وتدق فايزة البون ) اللا ناجية قالتلكم ايجو تو ... الناس راهم جو .. ورجعت تدق بالقوي ...لين فد هز راسو
- اففف شبي سماها هاذي ؟ ياخي مهبولة ؟ وبدا يعيط ..قلها هانا جايين ..فوتنا
- قاتلي ماترجعي كان ما يجو معاك ..
-نعم ؟ وقامت هي تضحك .. غزرلها بغزول وهبط من الفرش ومشا حل البا ب شوية .. قعدت المرا واقفة مبهمة تغزرلو ..صدرو عريان وسروالو فلستو محلولة ... حشمت
- شنوة ؟ قالها بغش باش تشدنا واحد منا وواحد منا وتهبطنا ولا كيفاش ؟ برا قول لناجية ماعينهمش في العشا
تربثت المرا وقاتلو
- لا خاتر سي محمود قاتلك الجماعة جو
- جماعة شكون اللي جو ؟
- والله مانعرف ؟..قاتلي قلو يجي يقابلهم ..جماعة العرس ..وين نعرف انا ؟
نطر يدو وعقد حواجبو والمرا تغزرلو باهتة في زينو
- باهي برا اقلب منظرك ..تو نخلط عليك
- سامحني ها سي محمود مشني انا والله اللا ناجية
- باهي باهي
وسكر الباب بقوة ورجعلها ... قعدت فوق الفرش شادها الضحك على منظرو وحالة وجهو
-حرام عليك ههه اش مدخلها المغبونة ؟
رجع قعد فوق الفرش
- دين أمها كبشت كي القرنيطة ( الشي اللي مافيبالوش بيه اللي امو تبعث فيها بلعاني خاتر تعرفو باش يقنعها ووصايتها الكل باش تمشي خسارة )وعاود رجعلها .. اش كنا نحكيو ؟
دزتو شوية بعدتو ووجها احمر من الغصرة
- يزي عاد ههههه كان باش نزيدو شوية باش يجينا البريقاد المرة هاذي !!
عدى يدو على شعرو وحك لحيتو بتوتر ...
- اففف طيرتهالي والله !! وباسها من خدها بوسة دافية وحنينة .. ماعندك وين هاربة مني ..قالها بصوت فيه برشة اغراء ...الليل مازال طويل ..طويل برشة ...تو ندوش وننحيلك ريحة البارفان اللي مقلقتك ...وتو نرضيك ...نرضيك ... حتى لين تقول يزي ..
وقام من الفرش غمزها وتبسم ومشا للدوش ... قعدت عينيها التبع فيه لين دخل للدوش كيف المسحورة .. حست بروحها وقلبها دخلو معاه ..يتبعو فيه ..يرفرفو وراه ... اهههه يلعن بو قلبها المراق قداش تسامح وتنسى بسهولة !!!!


الحلقة الثامنة والعشرون
شدها من يدها وشبكهم في بعضهم وتبسملها ...تبسيمة ذوبتها...هي تعشقو ...تموت عليه وزاد الوحم جاء عليه هو...هههه حتى وهي في قمة جروحها كانت تستنى فيه باش يجي يعنقها ويقلها ما صار شي ...بداو يهبطو الدروج بالشوية ..كانت بيت الفطور مليانة بالضيوف .. ولادعمهم وولادهم ..دوبة مادخلو الناس الكل قامت تسلم عليهم وتهني فيهم بالصغير..كان وجهها في وهج ..وعينيها تلمع ...ماكانش ينجم ينزع عينيه من عليها ..موش عارف اما يحس الحبالة زادتها زين على زين .....طول ماهي قاعدة في السهرية كان هو شاد جنبها شادلها يدها ...خايف لا تبدل رايها وتهرب منو ...وهي طول ماهي قاعدة كانت مطبسة راسها وما تحبش تغزر لحماتها ...كانت حاشمة منها خاتر ماسمعتش كلامها واول ماذبللها عينيه سامحتو...ماكانتش تنجم تقلها اللي قلبها وبدنها تقواو على ايرادتها ...خذلوها ...خلاوها ضعيفة قدام وجودو هو قدامها .... تحبو تحبو تحبو ...مافماش كلمة تعبر اكثر من هكة ...
جاه تليفون ..هز يدو من ايدها وعقد حواجبو قام مشا يحكي بعيد ....قعدت عينيها اتبع فيه وهو يمشي ويجي يحكي ...تلفتت تلقى ناجية تغزرلها ...عاودت طبست راسها حاشمة ....حاسة بالذنب ...قد ما وصاتها الزح ! يلعن بو ها الحب قداش يرخص ....جاء يوسف بحذاها ..طلع فوق حجرها واتكى بدا يجيه النوم ...عنقتو وبدات تبنن بيه ...والجماعة بداو مروحين ...جاء محمود رجع قعد بحذاها
-اشبيك بطيت في التليفون ؟
-لا امور خدمة نفض فيها ...(حاستو سارح بعيد في مخو )
-خدمة تو في الليل ؟
تبسملها وغزر لولدو
-ماعنديش وقت انا للخدمة ...هاو رقد يوسف هات نهزو هيا نطلعو حتى انا جاني النوم !!
وهزو بين يديه وقعد واقف يستنى فيها باش تطلع قدامو ...قالتلهم تصبح على خير من غير ماتتلفت ...وتحس في عينين حماتها باقي وراها ....
بدلت ليوسف وحطتو في فرشو وهو مربع يديه يستنى فيها ...وهي تتمهطل وتضيع في الوقت ...
-مازلت؟ سالها وجاء وقف بحذاها
- ك...كملت ...
شدها من يدها وقفها وبدا يهز فيها للباب وهي تجبد في روحها ...وقف يغزرلها باهت
- اشبيك ؟ وقربلها ...شدها من كتافها وعاود هاك الغزرة متاعو اللي تسحرها ..اشبيك حبي ؟ماتوحشتنيش؟
بلعت ريقها ووجها احمار وبدات ترعش ...عاود قربلها لين لسقها وهزلها شعرها بالشوية ويحط فيه في شفايفو
-موش تفاهمنا قبيلة ؟ متوحشك انا !(قالها بصوت ضعيف) متوحشك عاللخر ...ماعادش ننجم نشد روحي ونصبر اكثر من هكة صدقني ..!!
انفاسو رجعت تدغدغ في وذنيها ووقف ما حبش يتحلحز يعرف اللي قربو ليها هو نقطة ضعفها ...مايخليهاش تخمم..
- اسمع هيا نمشيو لبيتنا ونحكيو غادي ...خلي يوسف راقد .داكور ؟
قاتلو اي براسها ...شدها من ايدها وهزها لبيتهم ...سكر الباب وتلفتلها ...كانت مربوثة ومتوترة وموش قد بعضها وكان لازم يطمنها ...عنقها حطلها راسها في كتفو
- اشبي حبي الصغرون ؟ اشبيك حبي؟ اهه ؟شنوة مقلقك ؟ ريحتي ؟
عملتلو براسها لا وبدات دموعها هابطة بالشوية حتى لين ولات تبكي ..
غزرلها باهت ..هزها حطها عالفرش وقعد بحذاها ...بدا يمسحلها في دموعها ..
-ياخي اش فما ؟ اش صار للدموع هذي الكل ؟ خديجة ندمت انك سامحتني؟
-لا !!
عاود قربلها وتنهد ..عنقها ...عصرها بين يديه ..قعد يعدي في يديه على ظهرها ويهدي فيها كيف الطفلة الصغيرة
-سامحني خديجة ...سامحني خاتر مافهمتكش وما دللتكش كيما تستحق !!سامحني خاتر ما حاولتش نعرفك قبل العرس ...ما عديتش فترة خطوبة كيما تحلم بيها اي طفلة ...(وهزلها راسها باسلها شفايفها بكل حنية ) سامحني خاتر ما سالتكش على حياتك قبلي انا ..هذي كانت غلطتي خاتر ماعرفتكش!! ما سالتكش!! ماكنتش نعرف اللي انت قريت هندسة ..وماحاولتش باش نعرف ..وتنهد
- انت ...انت خذيتني باش نربيلك ولدك ...مربية اما تكلفتلك صداق ...قعرة ...وبهيمة ..( كانت تتكلم بوجيعة ) غزرلها باهت وهز حواجبو ...حط جبينو على جبينها وعنقها
-سامحني !!قد ما باش نقلك سامحني شوية ...وقتلي قلتو الكلم هذاكة ماكنتش نسخايلك تسمع فيا ....صدقني كنت نكذب على روحي ...نكذب ونحاول نصدق كذبتي ...من اول ما ريتك في داركم ...حتى وانت لابسة حوايج لا علاقة ..وتبسم يذكر فيها ...مانعرفش وقتها شنوة اللي خلاني نوافق عليك ....تبسيمتك وقتلي غزرت لولدي ..تبسيمتك سحرتني ...(عاود عنقها بقوة) ماحبيتش نصدق وقتها ...اما حبك .. حبك سرح فيا بالشوية بالشوية ....خذا راحتو حتى لين ملكني جملة ...مانتصورش روحي نهار ...نهار نعديه من غير ما نغزر لعينيك ...عينيك اللي احلى من لون الليل ..
ورقدها ...وجاء بجنبها ...بدا يعدي في يديه على بدنها ...لمستو كيف الحرير ....خفيفة وتسحر
بدات تذوب بين يديه ...غمضت عينيها وخلاتو يسرح في بدنها ..سلمت روحها للاحساسها ...لقلبها ...حستها احلى ليلة عداتها معاه من بعد ليلة عرسها ...احلى واروع ليلة ..شيخها لين ماعادش ...نساها في جروحها لكل وداواها كيما وعدها ....
في وسط الليل ...كانت يديه معنقتها...حست روحها متقلقة ...قامت تجري مشات ترد ...قام في جرتها ...حستو واقف مبهم عينيه فيها خوف
- لاباس ؟ كان صوتو بالنوم وتاعب ....(حتى هو لا ارتاح ولا خلاها ترتاح ههه)
- لا..لاباس ..كيف العادة ...اشبيك قمت ؟
شدها عنقها بالشوية ...كانت لابسه nuisette noir قصيرة زادت شعلتو ....مع بدنها زاد سمن شوية ..زاد حلا اكثر ...رجعها اللفرش ...حطلها راسها عالمخدة وباسها بوسة خفيفة ...
- ريحتى بالردان .(.قاتلو بالشوية وهي تتبسم بدلال وهزت ساقيها زاد هبل .)...ههه ريض تو ماشبعتش ؟
دورها ليه على جنب جبدلها بدنها ليه بقوة لصقو في بدنو وكان صوتو مليان رغبة
- مانشبعش منك انا !!! وباسها ...مانشبعش من مرتي ...وهز راسو غورلها متحير..اما ؟ اما مافماش مشكلة مع البيبي زعمة كيف نرقد معاك ؟
- لا...مفامش مشكلة !!اما فما مشكلة مع امي ناجية !!
- ناجية؟ سالها باهت اش مدخلها ناجية ؟
حكاتلو عاللي صار بينها وبين امو . .وكيفاش هي ما سمعتش كلامها
- صار هي تخدم في مخها معايا عزوزة الستوت ؟ وشدو كريز متاع ضحك ...ضربتو من كتفو بالشوية
- تضحك؟ اش باش نعمل معاها انا تو؟ والله ماني عارفة كيفاش باش نقابلها غدوة؟
شدها من دقنونتها وقربلها وجها بالشوية ليه ..غزرلها ببررشة حنية وبرشة حب
-انت ماكش تعمل في الغالط ! انت تحب راجلك وماتصبرش عليه كيما هو ما يصبرش عليك .. ما عندكش علاش باش تحس بالذنب ...كانك على ناجية خليها عليا ..انا نعرف داها ...ههه ....شكنا نعملو قبل ماحكينا على ناجية؟ ...وضحك وعاود حطها تحتو ..
في الصباح قام بكري ... كانت روحو راقدة ...مرتاحة ..في فمها تبسيمة محلاها ..وتذكر ليلة البارح ...سرح مخو فيها ...باش تهبلو ها المخلوقة ...باش تخرجو من عقلو ...قد ما يرقد معاها ويقول شبعت ..يحس روحو ما شبعش !! بدل حوايجو بالشوية باش مايفيقهاش ...جبد ورقة كتب عليها وهو يغزرلها ...تبسم وحطها بحذاها ....باسها من جبينها وخرج ...
مشا للكوجينة ....يلقا امو برك قاعدة تشرب في قهوتها ..الستة ونص متاع الصباح مازال مافاق حد ...كان هاك المطروشة اللي وين تراه تحل فمها باهتة
- صباح الخير سي محمود
- صباح الخير ..اعملي قهوة .
- حاضر سي محمود وقعدت تغزرلو ...
مشا وين قاعدة امو شدها من كتافها وباسلها راسها ..
-صباح الخير نجوتة!! هاك قمت بكري ؟
-وانا مستانسة نقوم مخر ؟ انت كيف السبة قمت بكري وسيبتها البهلولة متاعك ؟
غزرلها والطرشق بالضحك ...جابتلو فايزة القهوة حطتها قدامو وهو شعل سيقارو ...مد ساقيه لقدام وقالها
- سيب الطفلة ناجية ...ماتعبيلهاش مخها بافكارك ...وتلفتلها ...البارح راقدة معايا وتقول ترتكب في جريمة ...خايفة منك ...
- صار هي حكاتلك ؟ ودوحت راسها ...لا وفا عليها الراي هذيكة ...ماعادش فيها امل !!
نفخ سيقاروه وشرب من قهوتو وتبسم
- تشك في قدرات ولدك هههه ؟ لشكون طلعت انا ؟ وحك راسو
- العزري اقوى من سيدو ..قاتلو بغزول ....ولا وزيد قودت بيا ؟
- ههه ماقودتش ...قتلك خايفة منك ...قلتلها تو نتصرف معاك ...ههه ناجية مازلت خايفة عليها مني ؟
- لا ...نعرفك ماعادش تعمللها شي ...البكاء اللي بكيتو ليلتها عليها ...خلاني نعرف اللي انت باش تخمم الف مرة قبل ماتحط عليها ايدك ولا تجرحها ...اما حبيت نعملك قرصة صغيرة..
- هههه مانفعش معايا هههه وباسها من جبينها ...ماتخافش يا نجوتة ...نحطها في عينيا وشوية هاك المخلوقة ...انت تعرف ..واكثر وحدة تعرف اللي انا الي ضعيف قدامها موش هي ...وقام
-وين ماشي ؟
هابط لتونس
-وه؟ ياخي تو وقت تونس ؟ اليوم الحمام متاع اختك راهو ؟
غزرلها عينيه مزغللة بالضحك
-اي اش معنتها ؟ باش نلبسلك فوطة بلوزة وندورلك بكانون البخور ؟ وانا اش مدخلني في الحمام ؟ كنشس نمشي ندخل معاهم ههه؟
- دا على لونك ياسر ضامر !!اش ماشي تعمل في تونس ؟
- فما واحد لازم يخلص!! كيما خلصت انا ومرتي وعينيه سرحت بغل
- شنوة ؟ ماشي باش تعمل المشاكل ؟ هكا في فرحة اختك ؟ ماكش ماشي لحتى بقعة ماكانش تو نقول لمرتك؟
طبس عليها وباسلها خدها
- ماكش باش تقول لمرتي نعرف ..وما تخافش ناجية ...راك جبت راجل ما يخليش ثارو ...وقت الفطور انشالله نكون هوني ...وخرج
- باهي كلمني ..
عمللها بيدو باهي ...
بدات تحل في عينيها بالشوية ...تشم في ريحة الورد في خشمها ...حلتهم ..تلقى وردة حمرا فوق مخدة محمود ...تبسمت وهي تتفكرفي ليلة البارح ...تنهدت وشدتها بيدها تشم فيها ...لقات تحتها ورقة ...تنفضت جات قاعدة هزتها وحلتها تقرا فيها ." انت يا احلى من العسل يا ابن بدن مانيش شاعر باش نقعد نتغزل بيك نحب نقلك حاجة وحدة يا مرتي ..نحبك ونعشقك ونموت عليك وروحي و عقلي فيك يا مدام محمود بن رمضان سامحني
قعدت تقرا وتعاود تقرا وتعاود ..حاسة روحها طايرة طايرة .. طايرة من الفرحة ...ماعادش تحب تصدق فرحتها ..ولات خايفة ...خايفة لا تفرح تتنكس ...دموعها هبطو ...عاودت اتكات ...وعنقت مخدتو..زادت كبست عليها وفي يديها الوردة والورقة وقعدت تشم فيها ...تشم في ريحتو ...ريحتو في بدنها الكل ...في خشمها ...ريحتو ماتملش منها ..غمضت عينيها تتفكر في لمستو الحنينة ..في غزرتو ...في شفايفو ..في تعنيقتو ...ياربي ..يا ربي ماتحرمنيش منو ...راهو هو روحي ...ياربي راني تعبت ...ماعادش نحب نعيش نهار بل بيه ! بلا لمستو وبلا لهوتو بيا .نحبو نحبو نحبو ...
كيف خرجت من بيتها لقات الحركة والزغاريط وريحة البخور ...سناء تحضر في روحها للحمام ...مشات للصالة تفركس على محمود ما لقاتوش ...تلقى حماتها قاعدة ونساء دايرين بيها ...سلمت عليهم ومشات باستها ووجها احمر وحاشمة ...طبست راسها وقعدت بحذاها ساكتة ...حتى باش تسالها على راجلها حشمت
- برى للكوجينة افطري وعبي كرشك بلقدا ...قالتلها حماتها وتحكي معاها عادي
- با..باهي تو نمشي ..وينو محمود ؟
- خرج من بكري ..قال عندو قضية يقضيها تو يجي !!وطبست عليها توشوشلها ..ماشبعتيش منو محمود متاعك ؟ ههه وتزيدي تقودي بيا ؟ انا هي اللي نستاهل؟
- غزرتلها برعب
- - يا امي ناجية والله لاقودتها ؟
- حطت يدها على كتفها وتضحك
- - نفدلك معاك ...ربي يهنيكم بنتي ...انت لا محالة مريوحة ليه وما فيكش دوا...هههه ..اما حتى هو وعدني ماعادش يذيك حتى بكلمة
- تنهدت وتبسمت وباستها
- -عيشك امي ناجية ربي يخليك في ظهري ديما !!
- -ويخليلك راجلك وولادك ويبقي عليكم الستر ...نوقز تليفونها تلقاه محمود ..قامت تجري مشات للكوجينة وجها احمر ومغصور تقول واقف قدامها
- -ا..الو الو روحي صباح الخير وين مشيت ؟
- صباح الخير يابنينة (ويضحك) عندي قضية نقضيها ونرجعلك ..ماشية للحمام ؟
- لا امي ناجية قاتلي ماتمشيش موش باهية سخانة الحمام في شهور الوحم !!
- اممم معنتها كيف نروح نلقا الدار فارغة فيها كان انت؟
- امم يمكن
- جو ...خلي نكمل اللي بديتو البارح ههه
- زيتشي من البلادة ؟ ماتعبتش ياخي ؟
- تحكي بجدك ؟ اش عملت انا حتى نتعب ؟ ههه تي انا قاعد نسايس فيك ماكانش راك شفت التعب على قاعدة ؟
- محمود (قالتلو بدلال) حشمتني امان اسكت؟
باهي للا هاني باش نسكت لقيت لورقة والوردة
اممم لقيتهم محلاهم ...مانيش مصدقة !!هههه حاسة روحي في فيلم مصري قديم ..هههه رومنسية وورد وشعر اش مازال اخر ؟
مازال فترة هاك الروب الطوال المدورين هذوكم متاع سندريلا ما دخلنلهمش !!
متاع فارس الاحلام .ههه حتى انا نحلم بيها الفترة هذيكة متاع الامير اللي يجي على حصان ابيض ويهزني ههه ...اما انا عندي فارس احلامي محلاه ومابنو ...ماكنتش نحلم باش نلقى خير منو جملة جملة !!!
اهههه ياميمتي قلبي ...كان ماجاش موعد مهم راني رجعتلك تو نوريك الكلام الحلو اللي مانسمعو كان من بعيد ...ههه من قريب مانشوف كان البكاء والدموع ...وانا نعنق ونسكت هههه
ماعادش تشوف بكأء منو هكا انشالله يا ربي !!
- ههه باهي ياروحي باش نعلق تو ..تو نجي فيسع انشالله
هبط من الكرهبة ..قعد يقرى في العنوان ...هذا هو اللي عطاهولو ...بالاص قديم في المروج ...طلع الدروج بالزربة ...وقف قدام باب ودق ...حط يديه في مكتوبو قعد يستنى تحل الباب بالشوية ...كان واقف بحوايج الدار ...شعرو مازال مفرعس ...عينيه وساعت ووجهو لخلخ وهو يرا فيه قدامو
-سي ...سي محمود ؟
كان لابس lunettede soleil نحاها حطها في مكتوبو بالسياسة وهو يغزرلو بدم بارد ...دزو من كتفو ودخل ..
-اي ...سيدك محمود يا زبلة ...!!!
سكر الباب ولاخر من الصدمة ماتحركش ..جمد في بقعتو ...
-اي عاد ؟ تكلم يا بطل ؟ اش مازال عندك ماتقول على مرتي ؟
بدا يتحرك بالشوية خايف من الهدوء متاعو
-سي محم..مود ..المرة لخرى ..اا.ا
-هاني نسمع فيك تكلم ؟ وسخلي وذنيا بكلام الطحين متاعك ؟...اش مازال باش تقول على مرتي يا ولد الهجالة ...بالكشي تسخايلني ماركة كسوة وكرافات وقربيطة ...اه ...جايني تتهدد عليا في داري ...توسخلي في عرض مرتي
..هذاك اللي قدرك عليه ربي ؟ ...تحارب مع النساء كيف ماقديتش روحك مع الرجال ؟ (وزاد قربلو) وتزيد تهرب تسخايلني معادش باش نلقاك؟ هههه في كرش حوتة نجيبك انا !!! ماني قتلك ماتعرفنيش؟ شفت كل دمعة هبطت من عينيها ...باش يهبطو عليك انت ضرب تو ...وهجم عليه على غفلة ....عطاه بونية على جداقو طيحو وبرك عليه طاح يضرب ..يضرب يضرب لين لاخر ماعادش فيه ...وين يتفكر الضرب االي عطاه لمرتو على خاترو يزيد ينزل عليه ...حتى لين خرجلو دموماتو شرتلة ....ودهش ...شدو من كتافو ورماه دايخ ...عينيه زرق من الضرب ...وشفتو مفلوقة ...على قد ما يغزر لوجهو على قد ما قلبو يبرد ...طبس عليه ووشوشلو
- وماعندك ملتعملي ...تو تخرالي فيه ...العنوان عطاوهولي صحابي يخدمو في الحاكم ...كنت ننجم نخليهم هوما ولا غيرهم يجيو يدقدقوك هنا ...اما انا حبيت ثاري وثار مرتي ناخذو بيدي هاذي ..وهز يدو اللي ضرب بيها مرتو ...وعطاه كف ...زاد دوخو ...
خرج وصل للباب ...يسمع فيه يان ويعيطلو ...وقف وماتلفتلوش ...ماعادش يحب يشوف خليقتو ..
-سي محمود ...قالو بالشوية ...الطريحة هاذي ....كان لازم ناكلها ليا برشة ....وقتلي خليتها ...مرتك ...مرتك اشرف من الشرف بيدو ...سام...سامحني ...
- نعرف ..نعرف اللي مرتي اشرف من الشرف ...وخرج ...حس بدموعو هبطت دموع ندم وحسرة ....
نهارت العرس ...جاء الطقس دافي وسخون كان شهر ماي ...العرس في وتيل في الحمامات ...العروسة من الصباح وهي في الحجامة ...وخديجة باش يخلطها محمود بحذاها ...في الثنية قعد يوصي فيها باش ماتعبش روحها ...كان يضحك عليها وشايخ ...وجهها بدا يدور ويسمن ...قالت ناجية كيف المرا تزيان معنتها حبلة ببنية ..وهي موش زيانت برك؟باش تخرجو من عقلو اصل ههه مع بدنها زاد تعبى شوية ..ياحبيبي عالزمن ...ماعادش ينجم يبعد عليها ...
بدات السهرية ...وبدات لعباد تجي ...كانت لابسة روبة نوار المرة هذي قصيرة شوية ههه وقتلي شافها بدا يعارك يعارك بعد سكت ....قالها ميسالش ...عرس اختي وانسي القصير ..محلاه ومحلا غيرتو عليها ...هو اللي كان يفتق بالزين ...لابس سمكينق في النوار ومبدل كوب متاع شعرو ..يرعب يرعب ...ماعادش تنجم تبعد عينيها عليه ...قعدت هي وناجية ويوسف في طاولة قريبة من العروسة ...هو يمشي ويجي عليهم ...كل مرة يسلم على حد ...طبس عليها ..قالها- محلاك ومحلا مشطتك ....ليلتك زرقة ليوم ههه
طبست راسها من الحشمة ...كانت لامة شعرها لكلو كعكة كبيرة ومهبطة خصلات مع بانسو في عينيها ..وماكياج موش غامق ...العروسة والعروس مصدرين غزرتلهم وتفكرت ليلة عرسها ...تعدات كيف المنامة ...لا فرحت بيها ولا فهمتها ...هزت عينيها تلقاه يغزرلها ويضحك ...كان حاط ايدو في مكتوبو ...طويل ...وهرة ...ازين واحد في الصالة بدون مبالغة ...النساء لكلها عينيها عليه ...اما هو عينو عليها هي كهو ....كانت الفرقة تغني والعباد تشطح ..مشا للمنصة ..قعد يحكى مع جماعة الفرقة ....بعد هز الميكرو ووقف ...سكتو الناس الكل وقعدو يغزرولو ...طبس راسو وضحك ....غزرلها وعض على شفايفو ...كانت باهتة فيه ...
- بون سوار الناس الكل ...نحب نرحب بيكم ...ونشكركم على وجودكم معانا تشاركونا فرحتنا ....
بدى التصفيق والتزفير ...سكتهم بيديه
- هههه مازال مازال...وغزر لاختو ...نحب نهني اختي ونقلها انشالله ربي يتمم عليها ...ونقلها اللس هي خذات راجل...(ضحك طارق وبايبالو) وهبط ...بدا يمشي وين قاعدين هوما ...بدا قلبها يدق ...يرعش ..عينيها علقت في عينيه ....تبسملها ووقف قدامهم ....
- نحب ناخذ شويه وقت من عرس اختى باش نخصصو لروحي ...نحب نشكر فيه المرا ...المرااللي جابتني ...ومشا لامو باسها من راسها ...الحب الاول في حياتي ...هههه امي واختي وصاحبتي ...نحب زادة نشكرها خاتر خذاتلي المرا اللي تمنيتها حياتي كاملة ...وغزرلها ...غزرلها بكل حنية ...المرا اللي قد ماباش نوفيلها حقها مايوفاش !!! المرا اللي سكنت في روحي وولات هي روحي .(وبدات لعباد تصفق وتعيط وتقولو بوسها )
-ههههه مرتي حشامة ما تحبش البوس قدام لعباد ...قعدت تغزرلو مبهورة ...موش مصدقة وجها حمار ووهج ...كمل هو يحكي....
- نحب نهديلها ...نهديلها حاجة هي تحبها ...هههه ..نهديلها مقطع من غناية ام كلثوم ...( حطت يديها على وجهها وعينيها زغللت بالدموع ...تلفتت لناجية تلقاها حتى هي متاثرة ...ناجية القوية متاثرة ؟)حط يدو كيف مايعمل المايسترو وضحك مرة اخرى ...وبداات الموسيقى ..قعدت تغزر للصالة ...للعباد ...للعروسة ...لقاتهم لكلهم متاثرين ....قربلها ..شدلها يدها ووقفها قدامو ...مشاها بالشوية ووقفها في ويط البيست وبدا يغني ...وهي بدات تبكي
هات عينيك تسرح في دنيتهم عينيا
هات ايديك ترتاح للمستهم ايديا
ياحبيبي تعالى
ياحبيبي تعالى
وكفاية اللي فاتنا هو فاتنا ياحبيب الروح شويا
(وعنقها حطلها راسها في عنقو كبس عليها ...عينيه دمعت وباقي يغني...هزت يديها ودورتهم عليه وقعدت حاضنتو )
اللي شفتو ابل ماتشوفك عينيا عمري ضايع يحسبوه ازاي عليا
انت عمر ى
كمل الغناية ...موش عارف كيفاش كملها ...كانت دموعو سابقتو .دور يديه عليها وقعد معنقها ...معنقها ...موش عارف قداش وهو معنقها ...يسمع كان في التصفيق..الصياح ..التزغريط ...هبطت سناء تجري ...تعن
فيهم وتبكي- علاه هكة حرام عليكم ...برشة حب برشة .فسدتولي ماكياجي ...هزلها راسها لقاها باقي معنكشة فيه ..وجهها تبلبز بالدموع ..اما مازالت مزيانة ..وباش تقعد مزيانة لاخر عمرو ...ضحك ودموعو هابطة
- نحبك ...نحبك ...نحبك يااحلى قصة حب في حياتي

ا
- اسمع برك .. راهي أمك متوحشاتك ياسر وقاتلك ايجا طل عليا ..
- هي ويني هي هات نكلمها ؟
- راهي مريضة ما تقدرش ..
- مريضة ؟ (تفجع ) وشبيها ؟
- والله السكر والدم فرعسولها بدنها
- سناء بربي لاباس ماهو ؟
- والله لاباس ماتتفجعش .. غير مستاحشاتك انت ويوسف ..
- باهي باهي .. غدوة نقص ونجي انشالله
- عيش خويا ربي معاك
بعد نهارين كان قدام دارهم ... يوسف كان متقلق وتاعب وهو شادو من يدو واليد لخرى الفليجة متاعهم .. حلت سناء اختو الباب وبدات تبوس فيه وتعنق
- خويا محمود؟ مرحبا بيك مرحبا .. امي زغرطي زغرطي هاو لعريس جاء ..
- يابنتي يزي بلا فضايح ؟ اش فما ؟
وخرجت امو من الدار تبوس وتوشحل .. قعدت معنقتو وتبكي ..
ياوليدي توحشتك .. توحشتك
-تي هاكي لاباس ؟ علاش فجعتني عليك ؟
- والله كنت مريضة ( وشدت يوسف تبوس فيه وحضنتو بالقوي) تو وين تذهنت شوي .. كيف سمعت بيك جاي
ودخلو للدار فرحانين بيه وامو مرّة تبوسو ومرة تبوس ولدو ..كانت أمو وأختو سناء عايشين وحدهم بعد مامات بوه .. سناء مخطوبة وعرسها في الصيف .. هو ولدها البكري .. عمرو 37 سنا هو واختو بيناتهم 11 سنا امو جابتها بعد ما كبر هو .. هاكا علاش يحس روحو مسؤول عليها ..
عشية كاملة وهوما هر هر .. وهو يدكك علىى امو وعامل عليها جو .. سناء هزت يوسف فطرتو ورقدتو .. يوسف كان طفل عاقل ما يتكلمش برشا .. مزيان .. شعرو اصفر لامو وعينيه شهل وكبار لبوه وقشرتو قمحية زادة لبوه .. الحاسل طفل يتاكل ماكلة .. اما ديما منطوي على نفسو ...حتى في الحضانة ماعندوش اختلاط بالصغار .. يمكن بحكم انو متربي وحدو .. وحتى المربيات اللي يجيبهوملو مايحكيوش معاه .. كان بالنسبة ليهم خدمة .. يدخلو بالوقت ويروحو بالوقت . ما فماش مشاعر ناحية هاك الطفل الصغير وليتيم ..
سألتو ناجية امو:
-اش عملت في هاك الموضوع الليحكينا فيه ؟
ا-انا موضوع ؟
-هاوليدي بلاهي لا تهبلني ؟ مانا حكينا فيه ؟ ياخي ليمتا تقعد هكا بال مرا ؟ راك كبرت ..
ضحك وغزرلها .( هو بلا مرا ما يقعدش .. يعني عندو علاقات .. برشة علاقات عملهم مع النساء ... اما حتى وحدة لا ملاتلو الفراغ متاع مرتو .. كانت علاقاتو سطحية .. أساسها رغبة واحتياج برك .. )
- ربي يهديك ها ناجية جايبتني من غادي لهنا .. فجعتيني عليك باش مبعد نعرف اللي هي خطة منك باش تعرسيلي .. وزيد بنتك مستقبلتني من الباب هاو لعريس هاو لعريس جاء ... والله صحة عليكم .. زلبحتوني الزوز وخليتوني نسيب خدمتي واموري ونجي.. اشكوني ها المرا اللي تحكي عليها بربي؟
- ياعنبو زين ولدي (وضحكت وباستو ) بنية عاقلة بنت عمك صالح اللي كان يخدم في البوستة .. طفلة يتيمة .. عايشة مع مرت بوها موريتها شر الشعف .
- ناجية .. (قص عليها ) ياخي انا حالل ملجأ للايتام .. اش يهمني فيها انا ؟ ياخي عرس هذا راهو موش لعبة
- لا لا وليدي نعرف .. اما هي ذاقت اليتم وما يحس باليتيم كا ن اللي ذاق حتى هو هاكي علاش شتهيتهالك وليدي .. هذيك هي اللي باش تربيلك ولدك وتتلها بيه ..
- ياخي هكة هي الماخذة ؟ يابنتى راني نحكم في شركات .. ماتعرفيش قيمة ولدك ولا شنوة ؟ باش ناخذ مرا اللى تجي هكاكة ؟
- هاك خذيت وحدك المرة الأولى .. وحدة قاورية لا طقناها ولا طاقتنا .. كنت حتى كيف تجي قبل ماتجيش معاك .. وما تحبش اصل تشوفنا .. ماك جربت .. وخذيت اللي بالك فيها .. تو اسمع كلامي عيش ولدي .. راني امك وما نغرش بيك ... ماخيرش من عربية تصونك وتصونلك عرضك وتحافظ عليك وعلى ولدك .. اخي انت باش تعملها بورتوكلي في يدك ؟ هاويني تقعد في دارها مع ولدك وانت برة اعمل اللي تحب .. ما شادك حد..
وقعدت عشية كاملة وهي تقنع فيه .. في هاني باش نموت .. في نحب نتهنى عليك .. لين كسرتلو راسو ووافق....

الحلقة الثالثة
قعدت خديجة تبكي في بيتها وغامة على راسها ... غايذتها روحها ..يحبو يعرسولها لواحد مرتو ميتة وعندو صغير .. مرت بوها الكلبة ماصدقت لربي تحب ترتاح منها .. لا شاوروها لا سالوها .. حيوان هي عايشة في ها الدار.. جاء بوها البارح في الليل قالها فما شكون يحب عليك وباش يجي غدوة يخطب .. هكاكة لا تعرفو .لا شافتو . لا حكات معاه . وزيد يقلها ارمل وعندو ولد .. علاه؟ يحب يدفنها بالحياة .. يدفنلها شبابها مع واحد كبير .. اش عملت؟ ااااااااااااااه يامي وينك ؟... كان جيت حية ما يصيرش فيا هذا الكل لا يزي اللي عاناتو من صغرتها وزيد باش تزيد تعاني ...
دخلت عليها مرت بوها تصيح وتعيط
لتو مازلتي باركة ؟ قومي الناس عدها جاية ؟ قومي وانت تنوحي يراه على راسك انشالله .. ميبان فيك شي خرشية ... احمدي ربي اللي فما شكون جاء خطبك وحدة كيفك ..الفقر والفرعنة .. حتى كي مشيتي تقري عملتينا الفضح ... بره يكب سعدك انشالله اكثر ماهو مكبوب .. وزادت قربتلها شدتها من شعرها وهي تصيح وتبكي
-قومى البسي ماكانش والله لاما نمررلك عيشتك اكثر ماهي مرة .
وخرجت وخلاتها تغفص في دموعها .. هزت روحها بالسيف ولبست القفطان اللي رماتهولها في الفرش .. قفطان خايب قديم متاع وحدة أكبر من عمرها .. عمرها 25 سنة ما شافت فيهم حتى نهار حلو .. كان العشرة سنين لولانين وقتلي أمها حية ... بعد ولات تذوق كان في المرار .. سب وضرب وشتيمة لين بدنها حلّف واستانس .. كاينهم يعاقبو فيها على جيانها للدنيا .
مسحت دموعها ومشطت شعرها الطويل لاكحل ولمتو كعكة .. غزرت لعينيها في المراية لقاتهم ذابلين وحمر . ما عندهاش ماكياج باش تنحي التحويق اللي في عينيها .. وجهها تاعب من قلة النوم وبدنها مدقدق من الضرب .. حتى راسها ما قصرش بالوجيعة .. تي خير خلي كي يشوفها الشايب اللي جايها يهرب .. خلي تجي منو خير ..
غزر محمود لحيط الدار .. كانت خايخة وقديمة بعد غزر لامو كاينويلوم فيها ..
-ربي يهديك يامي .. تو انا باش الناسب ناس كيفما هاذم ؟
تبسمتلو امو وهي شادة يوسف بين يديها .. ما زالو كيف هبطو من الكرهبة 4×4 متاعو .. كان مخليها في دارهم . باش كيف يروح لتونس يلقا باش يدور ..
- وليدي احنا اش يهمنا فيهم .. ما ك باش تهز مريتك وتمشي ياخي باش تسكن معاهم انت؟
- تي انا مريتي يا ؟ انا مريتي ؟ والله ربي يهديك .. اففف
دقوا الباب خرجتلهم وحدة ظاهرة من وجهها شمطة .. قعت باهتة فيه تغزرلو . وتغزر لولد و.. مشوار وهي تثبت لين نطق
- يا مدام ننجمو ندخلوا عيشك ؟
- اااه .. أي بالطبيعة سامحوني ووه الحشمة
دخلو يلقاو زوز رجال قاعدين معاهم مرا كبيرة أخرى الحاسل ماكانش مركز مع حد .. بدا يفد وقعدت امو هي اللي تحكي وهو شادد يوسف بين ساقيه ويقلب في الدار ..ملا حالة .. وملا هم ؟ وين حطيتني يامي ربي يهديك ..
هكاكا وتجي الشختورة .. خرجت درا منين.. كانت لابسة حاجة لا علاقة وراسها مطبس وعاملة شاربة فوق راسها ... موش مدينة اما راميتو رميان فوق شعرها ماشافش وجهها وما حبش يشوفو DEJA اللي شافو يكفيه .. كيف رات امو مشات تعنق فيها وتبوس
-امي ناجية عسلامة ؟ اش تعمل هوني ( كانت باهتة )
-باستها امو وعنقتها
هاني جيت نخطب فيك لولدى محمود مانيش باش نلقا ماخير منك ..
(-شكوني اللي ماتلقاش خير منها تي وجهها كيف اللوحة هاوينو .. وينو الزين والعين والبدن اللي تحكي عليهم امو ؟ يامي راك باش تورطني راهو .. )
تلفتت بالشوية لقاها تغزر ليوسف .. وكان هو يغزرلها .. تبسمت .. تبسملها ... اما كيف تبسمت شاف حاجة في وجهها ..كانت عندها غمازات في خدودها ...ضحكتها حلوة برشة .. عينيها مطبسة تغزر لولدو ما شافهاش .. مدت يديها ليوسف ياخي قدملها .. ومشى لحضنها .. كاينو فما مغناطيس يجبد فيه ليها .. قعدت معنقتو وتحكي معاه .. سهرية كاملة وهو فوق حجرها ويضحك معاها .. عمرو ما شاف ولدو يتصرف مع وحدة بالتلقائية هذي .. وتذكر كلام امو كيف قالت ليتيم ما يفهو كان ليتيم اللي كيفو ... وهذاك اللي خلاه يأخذ قرارو .. كانت مصلحة ولدو هي اللي تعنيه .. حتى على حسابو هو .


الحلقة الرابعة

قعدت تغزرلو وهو في الكرهبة .. مرة يكونكتي بالتليفون ومرة يتلفت لولدو راكب من تالي ... يضحك هو وياه .. محلاه ومحلا ضحكتو ... كان شعرو فاتح شوية وعينيه شهل كبار .. قشرتو قمحية ... طويل .. خشمو مشنقل لفوق.. صغير .. .. خلاتو يظهر متكبر .. وهو بلحق متكبر .. تحسو يغزر للعباد من فوق .. وما عاجبو شي ... الوحيدين اللي يتصرف معاهم بطبيعتو هوما عايلتو .. بالطبيعة موش هي .. ههه هي ماحكا ش معاها جملة يمكن كلمة ..كلمتين ..موش متذكرة ... ااااااه .. كيفاش باش تعيش معاه هذا .حاسة روحها مفروضة عليه فرضان .. امي ناجية لصقتها بالكول ههه.. اما ولدو محلاه ومبنو بتاكل ماكلة .. تحسو منطوي على نفسو برشة .. ما يحكيش ما يعبرش عاللي في قلبو .. ذكرها بروحها .. وبحياتها اللي عداتها مرار .. وهذاكة اللي خلاها تتعلق بيه .. وتحبو . وهو زادة حبها وتعلق بيها عكس بوه ..
-اش رايك في هذي تقتل ؟؟ تلفتت لسناء وهوما في بوتيك يشريو في الجهاز ..
-وه ؟ عريانة ياسر .. والله تحشم ...
- أي هذاكة المطلوب (وضحكت ) هبليه ...هبليه .. ههه .. مالا عروسة اش تحبها تلبس ؟
وحططت nuisette على جنب وبدات تختار في اخرين وخديجة وجهها احمار وهي تتخيل في روحها لابستهم قدامو وزادت خزرتلو ..وهو قاعد يستنى فيهم في الكرهبة مع جو .. زعمة كيفاش باش تكون علاقتو بيها ؟ زعمة حنين ؟ حست بكرشها تدغدغ فيها وهي تتخيل .. ياميمتي ..عمرها ماكانت تتخيل في حياتها باش تأخذ واحد كيفو .. ملي راتو طاحت على راسها .. كانت تسخايلو راجل كبير ... ومعديتها ليلة كاملة وهي تنوح.. وتتخيل فيه ياخي طلع شباب يهبل .. وهاك الشمطة مرت بوها باش تموت من القهرة كيف راتو ..حستها هبلت وموش مصدقة .. ولات تعامل فيها بالباهي هالليامات ..وعينيها مليانة بالحسد والبغض .. الله يرحم والديك يامي ناجية ..
كملو شراو هي وسناء ..سناء عملت على كيفها وشراتلها المهدع الكل ... ماخلاتها تشري 2بيجاما كان بالسيف .
اش تعمل بيهم ؟
- وه؟ ياخي باش نقعد عريانة نهار كامل ؟ ههه وكيف هو يمشي للخدمة اش نعمل ؟
- باهي باهي تو نزيدو نشريو des survetements للدار صحيح عندك الحق .. ههه فاتتني هاذي
ركبو في الكرهبة ..سناء ركبت من قدام . وهي ركبت من تالي بحذا يوسف وقعدت تبوس فيه وتضحك ..
-شريتو كل شي ولا مازال ناقصة حاجات ؟ يسال في اختو ماغزرلهاش جملة
-لا مازالت شوية حاجات برك
اففف انت كان نسيبك على كيفك ضاهرلي ماكش باش تكمل ؟ لواه هذا الكل ؟ ياخي باش توفا الحوايج ؟ تو كيف تمشي غادي تشري اللي تحب !!!
يحكي عليها كايني موش موجودة اصل !!! وقعدو ثنية كاملة وهوما يتناقشو وسناء تقنع فيه وهي شادة يوسف حاطتو قدامها وتحكي معاه وتغزرلمحمود بالسرقة .. وهو متوتر وفادد كاينو الموضوع هذا ما يعنيهش جملة .. كاينو ماهوش عرسو ..
تعداو الايامات فيسع .. ومحمود كان مزروب يحب يرجع لفرنسا .. وجاء نهار الصداق .. بوها دهن الدار واستدعى العايلة الكل .. وهي مشات للحجامة ومعاها سناء ... الحجامة بعيدة شوية اما معروفة وسناء وصاتها باش ما تصبغش شعرها خاتر خوها ما يحبش الصبايغ
- هههه كلي هو شافني ولا مركز معايا .. تي حتى لون شعري مايعرفوش اصل خوك .. والله ماني عارفة علاش جاء خطبني ؟
امي ناجية هي اللي تحب تاخذني موش هو ..
-اش عندك فيه ؟ هو راهو هكاكا ..تحسو ما يركزش اما هو مركز على كل شي ... وموش انت لولا ولا لاخرى اللي تأخذ ماخذة تقليدية .. تو بعد تستانسو ببعضكم .. موش باش يلقى خير منك راهو .. محسوب هاك القورّة اللي يخالط فيهم يبردو على القلب هوما؟ .. هههه يابنتي العربي وحدو هههه ؟
حشمت وضحكت
يعطك دا يا سناء ديما ببلادتك ؟ -
كاشخة فيها ..
- يعطيك دودة محلاك طلعت .. هاكي باش تهبليه بلحق اليوم ههههه
- قعدت الحجامة تضحك وهي بدنها فور من الحشمة ماعادش فيها ...تسمع في التزمير البرة . وهي وين تلقاها .. قلبها ولا يدق .. يدق .. ويدييها ترعش ... لبها العرق...شدتها سناء من يدها وخرجو .. وهي تحرك في ساقيها بالسيف ..
كا ن واقف بحذا الكرهبة ... كان متلفت يحكي مع امو وتحسو متيقر .. غزرتلها امو وبدات تزغرط .. تلفت معاها ...حست عينيه وساعت وهو يغزرلها ... السخطة محلاه وما شبو .. لابس كوستيم في النوار وكرافات papillon طويل وكتافو عراض ... عسل عسل عسل .. يتاكل الحاصل ... غزرلها لعينيها .. وهي غزرتلو .. قعدو واقفين مقابلين بعضهم ... ماعادش تسمع في حتى حس وهو يغزرلها .. اول مرة تغزرلو لعينيه وهو اول مرة يثبت فيها ... قاعد باهت .. باهت في عينيها ... كحل في لون الليل وكبار .. فمها .. مدور وصغير .. خشمها .. دقنونتها ... الغمزات اللي في خدودها .. وين كان مخبي هالزين هذا الكل؟ ولا زعمة الحجامة قلبتها ...؟؟ اشبيه مانتبهش قبل ؟ بدات امو تجبد فيه من يدو وتضحك
- هاوليدي ؟ باش تقعد واقف برشة .. هاي عاد هز عروستك
تلفت لامو ورجع غزرلها .. كان وجهها ابيض برشة احمار انتبه اللي هو باهت فيها وشلق على روحو .. امو وسناء شادين الضحكة بالسيف .. بعد من الباب وحلهولها قالها
-تفضل ..
ركبت وركايبها ترعش .. وجهها مطمطم .. وقلبها تحسو باش ياقف من الحشمة .. وهو ركب بحذاها . ريحة البارفان متاعو دوختها ... مبنها ومحلاها ريحتو .. ركبت امو من قدام .. ويوسف في حجرها .. هزت راسها وضحكتلو
-tu es belle قالها بالشوية وهو يغزرلها وبعد غزر لبوه ومدلو يدو حب يجيه ..
هزو بوه من عند مماتو وحطو بيناتهم ... جات يدها في ايدو وهوما يلعبو معاه الزوز .. حست بالكرون ضربها بعدت يدها فيسع .. وهو قعد يغزرلها .. متفاجئ... كاينو حس بحاجة هو زادة الوقت هذاكة ...

الحلقة الخامسة
مشاو للبلدية والكراهب في جرة بعضهم حاسة روحها في حلمة .. كل شي تعدى فيسع .. ايدها ترعش وهي تصحح على صداقها .. حاجة ماتتوصفش انك تولي مرت راجل .. راجل ما تعرفوش .. ما تعرفش طبيعتو .. ماتعرفش حتى خدمتو شنية .. حست بالندم .. بالخوف .. بالرعب .. وهو يصحح غزرلها .. موش عارف اش عمل .. شكوني هاذي اللي ولات مرتو ؟ وحدة ختارتهالو امو... شافتها في الحمام .. هو اللي عاش معضم حياتو في بلاد أوروبية ..هو اللي شرب منهم وخذا منهم والطبع على طبعهم .. في اللخر يرضخ لامو .. وياخذ وحدة ماعندو بيها حتى علاقة ... وحدة ريفية جاهلة .. ماهيش من مستواه لا الاجتماعي ولا الثقافي .. اما ولدو حبها وهي حبتو ... زعمة هو خير مصلحة ولدو على حساب حياتو ..؟ واللي حسو قبيلة وقتلي شافها خارجة من الحجامة ؟ وقتلي جات يدو في يدها وهوما يلعبو مع يوسف؟ .. هي مزيانة هذا ماينكروش .. بون موش مزيانة برشة .. عادية .. وزادتها الحجامة شوية زين ... اما هو ماتسهويش النساء اللي من نوعيتها .. هو يحب المراء اللي عندها شخصية .. المرا اللي تبني روحها وتكافح .. المرا اللي تكون ند ليه .. مرا زادة تكون شقراء وعينيها ملونة .. كيما كريستين .. اااه كريستين .. قداش توحشتك .. حتى مرا ما تنجم تأخذ بقعتك يا عزيزتي ...
بعد البلدية روحو للدار وكملو العشوية غادي ... تعدات عشوية حلوة .. شطيح ورديح وجو .. سناء بدعت هي وخطيبها .. وامها ترس فيها ... سناء بنية تحفونة .. محامية تخدم وخطيبها زادة طارق كيفها .. طفل تحفون .. عاقل ومن عايلة ميسورة كيفهم ... قرواو مع بعضهم وحبو بعضهم .. عرسهم في الصيف انشالله ... مرت بوها باش تموت من القهرة وهي ترا في دار حماتها والهيلمان والناس الاكابر.. عيشتها في الغم والهم من صغرتها .. تحرش عليها بوها اللي شخصيتو ضعيفة قدامها .. يشدها حية يسيبها ميتة .. انشالله ربي ياخذلها حقها منهم .. تعبوها وحطموها ..ماخلاوهاش حتى تكمل قرايتها اللي تحبها برشة ..
طبست عليها سناء وهي قاعدة على الكرسي
هيا عروسة .. وقيت تبدل حوايجك وتمشي انت وراجلك .. (وضحكت ) صحة عليك .. وقتاش انا وطارق يسهل علينا ربي ههه ؟
حشمت وهي تغزرلو .. تلقاه واقف مع طارق .. ماعلى بالو بشي ... حاط يدو في مكتوبو ويشرب في كاس .. الله اعلم اشفيه هاك الكاس؟ هه مانظنش كان الروزاطة متاعنا .. طلعت لبيت نومها هي وسناء .. ساقيها ترعش .. حاسة روحها رزينة بالروبة .. خلطت عليها امو ومرت بوها يزغرطو ... وحدة فرحانة ووحدة بالغزول .. باستها امو من جبينها وقعدت بحذاها
-انت من ليوم بنتي موش كنتي .. والله الحمدالله اللي تمنيتو لقيتو .. ملي ريتك وانا نقول مصابها لولدي مصابها لوليدى . الحمدالله ياربي .. انشالله ربي يهنيك معاه .. ولدي راهو باهي برشة وحنين برشة .. اعرفي انت برك كيفاش تتعاملي معاه .. تكسبيه .. وتحطيه في مكتوبك .. الرجال راهم كيف لولاد الصغار ... يحبو كلمتهم هي اللي تمشي .. يحبو لمرا تدللهم وتجري في حضوضهم ... اعملي اللي يقلك عليه يحطك في عينيه واكثر ...
- عيشك امي ناجية ( طبست راسها حاشمة ) انشالله ربي يقدرنا الزوز.. انشالله ما ترا مني كان الخير
ضحت مرت بوها ضحكة صفراوية
- تهني الا ناجية بنتي متربية وعاقلة . هامالا واشي انا راني اللي مربيتها .. انشالله ماتهنيك كان هي على ولدك وولده زادة
غزلت وهي تسمع فيها . تلفتت وباست خد حماتها وعنقتها .. قداش حضنها حنين .. ومحلاها .. تفكرت حضن أمها وبدات تبكي ... شدتها حماتها وسناء وعنقوها الزوز
يزي من البكاء عيش بنتي موش باهي .. ربي يهنيك ويفرحك .. وغزرت لمرت بوها غزرة متاع وحدة في بالها بكل شي
هيا نخرجو احنا الا فاطمة خلي تبدل حوايجها لعروسة
خرجو لكل وقعدت وحدها ..شافت روحها في المراية .. تلقى الاكحل لكل هبط على عينيها .. ههه ولات عبيثة .. قعدت قدام المراية وبدات تمسح في المكياج ..
لقات حوايجها محطوطين في الفليجة خملتهملها سناء .. وحطتلها فوق الفرش سروال اكحل وسورية bleu تهبل .. نحات روبتها وبدات تلبس في حوايجها .. تسمع في حس قدام اللبيت مشات تجري سكرت الباب بالمفتاح لا يدخل عليها وهي عريانة .. تسمع فيه يحكي بالتليفون en français يمكن مع جماعة خدمتو .. وبعد تسمع فيه يضحك ويحكي مع واحد بالعربي
- ههه ياولدي وحلة كلبة وحلتها .. هاكا ناجية مالقات ماتعمل ... (بعد سكت شوية يسمع ) اش يهمني فيها ياخي هي كانت تحلم أصلا بواحد كيفي .. وحدة جاهلة .. نهايتها واصلة للثالثة ثانوي كان موش اقل ... تي ماهو جو حبها .. مانعرفش علاش ههه درا شنوة اللي را فيها ... (سكت يسمع ) وي وي هايكة تتلهى بيه عبارة جبت مربية لجو .. هههه اما تكلفتلي صداق .... وبعد بعد شوية وكمل يحكي ... وهي فشلت ... قعدت فوق الفرش وشدتها غصة البكاء ... اما مابكاتش .. يزيها من الدموع .. يزيها من الوجيعة .. هو حب مربية ليوسف ؟ عندو الحق .. هي جاهلة ؟ الغلطة منو هو اللي ماحاولش يعرفها .. اما باش يتمنيك عليها ويضحك عليها مع صحابو؟ ... هذا اللي وجعها .. وبعمرها ماهي باش تسامحو عليها ...وتو يشوف التقوعير والجهل على قاعدة ..

الحلقة السادسة
غزرت لروحها في المراية .. كانت لابسة السروال النوار والسورية .. نحاتهم وحلت الفليجة .. قعدت تقلب فيها حتى لين لقات مريول وjupe موش متناسقين مع بعضهم حتى طرف .. لبستهم ومشات جبدت بيجاما وحطتها في الفليجة وسكرتها ... دق الباب وهو يكلم فيها
- هيا مازلت مدام ؟ ماعادش بكري راهو ( يكلم فيها وفادد ) هاي باش توريه الفدة على أصولها ؟ لمت شعرها الطويل كعكة من غير ترتيب وتنفست بقوة .. وحلت الباب ... تبسمت بتبهليل ... الصدمة اللي في وجهو وهويغزر لحوايجها ماتتوصفش .. كان لابس سروال دجين ومريول لاصق في بدنو .. مرايات النظر نحاها وعينيه وساعت .. شدتها الضحكة وهي تغزرلو .. كانت لابسة jupeللركبة ومريول طويل يوصل لشطر jupe وصباط طالون لا علاقة بالحوايج .. هههه حاسيلو قمة في التقوعير ...
- هـ ...هكة خارجة؟ (هز حواجبو ويهز فيها ويحط باشمئزاز ) قالب شواربو وفادد عاللخر
- امممم.. شبيني ماعجبتكش ؟ ( شادة الضحكة وهي تتكلم )
- ماعندي مانقول الحاصل (ولفت وجهو يغزر اللوطة ) ربي يهديك يامي وكهو .. كان يقول فيها بالشوية اماهي سمعتو .. و مازال ياسي المغرور ؟ ماعندك ماشفت .. .
هزت الفليجة وهبطت من الدروج .. لقات امو واختو قاعدين في الصالة .. هو سبق وقعد بحذاهم وجهو مقلوب .. سناء حلت فمها وهي تغزرلها .. مشاتلها تجري شدتها من ايدها
- وه ؟ شنية هذا اللي لابستو ياشومي ؟ ياخي موش قتلي خرجلي السروال والسورية الزرقاء ؟ اشبيك هكة ؟
تبسمت وجبدتها بالشوية ليها قالتلها –خوك منفوخ برشة يلزمو شوية فشان .. تو نحكيلك مبعد
غزرت سناء لخوها تلقاه مطبس راسو يلعب مع ولدو ووجهو باش يترشق بالغش .وعاودت غزرتلها باهتة
-احكيلي شفما ؟ فاتتني حاجة ؟ ..
- ماني قتلك تو نحكيلك ؟
تلفتت امو قالتلهم
اش توتوتو غادي ؟ سناء سيبي العروسة ماعادش بكري عليهم ؟
قعدت تمشي بالشوية وين وصلت بحذاه طبست ليوسف قعدت تبوس فيه وهويغزرلها بغزول ... عنقها يوسف وشدها من رقبتها ... تلفتت لسناء وسالتها ببراءة
ياخي فاليجة يوسف حاضرة ؟
حست سناء باش تدوخ ... وامو قالتلها
علاش ؟ ياخي باش يمشي معاكم ؟
أي بالطبيعة ؟ وانا ننجم نبعد على حبيبي ؟ SI NON مانمشيش
- والله احسن كلمة قلتها تو ( قام وحستو يتهز ويتحط بالغش ) موش لازم منها ها المشية كان علي انا ماعينيش فيها
- ياخي كان هزينا يوسف شنوة المشكل ؟.. ماهوش باش يقلقنا هو جملة ؟ ويزيد يوسعنا بالنا ويحس روحو مع عايلتو .. خليه يستانس بينا مع بعضنا ؟
- مع بعضنا أي؟ ( كان يتكلم بالشوية معنتها تو تعيا وانت تقبض وملفت وجهو عليها حاطط يديه في مكتوبو وتلفت لسناء) برا برا حضرلو دبشو خلي نمشيو في هالليلة الكلبة ..
سناء مبهمة ما فاهمة شي شدتها من يدها وجبدتها وهي شادة يوسف
-ايجا معايا نلمولو دبشو ..
مشاو للبيت سكرتها وتلفتت لخديجة وهي تحط في يوسف اللوطة يلعب
- تو تحكيلي اش صار ؟
- تنهدت وقعدت فوق الفرش وبدات تحكيلها اللي صار الكل .. بعد ماكملت سناء الطرشقت بالضحك
- هههه نتصوروا كيف راك وانت هكة اشصار فيه مسكين ههههه ؟ اههه ياميمتي اش باش تعملو ا توة ؟
- والله مانعرف ؟ كلامو عليا غزلني وقلبلي البرنامج الكل .. خوك يسخايلني جاهلة وقعرة ... ازح قداش مضروب في روحو ... رضيت بالمكتوب وقلت موش انا لولة ولا لخرة ناخذ ماخذة تقليدية .. وزيد كيف ريت يوسف فرحت خاتر حبيتو برشة .. محلاه ومعقلو ..قلت عادي تو بالعشرة نستانسو ببعضنا ... تو نفهمو بعضنا .. نلقاه جملة موش قابل أصلا الوضع .. وزيد يغزرلي من الفوق كايني حشرة .. والله حقرت روحي والله
- اللطف عليك وه ؟ خويا راهو مستانس من اللي هو صغير يقرا هوني والبنات تجري في حضوضو ... يابنتي هابطين عليه وهو على شكون يرضى .. استانس هكاكة .. عمرو ماجرا في جرة وحدة .. ولا تعب باش يوصللها .. ههههه اما تعرف عجبتني فكرتك .. ههه خلي نبدلو الروتين شوية .. وجهو تالمون مقلوب قبيلة باش يطرشق نحسو ... ماللي ريتك حاستك باش تبدل فيه حاجة خويا ..
- نبدل ؟ ههه تفدلك انت ؟ ياذنوبي كان باش نحركلو شعرة ؟ يابنتي ماهوش حاسبني اصل ؟
- لا ريت غزرتو ليك قبيلة وانت خارجة من الحجامة .. خويا ونعرفو .. عينيه لمعت .. عجبتو .. اما هو متكبر وما يعرفش يعبر .. بهيم .. ( سكرت الفليجة بعد ماحطت حوايج يوسف وضحكت ) اما رانا نساء وما يقدنا حد ... ربي ربي عزيزتي ويجعلكشي .. ربيه هو وولدو ...

الحلقة السابعة
وصلو للوتيل في سوسة مع العشرة متاع الليل .. كانت قاعدة من تالي هي ويوسف في حجرها .. رقد مسكين في حضنها وهي تعنق فيه ... ثنية كاملة وهوما ساكتين .. كلمة ما قالهاش .. وهي قعدت تلعب مع يوسف مرة يحسبو مرة يغنيو ساعة ساعة تهز راسها تلقاه يغزرلها من روتروفيزور ..... كيف رقد الصغرون بات الحس وكملو الثنية ساكتين .. كان صوت شارل ازنفور في CD في الكرهبة يغني .. هدالها عصابها وخرجها من LMODE اللي هي فيه ..
كيف دخلو للوتيل خذا يوسف من حضنها قربلها لين النفس متاعو جاء في وجهها ... هز ولدو ويديه مست فخذها وهو يهز فيه ... حست برعشة والدغديغ في بدنها الكل وخرت شوية .. وجات عينيها في عينيه شعرو هابط شوية على جبينو تمنات وقتها تعدي صوابعها عليه وتحطلو راسو في حضنها وتعنقو .. هذا راجلها ..حلالها ... متاعها هي .. علاش حاستو بعيد ؟ علاش خايفة منو؟ علاش مش حاسة روحها عروسة كيما العرايس الكل؟ راجلها يبدا فرحان بيها وباش يطير بيها طيران .. ويستنى وقتاش يدخل بيها للبيت ويبداو وحدهم .. طول عمرها وهيا تأخذ في حاجاتها من الدنيا بالسيف ... ديما وهي تحارب وتجاهد.. ما شافتش نهار باهي .. تلطش فيها الدنيا على الايمين وعلى اليسار .. ورغم هذاكة كانت تحلم كيف البنات الكل بنهار عرسها وبالروبة البيضة وبالراجل اللي جاي عالحصان الأبيض .. راجل يحس بيها ..يحبها ..يخبيها في حضنو ويسكر عليها .. وينسيها في اللي شافتو الكل ... راجل حنين ..حضنو دافي .. موش راجل باردة مشاعرو كيف اللي قدامها ... كان هاز ولدو وسابقها .. وهي تمشي وراه ..كان يمشي كاينو هارب .. حاستو مستعار بيها .. وعندو الحق .. الناس الكل اللي قاعدين كانو يغزرولها ويغزرولو .. ههه بحوايجها هاذي مستحيل كان يفكرو اللي هذيكة تكون مرت هذاكة .. حشمت وعملت روحها مولا الدار موش هوني وطلعت معاه في الاسونسور .. وجهو كيف العادة مقلوب وما غزرلهاش
- مازال ..مازال راقد يوسف ؟
- اممممممممممم .. يجاوب فيها بالسيف
- مسكين تعب حتى هو اليوم
- امممممممممممممم
سكتت .. حاستو مايحبش يحكي .. وصلو لبيتهم .. كانت كبيرة ومزيانة برشة .. حط يوسف بالشوية فوق الفرش وكسل يديه وهي قعدت واقفة في الوسط .. موش عارفة اش باش تعمل .. خلط عليهم الراجل جابلهم فاليجاتهم .. حل محمود وحدة منهم .. جبد منها حوايج وقالها
-هاني داخل ندوش .. وانت اش باش تعمل ؟
طبست راسها .. حست بفوارة طلعت لراسها والدم الكل خرج من وجهها وولا احمر كيف الطمطومة .. انقذوني .. ههه مازالت موش مستوعبة لتو اللي هي معرسة وباش ترقد اليوم وبحذاها راجل .. وموش أي راجل .. يا ميمتي .. راجل يدوخ .. ههه راجلها ... قعدت تعاود فيها في مخها الكلمة لعلى تستوعبها ..
- ب..اش .. باش نبدل ليوسف حوايجو .. ب..بعد ندخل ندوش بعدك ..
- اوك
ودخل وهي قلبها بالدقداقة .. بدنها لكل سخن .. اللي تعرفو ومتاكدة منو انو ماش باش يصير شي بيناتهم اليوم .. لا يزي يوسف معاهم .. لا يزي حاستو هو بارد جملة من ناحيتها .. لا يزي هي حاشمة وموش عارفة اش تعمل ..؟ لكن هذا مامنعهاش من التخيل .. هههه .. حلو برشة التخيل .. موش كل يوم تبدى قاعدة مع واحد مغري ... ومغري باتم معنى الكلمة كيف راجلهاet surtout كيف خرج من بيت البانو .... اممممممممممم ياميمتى .. ريحتو تفحفح .. شعرو مبلول ولابس شورت وخلعة .. قداش شاهية تنقز عليه وتلعب بهاك الصدر المعبي بالشعر .. اووف .. افكارها ياسر منحرفة ولات .. هههه. ياربي كيفاش باش تكملها هالليلة الكلبة .. هو ماعلى بالو بشي .. يتصرف عادي .. بالطبيعة هو مستانس ما يقلقوش باش يخرج حتى عريان قدامها ... كملت بدلت اليوسف وهو راقد ... باستو ورجعتو في الفرش .. دخلت لبيت البانو وخرجت لابسة بيجاما مصور علاها هالو كيتي .. سروال وسورية طوال .. مايبينو شي .. تي هي هكة وحاشمة ... حلت شعرها الاكحل .. كان طويل .. يوصل لتحت ضهرها .. ملى بدات تقرا في الليسي ما قصتوش .. طويل وغزيروارتب من عند ربي ... حمدالله ما تعبهاش لا جبدان لا تكسير راس ..قعدت تمشط فيه بالشوية قدام لمراية .. وتشوف في روحها ... عينيها كبار كحل .. حواجبها خشان .. بيضة برشة .. وفمها صغير .. كيما يقولو فيها غنجة .. زين عربي باتم معنى الكلمة .. اما هي موش حاسة بيه الزين متاعها .... كان تشوف في روحها عادية واقل من عادية .. ماتملالوش عينو

..
كيف خرجت هي من بيت البانو ومشات بحذا المرايا ..كان هو متكي عالفرش يكونكتي بالتابلات متاعو .. ماغزرتلوش .. حسها مربوثة من مشيتها .. مطبسة راسها .. هههه لابسة هالو كيتي نهار عرسها ؟ .. حال روضة ضاهرلي .. يوسف من هنا وهي من غادي .. يلعن بو هالعرس المحنون هذا .. اما كي حلت شعرها .. حط التابلات وشرد فيها .... طووووويل واكحل كيف لون الليل ... محلاه .. يديها مزينيين بالحرقوس وهي تمشط فيه .. بيض كيف الشمعة وهاك الحرقوس زايد فيهم الشطر .. يغزرلها وباقي يقنع في روحو اللي هي موش من النوع اللي يجبدو .. هو يحب الشقراء .. الجريئة ... اللي ترمي روحها عليه وتشيخو .. موش الحشامة اللي تستنى حتى لين هو يبدى المبادرة .. يحب المرا اللي تثيرو وتحركلو غريزتو .. بانوثتها ودلالها ..موش اللكزة اللي قدامو ....مغطية روحها منراسها لساقيها .. محسوب هاك البدن الهايل اللي تغطي فيه ..؟؟ تو يدوخ هو كيف يراه .؟. تي ملا راحة بنقس .. محسوب ناقص نساء هو .. ؟؟ كيف يحب تويجيب احلى وحدة ... كان تقعد غادي دهرها ما يتلفتلهاش ...
- انت وين باش ترقد ؟ (سالها ويغزرلها بتمقصيص)
- ت..تو نرقد عال canappé هنا ( جاوبتو من غير ما تغزرلو )
- اوك على كيفك .. أيا بون نوي
حط التابلات على جنب الفرش ونحى lunette النظر من عينيه واتكى بحذا ولدو ورقد .. تلفتتلووالدم طلعلها لراسها بالغزول ... ماعبرهاش جملة... ههه يعني شنية متوقعة ؟ باش يجيها يجري ويقلها محلاك يامرتي ؟ ههه تحلم.. مشات اتكات .. لقاتها واسعة شوية .. يابسة .. قعدت تتقلب ليلة كاملة .. ماجاهاش النوم وهي تسمع في النفس متاعو .. ساعات يتحرك .. تهز راسها تلقاه يتقلب كل مرة على جنب .. صحة عليه شايخ في الفرش .. وهي ... هي قاعدة لهنا تبكي على سعدها المكبوب ..

الحلقة الثامنة
تحس في يد تمس فيها من خدها .. مانجمتش تحل عينيها ... زاد مسلها شعرها .. اممممممممممم . حلت بالشوية لقات يوسف واقف قدامها .. هه مبنو ومحلاه ... كان واقف قدامها .. والدنيا ضاوية .. متعرفش على روحها كيفاش رقدت البارح .... قعدت ساهرة ساهرة لين داخت بالنوم –بون ذور ( قالها يوسف وبالطبيعة يحكي بالفرنسية ) ذيعان ...
تبسمتلو وقامت هزتو في حضنها تبوس فيه
يعنبو زينو الذيعان ياربي
وتلفتت مالقاتش هاك اللي يتسمى راجلها في البيت .. بقعتو فارغة
-وينو papa؟
خرذ مالكيتوث
-باهي عزيزي نمشيو ننظفو حالتنا بعد نطلبو لفطور اوك ؟
- اوك طلبت لفطور في التليفون وبدلت ليوسف ولبست هي سروال دجين وبودي .. ضهرولها بدنها بالباهي .. المرا هاذي من غير تقوعير .. موش على خاترو ..اما باش لعباد ما يقعدوش يغزرولها غزرة دونية .. خاتر الوتيل مذخم تلقى فيه كا ن الكعبة واختها ..كان عليه هو يتفلق. بعد نصف ساعة كانت تلعب هي ويوسف في البالكون وسي الشباب دخل ... كان لابس شورت ومريول وسبادري .. ودبوزة ماء في يدو .. lunette شمس ترعب عليه .. نحاها وغزرلهم .. طبست راسها . ويوسف مشالو يجري يبوس فيه .. قام يضحك..
- قمت يا قطوس ؟ بو زينك وباسو من خدو وتلفتلها
فطرتو ؟
- وي يوسف جاع طلبت باش يجيبوه هوني
كانت واقفة شعرها محلول .. ونسمة خفيفة تلعبلها بيه . وجهها صافي كيف وجهbb لابسة دجين ومريول ظهرولها طولها ...قعد يهز فيها ويحط ... عراها من غير ما يعريها .. ياميمتي ملا غزرة عليه . وماصحها تذوب اصل ... وهو مافاق بروحو اللي هو شرد فيها الا ما شاف وجهها احمر وطبست راسها ....
- ب..باهي نمشي نعمل دوش بعد نخرجو

اول مرة يلقى روحو مربوث ومالقاش ما يحكي .. هاي طلعت مزيانة وبدنها حلو ؟ اما.. اما ماهيش ستيلو ... أي ما هيش ستيلو ... شنوة وين يتكلم كلمة وجهها يحمار؟ ياخي باش ترجعو لجو مراهقة ؟ ههه مالا كان يمسها اش باش تعمل ؟ وحس ببدنو سخن وهو يتخيل فيها بين يديه ..لا ما يعصرها عصران ... لا لا ما يقرمشها ... شنوة يامحمود الأفكار هذي ؟ ياخي موش قلت ماتعجبكش وقعرة ؟ أي اما هي مرتو تو .. كاتب عليها الصداق .. وهوراجل .. يعني يستحق مرا في حياتو .. حتى كيف ماتت كريستين .. ماقطعش علاقاتو مع النساء .. كان يخرج من علاقة يدخل في أخرى .. وتو اش باش يعمل .؟ باش يخونها ؟ وهي اش باش تعمل ؟ هي مازالت صغيرة يعني باش ترضى تعيش معاه من غير ما يصير شي بيناتهم ؟ اكيد راهي كيما أي مرا تحب تعمل علاقة ؟ هو مايعرفش عليها حتى شي .. مايعرفش عملت علاقات قبل العرس ولا لا ؟ هو أصلا ماعندوش فكرة عليها جملة ... شنية تحب شنية تكره ؟ تي حتى نومرو تليفونها ما يعرفوش ؟ يمكن جية يوسف معاهم جات بصلاح .. خليه يسترجع افكارو .. يفهم روحو ويحاول يفهمها .. هاذي عشرة عمر باش تكون بيناتهم موش نهار ولا اثنين .. وحتى كان امو دزتو دزان للماخذة .هو موش صغير ووافق عليها .... اكيد امو شافت فيها حاجات ماشافهومش هو .. هه هاكا ناجية راهي خبيثة وتعرفو ... اكيد مالكدتهالوش بلاش هكاكة هههه
خرج من الدوش يلقاها واقفة قدام المراية تلم في شعرها
- خليه محلول ( قالها من غير مايشعر )
غزرتلو مستغربة
- نعم ؟
- زاد قربلها حتى لين حست بالنفس متاعو تخلط بالنفس متاعها .. شعلت فيها النار ... وبدنها بدا يفور .. جاء هز يدو كاينو باش يمسو ... بعد عاود هبطها ...قعد يغزرلها .. غزرة ما فهمتهاش .... غزرة ذوبتها .. دوختها ... دخلتها في عالم فيه كان عينيه ... عينيه اللي تشوف فيهم في وجهها tellement صافيين ...سرحت معاهم ونسات كل شي .... زاد قربلها .. لصقها .. بدنها رعش بكلو غمضت عينيها وشفايفها رعشو .. حست روحها باش تترشق ... كان صدروعريان وواقف قدامها ... قداش تمنات في اللحظة هذيكة تحط راسها غادي .. قداش تمنات تغطس في وسطو وتخليه يلعبلها بشعرها ... من اول مرة شافتو فيها وهي تحلم تكون ليه .... حبتو .. حبتو حبتو ... تو تاكدت من مشاعرها .. حبتو .. ماهيش هاربة من مشاكلها وحياتها وقتلي وافقت عليه ... وافقت خاتر حبتو .. خاتر هو الراجل اللي تمناتو حياتها كاملة .. حتى وهو يغزرلها غزرة دونية .. حتى وهو حاقرها ... حتى وهو يستعار بيها ... تحبو ..حست بصوابع يديه فوق شعرها .. وذابت .. كاينك حطيت كورنو قلاس فوق النار ... ذابت وسخنت .. هزلها شعرها بين صوابعو وقربو لخشمو وقعد يشم فيه
- محلا ريحتو ومحلاه شعرك ..( كان يحكي بالشوية كاينو يوشوش )زاد قربلها كاينو باش يعنقها وهي تكبست وزادت غمضت عينيها .. ريحتو دخلت في خناخشها طول .كتافو كبار وواسعين . هزلها راسها بالشوية وهي ترعش كيف الفروج .... طبس راسو لين قربو شفايفو لشفايفها ...و..
- Papaماناش خارجين ؟

الحلقة التاسعة

غزرلها غزرة متاع لوم (كاينو يلوم فيها على جيبان يوسف معاهم) وبعد شوية خلاها النفس مقطوع عليها .. غمضت عينيها وحست بساقيها الكل ترعش .... وهوطبس على ولدو وباسو .. هاك البوسة كانت باش تاخذها هي وتحرمت منها ... ااااااااااه ياربي علاه ؟ هز راسو وعاود غزرلها وتبسم كاينو متشمت فيها ... ولا يجبد عليها بالمرتاح ههه ... حس اللي هي باش تموت حسها متشوقة لبوستو .. ولكل شي .. ههه يعرف روحو مايتقاومش ..( ياعيني عليك يا محمود كيف تبدا تعبر)
_ هانا خارجين صغروني نلبس ونخرجو ...
هز حوايجو ودخل لبيت البانو باش يلبس .. خلي يلبس لهنا خير ماتدوخلو ... تي هي هكاكة ووجها ولا كيف كعبة الطماطم .. خلي كان ينحي حوايجو قدامها ... هههه .. اما محلاه .... محلاه وجهها .. قداش توحشها ... الحشمة عند المرا قداش توحشها .. ليه برشة ... برشة ..تي سنين ماراهاش .. خلطتو بالنساء الاوروبيات نساوه فيها ... ضحك وهو يمشط في شعرو.. حك لحيتو واستواها ... حس روحو فرحان .. فرحان .. مايعرفش علاش ؟ ههه كان ماجاش يوسف معاهم راهي تو ولات مرتو .. موش عارف اللي حسو معاها .. وموش فاهمو .. ؟ رغبة ..رغبة قوية جاتو وهويغزرلها .. كيف راها واقفة في البالكون وشعرها يطاير وهي تضحك .. مانجمش ماياقفش ويغزرلها .. شاف وقتها اللي شافتو امو فيها .. شاف الحلاوة والزين والبدن اللي حكاتلو عليه ناجية ...شاف البراءة وشاف الحشمة .. شاف الانوثة اللي كانت مخبية في الحوايج الخايبة اللي تلبس فيهم ET SURTOUT حوايج البارح اعععععععععععع يرعبو ... خسارة ناقصة شوية اناقة .. وناقصة ثقافة ... هههه اما فما حاجات أخرى يعوضو .. كيما قال ناجية ماكش باش تحطها بورتوكلي وتدور بيها .. خلي يشوف اخرتها مع الحشامة هاذي ... وين باش توصل معاه ؟ الله اعلم اش مخبيتلو الايامات ؟
قعدو في قهوة في القنطاوي .. ويوسف بدا يجري ويلعب بين الطواول ..كانت لتو حاسة بقلبها يدق بالقوي ..كانت تلهي في روحها بيوسف باش ما تغزرلوش .. وهي حاستو يلعبلعها باعصابها ويضحك عليها وفاهمها ... حاستو فاهم اللي يدور في مخها الكل ... فهم اللي هي كانت متشوقة لبوسة منو .. عندها الحق سناء كيف قالت النساء تجري في جرتو والطايحة اكثر من الواقفة ؟ ياربي ... قد ماتحلفت البارح وقدما تغششت ... بصبعو بركة طيحني ؟ ياربي اش باش نعمل تو ؟ ياربي عينيه يهبلو .. ياربي نحبو ومانحبش نضعف قدامو ... ياربي قويني .. قويني .. مانحبش نكون حاجة ساهلة بالنسبة ليه ياخذني وقت ما يحب ؟ نحبو يتعب باش يوصللي .. نعرف اللي انا في اللخر باش نكون ليه .. اما نحبو يقدرني .. يحس بقيمتي ... مانحبش نكون مرا كيما أي مرا بالنسبة ليه .. نحب نكون مميزة .. نحب ليلتي الأولى معاه تكون مميزة .. نحبو ... نحبو يحبني .. ولونو صعيب انو يحبني ... لكن يحترمني عالاقل .. ااههه يا قلبي .. قداش باش تعاني ..
- اش تحب تشرب ؟ سالها وهويغزر لولدو .. لابس LUNETTEشمس .. تحسو موش يغزرلها .. اما هو مركز معاها ... ويتبع فيها
- اللي يجي ..
- اممم .. طلب SERVEUR جيبلنا JUS وقهوة وعيط ليوسف .. يا يوسف اش تشرب بابا ؟

- جاء يجري يتكعبر .. قعد بحذا خديجة . عنقتو وحطتو عالكرسي .. تلفتلو بوه يضحك
- شنوة احنا معادش نضحيو ؟ ههه عندك الحق .. حتى انت وليت تحب التعنيق كيف بوك ؟ ههه
ذابت وحشمت .. تلفتت تلقى زوز كوبلوات قاعدين بحذاهم ولاو يضحكو .. وهو تبسم .. هو يعمل بلعاني باش يشوف وجهها يحمار .. يشيخ كيف يشوفو هكاكة ...
ذيبلي ذي –
- باهي بابا .. نجيبلك مالا لا
قعدو يلعبو مع يوسف ويضحكو معاه وعداوها قريب نصف نهار وهوما يلعبو فيه في الماناج .. تفرهدو وشاخو وضحكو .. أي واحد يراهم يحسهم عايلة فرحانة .. اما الدخلاني يعلم بيه كان ربي
- ياخي ناجية منين تعرفك ؟ سالها وقتلي هوما يتمشاو بحذا البحر ويوسف يمشي قدامهم ( يعرف اما يتبهنس يحب يسمعها هي اش باش تقول)
- في ... فال.. (تربثت ) فيالحومة .. كنت ديما نراها في الحومة وفي ..
- امممم فهمتك .. اما هي تحبك برشة .. نهار الكل وهي تشكرلي فيك وتمجد لين فلقتلي راسي ...
- هه امي ناجية الناس لكل تحبها لسانها حلو وطبيعتها محلاها .. ربي يخليهالك انشالله ( وتنهدت) طبست راسها وهو غزرلها والسيقارو في يدو
- قداش عمرك وقتلي ماتت امك ؟
- 11 سنة .. كان عندها .. عندها المرض الخايب .. خطفها خطفان .. الله يرحمها
- الله يرحمها ..حتى انا باب مات بيه .. هذيكة الدنيا .. اما .. اما نحس مرت بوك صعيبة معاك ؟
- هه هي صعيبة برك .. تي حياتي ردتهالي جحيم .. تي .. (وسكتت)
- أمم نسمع فيك اش كنت باش تقول ؟ وقفت وغزرتلو .. كان لابس مراياتو ماشفتش عينيه اما حستو يغزرلها
- مانحبش نكسرلك راسك بحكايتي .. احنا جينا باش نتفرهدو .. مانحبش نتفكرها ولا نحكي عليها
حط السيقارو في فمو وعاود جبدو .. كان مركز مع وجهها .. شعرها عاملتو ظفرة على جنب .. زاد حلاها .. ردها كيف الطفلة الصغيرة ..جاتو برشة احاسيس وهو يغزرلها .. حب يبوسها من عينيها ..هههه ..عينيها يجبدو محلاهم .. رموشهم طوال .. قد ما قعد يقنع في روحو اللي هو يميل للشقراء لقا روحو مايللها من غير ما يشعر .. موش باش يقول حب خاتر مازال ماوصلش لدرجة الحب .. اما ..اما إحساس رقيق ناحيتها ... يمكن خاتر هي مختلفة عاللي شافهم .. مختلفة على كريستين .. تي هي النقيض متاعها موش مختلفة برك .. حاجة جديدة مازال ماعرفهاش ..نكهة جديدة يحب يذوقها ... فاكية حلوة يحب يحس بطعمها في فمو ... ههه وزيد على هذا الكل هي مرتو ..مرتو . .. مرتو اللي باش تربيلو ولدو وتعيش معاه ... ماقص على افكارو كان صوت التليفون .. موش تليفونو ..تليفون مرتو .. هزت التليفون وهو مركز معاها ويغزرلها ..
- اشكون ؟
- س..سناء
مايعرفش علاش حس بنخزة في قلبو كيف نوقز التليفون .. التليفون اللي هو ما يعرفش نومروه .. وقداش ارتاح كيف عرف اللي هي سناء اختو .. موش حد اخر...

الحلقة العاشرة
هزت التليفون و غزرتلو
-ننجم نكلمها؟
-بالطبيعة تو هذا سؤال؟
قعد واقف وهي بعدت شوية اتكات عالحيط متاع السور وقعدت تغزرلو يلعب مع ولدو ويجري وقلبها بالدقداقة
- الو سناء !!!
- الو ياسخطة !تي وينك نكلم فيك من قبيلة؟
- كنا نتمشاو عالبحر انا وخوك وجو
- اممم ماتقليش وليتو صحاب ؟
- يا سناء اش باش نحكيلك ؟
- احكي احكي ظاهر فيك طحت على راسك؟
دورت وجهها باش ماتقابلوش خاتر راتو مركز معاها
- ياسناء اش باش نعمل تو ؟
- فاش؟
- خوك حاستو ناوي على حاجة ...نعرفش اما ..اففف هبلني والله
- ههههه البارح تحلف وتتكتف ..زايد يابنتي ...خويا ما يقوى عليه كان ربي ..هههه
- سناء جيت نحكيلك وليت تتمقعر ...ماص..ار شي بيناتنا راهو ...اما ..اما جاء باش يبوسني اليوم ...كان موش يوسف راني مشيت فيها
- اي شنية المشكل ياخي راجلك هو باش تعملو شي في الحرام انتوما؟
- اففف يا سناء افهمني ؟ياخي نسيت لكلام اللي قالو البارح ؟
- هههه موش انا اللي نسيت ؟ انت ظاهر فيك نسيت وسلمت ( وقعدت تقلد في صوتها) هاو باش يبوسني ..هاو دوخني ..وانا نكلم فيك فيبالي بديت تخدم في خدمتك وتربي ههههه ياخي هاو طيحك وبالكاوو زادة هههه!!!!
- امان سناء تتمقصص؟ نعرف اللي هو خوك ...اما انا ماعندي حد كان انت امان ...ماعنديش لشكون نحكي ...انت اللي تعرف كل شي عليا ..امان عاوني ...( حست روحها باش تبكي) سناء مانحبش نضعف ...مانحبش نكون ساهلة بالنسبة ليه حتى ولوكان مرتو... عاوني .اش نعمل امان ؟
- ياخي شبيك مكبرتها الحكاية خدوج ؟ وه عادي راهو ...ياخي راجلك راهو ؟ باش تمنع روحك عليه ؟ تي ناجية مرجتني مالصباح وهي تطلب... اسالها اش عملت ؟ تهنات ولا لا ؟ ههه ماك تعرف عاد النساء القدم ..
تلفتت تلقاه واقف بحذاها
- لاباس سناء ماهو ؟
تربثت...موش عارفة من وقتاه واقف بحذاها.. اما حستو ما سمع شي
- لا..لاباس تحب تكلمها؟
- هات ..هز التليفون ..غزرلو ماهوش تليفون من النوع الغالي ...تي ارخص ماركة عندها ..الحاصل ما جاء شي ..اهلا نسنوس cv اشبيك شديت بالحديث اش فما ؟ امك لاباس ؟ اشبيها مالصباح مارجتني بالتليفونات ؟ اش تحب ؟ ...وقعد يسمع ....بعد شوية وقعد يحكي معاها ....مشوار ورجعلها مدلها التليفون
- شد سناء تحب تكلمك !وبعد شوية وقعد واقف
- ماتبطاش عاد باش نمشيو نفطرو ؟
-اسمع (قالتلها سناء) تحب تسمع كلامي ؟
-اي بالطبيعة ؟ كانت تتكلم بالشوية وتغزرلو وهو السخطة ما حبش يتحلحز
-باهي ....وقعدت تحكي معاها وتفسرلها اش باش تعمل وتوصي فيها باش ما تضعفش قدامو ...وهي تسمع وتستوعب ..وتدعي باش ربي يقويها ...

قعدو يفطرو وهو يغزر لعينيها اللي تهرب فيهم وماتحبش تغزر ناحيتو هو ...حسها مربوثة ...خايفة ...ملي مشات تحكي مع سناء تقلبت ....ههه ما يعرفش علاش قلبو ما قايلو خير ...قعدت تلهي في روحها وتوكل في يوسف وهو يلعب بالمغرفة ويفك يحب ياكل وحدو
-هههه تبدل الحلوف ولا يحب يعمل على روحو ( قالها وهو يجبد فيها بالحديث فماش ما يفهم حاجة )
-كبر خاترو المزيان وقعدت تبوس فيه وهو يضحك شايخ ...
-هههه صح عليه جو ..شبع بوس وتعنيق !!!!! ههه
يستفزفيها باش يشوف حمورية جهها ..حاستو عامل جو وماعلا بالو بشي...وهي تاكل في روحها ..
رجعو لبيت لوتيل .. قعدت حط يوسف اللي رقد من التعب فوق الفرش وتلفتلها وهي قاعدة فوق il canapé
اش نعملو تو ؟ ...وجاء قعد بحذاها ..قعد يغزرلها ويتبسم ...وهي ...هي وين تلقاها ...ياميمتي اجريلي اجريلي ..حط يدو وراء ضهرها واتكى بضهرو ..حل التلفزة وهز ساقيه حطهم فوق الطاولة ...كل حركة يعملها تشعل فيها النار ...وتضعفها ...كل تبسيمة منو ..تهزها بعييييييد ...وقتلي عرفت اللي هي تحبو ...حست بروحها ضعيييفة ...حساسة برشة .. كل شي في حركاتو ولا في تصرفاتو ياثر عليها ...يزيد ها محبة ليه وعشق ...بدنو ..عينيه .. رجوليتو الزايدة ...لحيتو اللي تتمنى تعدي صوابعها فوقها ...خشمو المشنقل الفوق وزادو زين على زين ...اما كلامو اللي سمعتو وقتلي يحكي عليها مع صاحبو وجعها ...وجعها برشة ...( هاني جبت مربية لولدي اما كلفتلي الصداق....وحدة قعرة وجاهلة ....) لتو مازال يرن في وذنيها ...لتو ...ودمعت عينيها ..تلفتلها محمود يغزرلها باهت
- لاباس خديجة ؟اشبيك؟ وقربلها باش يمسها ...بعدت شوية ...هز حواجبو مستغرب ..وهي قامت تجري لبيت البانو ...خلط عليها يدق في الباب
- خديجة اشبيك ؟ فهمني اشبيك ؟ من الصباح وانا نرا فيك موش قد بعضك !!!ياخي اش فما ؟
كان يدق في الباب وهي قاعدة تبكي بصوت ضعيف ..ما تحبش تسمعو ...تبكي موش فاهمة علاش تبكي ...من شيرة تحبو ومن شيرة تحبش يمسها ..من شيرة تحب تتمتع معاه وتعيش دور العروسة ! ومن شيرة كيف تتفكر نظرة الحقرة متاعو من اول ما راها ومعبرهاش حتى بشطر عين ...ماخذاش بخاطرها .ولا حاول يتقربلها ويفهمها ...وتو جاي يترهدن ويحب يبوس ويدحنس كاينو ما صار شي !!ههه تحلم يا سي محمود ...كان انت يزينك وبغرورك تسخايل روحك تنجم تملك كل شي ...انا ...انا خديجة ..البنية الضعيفة اللي لا حول ولا قوة ليها باش تاقفلك وباش تتصدالك ...وباش تقلك لا ...لا موش كل شي تحب عليه باش تلقاه يجيك بالساهل ...

الحلقة الحادية عشر
شعل سيقارو وبدا ينفخ ومخو سرح بعيد ..نسمة باردة قشعرتلو بدنو ..تلفت للبيت يلقاها راقدة في الفرش بحذا يوسف ..لابسة حوايج البارح ومتغطية بكلها ..وفي سابع نومة ...ههه صحة عليها ...هرب عليه النوم ...مانجمش يرقد ...كا ن ممني روحو بسهرية تعشق اليوم ...كان ناوي باش يطلب فرش اخر لولدو ولا حتى يبدل البيت ..ويرقد معاها فرد فرش ..ياخي قصتلو قصة عربي ....هو محمود بن رمضان ..اللي يشاور على اي مرا تجيه ..مرتو ...مرتو تقلو لا...تفكر كلامها قبيلة وقتلي خرجت من salle de bain...كان يغزرلها باهت وهي خارجة بنفس البيجاما متاع هالو كيتي ...ياخي ماش باش تنحي دينمها هذي .ًلصقت فيها ..ًكانت مربوثة وراسها مطبس وهو ساكت مكتف يديه واقف بكل ثقة في النفس ...شعرها مبلول ريحتو بنينة ...قعدت عاelcanape مشا قعد بحذاها ...عدا صوابعو على شعرها ...وباسها من جبينها ...هزلها راسها ...عينيها يسحرو ...نحى lunetteحطها فوق ااطاولة وطبس راسو..طبست هي راسها جات شفايفو فوق شعرها ..ههه ملا حشامة هذي ...زاد هزلها راسها
- ياخي شنوة تو ؟قداش باش تقعد حاشمة ؟
- اما..ن ..حسها تبلع في ريقها بالسيف وهي تكلم فيه ...حتى هو ريقو ناشف ...حس برغبة قوية ...حتى هو عندو برشة مادخلش في علاقة الوقت والخدمة ولهوتو بيوسف ماخلاولوش وقت باش يعرف مرا ...وهو من طبعو مايحبش اي مرا ...يحب يختار النساء اللي يعمل معاهم علاقة ...اول مرا هذي مايختارهاش هو ...اما ...اففففف... مش عارف ...مش عارف الي حاسو ناحيتها شنوة ؟..رغبة ...احتياج...امر واقع يلزم يتعايش معاه ..مرا موجودة ...تستنى فيه باش يثبتلها رجوليتو ...واكيد هو موش باش يخذلها ...اما اللي قالتو مبعد صدمو ...
- امان سي محمود ..ننجمو نحكيو شوية ؟
تبسم وغزرلها ...كان حاسها شادة روحها بالسيف اما ميسالش مازال الليل طووويل
- ههههه شنوة سي محمود هذي ؟
- اي ...اي سي محمود( وبعدت شوية ) اللي نعرفو عليك اللي انت سي محمود
- وراجلك ...قالهالها بالشوية ..هزت عينيها الحلوين وحس فيهم وجيعة
- اي صحيح .. اما ما نعرف عليك شي ...فيبالك ما نعرف عليك شي ...(ووقفت) شنوة تحب شنوة تكره ...شنوة خدمتك ..وين تسكن ؟ حتى شي حتى شي ...وانت زادة كيف كيف ...ماحاولتش تعرفني في الشهر اللي تعدى الكل ...لا حكيت معايا ...ولا...ولا..حاولت تفهمني ...ماكسرتش راسك معايا جملة ...حاستك تعمل في حاجة بالسيف عليك ...حاجة مفروضة عليك ..حاجة ...قص عليها
- والله مانيش نرضع في صبعي انا راهو ...واشبيك تو تحكي في هذا الكل ؟ وقام قربلها شدها من يديها باسهم بشفايفو ...حسها تفغم اما قاعدة تقاوم ...نحات يديها وزادت بعدت
- محمود ...مانحبش نعمل علاقة مع واحد مانعرفوش !!!
- نعم ؟ غزرلها باهت ...شنوة ماتعرفوش ؟ ( وحس كرامتو تهانت ...عمرها مرا حكات معاه هكا علا صوتو شوية ) مافهمتكش عيشك فهمني؟
- يعني ...وتنهدت وقربتلو ..يعني احنا الزوز مانعرفو على بعضنا حتى شي...خلينا....خلينا نتعرفو على بعضنا ...مازال الوقت قدامنا طويل ...انا ما نعرفش طبيعتك وانت زادة ...خلينا نفهمو بعضنا بالباهي ..ممكن ماتنجحش العلاقة بيناتنا ...ممكن ماتحبنيش مع الوقت ولا انا ما نحبكش ( كلمة ما نحبكش فورتلو دمو ) ...قص عليها
- معنتها انت تحبنا نتعرفو على بعضنا باش تكون علاقتنا كاملة؟ اوك ...ما فما حتى مشكل ....بالنسبة ليا انا ما يقلقنيش ( وهو باش يموت) عادي ..تحب نتعرفو نتعرفو ...وكيما قلت مازال الوقت طويل ماعنا علاش مزروبين ...وعطاها بضهرو .باش مايضهرلهاش اش يحس ...
- تنجم تمشي ترقد في الفرش بحذا يوسف ..تو نرقد انا هوني .
- محم...ود...حسها باش تقول حاجة بعد بطلت ...تصبح على خير ...
- اممم اوك

ومن وقتها وهو قاعد في البالكون يرحي في الدخان ويخمم .. احتياج بدنو لمرا ..خلاه يغزل من كلامها ..خاتر في الوقت هذاك كانت غريزتو مسيطرة عليه ...ولاقيها قدامو ..بدا السيناريو الصباح ...وحب يكملو في الليل ...مشاعرو مختلطة وموش فاهم روحو اش يحب ....يحب يرقد معاها خاتر عجبتو ولا على خاتر مستحق يفرهد بدنو .؟ ..يمكن كلامها صحيح ...حس روحو تسرع برشة معاها ...ماحاولش يعرفها في الشهر اللي هوما مخطوبين فيه ...ما حاولش يفهمها ...كانت مسيطرة عليه فكرة انها انسانة جاهلة وقعرة ووو .ً اما الفرق اللي شافو فيها بين البارح واليوم كبير ...البارح كان برا فيها نوع ...واليوم الصباح ..ًهههه .اليوم الصباح كيف راها ...كانت انسانة اخرى ...انسانة مختلفة عاللي حاططها في مخو من نهارت اللي مشاو لدارهم باش يخطبها ...انسانة عندها مشاعر حلوة .. في عينيها حاس وجيعة كبيرة ...في عينيها برشة براءة وبرشة طفولة ....في عينيها برشة كلام ...برشة كلام ماقالتوش بفمها ....في عينيها برشة حلاوة وبرشة عذوبة ...في عينيها ....وتبسم ...هز يدو عداها فوق شعرو ولحيتو ...وعاود تلفت ...كانت معنقة يوسف ...هز روحو ومشا اتكى فوق elcanape حط يديه ورا راسو وغمض عيينيه ......في عينيها برشة حاجات يحب يكتشفهم .....ميسالش ...يستحقو انو يصبر ...يصبر شنية المشكل؟ هو محمود بن رمضان ...اول مرة يترفض من عند مرا ....وشكوني المرا ...مرتو ....مرتواللي كا ن مستهين بيها ومقلل من شانها .. اما طلعت مش ساهلة . .هههه مش ساهلة حتى طرف...

الحلقة الثانية عشر
تعداو ثلاثة أيام كيف الحلمة بالنسبة ليها .. حوصو دارو تفرهدو ... شاخو شاخو ... والضغط النفسي اللي كان جاثم عليها اتنحى .. وقتلي حكات معاه ارتاحت ... بون مارتاحتش برشة ... وقتلي قاتلو نتعرفو على بعضنا قبل ما نعملو علاقة ...حستو تغشش اما ماضهرش.. فرحت ..موش على خاتر تغشش ..اما على خاتر حست في عينيه اللي هي تعجبو .. يعني ..يعني الراجل كيف يعمل علاقة مع مرا لازم تبدا عندو رغبة ناحيتها .. ههه تعرف اش تمنات وقتها .. تمنات يرفض ويقلها لا .. ويبوسها .. تمنات يعنقها ويقلها شنوة هالكلام التافه اللي تحكي فيه ويهز يرميها فوق الفرش .. هبلت ..اما هذاكة اللي تمناتو بلحق .. اما سناء قالتلها راهو كرامتو فوق كل شي .. كيف ترفضو مرا مايرميش روحو عليها .. بوزينو .. ياسر بخشمو السخطة ... اما حتى هي زادة بخشمها والكلام اللي قالو باش تندمو عليه .. ويجي نهار ويعرف كل شي .. كل شي عليها ..
امو كل يوم تكلم فيهم في التليفون ...تحسو يتلف فيها ... ههه اليوم باش يروحو .. ثنية كاملة وهوما يغنيو ويضحكو ... حستو تبدل معاها.. ماحكاوش مع بعضهم برشة .اما ..اما يوسف كسر جبل الثلج اللي بيناتهم ... وقت كامل وهوما يحكيو معاه وعليه ...وزادت تعلقت بيه الصغرون .. يدخل روحو ..هه وقاعد يتعلم في الكلام بالعربي ..يضحك ..
في دارهم امي ناجية حضرتلهم عشا قمقوم ... كسكسي عربي يعمل ستة وستين كيف .... حكاو وضحكو .. في الليل هزت يوسف باش ترقدو ..طلعت معاها سناء وهو قعد بحذا امو ...
-اه اش قولك يارجال ؟
- فاش ؟ ( وضحك .. حط راسو على ساقيها واتكى ..قداش يموت عليها الرقدة هذ ي وقداش يتوحشها )
ضربتو على راسو بالشوية وضحكت
-دا على لونك !!! في اللي خارتهالك امك ؟
- ااااه .. وقعد يتبهنس وبعد جاوبها والله مازلت ماذقتش السلعة ههههه؟
-وه ؟ (قعدت تغزرلو باهتة ) .. اشبيكم لاباس ؟
هز راسو وشدلها يدها لاباس اناجية لاباس .. ياخي تحبي شقو دقو .. الطفلة مازلت مش خارطة عليا وانا ندخل عليها طول ههه
-بلاهي يزيني بلا ترهدين ..مالا احنا كنا قبل نتعرفو على بعضنا؟ ملا حكاية جايبها
-ههه هاناجية ضاهر فيك خمجتيها مع بابا من الليلة لولة ههه
ضربتو على راسو وتضحك حاشمة
-يزي احشم والله لاك متربي.. احكيلي اشصار ؟
-ماو قلنا عاد تحب تتعرف هههه هاي طلعت حشامة .وعاللخر زادة ههه زادت هزت يوسف معانا اش تحبيني نعمل انا ؟ نشدها بالسيف ؟
-أي حشامة مالا تسخايلها كيف هاك الرقع اللي تعرفهم انت ؟ ولاه تشد فيها بالسيف الطفلة حسيتها فرحانة ؟..باش تموت بالفرحة ملي خطبتها
- ههه نعرف نعرف .. اما ماني قتلك حشامة وضاهر فيها ضلمة زادة ..هاني نسايس فيها ..موش مشكل ماعندي مازاربني ... اما ناجية .ملا سلعة بصراحة ههه ماصدقتكش من لول ..اما تو هاي بدات تبان ههه
-ماني قتلك ماتحشمش والله ..ههه هاي برك نحبك تتهنى وراس ولدي لاك باش تندمها جملة ..راني امك وقاريتك قراية .. ياخي مانعرفكش اش تحب انا ؟
- هه لا تعرفيني تعرفيني .. تعرفيني ريقتي سايلة ... نذوقو السلعة بعد تا نحكيو ....

في الليل مشا دوش ... ودخل يبدل حوايجو ..كان لابس منشفة في حزامو ... وصدرو عريان ... كانت شادة الفرش ... على حرف الفرش لابسة سروال قصير في الروز وبودي عليه تصويرة باربي ههه هاو بدا شويا تحسن ..ضهرو ساقيها شوية ههه .. حس وجهها طمطم وهي تغزرلو هكاكة ... طبست راسها مالحشمة وهوعمال يزيدها في الدوزة .. قربلها ... شعرها كان ملموم ببوند ... حط يدو بالشوية وجبدها ..هبط كيف الشلال على وجهها ..غمض عينيه .. حط خشمو على راسها وباسهولها وزاد قعد بحذاها ..قالها بالشوية
-موش قتلك ماعادش تشدو شعرك ؟ خليه ديما محلول نحبو محلول ..محلاه وهو محلول ..
قعدت مطبسة ..يحسها تبلع في ريقها بالسيف .. حاسس اللي يدور في مخها الكل ..خاتر نفس الإحساس عندو هو تو ... اما مستحيل يفرض روحو عليها .. يعرف اللي هو بصبعو تو ينجم يخليها تحتو وملكو .. اما هو يحترم قرارها .. يلزم يشد روحو .. يحب وقتلي تبدا معاه تكون زادة هي مستعدة للحظة هاذي ... بعد شوية وقام باش يجبد حوايجو من الخزانة .. حسها تتنفس بالشوية ..هزت ساقيها وعنقتهم بيديها وقعدت تغزرلو بالسرقة .. مشط شعرو وعمل شوية بارفان ومشى اتكى بحذاها .. حسها قاعدة لابدة في بقعتها ماتحركتش .. ضحك ..
- ياخي باش تقعد هكا برشة ؟
حسها مربوثة وخايفة .. مرعوبة اكثر تواتي
لا ..ها.هاني باش نرقد
اتكى على مرفقو وجبدلها يدها بالشوية .. غزرتلو باهتة ..عينيها وساعت يدها كانت باردة وترعش ... حط يدو عليها وجبدها ليه بالشوية وهو يتبسم ..
ماتخافش ..موش باش نعملك شي ايجا ارقد؟ بدات تتزرزح بالشوية بالشوية لين قربت بحذاه .. حسها صغرونة وخايفة ...ماحبش يزيد يخوفها اكثر .. حطلها راسها فو كتفو ورما الغطاء عليهم ..تنهد .. وقعد يلعبلها بشعرها وهي جامدة ماتحركتش .. لاعرفت تغمض عينيها ولا تحلهم ... حس بدنها الكل يرعش وبارد ... تلفت باسلها جبينها وزاد كبس عليها
-ماتخافش .. ماني قتلك مايصيرشي .. ارقد ارتاح .. ارقد على كتفي .. مانيش باش نعملك شي كيما وعدتك ... justeنحبك ترقد عندي ... موش تحب نستانسو ببعضنا ؟ عملتلو براسها أي وهي تغزرلو وهزت يدها بالشوية حطتها على صدرو .. هزتها كايني لسعتها حاجة وبعد عاودت رجعتها .. تبسم وغزرلها وشبك صوابعو في صوابعها
-ارقد عاد ..ههه ارقد خير مانبدل راي راهو ؟
تبسمتلو وغمضت عينيها .. وهو يعلم بيه ربي كيفاش شاد روحو عليها ... اما ميسالش .. الموقف هذا ماتعرضلوش في حياتو .. محلاه إحساس انك تحس روحك انت اللي مسيطر على العلاقة .. انت اللي تسير فيها .. انت اللي تحكم وانت الي تاثر..انت الراجل .. وهي الانثى ..

الحلقة الثالثة عشر

كيف حلت عينيها الصباح تسخايل روحها تحلم ....لقات وجهها غاطس في وسط صدرو .. وهو معنقها .. موش معنقها مكبش فيها .. تسمع في دقات قلبو في وذنيها ..هزت راسها شوية وقعدت تغزرلو ..كان يتنفس بالشوية .. وجهو مرتاح وهو راقد ..ريحتو بنينة .. عدات صوابعها على صدرو بالشوية .. هه موش مصدقة .. والله لاهي مصدقة ... بلحق كانت تسخايل روحها تحلم .. هي قالت للراجل هذا مانحبش نعمل علاقة معاك؟ هي حرمت روحها من الحنية متاع صدرو ؟ هي حرمت روحها من تعنيقتو .. من تبسيمتو .. من يديه اللي حضنوها ؟ هي حرمت روحها من بدنو الدافي ؟ من شفايفو الحلوين ؟ اهههههههههههه ياميمتي ؟ يا ميمتي قداش حنين ؟ قداش حنين ..قداش حنين !!! قداش هو رقيق .. بعمرها ما تصورت في حياتها انها باش تقابل واحد كيفو .. اول مرة ..اول مرة في حياتها تحط راسها وترقد وهي حاسة بالأمان .. اول مرة ماتباتش خايفة .. ماتباتش وهي دموعها على خدها ... محلا صدرو .. محلا يديه ..تبسمت وموش حاسة بصوابع يديها اللي قعدت تمشي وتجي فوق صدرو ...حست بيدو شدتلها يدها .. هزت راسها مفجوعة .. جات عينيها في عينيه ... هزلها صوابعها وباسهم
-صباح الخير ..رقدت مليح ؟
- اممممم .وطبست راسها حاشمة ...وفرحانة ..فرحانة...فرحانة ... عاودت حطت راسها فوق صدرو وتبسمت مع تنهيدة .. حست صدرو يتهز ويتحط ... كان يضحك ..
- باش تقعد لاسقتني كيف البقة ؟ ولا باش تقوم تحضرلي الفطور ..حاسس روحي جيعان ..
عاودت هزت راسها غزرتلو .. كان يضحك شايخ عليها .. وجهها احمار وهو غمزها وشدلها خدودها بين يديه بدا يغفص فيهم
- هههه في بالك البارح رقدت احلى نومة .. اما هاوك ملتزم باتفاقنا ؟ في بالك اللي انت حلوة برشة كيف تقوم الصباح؟ وقرب شفايفو .. وهي بدات ترعش وغمضت عينيها ..ساي ماعادش فيها .. اللي يصير خلي يصير .. حست بشفايفو فوق خشمها.. ههه باسها من خشمها .. وقام بالشوية بعد .. حست بالبرد بعد الدفاء متاع ليلة كاملة .. غمضت عينيها ورمات راسها عالمخدة .. ما تحبش تفيق ... ماتحبش تفيق من الحلمة ..ما تحبش تمسح الاحاسيس اللي في بدنها الكل .. هو يعرف كيفاش يتحكم في روحو .. يعرف يسيطر .. المشكلة فيها هي .. بدنها .. بدنها شعل ... هو محافظ على الاتفاق وهي ماعادش فيها ... قام من الفرش حستو ..ما شافتش عينيه اللي شاعلة رغبة .. كان شادد روحو بالسيف اول مرة يحس بالطريقة هذي .. اول مرة قلبة يدق بالقوي ... المشاعر هذي يسخايل روحو نساها وكبر عليها .. اما يلزمو يصبر...يصبر موش على خاطرها هي برك .. على خاطرو هو زادة .. يلزم يفهم مشاعرو ويستوعبها .. برشة حاجات حسها تصبت مع بعضها .. ما عادش فاهم روحو.. بلحق ماعادش فاهم روحو .... قداش رقيقة وحضنها حنين ودافي .. كان يلقى يقعد معنقها نهار كامل ...اما خايف .. خايف لاما يشدش روحو ويفسد كل شي ... هي تحب تكون ليلتهم مميزة .. تحب ليلتها لولة معاه تكون مميزة وهو باش يحققلها اللي تحبو ..تلفت يلقاها مازالت مغمضة عينيها ومغطسة راسها في المخدة .. تبسم .حاسس بيك والله حاسس بيك والفرصة اللي طلبتها مني انا مستحقها اكثر منك تو .. طبس عليها وشوشلها في وذنها
- هيا يا بخيلة قوم عاد .. نحب فطور الصباح من يديك انت !!!
حلت عينيها وقامت تجري .. حسها مربوثة وداخلة بعضها
-بالطبيعة نحضرلك احلى فطور .. نمشي نشوف يوسف .. ونحضرهولك .
كيف دخلت للكوجينة ..لقات سناء وحماتها قاعدين يفطرو في الفيراندا .. كانت الشمس شارقة ودافية .. زادت عطاتها شحنة إيجابية .. هي بطبيعتها حاسة بنشاط .. نشاط قوي .. كان تلقا حيط تكسرو .. كانت تتبسم .. تلفتتلها سناء لقات وجهها مورد عاطي عالغوز .. غمزتها بعينيها .. كايني فايقة باللي صار بيناتهم .. تلفتت حماتها ضحكتلها
- اهلا بالعروسة صباح الخير يا بنيتي .. هي ايجا افطري معانا هي ؟
مشاتلها باستها من جبينها وغزرت تلقى يوسف يلعب في الجنينة بايباتلو ..
-لا امي ناجية عيشك .. محمود ..محمود يحبني نحضرلو لفطور .
سناء الطرشقت بالضحك وامها قحرتلها
-أي بنتي حضري فطور راجلك مالا لا.. هاوك كل شي قدامك في الكوجينة .. الدار دارك ودار راجلك ..اعملي اللي تحبي
عاودت باستها
-عيشك امي ناجية ربي يخليك
ومشات بدات تحضر في الفطور .. جات بحذاها سناء تغسل في كاسها
- أيا عروسة احكيلي اش صار يا لفعة ؟
ضحكة بحشمة
-ما صار شي
-اممم ماصا رشي ؟ باهي موش وقتو تو ..عندي محكمة .. اما كيف نجي باش تحكيلي بالتفصيل مفهوم ؟
خرجت سناء وقعدت هي الطيب في القهوة .. يوسف جاء يلعب بحذاها حلت الراديو تلقى غناية فيروز " حبيتك بالصيف " قعدت تغني معاها .. ماحست كان بيدين جبدتها من حزامها من تالي
- شكون اللي حبيتو في الصيف وفي الشتاء ؟ وباسها من رقبتها ..ريحة الجال دوش مبنها وبدنو مدفاه
بدنها رعش ولخلخ
محمود محمود امك قاعدة امان ؟
بعد عليها وتلفت لامو يلقاها تضحك .. هز يوسف باسو ومشا
لامو باسها من جبينها
نجوتة الغالية نعنبو زينك ..والله وحدك في الوهرة ياتحفونة
-ههه هي هي زلبحني زلبحني ياطحان .. ( قالتهالو بالشوية ) الكلام الحلو ولا لمرتك
- هههه يا مغيارة .. مافما حتى وحدة تأخذ بقعتك .. انت الأصل والباقي تقليد ..ههه
جات بحذاهم خديجة حطت الفطور وهو يغزرلها ويضحك .. ما بن هاك الضحكة وما حنها ... قعدت توكل في يوسف .. وهو يشرب في القهوة
- اممم بنينة القهوة يعطيك الصحة
- لا عاد موش ابن من قهوة امي ناجية ؟
- اممم قهوة ناجية ماتجي كيفها حتى قهوة وغمز امو
- لا حتى مريتك مقدية وبنت دار على قاعدة .. ربي يهنيكم وليدي .. وربي يفرحكم
قعدو يحكيو ويضحكو بعد شعل سيقارو وبدا ينفخ
- خسارة والله باش نتوحشها هاللمة !!!
- لاه وليدي انشالله ديما ملمويين ؟
- انشالله انشالله ..اما كهو وقيت عاد .. يلزمني نرجع باش نقعد شاددلك ركايبك هنا ههه.. هملت خدمتي برشة والله
- اوووه يا وليدي راجع
وهي حست قلبها هبط وتفجعت .. نسات اللي هو يخدم البرا واللي حياتو الكل مربوطة غادي ..هز راسو غزرلها .. حس بالخوف في عينيها .. شدلها يدها حب يطمنها
- أي وقيت يامي .. يلزمني نرجع .. باش نهز مرتي وولدي ونمشي ..
وضحكلها ضحكة حط فيها الحنية متاع الدنيا الكل .


الحلقة الرابعة عشر
دخل محمود لبيروه ... دخلت السكرتيرة في جرتو .. في يدها كاس القهوة .. كانت تعرف طبيعتو .. يحب يرا كاس القهوة فوق الطاولة دوب ما يدخل ...ماكانش ينجم يخدم من غير مايشربها ... اما تو ليه جمعتين مللي رجع طبيعتو تبدلت ... ماعادش يعارك ويصيح على اقل غلطة .. اخلاقو تحسنت مع الخدامة .. ههه حتى القهوة ولا يشربها قبل ما يخرج .. كانت تحضرهالو خديجة . تقوم قبلو وتحضرهالو .. وتحضرلو فطور قمقوم . يعبي كرشو لين يحس بالتخمة .. يقعد شبعان لين يروح ... الدار متاعو رجعت فيها الروح ... وقتلي وصلو لفرنسا ماكانش ينجم يأخذ كونجي باش يهز يفرهدها .. خاتر الخدمة كانت مكدسة وتستنى فيه .. رجع يخدم طول ووعدها في اقرب فرصة يأخذ كونجي ويهز يفرهدها ويوريها فرنسا .. وهي ماعارضتش مسكينة .. كانت راضية وقنوعة .. كل يوم يروح للدار يلقاها دافية .. العشاء طايب .. وصوت ام كلثوم يشرقع .. كانت مغرومة بام كلثوم .. بون هو ماكانش يسمعها ياسر ولا يركز معاها .. اما من كثر ماهو وين يدخل يلقاها حاطتها تغرم بيها حتى هو .. كانت تطيب العشاء على صوتها .. وتغني معاها .. صوتها كان دافي كيما بدنها .. ههه كل يوم ولا يروح يجري باش يقعد مع عايلتو ... عايلتو أي .. خدوجة رجعت الفرحة للدار .. عوضت ولدو على فقدان امو لدرجة انو ولا يعيطلها ماما .. صحيح الوقت اللي قعدو معاها شوية .. اما كل يوم معاها يحسو وقت طووويل .. مازال ما صار شي بيناتهم .. مازالت حشامة وخوافة .. ومازال هو يسايس فيها .. كل يوم ترقد في حضنو .. وكل يوم يعديه احلى من خوه ...وكل يوم يزيد يستانس بيها .. وكل يوم تدخل في قلبو كيف السوسة ... وكل يوم يزيد يتعلق بيها ... موش عارف شنوة اللي يحس فيه تجاهها .. بلحق موش عارف ... اما كيف تغزرلو بعينيها الكبار اللي في لون الليل (واللي بعمرو ماكان يسخايل روحو باش يعجبوه نهار من النهارات) يرا الخوف فيهم وقتلي يعنقها ..يرا البراءة .. يرى فيهم البنية الصغيرة اللي تمرمدت وقاسات وهي صغيرة .. يحس بمسؤولية كبيرة تجاهها.. يحب يحطها في صدرو ويخبيها .. يحميها ويخبيها ... تنهد وحل الدوسيات وبدا يخدم .. بعد نصف ساعة كان غاطس في الأوراق ويدخل عليه صاحبو توفيق
- بونجور معلم CV؟
- حمدالله هاك تشوف ؟
قعد مقابلو في الكرسي
-ياخي وقتاش باش تستدعينا لدارك ؟ الجماعة لكل يسالو فيا هنا مرجوني راهم ؟
-هههه ماو لاباس جاينيي ؟ وهز راسو يغزرلو ..نحى مراياتو وكتف يديه
- تي انا مالقيتش الوقت لروحي حتى باش نخرج عايلتي تتفرهد ؟ تي هاك تشوف فيا مللي جيت وانا غاطس ؟
ضحك توفيق وغزرلو
- أي أي هاني نفهم فيك .. قول ماتحبناش نشوفو مرتك !!هام الجماعة يحكيو قالو قمبلة متاع زين مرتك ؟
هز حواجبو وغزرلو مستغرب وحس الدم طلعلو لراسو .. حك لحيتو وعدى يدو على شعرو كيما كل ما يبدا متوتر
- توفيق ؟ ياخي واعي على شكون قاعد تحكي انت ؟ هه مرتي راهي اللي تحكي عليها ؟
- تربث توفيق وبهت فيه
- صاحبي ههه ياخي انا شقلت ؟ والله مانقصد شي ؟ ياخي اشبيك محمود ؟ نسيت وقتلي كلمتني في التليفون نهارت عرسك ؟ موش قتلي وحدة قعرة وو.. قص عليه وهز يدوباش ما يكملش يحكي
- CV CV ماعادش تكمل انا الغالط اللي نحكي معاك ؟
- ياخي اشبيك محمود لاباس ؟ والله مانقصد شي يا ولدي ؟ماتقليش وليت ..؟ شنوة محمود ؟

شعل سيقارو .. حس روحو متوتر .. توفيق صاحبو ملي هوما في تونس .. مهندس كيفو .. وقتلي شد الخدمة جابو معاه .. هو الوحيد اللي يعرف عليه كل شي .. والوحيد اللي يفهمو .. نفخ السيقارو وتكى راسو على الكرسي
ضاهرلي طحت على راسي يا توفيق .. الطفلة مافيها حتى عيب ههه .. صدقني وليت نفركس في العيوب باش مانتعلقش بيها .
- هههه ضاهرلي خالتي ناجية جابتك للثنية المرة هاذي هههه .. أيا مبروك مبروك ياخويا ... مبروك رجوعك للدنيا ... مبروك عليك كيف رجعت تحس وتعيش الحب كيفنا .. انا ملي رجعت فقت بيك متبدل .. ههه ياولدي ساعات نشوفك تبدا قاعد معانا وتتبسم وحدك نقول شبيه هذا ؟.. ماحبيتش نسالك .. قلت تو تجي بطبيعتها ..
- ههه كنت نسخايل روحي كبرت على الحكايات هذي .. ياخي هاني رجعت كايني مراهق والله
قام توفيق من بلاصتو وقالو
-امالا لازم نتعرفو عليها هالمرا اللي قلبتلك حياتك ... لازم نعملو une petite fete في دارك ونجيب انا حياة وهشام باش يتعرفو عليها
- ياخي انت ولا حياة محتاجين مستاذنات باش تجيو تطلو .. جيبها وايجا وقتلي تحب .. اما الحفلة عندك الحق الخدامة الكل يستناو منى في الخطوة هذي تو نتفاهم معاها وقتاش ونعملوها
-بون ملال نخليك تو .. ربي يهنيك كيما يقولو فيها هههه
خرج وخلاه يكمل في سيقاروه .. هز تليفونو وكلمها .. نوقز شوية بعد هزت
- الووو وينك اش عاملة ؟
- ضحكت وجاوبتو cv !! هاني نطيبلك في الماكلة
- أمم بنينة ريحتها هه
- وصلتك الغادي ؟ ههه
- وصلتني ؟ تي كل يوم في خشمي ههه نشم فيها كل ليلة
سكتت حسها حشمت وقعد يتخيل فيها قدامو وهي وجهها احمر وهو يبدى يتمقصص عليها ويغش فيها بالكلام وهي كيف البوهالية ماتفهموش ههه تبدى الطاوع فيه لين تحصل .. يولي عادد وجهها احمر وتتربث وهو يبدى شايخ عليها
- وق..وقتاش مروح اليوم ؟
- انشالله نحاول بكري .. وين نقول بديت ننقص نلقى شي اخر يستنى فيا ؟
- ربي يعينك ... موش مشكل هاو يوسف معايا يونس فيا
- ههه صحة عليه يوسف مبنك شايخ في ها البرد راكش .. حتى الحضانة معادش يحب يمشيلها الحلوف .. يحب يقعد بحذاك
- ههه خليه .هاني نقري فيه انا في الدار والله موسعلي بالي .. تعرفني نحبو برشة
- اممم تحبو هو كهو ؟ وضحك
- محمو..د .. وسمع تنهيدتها بالشوية .. خلي نمشي نشوف الماكلة
وعلقت التليفون خلاتو يضحك وشايخ يغزر للتليفون وسارح .. حس روحو مراهق صغير في اول بداياتو يتعلم في الحب ..
تذكر الكاميرا اللي عاملها في دارو من وقت اللي بدا يوسف يكبر .. ماللي جاء من تونس ماحلهاش وما تفقدش الدار .. يمكن خاتر متهني بمرتو ونساها جملة .. ضحك وحلها .. كانت راكزة في بيت الصالة الفوق مايفيق بيها حد .. وحصّل بيها برشة مربيات وطردهم وقتلي شافهم كيفاش يعاملو في يوسف .... حط يدو على لحيتو وقعد يتفرج ... اتكى على البيرو وهز ستيلو في يدو .. من الأول الصالة كانت فارغة ... شوية وشاف ولدو يوسف يجري ويضحك ... بعد شافها هي خالطة في جرتو ... عينيه وساعت وتصدم ... اكثر كلمة تنجم تتقال وقتلي راها ... تصدم ...

الحلقةالخامسة عشر
بلحق تصدم ...وخر لتالي بكرسيه وقعد يتفرج..كانت لابسة شورت دجين tres et tres courteوبودي بروتال لاصق في بدنها ظهرلها صدرها .....كانت تجري في جرت يوسف وتضحك وشعرها محلول بتطاير وراها وهي تجري ....قد ما كان يتخيل مشاهد في مخو عليها عمرو ما تخيل المشهد الي شافو ....قد ما شاف نساء قدامو toute nu عمرو ما شاف بدن كيما الي قدامو ... كان ابيض كيف لحليب ....صافي وكامل ....كامل لدرجة ماتشوف فيه حتى غلطة ....حط يديه على فمو ...عاود نحاها وقعد مركز ....ماحسش بيديه ترعش ....بدنو الكل ولا يرعش ....عمرو ما حس برغبة قوية تجاه مرا كيما حسها وقتها .. حتى كريستين ...ماكانش مصدق اللي المرا الي يتفرج فيها هي مرتو . .مرتو اللي ترقد في حضنو كل يوم ...مرتو اللي يبات معنقها وخايف عليها من روحو ....عدا يديه على شعرو وهز سيقارو اخر ....يدو كانت ترعش وهو يشعل فيه ....كانت تضحك وتدغدغ في يوسف ...ومش حاسة بالنار اللي شعلتهالو في قلبو ....حاسو باش يخرج من بلاصتو ...كاينو عمرو ما شاف مرا ولا رقد مع مرا ....عينيه زغللت ...رغبة قوية جاتو مانجمش يسيطر عليها ...اول ردة فعل عملها ...انو سكر الكام وقام من بقعتو ....مشا للشباك وحلو ..خرج راسو لعلى النسمة الباردة تبردلو بدنو اللي شعل ...محمود .محمودمحمود...ههههه فيق ...فيق راهي مرتك ....مرتك ....حلالك ...ملكك...متاعك.ً.حاجتك ....علاش حارم روحك منها ؟اليوم يلزم يفصلها !!! اليوم يلزم تكون مرتو بلحق ...ماعادش ينجم يشد روحو عليها !!! كيفاش مازال باش يمسها وهو يتخيل في بدنها اللي شافو ....بدنها اللي هبلو ....هذاك علاش ناجية قتلو اشتهيتها ليك انت كيف شافتها في الحمام ....هههه كل يوم يكتشف فيها حاجة جديدة وصفة جديدة ....كل يوم تدخل في قلبو كيف العسل ...كل يوم تحتل مخو وحياتو وتنسيه في الماضي الكل ...اما بدنها ....قد ما تخيل عمرو ماتخيلو يالزين هذاك الكل ....اهههه ياربي !!! كانت كل يوم تغطي فيه عليه ....المشكلة ...والمشكلة الكبيرة انها موش حاسة بروحها ....مش عارفة اللي هي مغرية ....اللي هي عندها انوثة فايقة ....ماقصلو على افكارو كان دخول السكرتيرة ..جابتلو دوسيات جدد باش يشوفهم ....قعدت تغزرلو ...كان وجهو مقلوب....وعينيه سارحة ...حطتهملو فوق البيرو وخرجت .وهو حط يدو على رقبتو ...ورجع البيروه ..في الوقت اللي هو يتمنى انو يمشي للدار وياخذ حقوقو الزوجية من مرتو ...

الحلقة السادسة عشر
حست بيدين يمسولها في خدودها ... عداهم على يديها ...حلت عينيها بالسيف ... كانت حاسة بالدفاء ... يديه معنقتها من تالي وراسو مغروس في كتفها من تالي .. بدات تفيق بالشوية .. لقات وجه يوسف قدامها .. بدات تستوعب اللي صار ... تفكرت ليلة البارح ... دارت شوية حست بوجيعة من اللوطة .. منجمتش تتحرك .. محمود كان مكبش فيها مسكرلها على يديها ..ويوسف واقف قدامها يغزرلها بكل براءة ...
- ماما خديجة ماكث باث تكوم ؟
- أي.ا..ي هاني قايمة ياروحي ..هاني قايمة ..
تربثت .. كانت تغزر لروحها لقات روحها عريانة ...والشي تحتها مرنخ .. وجهها حمار وسخنت .. البارح من التعب مانجمتش تتحرك ... زادت غطات روحها وبدات تعيط بالشوية
-محمو..د ؟ محمود ؟ محمود قوم ... بدات تتحرك بالشوية وهوباقي راقد في سابع نومة .. مستانسة تقوم قبلهم الكل وتحضر الفطور ..اليوم صبحت تاعبة وحتى محمود تعب .. تنهدت بالشوية ودارتلو ويوسف مازال واقف يغزلهم ويحب يطلع فوق الفرش ... شدتو من وجهو وبدات تفيق فيه
-محمود .. فيق عاد ماعادش بكري ؟
بدا يحرك فيراسو ..حل عينيه بالشوية وبدا يستوعب .. هز يدو عداها على شعرو وعاود اتكى
-قداش الوقت تو؟
-نعرفش اما ظاهرلي قمت مخر ؟
عاود تلفتلها وتبسم .. ضحكتو كانت شريرة و...وحنينة ..شدها من خدودها وعنقها
- شكون السبب ؟ اه ؟ شكون السبب ؟ مش انت ؟ وبدا باش يطلع فوقها .. يسمع في ضحكة ولدو تلفتلو وهي بدات الدز فيه مربوثة ..ووجهها يمشي الوان ويجي الوان.. حاشمة..موجوعة .متقلقة ..تلفت هو الولدو وضحكلو
- اش تعمل انت هوني ياكعبة ؟
- ولدو يسخايلهم يلعبو جاء باش يطلع فوقهم يلعب هو زادة
شدتلو يدو كبستلو عليها
- محمود محمود شدو امان .. شوف انا عريانة و..و.والفرش ..الفرش ممسخ .. شدو لا يطلع ... ( وطبست راسها وجهها احمر وهزت الغطاء عاللخر )
- ضحك نفس الضحكة الشريرة وهبط من فوقها .. لبس البوكسر متاعو ومشاء هز ولدو يعنق فيه ويرمي فيه الفوق ولاخر شايخ بالضحك وعاود تلفتلها وهي مغمضة عينيها ماتحبش تشوفو عريان ..طبس عليها ووشوشلها
- هاني راجعلك .. نمشي نحطلو حاجة يتلها فيها ونرجعلك ..اقعد هكاكة .. نحبك هكة كيف نرجع ...
هو خرج منا وهي قامت تجري منا ... تحس في بدنها لكلو خفيف وشوية وجيعة مقلقتها ..غزرت للفرش تلقى شوية دم تحتها .. بدنها لكلو رعش وتكهرب وهي تتفكر في ليلة البارح .. اللي عمرها ماشافتو في حياتها شافتو البارح .. هبلها هبلها هبلها .. هبلها وهبل عليها .. ههه ..جبدت روب قصيرة شوية وسليب ومشات لبيت البانو ..دخلت تحت الدوش ... الماء يصب عليها وهي بكلها ترجف ... سمعتو يعيطلها .. وبعد حل بيت البانو ودخل
-موش قتلك اقعد في بقعتك ماتتحركش ؟
وحل باب الدوش ودخل بحذاها ... اهه .. وين تلقاها ؟ بدا يهز فيها ويحط وهي ذابت موش عارفة شنوة باش تغطي وشنوة باش تخلي ...طبست راسها وبدنها لخلخ واحمارت
محمود ..اما ..ن ..اخرج ...امان ..
عينيه زغللت وقربلها .غطس معاها في البانو وعنقها ... هبط راسو وقربلها وبدا الماء يصب عليهم الزوز .. حست ببدنها الكل كهرب .. كورون قوي ضربها .. وهويمس فيها بالشوية اطراف صوابعو تمشي وتجي على ضهرها وراسو غطس في عنقها .... حست بالدغديغة في كرشها من اللوطة وبدا النفس يضياق عليها ... عاود هز راسو وغزرلها في عينيها .. حطلها وجهها بين يديه ولصقها في الحيط ..
- دين واليدك هبلتني ..هبلتني .. ماخليت فيا حتى طرف عقل !! راني هبلت من البارح لليوم كان يتكلم كاينو يوشوش في وذنها
غرست راسها في صدرو وهو تنهد
- ياحشامة .. وزاد كبس عليها عنقها .. ياحشامة في بالك عديت البارح احلى ليلة ..احلى احلى ليلة في حياتي ؟... في بالك النساء اللي تعداو في حياتي الكل فسختهم وانا راقد معاك ؟.. في بالك اللي انت ابن مرا ؟ فرحت وهي تسمع فيه ..فرحت فرحت فرحت .. ماهيش مصدقة اللي تسمع فيه .. هزت يديها ودورتهم على ظهرو .حستو تنطر وتوجع .. هزت راسها وغزرتلو ..كان الماء هابط على شعرو ووجهو ولحيتو زادتو زين واغراء حط يديه الزوز على الحيط وحسرها بيناتهم
- شبيك محمود ؟ موجوع ؟
- ضحك وغزرلها وزاد قرب حط شفايفو على شفايفها
- يالي ماتعرفش تبوس !!!ههه.. قداش باش نعلم انا؟ البارح كليتني بطريحة في بالك ههه .. ظهري لكلو يوجع صبح من صوابعك
عدات يديها بالشوية على صدرو وبدات تقرب فيه ليها وعنقتو
- سامحني ... وجعتك ؟
- هههه الكلمة هاذي normalement نقولهالك انا؟ ومسلها خدها ..وجعتك انا البارح .سامحني انت وهزها بالشوية صب عليها الشامبو وبدا يفركلها في شعرها كيف الطفل الصغير ..وحط جال دوش وبدا يعدي فيه على بدنها وكل مايعدي يدو في بلاصة يبوسها.. لين دوخها وقطع عليها النفس .. وعاود سيناريو الليلة اللي فاتت 
بعد نص ساعة كانت في الكوجينة تفطر في يوسف ...كانت لابسة روب نوار قصيرة شوية ...شعرها محلول ومبلول ...وحالة فيروز وتغني هي ويوسف معاها "بكتب اسمك ياحبيبي" وهي باش تطير بالفرحة ..دخل محمود لابس حوايجو متاع الخدمة ...شعرو مبلول ..وجهو يضحك ومرتاح ..ريحتو تهبل ً..تعشق ...غزرلها مرة اخرى برغبة وقربلها ..باس ولدو وقعد بحذاها...قعد ياكل فيها بعينيه وهي لابسة الروبة وجها زاد احمار وحشمت السخطة ملا عينين عليه !! يعريوك وانت في بلاصتك..طبس وشوشلها
-نحبك ديما تلبس تلبس هكا قدامي وماذابيك اقصر من هكا زادة وتبسملها ومشا باسها من رقبتها وتنهد
- والله لا عيني باش نمشي ياروحي ...نحب نقعد معاك ....نحب نعنقك ونبوسك ونشبع بريحتك ....اففف ..
ضحكت وشدت يوسف هبطتو ..مشا يجري يلعب في الصالة وهي مشات تسخنلو في القهوة ..كانت مربوثة وطايرة من الفرحة ...قد ماباش توصف اللي تحس بيه ماتنجمش خاتر ما يوتوصفش ....يتحس برك ...بدنها ومخها وقلبها الكل ملكو هو ...ملكو وحدو...ماعادش تنجم تتحكم في روحها ...وين يمسها تولي بكلها ترعش وماذبيها تغطس فيه وماعادش تخرج ....في لحظة تطورت الامور بيناتهم...في لحظة قلب الموازين الكل ...في لحظة سيطر عليها وردها مدام بن رمضان ...وجهها ولا عاطي عالغوز ..وحست برعشة ...وهو كان يشوف في تعببرات وجهها ومركز معاها ...وقف وجاء وراها ..جبدها ليه وعنقها وقعد مغطس راسو يشم فيها ...يبوس ويدحنس ..مشا قعد فوق الكرسي وحطها بين ساقيه وقع معنقها ..كابس عليها وحط دقنونتو في ظهرها ...وغمض عينيه ..حست ببديه الكلها ترعش وهو يكلم فيها وصوتو زادة فيه الرعشة
- ماعادش ننجم نسيطر على روحي ....ماعادش ننحم نشد روحي عليك ....مانحبش نخدم ..مانحبش ..نحب نقعد معاك وحدي ...نحب نشبع بيك ..خديجة اش عملتلي ؟ اش عملتلي؟ خديجة بدنك سيطر عليا ...هبلني ...مانشبعش منو ...مانشبعش...منين طلعتلي ؟ منين؟ ناجية جابتلي احلى حاجة في حياتي ...انت احلى حاجة تعدات في حياتي ...كلامو دخلها بعضها ...مانجمتش تشد روحها ...تلفتتلو ..قعدت قدامو ..في حجرو ...بدنها يرعش ..شدلتو راسو بين يديها وحطتو في صدرها وكبست عليه
وبدات دموعها هابطة ...هز راسو وغزرلها...كانت في عينيه رغبة ...حنية ...حب ...خوف ...اي خوف ...خوف من المشاعر القوية اللي حسها تجاهها ... شدلها خدودها وتبسم
- بكاية زادة ؟
- لا...لا ما..مانيش نبكي ..ا..ا..
هزصوابعو وبدا يمسحلها في الدموع ويبوسلها في خدودها بالشوية وتنهدوقالها
- محلا دين امك وما بنك ...وعاود شدها ليه وكبس عليها ...والدين الخدمة باش نبطلها والله لاني ماشي
قامت تضحك وقلبها يدق في 100
-ويوسف اش باش تعمل فيه ؟
وقف وباسها بالقوي لين قطعت النفس
- باقي ماتعرفش تبوس ههه هذي الحاجة لولة اللي باش نعلمهالك اليوم ...وبعد شوية ..يوسف هاني باش نهزو للروضة ونرجعلك ..
- وه باش تهزو تو ؟
- باش نهزو ونرجعلك نبرد قلبي فيك من غير مايقلقني حد ...باش نهريك بوس اليوم
وخرج يجري يعيط ليوسف ..خلاها واقفة مبهمة تغزرلو...

الحلقة السابعة عشر
فيقها صوت التليفون ...شدينوقز ينوقز ماحبش يسكت ..تلفتت وراها لقات محمود مش في بلاصتو وسمعت صوت الدوش ...غزرت للتليفون وعينيها شطر مغمضين -الو؟
-ا..الو ..تليفون سي محمود؟كان صوت راجل ويتكلم بالعربي ...هزت راسها وركزت معاه
-اي اي تليفونو .انا مرتو!
-اهلا مدام...سامحني قلقتك ...اما سي محمود ماجاش يخدم وما تكلمش ...في الحقيقة تحيرنا ...هو يتكلم ومحمود خرج من الدوش ...لاف منشفة صغيرة على حزامو ومنشفة ينشف بيها في راسو ...هزت التليفون واعطاتهولو قتلو بالشوية وهو يسال فيها بعينيه
-الخدمة الخدمة
هز براسو وخذا التليفون...-الو ...قعديحكي ويغزرلها ...تبسمتلو.وهزت لغطاء عاللخر ..حشمت عاللخر وهو يهز فيها ويحط ..حتى وهو يتكلم موش مخليها...
- ماتكلمتش نسيت .. تلهيت فما مشكل؟...وقعد يسمع وطبس عليها باسها من جبينها ..ودزها شوية قعد بحذاها...كانت ريحتو تعشق ...وبدنوسخون ويشهي هههه....
- اه والله نسيت ياتوفيق!!!باهي باهي ..مانيش جاي اليوم
- .......
- اش يهمك في ولديا انت ؟وتلفتلها شدها راسها وغرسو في صدرو ...قعدت تشم في ريحتو وغمضت عينيها وكمل يحكي ...تسمع في الضحك في التليفون وهوتبسم
- باهي اش تحب انت تو؟مانجمش نقعد مع مرتي انا من غير ما يقلقني حد ؟يزي عاد فديت ماللى جيت وانا نخدم !!خليني نرتاح نهار!!.
- .....
- باهي تو نتفاهم معاها ونقلكم باهي ..ايا سيبني تو عندي مانعمل !
علق التليفون وتلفتلها ...هزلها راسها وباسها ..
- سامحني تعبتك ...وتنهد ...نعرف روحي تعبتك وما خليتكش ترتاح !!! عضت على شفتها وطبست راسها وهو ضحك
- حاس بيك موجوعة ...اما الله غالب مانجمتش نشد روحي عليك ...مانجمتش ...تي حتى عندي اجتماع نسيتو جملة يا بو قلب ..والله نسيت كل شي...وغزرلها في عينيها بكل شوق وحنية
- ضاهرلي باش نبرك بحذاك هوني ماعادش متحرك من جنبك ؟
- محمود ؟ تبسمت بدلال وحشمة ..يزيتشي تو؟
وقف وهو يتنهد ...عدى يديه على شعرو ونفخ
- الحاسل ما عادش فيها ...هيا هيا قوم نخرجك شوية ..نفطرو البرة وبعد نتعداو ليوسف نروحو بيه
قعدت تغزرلو والفرحة باس تتنطر من عينيها
-بلحق محمود ؟ باش تخرجني؟
حل الخزانة يجبدفي حوايجو وتلفتلها
-بلحق..وقوم فيسع خاتر منظرك هكة يغريني ويخليني نخمم باش نبدل رايي؟
قامت تجري وهي لافة الملحفة على بدنها ...من الجري ادعثرت ...وهو ولا يضحك ....ميت بالضحك عليها ...
قعد يدور بيها في البلاد وهي حالة فمها وباهتة في البني والشوارع ...هزها للشونزيليزي ..قعدو في مطعم ...كانت لابسة سروال دحين نوار وتريكو نوار وكبوط ازرق وبوني نوار ...خاتر الطقس بارد ..شعرها محلول تحت البوني ..قعد يتغزل بيها وهوما قاعدين في الطاولة ....شد تليفونو وبدا يصور فيها وهي تضحك
-محلاك ...قداش وتاتك البوني ...وقربلها باسها من شفايفها ...حشمت وطبست راسها
-وه محمود الناس تتفرج !
-ههههه ياخي تسخايلنا في تونس .؟ لهنا كل شب جايز وحد مالاهي بحد هههه
- اي ...ولو ...انا ..انا نحشم...
قربلها يعنق فيها
- كان باش نتبعك انت ماعادش نمسك بلكل .هههه..يابنتي اسكت وخليني نتصرف ...راك مرتي ..تعرف اش معنتها مرتي ؟يعني عندي الحق باش نبوس ونعنق ونرقد معاك وقتلي نحب ووين مانحب ؟ واضح ؟
- لا انت ظاهر فيك هبلت ؟
- هبلت هبلت وباسلها خدها ...هبلت بيك .هههه.هيا نروحو؟
قحرتلو وعينيها وساعت
- محمود؟
- ههههه نفدلك نفدلك
وتلفت عيط lserveur وطلب ماكلة وقالها اش تحب؟

تلفتت هي لserveurوقعدت تسال فيه بالفرنسية وطلبت اش تحب ...وهو قعد يغزرلها باهت ...كانت تحكي بالفرنسية كايني تحكي بالعربي ماعندهاش مشكل ....هو عمرو ما سالها على نيفو متاعها ...خاتر ما حبش يحرجها ...من الاول كانت مقلقتو الحكاية ...بالطبيعة قبل ما يعرفها ..كان يخمم كيفاش باش يهزها معاه وهو يعتبرها جاهلة وماهيش قارية كيفو هو ...يعني هو دكتوراه في الهندسة ...ياخذ وحدة ما ...اما مبعد ماعرفها ..وشافها ماعادش مقلقتو لحكاية ..تو بالشوية بالشوية تتعلم وتتلنصى ...المهم ...المهم هي اكثر مرا حس بيها و...وشيختو...شيختو عاللخر زادة ....كريستين ...مرتو ..كان يحبها ..اما كان حب متاع صغر ..تعرف عليها وهما صغار الزوز ويقراو ....كانت ند ليه وهي اللي عرضت روحها عليه وهو ما مانعش ...يعني وافقعلى العلاقة ...وماكانتش vierge اما تقبل الحكاية وعادي المهم كانت مخلصة لعلاقتهم واستانس بيها وحبها وقتلي حبلت بيوسف قررو باش يعرسو ...ووقتلي ماتت خلات فراغ كبير في حياتو ...وتنهد وهو يغزر لمرتو وهي تدور في وجهها وتتفرج ...كانت مرتاحة وراضبة وفرحانة ....تعرف على برشة نساء بعد كريستين ودخل في برشة علاقات ...اما اللي حسو مع خديجة ....واو ...حاجة ماتتوصفش ....حشمتها وقلة خبرتها وانوثتها والخوف من العلاقة اللي راه في عينيها حسسوه برجوليتو ....رجعوه للماضي ....ذكروه باللي هو راجل شرقي ..يحب مرتو تكون ليه هو وحدو ...وهو اول واحد يمسها واخر واحد يحط يدو عليها ..واللذة اللي ذاقها معاها بعمرو لا ذاقها ولا باش يذوقها مع وحدة اخرى ..
قعدو يدورو بعد في وسط البلاد ...شاددها من يدها وهي كيف الطفلة الصغيرة ساعات كيف تشوف حاجة تعجبها تولي تنقز وتضحك
- يا محمود محلاها؟
تعرف فما برشة بني وبرشا بلايص يشبهو لبقايع في تونس؟
هز سيقارو وشعلو وبدا ينفخ
-اي ماهوبرشة بلايص في تونس بني فرنسا قعدت كيما هي !
-امممم صحيح !ووقفت تلفتتلو ..نحب نمشي لمكتبة !
-مكتبة ؟بهت يغزرلها
-اي مكتبة !...نحب نشري شوية كتب ..انا نقعد وحدي نهار كامل ..نفد ..نحب نشري شوية كتب نوسع بيهم بالي ..
شدها من يدها كبس عليها وعقد حواجبو باهت
-باهي لالا نهزك للمكتبة !
هزها لمكتبة كبيرة فيها كتب عربي وفرنسي ...قعدت تدور وتقرى في المواضيع ...واللي بهتو انها ما تلفتتش للكتب العربي ...كانت تهز في كتب فرنسية متاع ادباء صعيب يقرالهم اي حد ....خذات زوز كتب ..واحد لماركيز مترجم ومسرحية لموليار ...والي بهتو اكثر انها خذات كتاب يحكي على فن الهندسة والمعمار
قعدو عشية كاملة وهما يحوصو ويدورو ..وهو مكبش فيها معنقها ...وهي طايرة من الفرحة ..طايرة طايرة طايرة ...مشاو جابو يوسف وزادو تعشاو البرة ...روحو في الليل تاعبين ..مدشدشين ...وقتلي حلو الباب خطرتلها فكرة حلوة باش تفاجء بيها راجلها قاتلو
-امان محمود ترقد انت يوسف ؟بدلو حوايجو ورقدو خلي نمشي انا ندوش ؟
طبس عليها باسها
- باهي لالا انت تامر وانا النفذ ! تو نرقدو يوسف هو بطبيعتو راقد
طلعت الفوق دخلت لبيت البانو ..دوشت وصبت على روحها اابارفان ...وقفت مقابل المراية..وهي تتبسم مشطت شعرها وعملت ماكياج دوب اللاش ..اليوم باش تهبلو ...ديما ياخذها على غفلة مايخليهاش تحضر روحها ....هههه هو بطبيعتو هابل خلي تكمل عليه هههه ...تسمع في باب بيت النوم تحل ...قلبها ولا يدق وبدنها رعش ....تسمع فيه يحكي في التليفون ..لبسن النويزات متاعها وهي باقي تغزر لروحها وتثبت فماش حاجة ناقصة ...وجهها احمار وهي تتخيل فيه ...هبطت شعرها وريقلتو بلقدا ...خذات نفس وحلت الباب بالشوية ....كان قاعد فوق الفرش بحوايجو..يتكلم في التليفون ويضحك وهز راسو ....اول ماشافها..حستو تصدم ....عينيه وساعت وهبط التليفون من الربثة ...كانت لابسة2piecesفي الروج ونويزات كحلة كلهت دانتال قصيرة ...وجهو احمار ولخلخ وهي واقفة بكل اغراء ...بكل انوثة قدامو ..غزرلها فمو تحل وعاود غزر للتليوفون عاود هزو ووقف
-اي اي اي يا ناجية ..!ولدك ساي مشا فيها
هي تربثت ...صار يكلم في امو ؟ولات تندب في وجهها من الحشمة ..ورجعت تجري لبيت البانو سكرتها على روحها ...خلط عليها وبدا يدق وهو باقي يكلم في امو
-ايا باي تو ناجية ماعادش فيها ... علق التليفون وبدا يعيطلها
-حل الباب !
-لا مانيش حالة
- حل الباب يابنتي ماعندك وين هاربة اليوم لابسة هكاكة وتحبني نسيبك ؟
-هكاكة تحكي قدام امك ..والله فضحتني ..يا ملا حشمة ؟
ولا يضحك وهو باقي يدق .
- يا بنتي انا فضايح ؟تي تو كان ما تحلش الباب باش تشوف الفضايح على حق !حل فيسع
- باهي ابعد
باقي يضحك باهي هاني بعدت .

الحلقة الثامنة عشر
حلت المفتاح بالشوية وطلت ...تلقاه واقف قدامها ...بدا يحل في سوريتو ...عينيه لمعت وجبدها ليه...عنقها بقوة وحشا راسو في كرومتها يشم فيها حستو شعل عاللخر وهبل ...
-هاربة ؟قالها وصوتو بكلو يرعش ..وين عندك تهرب ...ما تهرب كان لحضني انا راهو ...مابنك مابنك مابنك ...وبعدها عليه شوية وقعد يثبت في بدنها وعينيه الكل باش ياكلوها ...هزها بقوة ورماها في الفرش ...قول طيشها هههه...ورقد بحذاها وبدا ينحيلها في نويزات ويبوس فيها ...ولات تضحك ..شددتلو يدو وقاتلو بدلال
محمود ...امان ..نبدا نحضر في روحي ساعة تجي انت في دقيقة تنحي كل شي ؟
هز راسو وغزرلها برغبة قوية وضحك
- دقيقة ؟سكوندة ...سكوندة وحدة ويتنحى كل شي !!
وعاود رجع يجبد فيها وهي تضحك وتقاوم فيه .....
بعد ساعة ...كانت متكية على صدرو ومعنقتو وهو شاد سيقارويتكيف ويكونكتي
...هزت راسها وقاتلو
- هكاكة قبيلة تحكي امي ناجية؟اش باش تقول علينا بربي؟
- ياخي تحكي بجدك انت؟ ياخي ناجية وقتلي خذاتك ليا ..عارفتك باش تلعب معايا الكارطة !؟ياخي خارجتلي هكاكة تحبني نقعد في عقلي ؟ وطفى السيقارو وحط التليفون وlunetteبحذاه وتلفتلها ..هبط وجاء مقابلها شدها من يديها وحطها فوقو وباسها من خشمها وهبط لفمها .وقالها بالشوية
- ماعدش تخمم في حد وانت معايا .... خمم كان فيا انا ..انا كهو ..وطفى الضو ....
في الصباح وهي تحضرلو في الفطور قالها على الحفلة
- جماعة الشركة الكل يحبو يجيو للدار ويتعرفو عليك ...هذا تقليد عندنا ...يعني كيف واحد يعرس ولا يشري دار يستدعي جماعة الشركة ...بون موش الكل اما المسؤولين الكبار
حطتلو القهوة قدامو وقعدت
- مافما حتى مشكل ! وقتاش باش تستدعيهم ؟
- مانعرفش وقتلي يساعدك ؟ تحب الويك اند الجاي مثلا ؟
- باهي اش تحب نحضر ؟
- قعد بشرب في القهوة وضحك
- ماتحضر شي حضرلي كان روحك الامور هاذي فما مختصين يجيو بالذمة ...اما ...مانعرفش باش نهزك ونشريو حوايج للمناسبة
- لا لا من غير ماتشريلي ..عندي ...حوايجي لكل جدد مازلت مالبستهمش..
غزرلها وشد باسلها يدها
- كانك عليا انا نحبك بلاش اهههه ياقلبي
ضحكت وقامت فيسع تلم في الطاولة
- برا لخدمتك برا ...ظاهر فيك باش تعاود سيناريو البارح هههه
عنقها من تالي وباسها
- ماذبيا ...اما الله غالب عندي اجتماع مهم اليوم ماكانش الله لا نفلتك ؟
مشا للخدمة وهو يحس في طاقة كبيرة في بدنو ...راحة البال والاستقرار ...حاجة جديدة في حياتو ...محلاه العرس الحاصل ..محلاه محلاه وخاصة العرس بعربية .بنت بلادو ..تفهمو تقدرو وتصونو ..وتطاوعو وتتلهى بيه ...حاسس روحو اسعد راجل في العالم ...يسوق في الكرهبة ويغني ...حتى هو ولا كيف مرتو تقضي وتغني ...وصل لبيروه ...تلمو الخدامة وبدا الجتماع ...توفيق يغزلو ويتبسم
- اا عروس ؟تفرهدت البارح ؟
طبس عليه كلمو بالشوية
- ياولدي اش يهمك في ن***ي انت ؟ نهار كامل وانت مارجني بالتليفونات والمبساجات اما والله لما نرجعهالك ؟
قام توفيق يضحك ...وبدا الاجتماع وبدات الخدمة ....
وجاء نهار الحفلة ...كانت تحضر في روحها فرحانة ...جبدت حوايجها وحوايج يوسف ...كانت تحب محمود يتشرف بيها ...تحبو يفتخر بيها قدام الناس اللي يخدمو عندو ...ماكانتش تعرف اللي من الحفلة هذيكة باش تتقلب حياتها ..والسعادة اللي عايشتها محمود باش تولي تعاسة ...تعاسة ..واوهام ...اوهام الحب ..

الحلقة التاسعة عشر
في الجمعة اللي قبل الحفلة تعرفت خديجة على توفيق صاحبو ومرتو حياة وولدو هشام عمرو 15سنة ...فرحت كيف عرفتهم كانت عايلة دافية ...توفيق كان ظاهر صاحبو عالخر ومرتو حياة مرا تحفونة برشة ...طبيعتها بشوشة ..كانو شلة مع بعضهم قراو مع بعضهم الثلاثة هذاكة علاش هي تعرف عليهم برشة حاجات ...ارتاحتلها خديجة في هاك الجمعة ولاو يخرجو مع بعضهم يقضيو ..يفطرو ..دورتها في برشة بلايص ...ومحود ارتاح كيف ولاو صحاب باش ما يقعدش حاسس بالذنب خاتر ما عندوش الوقت باش يخرجها ...خلى المهمة هاذي الحياة ...
في صباح الحفلة نهار السبت ...جات l’équipeعلى بكري وبداو يحضرو في الدار يزيدو وينقصو في الاثاث...قامت بكري حضرت فطور يوسف ..فطرتو وخلاتو يلعب ...طلعت الفوق باش تفيق محمود ..لقاتو فاق ويحجم في لحيتو في بيت البانو
-صباح الخير ...وباستو من خدو ..رجعلها البوسة وخدو الكل بالجال تاع الحجامة مسخلها وجهها ..قامت تضحك
صباح الخير عزيزتي .ورجع يغزر للمراية ....نظف لحيتو ودخل يعمل دوش ...وهي قعدت تنظم في البيت ..خرج لافف منشفة على حزامو ..جاهامن تالي عنقها وباسها من رقبتها يتبسم
-تعرف اش شاهي تو؟
-اممم اش شاهي ؟
لفتها ليه غزرلها في عينيها وطبس يوشوش في وذنها
-شاهي نعمل واحدهههه
بهتت وبعدت روحها وقعدت تقحرلو
-ياخي الحشمة ما تعرفهاش انت ؟
-هههه مانعرفهاش ..اما نسمع بيها ؟
-يا؟تو نورمال انت ؟ الدنيا تغلي اللوطة وانت تخمم هكة ؟
باسها مم شفتها وبعد مشا يجبد في حوايج من الخزانة
-نورمال !ياخي انا نعمل في العيب انا ؟..تو كان جيت عيني ما يمنعني حد راهو !
وقفت قدامو وعضت على شفايفها وهي تعرف اللي الفازة هذي تهبلو وتشعلو ..بدات تلعب بشعرها بصوابعها وهو وقف مبهم يغزرلها .ههه حستو يبلع في ريقو بالسيف وعينيه زغللت
-يعني انت تو ماعينيكش ؟قاتلو بدلال
طبس على شفايفها ...تنهد وغطس راسو في رقبتها وبدا يبوس فيها من كل بقعة ...حست بالسخانة في بدنها لكل ..بدات تبعد فيه .
- ههههه يامهبول ريض لعباد اللوطة وه؟
سيبها ومشا سكر الباب بالمفتاح ورجعلها هزها وحطها فوق الفرش ورجع يبوس وهي باقي تدز
- جبتها لروحك ..قالها وهو ينحيلها في حوايجها ...جبتها لروحك كنت قاعد رايض ..بديت تغري فيا تحمل مالا
- وعاود طبس راسو ..كلاها ماكلة من لحمها الكل ...دقدقها ....
في العشية لبس محمود الكوستيم متاعو ...وهي لبست يوسف كسوتو وقعدو الزوز يضحكو عليه شايخين ...ولا كيف الراجل القصير وهو يتكعبر ...هزو بوه يبوس فيه ويمشمش
-محلا زين ولدي ...ايا نهبطو خلي ماما تحضر روحها ...وتلفتلها ..ياخي لتو ماوريتنيش اش باش تلبس راهو ؟
ضحكت ودزتو البرة
- مانيش موريتك ..ماو قتلك تو تشوفني مبعد !
هز صبعو وغزرلها
-اي ماتفاهمنا عاد زادة ..لعرا والقرا لاواضح؟
-واضح واضح ..وعاودت دزتو ..حافظة درسي !!
بدات تحضر في روحها ...كملت شعرها ..عملتلو بابليز ...وبدات المكياج ...تسمع في صوت الناقوز ...وبدات العباد تجي ...بالطبيعة هي باش تخرج بعد ما يوصلو الناس الكل ...حاسة روحها هي نجمة الحفلة ...سمعت دقان الباب وبعدت دخلت حياة تضحك
-عسلامة ياعروسة !!مازلت؟
سلمت عليها فرحانة ...قعدت بحذاها فوق الفرش وقعدت تغزر للروب
-يا تفتق محلاها!منين شريتها ؟
- من تونس ..شريتها انا وسناء
-اخت محمود
- اممم
-صحة صحة تهبل وانت تهبل الله احد عليك ههه عندو الحق محمود يهبل هههه
وجهها حمار وحشمت عاللخر تبسمتلها حياة وقربتلها
-قالي توفيق الراجل ولت يضحك وحدو في الخدمة وعلى قد ماهو كان صعيب مع الخدامة ..ولا نهار الكل يوزع في الابتسامات هههه
ولاو يضحكو الزوز ...وقعدت حياة تعاون فيها على لبسا ن الروبة ..كيف كملو قعدت تغزرلها وتصلي عالنبي
- ضاهرلي محمود باش يطردنا نهار اليوم هههه
- هههه لها الدرجة ؟
- والله تباركالله عليك ربي انشالله يهنيكم ...ايا خلي نهبط انا ...كمل انت واهبط وحدك عاد ..ولا تحب نعيطلك محمود؟
قالتلها براسها لا
- تو نهبط وحدي ..اما ..اما قلو ياقف بحذا الدروج باش يعرضني خاتر نحشم قدام عباد مانعرفهاش
- باهي عزيزتي باهي
- عيشك ياحياة ربي يخليك
كملت ريقلت روحها وقعدت تغزر وتثبت فماش حاجة ناقصة ...هزت البوشات متاعها وخرجت بعد ماسمات بسم الله
قعد محمود واقف بحذا الدروج كيما وصاتو حياة ...وغمزت راجلها وقعدو واقفين قراب ليه باش يشوفوه كيف تخرج مرتو ...الدار كانت مليانة بالضيوف ..شراب وماكلة شايحة ودخان ...الدنيا تغلي ..بدا يتلفت ويتبسم للعباد ..وهز راسو ...حل فمو طاقة ...بهت ...حس بسخانة وبرد فرد وقت وهو يغزرلها هابطة من الدروج ...الجوجمة الكل تنحات من مخو ...قعدت كان هي في عينيه ...كانت لابسة روب في الروج للركبة ..ساتان ومن فوق دانتال ...يديها دانتال ..لاصقة في بدنها ...سكسي ..عاللخر سكسي حتى وهي موش قصيرة كيما وصاها لكن كانت مغرية ..مع بيوضية بدنها ...واتاتها برشة ....شعرها الاكحل بوكلي هابط على ضهرها كيف الغجرية ....عينيها ...عينيها الكبار زادهم المكياج زين على زين ....مرتو ...مرتو...ترعب ...حس قلبو باش ياقف وهي عمال تقربلو وتتبسم ...حس الصالة لكل سكتت وهما واقفين يتفرجو فيها كيفاش هابطة ...حس روحو قريب يبكي ...حس دمعتو قربت وعينيه زغللو . ..يحبها يحبها ...يحبها ...المرا اللي قدامو يحبها ...كان تطلب عينيه يعطيهملها ...حس بيدها الصغيرة فوق يدو ...قعد كاشخ ماتحلحزش من بقعتو ...فيقو صوتها وهي تضحك
-محمود ؟ شلقت على روحك راهو !وطبست عليه باستو من خدو بالشوية ...وريحة البارفان متاعها اثارتوزادت شعلت فيه النار ..كان الروج متاعها يلمع ...حس روحو باش يتقطع عليه النفس وهو يغزر لشافيفها...تلفت يلقى لعباد مركزة معاهم ..وتوفيق ومرتو باش يموتو بالضحك وهوما يغزرو لردة فعلو ...وجهو احمار ..بلحق شلق على روحو ....كل يوم تزيد تعطيه وجه اخر عمرو ماشافو ...عاود تلفتلها ..كان يلقى يسيب كل شي ويهزها يطلعها الفوق ويدخل معاها في عالم اخر ..شدها من ايدها وهو بكلو يرعش ...
طبس يوشوشلها في وذنها
- ليوم قاتلك قاتلك ماعندك وين تهرب...نحس في النار شاعلة فيا وراس ر***ك لا نعديهالك بالساهل
تبسمت للعباداللي يغزرولهاووشوشتلو
- ماعندي وين نهرب ياروحي ...اعمل فيا اللي تحب ..اقتلني ًاذبحني..كولني ...ههه انا كلي ملكك
حستو شاد روحو بالسيف وهي تجبد عليه بالدم البارد ..اثارة قوية حسها لين ماعادش ينجم يتحرك ...غمض عينيه بالشوية يحب يسترجع قوتو...لعباد الكل مركزة معاهم بلزمو يشد روحو ..منعو صاحبو توفيق قربلو وهو يضحك شدو من كتفو وشوشلو
- يا معلم يامعلم ..شلقت على روحك ..شد روحك ماكانش باش تفضحنا ههه
وشدلها يدها باسهالها
-مرحبا بيك مدام ..تباركالله عليك ..هيا نعرفك على جماعة الخدمة متشوقين يعرفوك
وبدا يدور بيها ويسميلها في اساميهم وهي في غيبوبة تخمم في محمود وفي ردة فعلو ..وجهها احمر وهي تدور من واحد لواحد ولكلهم يبوسولها في يدها باعجاب والنساء في عينيهم الغيرة ...والحسد ...بدات تحس بالدوخة من الجوجمة ومحمود شاد كاس ويشرب ويعاود ويغزرلها من بعيد ..حست بنارو شاعلة ...حاسة بيه ..ههه ياميمتي ليلة زرقة الليلة هههه

-عسلامة خديجة ...
تلفتت بالشوية ..حست الصوت تعرفو ...لكن الصدمة انو كان واقف قدامها ...الانسان اللي دمرلها مستقبلها واللي كان سبب في حرمانها من قرايتها ...معز ...معز واقف قدامها بشحمو ولحمو ...ويتبسم...


الحلقة العشرون

- معز ؟ اش تعمل هوني ؟
حست بالعرق يلب في بدنها الكل ... فجعة .. فجعة قوية وهي تراه فيه قدامها .. يدها ولات ترعش وتلفتت شيرة محمود تلقاه يغزرلها ومركز معاها وهي واقفة مع معز ... تبسمتلو باش ماتضهرلوش اللي هي متوترة وعاودت تلفتت لمعز
-ماقتلش اش تعمل هوني ؟
شرب من الكاس متاعو وحط يدو في مكتوبو.. كان طويل واسمر وعينيه كحل يلمعو كيف شافوها ..ماتبدلش .. ههه كيما خلاتو لقاتو غير نظاف شوية في هندامو
- انا نخدم في الشركة اللي يحكم فيها راجلك ...وهبط الكاس وغزرلها بحسرة وتنهد اما انت تبدلت وزينت ...زينت برشة ... ماصدقتش وقتلي شفتك ...حست بوجيعة في كلامو ..صحة عليه راجلك ...متمتع بالحاجة اللي كان من المفروض انا نتمتع بيها ..
عينيها شعلو بالغش وقحرتلو قحرة متاع موت ...
- ماعادش تجبد الموضوع هذا حتى في احلامك ..فاهم ولا لا ؟
- سامحني خديجة سامحني ! سامحني ماوقفتش معاك وقتلي ستحقييتني ... كنت وقتها صغير وماعنديش مستقبل .. خفت .. كان يتكلم بالشوية ومطبس راسو يوشوشلها !
- عينين راجلك باش تاكلنا ماكلة .. هاو بدا يقرب ..
طبست راسها وريقها نشف ..ماحبتش تتلفت باش ماتشلقش على روحها .. وحست بيديه جبدوها ليها وعنقها من كتافها ..وقحر لمعز وعاود طبس باسها من خدها
- تعرفت على مرتي سي معز ؟ كان يكلم فيه بغزول وحست اللي الكورون موش متعدي بيناتهم جملة
- أي سي محمود تعرفت عليها ..وتبسملو تو كنت نقول للمدام اللي انت محظوظ برشة
زاد كبسلها على كتافها وغرسلها راسها في صدرو ..خباها في حضنو ..
-بالطبيعة محظوظ عندك شك في هذا ؟ وضحكلو ضحكة صفراوية وطبس باسها من شفتها .. حستو متوتر وريحتو بالشراب ..هزت راسها لقات معز يغزرلهم بحسد .. تبسملها وهز الكاس كاينو يحي فيهم وبعد ..
بعدت روحها عليه بالشوية ووجها احمر مطمطم من الحشمة
- ياراجل ياخي هبلت ها النهار ؟ الناس تتفرج راهو ؟
- تعرفو معز ؟ سالها بمباغتة
تربثت وقعدت تغزر لعينيه كانو يتشاعلو بين الرغبة والغش والشهوة وبرشة احاسيس أخرى ...
- وه ؟ من...منين نعرفو انا؟
- لا خاترك قعدت تحكي معاه برشة !
- ههه وين ترا فيها البرشة ... لقيتو تونسي قعد يكلم فيا بالعربي حكينا شوية وبرا
قعدت عينيه تدور في بدنها الكل وهو معنقها وعاود غزر لوين واقف معز وقالها
-لا خاتر مانحملوش جملة انا هذاكة ... وزيد قاعد يغزرلك في غزرة ماعجبتنيش ... وعدا يديه على شعرها ويديه ترعش
-مانحب حد يغزرلك كان انا .. انت ملكي انا كهو .. ندمت اللي عملت الحفلة .عينين الرجال الكل باش تاكلك ...حاسس روحي باش نرتكب جريمة في ها الليلة الكلبة وقتاش توفا ؟
تبسمتلو وزيد هاك الغمازات بانو اكثر وحطتت يدها على قلبو كان يدق بالقوي ... ماكانتش حاسة بالعباد اللي واقفين في الصالة يغزرولهم ويوشوشو ويتبسمو ..
- ماعاد مامازال عزيزي ..تو توفا وزيد انا مايملالي عيني في الصالة هاذي الكل كان واحد برك ...وضحكت وهي تغزر اللوطة .. واحد اسمو يوسف ههههه وطبست هزتو في حضنها وهو جاي يتكعبر وعنقها
- محلاك ماما ديذة ..محلاك
- ههه وانت زادة احلى راجل في السهرية هاذي
جبد روحو منها بالسيف ...وقعد يدور في الصالة ويحكي مع العباد وهومخو فيها هي .. يغزرلها ويتبع فيها ... عينيه مانجمتش تبعد عليها حتى ولدو غار منو كيف شدها وعنقها هههه يارسول الله حالتو ولات متعبة اصل ...
معز كان واقف يعس عليها زادة .. كان يستنى في فرصة أخرى باش يحكي معاها ..اما عينين راجلها كيف الصقر يعسو عليها وين تمشي ووين تجي ... استغل فرصة انو هو خرج مع واحد يوصل فيه للباب وهو مشالها .. كانت واقفة مع كوبل وتحكي معاهم شدها من ايدها ودورها ليه بهتت وجبدت ايدها
-وه ؟ نحي كسرتك هبلت ؟
-سامحني اما ..اما مانجمتش نحكي معاك ..راجلك يعس عليك في عسة صحيحة ..خديجة اعطيني نومروك خلي نكلمك لازمنا نحكيو راهو ؟
- امان معز امان ؟ يزي اللي صار من جرتك وبطلت قرايتي !جايني تو زادة تحب تخرب عليا ؟
- علاش نخرب عليك ؟ ياخي هاني ماقلت حتى كلمة قدام راجلك ؟
-ياخي اش عندك باش تقول ؟ وبدات تصيح بالشوية
-ياخي اش بيناتنا احنا باش تحكيه ؟
- بيناتنا حب عمرو أربعة سنين .. أربعة سنين ياخديجة مانسيتهمش وماتنحاوش من بالي
- ههه كنت نسخايلو حتى انا حب ..اما ملي عرفت راجلي حسيت اللي بيناتنا لعب ذر ... انا خذيت راجل ..راجل باتم معنى الكلمة موش غشير تخلى عليا في اول موقف صارلي .. وبعدت شوية عليه وتو سامحني نخليك ...ماعاد عنا مانحكيو
-خديجة ... وبعد كيف را محمود عاود دخل للصالة بعد ...
وفات السهرية .... وبداو الناس يخرجو .. معز قعد يلوج على فرصة أخرى شي .. مانجمش يكلمها ولا يدور بيها ... كانت واقفة هي وراجلها قدام الباب يسلمو على العباد ..كان معنقها ومكبش فيها وهو يغلي من داخل.. غاضتو كلمة غشير كيف قالتهالو وغاضتو كيفاش هي ملك واحد ..واحد يكرهو ويغير منو ..
محمود سكر الباب ..وتلفتلها يتبسم .... قعدت واقفة في الوسط ...عينيه كانو يتشاعلو .. خافت منو هههه بدات توخر بالشوية بالشوية وهو يقدم .. في الللخر نحات التالون وهربت تجري وتضحك ... خلط عليها وقفلها قدام الدروج وحسرها بين الدرجة والعرصة ... كان يلهث وهي زادة ....
-مالا شقتلي قبيلة ؟ شدلها راسها بين يديه وطلعو الفوق وطبس عليها حط خشمو على خشمها (تعلمو تعلمو البنات الرومنسية ههه)اه ؟ قتلي كولني ...مشمشني ...اقتلني
كان كل كلمة يقولها بالشوية ويبوسها ..كل مرة في بلاصة ... غمضت عينيها وسلمت روحها للاحساس القوي اللي عايشتو معاه ... نحى الكرافات ورماها .. نحى كسوتو وبدا يحل في سوريتو ... وهي حاسة روحها في غيبوبة غطست راسها في صدرو وحطت شفايفها على قلبو .. كانت تسمع في دقاتو .. دقاتو القوية حاستهم يدقو على خاترها .. باستو وهوتنهد بالقوي وشدلها راسها كبس عليها وزاد غرسهولها في صدرو
-اوعدني محمود ...اوعدني يقعد القلب هذا يدق ليا انا برك وزادت دورت يديها على ظهرو اوعدني مهما يصير ماتتخلاش عليا ... اوعدني محمود ...باش تخليني بجنبك وتحميني .. حست بدموعها على خدها وهي تحكي معاه ... هزت راسها وغزرتلو في عينيه اللي تعشقهم ..عينيه اللي ذوبوها ... عمري ماحسيت روحي مزيانة كان كيف غزرت لعينيك .. شفت روحي في عينيك .. عينيك هوما مرايتي ... هوما القوة متاعي .. هوما اللي عطاوني الثقة في روحي ... هما اللي خلاوني خديجة اللي انا فيها تو ... عينيك هوما اللي حسسوني اللي انا مرا ..حسسوني بانوثتي ... خلاوني عاشقة ... اوعدني تقعد تغزرلي ديما هكا ..وعدات صوابعها على شعرو وعلى خدو .. مسحلها دموعها بشفايفو والنفس متاعو في وجهها ...عينيه زغللت بالدموع ...هبط على ركايبو قدامها ... حط وجهو في كرشها وعنقها ..تنفس بالقوي وهو مكبش فيها ..قعدت معنقتلو راسو وزادت غرستو في كرشها ... هبطت بالشوية لين ولات مقابلتو ..قعدو معنقين بعضهم فوق الدرجة متاع الدروج ..حاطتلو راسو على صدرها وهو معنقها ... وبعد عدى يدو على بدنها الكل وهو يتنفس بقوة رقدها على يدو وهبط شفايفو على شفايفها ..كلالها شفايفها برغبة قوية وشهوة...هزها بين يديه ووجهو احمار وقعدت هي غارسة راسها في كتفو وطلع بيها الدروج حل باب بيت النوم دخلها وسكر الباب...

الحلقة الواحدة والعشرون
تعدات اياماتها مع محمود احلى من العسل ...كل يوم حب...كل يوم حب ...نسات مقابلة معز ولا حاولت تتناساها ...ماعادش تحب تفكر فيه ...كل لحظة تزيد تعشق راجلها وتتعلق بيه ...وهو تحسو ماذابيه يحطها في عينيه ويسكر عليها ...وكل ما يتعلق بيها اكثر تزيد غيرتو عليها اكثر ...حتى كيف تخرج هي وحياة باش يقضيو قضيات ولا يحوصو بيوسف لازم يتفقد حوايجها قبل ...ويبدا يخرنن عليها ويمرجها باش تروح ...وفي الليل ...ههه يرضيها وينسيها كل شي ...محمود مرة في الخدمة عامل اجتماع ..كان معز قاعد في الاجتماع ...هو من اول مادخل للشركة ماهضموش ...وزاد غزل عليه من نهارت الحفلة ...حسو يغزر لمرتو ...غزرة ما عجبتوش ...ماهيش بريءة..فد وهو قاعد معاهم ...تلفت لتوفيق وقالو
-اففف ها المخلوق هذا ماذابيك معادش تجيبهولي في الاجتماعات ...ماعندو علاش قاعد معانا !!
-تي ماهو لمينا المهندسين الكل متاع الشركة باش كل واحد يقدم مشروعو ...وباش ندرسوهم ونشوفو اناهو اللي انسب وهو قدم دوسييه قلت خلي نعطيه فرصتو
عقد وجهو وهو يقحرلو من تحت لتحت
-تي بهيم بهيم من غير ما تشوف شي من عندو .ًقداش ليه يخدم معانا تو ؟ تي انا كيف قبلت دوسيه قلت مهندسين شباب خلي نعطيهم فرصتهم وزيد عربي وولد بلادي وتعرفني نحب نعاون ولاد بلادي ...اما هو ماعطى حتى اضافة ...حاول باش تسقدو خاتر انا فديت منو ...اعطيه هبوطو !!حطو في شركة اخرى ؟المهم يبعد على وجهي !!
-باهي تهنى ..تو نتصرف
بعد الاجتماع دخل محمود لبيروه وقعد ..جابتلو السكرتيرة القهوة ...قعد يشرب فيها وحل الكام يتفرج في مرتو في الدار ...ولات هاذي هوايتو المفضلة ...كل مايقعد وحدو يحل ويقعد يتفرج فيها ..حاسس روحو ما ينجمش يشبع منها ..كل ما يزيد نهار كل يتعلق بيها اكثر وكل ليلة كيف يبدا مروح يحس روحو متوحشها عاللخر ...كانت تقري في يوسف وتلون معاه ...بعد هزت كتابها وقعدت تقرا فيه ...سمع الباب دق
- تفضل!!
ودخل سي السما معز
- صباح الخير سي محمود
- صباح الخير..تفضل
- سي محمود حسيت الخدمة متاعي ماعجبتكش ...ضاهرلي حتى قبل ماتشوف مشروعي ؟
تكى يديه على الطاولة وقعد يلعب بالستيلو
- والله مانيش انا المسؤول على المشاريع .فما مجلس ادارة هو اللي يقرر
- نعرف سي محمود اما نعرف زادة اللي الكلمة لولة ولخرة ليك
شد سيقارو وشعلو وقعد يغزرلو ...ومعز من داخل يغزل وفادد وماذابيه يطرشق عليه
-لا غالط ..انا مانيش دكتاتور هوني القرار ياخذوه اعضاء مجلس الادارة الكل وكيما قتلك اذا كان مشروعك مخدوم مليح مافماش علاش نرفضوه ...
تلفت معز على غفلة لقا في الكام خديجة في الدار قاعدة ...قلبو ولا يدق ...وماحبش يشلق االي هو شافها ..خاتر محمود نساه محلول وهو يحكي مهاه ...محلاها خديجة صحة عليه ...عندو الزهر في كل شي ...كان قلبو معبي بالحقد عليه ..غل وغيرة ...قام من الكرسي وقالو
-بارك الله فيك سي محمود انشالله يعجبكم مشروعي المرة هاذي وماتفقدش ثقتك فيا !!
اتكى محمود على كرسيه وباقي يلعب بالستيلو وقالو اي براسو من غير مايتنازل ويكلمو حس بالذل والاهانة ...وصل قدام الباب وبعد تلفتلو
-سلملي على مدام خديجة بربي!!
وقتها قام محمود يجري من بلاصتو وحس الدم طلع لراسو قحرلو بغزول
-والله مافهمتكش؟ شمعنتها نسلملك على مرتي ؟ياخي انا كيف نروح باش نقعد نحكي مع مرتي على جماعة الخدمة ..والله عنا حاجات اخرى نعملوها من انا نحكيو عالخدمة ..
سامحني سي محمود مافيباليش الكلمة هاذي باش تغششك ..!!!في بالي عادي نسلم على بنت بلادي راهو ..وتبسملو وخرج ..خرج وخلاه يتهز ويتحط...عدى يديه على شعرو بتنرفيز وعاود رجع قعد ...غزر للكام يلقى الصالة فارغة ...افففف نساه محلول والطحان كان هوني ..جاب ربي ماهيش موجودة .
في الليل بعد ماحطت خديجة لعشاء عيطتتلهم باش يتعشاو هو وولدو ...كانو قاعدين الزوز في الصالة يتفرجو ..باسها من جبينها وبدا ياكل ويتبنن وهي توكل في يوسف وساعات تحطلو قدمة في فمو وتضحك ...
-حقا محمود امي ناجية كلمتني اليوم تتشوكع !!
-اشبيها زادة ؟نهار كامل وهي تتكلم تقول لاصقة في التليفون !!
-هههه لا لا اما عرس اختك قريب مازالو شهر راهو وهوما وحدهم غادي مساكن يهزو ويسبطو وسناء عاملتلي ليسة طويلة عريضة باش نشريهالها من هنا ...الحاسل باختصار يحبوني نهبط باش نعاونهم !!
حستو قريب يشرق بالماكلة ...هز كاس ماء شربو وتلفتلها
- نعم للا؟ تمشي بحذاهم ؟وانا لشكون تخليني ؟
ضحكت وباستون خدو
- ياخي عرس اختك هذا راهو ...شكون باش ياقف معاها ؟
- مايهمنيش !!مازال عندي بروجي نعملو فيه ..نكملو بعد نمشيو مع بعضنا
ضحتلو بدلال وعنقتو
-امان حبي امان..عيب راهو ..المفروض نكون معاهم تو ..والله تسخف وحدها وامك مرا كبيرة
باسها من شفتها بوسة خفيفة
- حتى انا نسخف ...باش تخليني وحدي وتمشي..وانا شكون بيا ؟؟مانجمش نقعد في الدار وانت موش فيها ..من غير ماتبدا انت الدور وتغني ..نحب كيف ندخللها نرا وجهك قدامي يضحك ..نشم ريحة العشاء والدار تبدا دافية وفرشي يبدا دافي وسخون ..وصوت فيروز الصباح وام كلثوم لعشية ...لا لا مافماش مشي انسى ...
جاتو من تالي وعنقتو ..باستلو رقبتو وغمرت راسها فيها
-با روحي ياروحي وشوشتلو في وذنو باش مايسمعش يوسف ..ياخي انا نحب نمشي تسخايلني ؟تسخايلني نحب نبعد عليك ..؟تي انت روحي وممو عينيا !!! اما هاذي حاجة لازمة راهو ! عرس اختك كيف ماناقفولوش احنا اش كون باش ياقفلو ؟
وقف وهو يمسح في يديه وغزرلها وعينيه بكلها عشق
-هاني باش نرقد يوسف ونرجعلك ...اذا كان تحب تمشي يلزمك تعوضلي الايامات اللي باش تغيبهم الكل واضح!؟ قىرصتو من خدودو وباستو على طرف شفتو
-واضح واضح واضح
في الصباح دوب مادخل لبيروه ..لقا السكرتيرة متاعو متقلقة ..سالها اشبيها قالتلو راهو معز جا ء متغشش ويسال عليه ...هي مازالت تحكي معاه وهو جاه ودخل من غير ما يشاور كانت عينيه تتشاعل وكشاكشو خارجة
-عملت اللي في مخك سي محمود ؟حبيت تتخلص مني وعملت اللي تحب ؟
هز يدو وقربلو باهت
-نعم فاش تحكي انت ؟لاباس ماهو ؟نخدم عند جد بوك الكلب انا جاي عالصباح تعيط ...وقربلو يصيح عليه وبدا يدز فيه ...السكرتيرة كيف حستها باش تلحم مشات تجري تعيط لتوفيق خاتر كان هو اللي يهديه ..ومعز قعد يعيط
-المشروع ...المشروع متاعي رفضوه ...وباش يخرجوني ..عارف ..عارف اللي انت عندك يد في هذا الكل ..انت من اولك موش حاملني ..وزيد تو كيف ...كيف ...
-كيف شنوة اه ؟ كيف شنوة ؟تكلم حل ر** فمك !!اش تحب تقول ودزو من كتفو وبدا يصيح - انت انسان فاشل ..وانا اللي رفضتو مشروعك ..وباش نخرجك من الخدمة ..كيما عطيتك فرصة من الاول انا تو باش ننحيهالك وريني اش تنجم تعمل تره؟
- اش ننجم نعمل ؟ههه (وضحك بغزول ) برشة حاجات ننجم نعملها وكان تسخايل روحك قوي وعندك نفوذ راهو موش معايا انا ...
دخل توفيق يجري يلقاها لاحمة بيناتهم وباش يتضاربو شد صاحبو من كتافو ودز معز بعدو
-صلي عالنبي محمود رانا في الخدمة ماناش في الشارع ؟؟؟
-هاو الطحان جايني عالصباح يتهدد عليا يسخايل روحو راجل !!وعاود غزر لمعز وقالو -تو تخرالي فيه مالا هاني طردتك برا ارجع منين جيت يا سارح ..
وقتها معز خطرتلو فكرة باش يذل بيها محمود ... ،لازم يذلو ويكسرلو شوكتو ...وخديجة هي الحل !!!...مشا يجري ركب في كرهبتو ومشا طول ...لدار محمود...
-


الحلقة الثانية والعشرون 

قعد توفيق يهدي فيه .. وجماعة الشركة بداو يتلمو ..شطرهم موش فاهمين لحديث خاترهم قورّة اما عارفين اللي عرفهم متغشش عاللخر ...مشات السكرتيرة تعملو في قهوة وهو شعل سيقارو ويديه ترعش .. سكر توفيق الباب وقالو 
-هدي روحك تو.. ماهو عملت اللي مخك ؟.. البارح مشيتلو لبيروه وقتلو اللي احنا ماعادش حشتنا بيه فهم اللي الحكاية جات منك انت هذاك علاش جاك الصباح هايج 
-هايج ؟ هايج على دين والديه ؟انا يجيني واحد كيفو هو يطيحلي قدري ؟ والله لاما نكلفهالو غالية ؟ فرنسا لما نحرمها عليه الشلاكة .. مازال مايعرفنيش ؟ 
قعد يرحي من داخل ومن برا وقعد توفيق يهدي فيه ... جابتلو السكرتيرة القهوة وهو بدا يهدى بالشوية ....بعد ساعة بدات ترجع فيه الروح ورجع للخدمة ... وتفكر اللي هو باش يحضر الباسبور متاع مرتو وولدو باش يروحو ويقصلهم التساكر .. زاد فد .. كيفاش باش يقعد وحدو في هاك الدار وتولي ماعادش فيها حس الضحك متاعهم... حل الكام لعلاش كيف يشوفهم يتفرهد وترجع فيه الروح ... من الأول ما استوعبش !!!! بهت ..ههه كلمة بهت ولا تصدم ماتافيش بالغرض ؟ لالالا ... كان معز واقف مع ...مرتو في وسط الصالة وظاهرين يتناقشو وهو يعيط عليها ..وقف ..بدنو الكل حسو ملخلخ...وتفجع ..اول مرة يحس بالفجعة والخوف ... الطحان مشا لدارو ؟ مشا لدارو ؟ اش يحب يعمل ؟ هز مفاتحو وخرج يجري ... مايعرفش على روحوكيفاش هازتو ساقيه ولا وين واقفة كرهبتو ؟ يهز في التليفون ويكلم فيها ..زاد تفجع كيف ماكلمتوش...ياربي !!!والله كان يمسها هي ولا ولدو لاما يقتلو ويدفنو في بلاصتو الكلب ..الكلب ... بدا يجري في الكياس ويضرب على الفولون بغش ..ليوم لاما نقتلك يامعز الكلب ..
وقتلي حلت خديجة الباب اخر واحد كانت تتصورو ياقف قدامها هو السخطة معز !! 
-لاباس في مخك انت ؟ جايني لهوني اش تحب عندي ؟ 
ووقفت قدامو باش مايدخلش .. كانت عينيه تتشاعل وفيها غل ..دزها ودخل طول للصالة وهذا كان الهدف متاعو .. لقا ولدو يتفرج في التلفزة زاد غزل وغزرلها وهي مفجوعة 
-في بالك ؟ في بالك راجلك طردني من الخدمة ؟ الكلب ذلني كيما حب وسمعني ما نكره ؟ 
مشات خديجة تجري ليوسف هزتو وهو يغزر للراجل باهت قاتلو باب اطلع لبيتك العب خاتر فما حاجة تكسرت في الدار وعمي جاء باش يصلحها ؟ 
طبس راسو ومشا يجري لبيتو .. تلفتت لمعز وبدات تصيح عليه
- علاش يطرد فيك ؟ سمع بالحكاية ؟ كانت ترعش وخايفة 
- هه هذاك اللي همك انت ؟ لا ماسمعش ..هو من اصلو ما يهضمنيش وحتى انا نكرهو !! راجلك متكبر وضاربو في روحو وعندو لعباد تفش .. الحيوان قصت عليه تصيح 
- ماعادش تقول حتى كلمة على راجلي فاهم ولا لا ؟ انت هو الحيوان ..راجلي خير منك واشرف منك ياكلب ..اخرج من داري اخرج !!
شدها من كتافها وبدا يخض فيها 
- دارك وراجلك ؟ تو ولات دارك وراجلك ؟ وتربي في الكبول متاعو ..اللي من المفروض راهو تو عندنا ولد قدو كان عرسنا .. علاش خديجة علاش ؟ علاش كرهتني ؟ نسيت هاك الايامات ..نسيتها ؟ 
جبدت روحها وهربت وهو خلط عليها زاد شدها بالسيف .. ماحبتش تعيط باش ماتخوفش يوسف بدات تكلم فيه بالسياسة 
- سيبني معز سيبني ..عيشك سيبني ..اش تحب عندي ؟ اش مدخلني انا في خدمتكم ومشاكلكم ؟ 
سمع حس كرهبة قربت ووقفت قدام الدار وهي من الخوف من الربثة ماسمعتهاش ..سيبها وبدا يبعد ..غزرلها وعينيه بكلهم وجيعة 
- سامحني خديجة ..سامحني .. المرة هاذي زادة باش نوجعك .. وباش نتخلى عليك .. الله غالب جيت انت في الوسط ..
- اش ..اش تقصد ؟
مازالت ماكملتش كلمتها والباب تحل ودخل محمود يجري ... لقاهم واقفين في وسط البيت .. خديجة حالة فمها من الصدمة ومعز يتبسم بحقد ... مشا لمرتو يجري سالها 
- اش عملك الكلب كلمني ؟ خديجة عملك حاجة ؟ 
وتلفتلو شدو من خناقو وضربو ببونية وبرك عليه ..
-ياطحان ..يا ولد لحرام جايني لداري ياكلب يامسخ ...اش تحب من عندي ومن عند مرتي يامي***؟ 
وهو يغزرلو بشماتة قالو 
- مرتك هذيكة نعرفها قبل ماتعرفها انت يا... هه سي محمود 
سيبو وبعد شوية وقعد يغزرلو نظرة متاع تساءل وغزر لمرتو يلقى وجهها احمر وترعش بكلها ..عملتلو براسها لا وغزرت لمعز ودموعها هبطو ...
-اش تقصد؟ 
بعد شوية لشيرة الباب وقالو وهو في قمة الشماتة 
-انا ومرتك كانت عندنا علاقة لمدة أربعة سنين .. وعرضت عليا باش نعرس بيها وانا رفضت .. ههه خليتهاك ليك انت ياسي ..محمود ... وخرج ..خرج وحس روحو هكاكة انتقم لروحو .. حس روحو تفرهد ... خرج وخلاه واقف في بلاصتو كيف المشلول ... حس بدنو الكل تخدر ويبس ..قعد كلامو يزن على راسو وهو موش مستوعب اللي سمعو ..موش مصدق !حس حياتو لكل نهارت في اللحظة هذيكة .. اللي بناه الكل مع مرتو طلع وهم .... طلع عايش في وهم ..وهم .. الحب اللي عطاتهولو الكل وهم .. طلعت تحب واحد اخر وكذبت عليه ... هو محمود اللي عطاها قلبو وعقلو وسلملها في حياتو الكل وامنها على شرفو طلعت تكذب عليه ؟؟؟طلعت تخدع فيه الوقت هذا الكل؟ ... مافاق كان على صوتها وهي تكلم فيه بالشوية 
-اما..ن ..امان محمود خاللي نفسرلك ؟ مانجمش يتلفتلها ..مايحبش يشوفها ... مايحبش يضعف ... كان صوتها يرعش بالخوف .. شدتو من يدو ...وكان يعقل ..دزلها يدها وتلفتلها من غير مايغزرلها ..عطاها الكف لول والكف الثاني .. حس بغل كبير في قلبو وضياق النفس عليه ..كركرها من شعرها وبدا يصيح 
-في داري ياكلبة ؟ في داري ؟ امنتك على شرفي ياكلبة ..يافاجرة وبدا يضرب ويصيح ماهوش واعي ..فقد السيطرة على روحو ..طيحها على Lcanapé وبدا يضرب يضرب يضرب .. على قد ماحبها على قد ماكرهها في اللحظة هذيكة ..بدات تصيح وتعيط مارحمهاش ...مافيقو كان صوت ولدو وهو يصيح 
- ثيبها ثيبها نكرهك نكرهك ثيبها ماعادث تزربها ثيبها .. وشدتو هستيرية متاع بكاء ... ماحسش بروحو اش عمل كان كيف سمع صوت ولدو ... كان وجهها مدمدم والدم خارج من فمها ومن خشمها .. سيبها ... هو سيبها وهي مشات تجري ليوسف تعنق فيه وتبكي 
-لا مضربنيش ماضربنيش ..بابا ماضربنيش .. انا .انا طحت وهو شدني ماتخافش .. وقعدت تعنق فيه وهو يبكي ويغزر لبوه 
-لا زربك زربك ريتو زربك ..؟ نكرهو انا نكرهو .. زادت عنقتو .. وقعدت تمسح في الدم بيديها ... وتسكت فيه وهويغزرلهم ..حتى ولدو كرهو ..؟ حس بوجيعة قوية في قلبو ... كل شي انهار في لحظة ... هبط على الكرسي وحط وجهو بين يديه ... كانت يديه مسخة بالدم متاعها وبدنو الكل يرعش .. حس روحو مازال مابردش قلبو فيها ..مازال يحب يضربها ... موش يضربها يقتلها .. يقتلها كيما قتلتو هي .. مازال موش مستوعب الليي صار .. كايني منامة خايبة يستنى وقتاش يفيق منها !!! نحى lunette متاعو رماها بحذاه وقعد يعدي في يديه على وجهو وعلى شعرو .. قعد يسمع فيهم يبكيو الزوز وهي تسكت في يوسف وتريض فيه ... مانجمش يهز راسو ويشوف نظرة الكره في عينين ولدو ... عينيه تملات بالدموع .. مايحبش يبكي مايحبش .. ماتستاهلش حتى دمعة يهبطها على خاطرها ... هز مفاتحو وخرج يجري وطربق الباب وراه ..
خديجة بدنها الكل يوجع ... كانت مكبشة في يوسف وتبكي .. تبكي عليه وعليها ... كل اللي بناتو في لحظة تحطم قدام عينيها .. في لحظة تهدم كل شي ... ويوسف من الفجعة بال على روحو ...
-ماما ديذة .. اندك دم ..اندك دم .. املك دم بابا .. 
قعدت تبوس فيه وتحاول باش ماتضهرلوش ولات تضحكلو 
-لا بابا ماضربنيش .. ماضربنيش .. انا طحت وراس ولدي طحت .. بابا يحبنا راهو .. مايضربناش ؟ 
قعد يضرب بساقو على القاعة ويصيح 
-زربك زربك نكرهو نكرهو ... 
حست بدوخة ووجيعة في كرشها .. وجيعة بدات تقوى .. حاولت تهز روحها قدام يوسف .... كركرت روحها لتوالت نظفت وجهها من الدم ..كان خارج من كل بلاصة ووجها تنفخ من الكفوف ... لتو من الصدمة موش مستوعبة اللي صار ؟ موش فاهمة ..علاش صار هذا الكل ؟ علاش هي بالذات ربي ما يحبهاش ؟ علاش وين تسخايل روحها قدمت خطوة تلقى روحها رجعت عشرة خطوات لتالي علاش؟ علاش ديما هي اللي تخلص ؟وقفت قدام المراية... شدتها هيسترية متاع بكاء .. هبطت على ركايبها وبدات تبكي تبكي لين حست الدموع نشفو من عينيها ..ويوسف مكبش فيها ماحبش يسيبها .. حستو خايف عاللخر ... لازم تقوم وتشد روحها على خاطرو .. هزتو لبيتو بدلتلو حوايجو وقعدت معاه فوق الفرش ترقد فيه وحطت راسها عالمخدة بحذاه وغمضت عينيها من التعب ...

الحلقة الثالثة والعشرون
تعدات العشية موش عارفة قداش الوقت...رقدت رقدت لين تعبت من النوم ...ماحست كان بيوسف يتحرك تحتها متقلق ...عنقتو ياخي فاق ....غزرلها ولا يبكي
-دم دم ماما ديذة دم !!!
بدات تسكت فيه وهي تمسح في وجهها وتتوجع ..تحس في بدنها ماعادش فيه حتى عظمة صحيحة ً
-ماتخافش بابا وفا الدم وفا معادش فما دم ..هذاية من الطيحة قبيلة ..وعنقتو تلقاه عاود مسخ روحو بالpipi قامت تهز في روحها بالسيف طلت على المنقالة تلقاها الستة متاع العشية ...حست بدوخة قوية وقلبها غم عليها ..مشات تجري لتوالت ردت ردت حتى خرجت اللي في كرشها الكل ..ويوسف قعد بحذاها واقف يغزرلها موش فاهم شي ...مسكين قلبها دم عليه ...ماهوش مستانس يشوف في المنظر هذا ...كان عليها هي ستانست ...بدنها حلف ...من صغرتها وهي تاكل في الكفوف وتسكت ..ماتتكلمش...طول عمرها عايشة في الذل والاهانة ..ماعدش فما حاجة تقلقها ...حتى كيف ذاقت ايامات حلوة حسدتها الدنيا عليها ...فيقتها من المنامة الحلوة اللي عاشتها ورجعتها للكابوس ...هههه تي حتى هي من قوة الفرحة اللي عاشتها ماصدقتش وولات تستنى وقتاش باش تجيها المصيبة ومنين ؟ حسبي الله ونعم الوكيل فيك يا معز !! حسبي الله عللي عملتو !!!قتلتني بالحياة ومسختلي شرفي !!حطمتني انشالله تلقاه يا ساقط ...!!! هزت روحها والدوخة لاعبة عليها ...بدلت ليوسف وهبطت هي وياه الكوجيينة ..طيبتلو املات وبدات توكل فيه ...مسكين جاع ولا ياكل بالزربة ...بعد ماكملتلو حللتلو التلفزة وخلاتو يتفرج ....زاد غم عليها قلبها وعاودت ردت ...غزرت لروحها في المراية ..ماعرفتش روحها ..وبدات تبكي بالشوية ...وجهها ...وجهها اللي يبدى يتغزل بيه كل يوم !! وجهها اللي يحطو كل يوم في حضنو وما يرقد كان ما يغطسو فيه ....وحهها الكلو مدمدم ...الكلو منفوخ ...شفتها مفلوقة ...بلايص بلايص زرق في وجهها وفي رقبتها وفي بدنها الكل ...وهو لتو مافماش ريحتو ...ماالي خرج الصباح مارجعش وماتفقدش حتى ولدو االي يرعش عليه ..مشات قعدت في الصالة وتغزر للوقت ...اتكات وحطت يوسف بجنبها تلعبلو على شعرو .. جات الثمنية وجات التسعة وهو حتى خبر...بدا قلبها يتوغوش ...اي يتوغوش ...بالرغم اللي عملو فيها الكل هي عاذرتو .. هو ما سمعهاش ...سمع كان الكلام اللي قالو معز ...كيما حب يوصلو شماتة فيه ...باش يذلو بيها وهذيكة كانت خطتو كيف قالها سامحني جيت انت في الوسط ....يعرف اللي محمود يغير عليها برشة ....شافو كيفاش يتصرف في الحفلة معاها...عرف نقطة ضعفو وين وضربو فيها ...اما الكلب عمرو ما مسها ولا حط عليها يدو ...عمرها ما خلاتو ...كانت ديما محافظة على روحها للراجل الي يستحق ... في نهار من النهارات كانت تسخايل معز هو الشخص هذاكة ...كانت تسخايلو باش ياقف معاها ويحميها من بوها ومرت بوها ...ياخي هرب ....هرب وخلاها تواجه مصيرها وحدها ومكفاهش اللي صار زاد عمللها العملة هاذي !!!!
جات الحداش تاع الليل ومحمود ماروحش ....هزت يوسف لبيتو رقدتو وقعت تمشي وتجي في الصالة ....تفجعت وماعرفتش اش تعمل ....مشات تجري للتليفون وكلمت حياة
-الو حياة ؟سامحني كلمتك هالوقت ...راجلك في الدار بربي؟
- السماح وه توهذا كلام تقولو؟اي هاو في الدار ...علاش؟
-امان تقلو يكلم محمود يشوفو وين .. ؟ من الصباح خرج لتو لا رجع والله تشغشبت ؟؟
-وه شبيه لتو ؟توفيق قالي عمل عركة الصباح مع مهندس في الخدمة اما مبعد سكت وراض!! ياخي قعد يغزل على الحكاية ولا شنوة ...؟؟وانت كلمتو؟
تنهدت وقالتلها
-لا ماكلمتوش . حياة امان قصة طويلة ..تو ..تو نحكيهالك ...المهم قول لراجلك يشوفهولي وين يعاود يكلمني يفرحك !!!.-باهي باهي وعلقت التليفون .
قعدت شادة ومكبشة في التليفون وقلبها ولا يرعش ويدق ...شوية من الفجعة شوية من قلة الماكلة ...ماحطت في فمها شي من الصباح ...حتى لين غم عليها ...بدات تمشي وتجي ...تمشي وتجي ...حتى لين نوقز التليفون ..هزتو وايدها ترعش
-ا...الو ؟
-الو قالها توفيق ...اسمع هاني لقيتو محمود . اما ...
-اما شنية امان؟وبدات تبكي
-ما تخافش ماتخافش ...سكران خيط راهو ...حتى الكرهبة ما ينجمش يسوقها ...هاني باش ناخولو قهوة قوية تفيقو ونتلها بيه حتى لين يفيق ...برة ارقد انت على روحك واتهنى
-عيشك يا توفيق ...عيشك رد بالك عليه !!
-تهنى تهنى ! ماتخافش ..
علقت التليفون وقعدت تبكي ...

تبكي على سعدها المكبوب وايامها الحزينة ...موش عارفة اش باش تعمل في حياتها كان يخرجها محمود من حياتو ؟وين باش تمشي؟ علاش ياربي علاش ؟علاش ماسمعهاش ؟ علاش ماحاولش يفهمها ؟علاش عطى لفرصة لواحد ساقط وواطي يحقق اللي يحب عليه ؟ ...تعبت من كلمة علاه ..تعبت ..ماعادش عندها حتى القوة باش تخمم ولا تفكر... طلعت بالشوية ودخلت لبيت يوسف ...كان راقد كيف الملايكة ...حطت مخدة ورقدت بحذاه ...هزها النوم ومافاقت بشي ...حست بوجيعة في بدنها .حلت عينيها مفجوعة ...تلقاه واقف قدامها ...كان وجهو تاعب وعينيه حمر ...ماغزلهاش ....ملفت وجهو عليها ...
- قوم اخرج من البيت نحب نقعد مع ولدي شوية !!!
سخفتها حالتو ...كان من المفروظ في الوقت هذا يبداو راقدين معنقين بعضهم ...حست بالدوخة وبالبرد في بدنها ...طبست راسها وجات قايمة عاودت جاتها الدوخة ...جات باش الطيح لقفتها يديه...شدها ورماها في حضنو ...قعدت مكبشة فيه ...قداش حست بالدفاء والامان؟ ...قداش حضنو حنين ؟ .ياريتو يخليها عندو ويخبيها؟ ياريتو يحس بالخوف اللي داخلها ويطمنها ويقلها ماتخافش ؟ ...حست بيديه بداو يبعدو فيها ...ورجع بدنها يحس بالبرد ...النفس متاعو بالشراب جاء في وجهها وهو يكلم فيها بصوت ضعيف
-قتلك اخرج ...اقلب منظرك عليا ..نحب نقعد مع ولدي وحدي !!
هزت راسها وغزرتلو ....عينيه فيهم وجيعة كبيرة ...كي
ف غزرلها حستو بهت تصدم من الضرب الي في وجهها ...اما ملتكلمش ...تنهد ومشا بحذا ولدو وقعد يبوس فيه بالشوية ويعدي في يدو عليه بكل حنية ...حبت تفسرلو ..تفهمو ..وقفت بحذاه وقاتلو
-محمو...د !! محمود ..خلي...

هز راسو وعينيه كلها غل هز يدو وحطها في فمو معنتها اسكت وقالها-اخرج ..اخرج عليا تو خير مانكمل اللي بديتو قبيلة ....
خرجت تجري وتبكي ..دخلت لبيت نومها ووقفت وراء الباب وقعدت تبكي ...عنقت بدنها بيديها ومشات رمات روحها في الفرش وتكمشت على روحها ...ودموعها عباو المخدة ... تسمع في صوت يوسف يصيح ويعيط ويقلو دم دم ..نكلهك نكلهك ...مشات تجري تجري ....حلت الباب ودخلت تلقا محمود حاط ركايبو اللوطة ووجهو فوق الفرش ويبكي ...يبكي بالشهقة ...ويوسف يصيح وخايف ....مشات تجري عنقتو اطمن فيه ...وتغزر لمحمود وحالتو ...
-يوسف بابا يحبك راهو ...ماتعملش هكة لبابا عيش ولدي ؟
تعنكش فيها ماحبش يسيبها ويصيح
-بابا يزرب بابا .. زربك زربك ...
وقتلي سمع محمود كلام ولدو ...قام يجري خرج وسكر الباب ..

الحلقة الرابعة والعشرون
قعد محمود في الصالة يتكيف ...السيقارو وراء خوه ... يتكيف ويشرب ...ويتذكر في اللي صارالكل ...مازال موش مستوعب ؟ ..مازال عقلو رافض الحكاية .. وتذكر وجهها .. وجهها فسد من الضرب ...حط راسو بين يديه وبدا يحك في عينيه ...النار لتو مازال يحس فيها شاعلة فيه .. ماحبتش تبرد .. وهاك الكلب قد مافركس عليه مالقاهش .. فص ملح وذاب .. تخبى كيف الجبان ..اما ماعندو وين يمشي ؟ تو يلقاه .. وتو يحاسبو على كل كلمة قالها ...اربعة سنين مع بعضهم ؟ أربعة سنين ؟ وقتلي سالها في الحفلة قاتلو مانعرفوش ؟ .. بكل صحة رقعة .. تمنيكو عليه الزوز ؟ قعد يمشي ويجي في الصالة ..حتى بقعة ماهي حاملتو ..فادد ..فادد .. اكثر حاجة ماثرة عليه هي ردة فعل ولدو !!.ولدو كرهو ؟ تاثر وولا يخاف منو ... ولدو يخاف منو؟ ولدو ولا يشوف فيه غول ؟
عدى يدو على شعرو كيماكل ما يبدا متوتر ..وتلفت شيرة الدروج ..يسمع في الحثلة.. كان الضو ناقص ..زاد قرب وبدا يطلع الدرجات ... يلقاها قاعدة في اول درجة وحاطة ايدها على كرشها والايد لخرى على فمها .. حس فما حاجة ...قلبو ولا يدق بالقوي وطلع يجري وقف قدامها ... كانت مطبسة راسها وتإن بالوجيعة وتبكي طبس عليها ...مافهمش شبيها جاء باش يشدلها ايدها لكن تراجع ..هبطلها ..وسالها
- اشبيك؟ اشبيك جاية تنوح هوني ماهو لاباس ؟
ماجاوبتوش ..باقي مطبسة راسها ...من الغزول شدلها شعرها وطلعلها راسها .. هزت يديها وغطات وجهها لاشعوريا ..خايفة لا يعاود يضربها .. قلبو عصر عليه .. سخفتو حالتها لكن ماحبش يضهرلها .. ماحبش يضهرلها ضعفو ... ماحبش يضهرلها اللي هو يحب يعنقها ويعنقها ويعنقها وينسى كل شي في حضنها .. ينسى اللي صار الكل ويرقدها في حضنو ...سيبلها شعرها وقالها بصوت ضعيف
-ما تخافش ..موش باش نضربك ..
وجاء هابط ..شدتو من يدو جمد في بلاصتو وما حبش يتلفت
- مح..مود .. وجي..عة ..وجيعة في كرشي .. وجيعة امان باش نموت ... باش نموت ..
تلفتلها يلقاها تتوجع بلحق هبط راسو اللوطة ..يلقى قلتة دم تحتها .. تفجع ..حس الدنيا دارت بيه .. من غير ما يشعر هزها بين يديه وهبط يجري من الدروج .. تمهمش .. حتى مفاتح الكرهبة يدور بيها ويفركس وهي ولات تصيح من الوجيعة وتقلو
-يوسف ..يوسف ماتخليهش وحدو .. يخاف ..
كان يجري ويلهث
- تو وقت يوسف ؟..باش تموت وتحكيلي على يوسف ؟
- جيبو ماتخليهش وحدو جيبو
- باهي باهي .. ماكانش عارف اش يعمل .. حطها في الكرهبة وطلع جاب يوسف وهو راقد بغطاه حطو من تالي وطار بالكرهبة .. يسوق ويديه ترعش وهي تتوجع وتقلو باش نموت ..باش نموت ..
- ماعادش تجبد الموت ..اسكت هانا وصلنا ..هانا وصلنا .
. وهو في الطريق كلم صاحبو توفيق باش يخلط عليه في الكلينيك .. ماعرفش على روحو كيفاش وصل؟.. ولا كيفاش جاو هزوها الفراملة يتجراو؟ كان الدم تحتها ماحبش يكف ..دخلوها لبيت العمليات طول وهوقعد شادد ولدو في الكلوار وهو راقد .. مافاقش المرة هاذي .. من التعب واللي شافو اليوم مافاقش ..مايعرفش قداش قعد لين جاء صاحبو هو ومرتو ..دخلو يجريو
- اش فما ياخي ؟ اشبيها خديجة ؟
حياة كيف رات يوسف في يديه خذاتو من عندو وحطتو في حضنها
-اشبيها خديجة ؟ قبيلة كلمتني صوتها مبدل وتاعب سالتها قاتلي شي ..ياخي اش فما ؟
- كلمتك ؟ وقتاش كلمتك ؟ (بهت)
- قبل مانجيك انا لوين ساهر .(جاوبو توفيق) . ياخي انا وحيت وحدي اللي انت ساهر غادي ؟ ماهي مرتك تشغبت عليك كلمتنا .. قاتلي فركس عليه راهو ماروحش من الصباح !! كان وجهو اصفر كيف الليمونة وعينيه حمر من البكاء والشرب ..تلفت للبيت اللي دخلوها فيها وهوما الزوز يغزرولو ..
- تو نحكيومبعد ..كان صوتو تاعب ... خلي نطمان عليها بعد تو نحكيو ..
قعدو الثلاثة يستناو .. لين خرج الطبيب ..نقز يجري يسال فيه على مرتو وتوفيق معاه ..
لاباس دكتور ؟ اشبيها ؟ ( بالطبيعة بالفرنسية )
غزرلو الطبيب غزرة متاع لوم
- انت راجلها ؟
- أي انا ؟
- المدام على شعرة ..كانت باش تخسر الصغير اللي في كرشها
عينيه وساعت من الصدمة والمفاجاة
- صغير ؟ صغير ؟ م..مرتي حبلة ؟
- علاه انت ما فيبالكش ؟
- لا .لالا مافيباليش.. ؟ والله لافي بالي
- جاها نزيف من الضرب اللي كلاتو في بدنها الكل .. وغزرلو باحتقار .. على كل حال هانا وقفنالها النزيف وركحنالها الصغير وانشالله ماتصيرش مضاعفات .. يلزمها تبات تحت المراقبة الليلة ..
الطبيب مشا وهو دموعو هبطت بالوقت .. هز يدو وضربها عالحيط من الغل .. وتوفيق قعد يغزرلو باهت
- ياخي الطبيب قال باش تطيحو من الضرب ؟ ولا انا سمعتو بالغالط ؟ بالكشي ماعادش نفهم اللغة انا؟
تنهد تنهيدة قوية وتكى راسو عالحيط
-لا مافمهتش بالغالط... انا اليوم كنت باش نقتل ولدي .. كنت باش نقضي على روح بريئة مازالت ماخرجتش للدنيا ؟ وليت مجرم انا اليوم ..وحط ايدو على وجهو ..انا اليوم استجرمت !!! حتى ولدي كرهني وماعادش يحب يشوفني ... ولدي كرهني ياتوفيق ولدي كرهني ...
شدو من كتفو قالو
- هيا نخرجو نحكيو البرا وفهمني اش صار ؟
-نحب نشوفها .... على الأقل نطمن عليها .. وغزر لشيرة الباب لمسكر
- لا فايدة تو ..سمعت الطبيب قالك باش تبات ليلة غادي .. هانا قاعدين حتى لين يخرجوها .. خلي حياة تروح بيوسف معاها واحنا خلي نحكيو داكور ؟
هز راسو ومشا معاه وهو قلبو الكل في هاك البيت ....

- تو هذا كلام تحكيه ؟ ( بعد نص ساعة في القهوة متاع الكلينيك) ياخي هبلت ؟ قالو توفيق ... تشد مرتك تفشخها وقريب لاتطيحلها صغيرها خاتر جاك واحد كلب مايسواش موش راجل قالك كلمتين صدقتو ؟
كان يتكيف في السيقارو وعينيه سارحة
- اما هي مانكرتش ؟ ماقالتليش لا موش صحيح ؟
- انت خليتلها الفرصة باش تحكي ؟ قعدت معاها وسإلتها ؟ وحتى كان صحيح ؟ ماعندكش الحق باش تحاسبها على الماضي متاعها ؟ هي تو مع شكون ؟ هي حاسبتك مع قداش من مرا رقدت ؟
- مارقدتش معاه !! لا قص عليه وحس بدنو الكل يغلي .. مارقدش معاه ..انا...انا كنت لول في حياتها حتى حد مامسها قبلي انا ..
- RAION DE PLUS !!مالا على شنوة تحاسب فيها ؟ على علاقة صداقة ؟ علاقة افلاطونية تصير لاي طفلة في بداية حياتها؟ ..وهز يدو حطها فوق راسو .. فهمني فهمني ؟ مخك هذا شولى فيه ؟ ياخي طلعتلك شعرة سيدنا علي كان معاها هي ؟ الطفلة خنقتها ..نرا فيك راهو كيفاش تتصرف معاها.. تعس حتى على لبستها .. ياخي كنت هكا مع كريستين ؟ هاي كانت تمشي وتحوص وتسافر مع صوحابها ولا عمرك حاسبتها ؟ ويني لسبري متاعك ؟ جات في هاالمغبونة وولات حزارة ؟
- وقتلي سالتها في الحفلة تعرفو ولا لا قاتلي لا ؟ .. كذبت عليا .. كذبت عليا
- ماكذبتش عليك .
- شنوة تو تلقالها في المبررات انت ؟
- لا موش نلقالها خ..اطر واضح كل شي .. هي خبات عليك موش كذبت ..خبات خاتر راتك كيفاش تتصرف معاها .. خافت منك الطفلة .. وهاو اللي توقعتو صار ؟ دوبة ما سمعت الحكاية من طرف واحد فشخت دين أمها هكاكة .. لا فهمت ولا اطعمت ..
قعد مطبس راسو وساكت ..مشبك صوابعو في بعضهم ويحرك فيهم بتوتر .. قاعد يستوعب في كلام صاحبو .. قعد يتفكر اش صار نهارتها .. وتفكر كيفاش هددو معز .. تفكر نهارت الحفلة كيفاش يغزر لمرتو باش ياكلها بعينيه .. وهي ما عطاتو حتى اهتمام .. هي كان جات تحبو راهي حاولت تعمل المستحيل باش تقعد معاه ولا تقابلو .. هي ديما قدام عينيه ..حتى كيف تخرج تخرج مع حياة ولا معاه .. وفي الدار يبدى حاط الكاميرا ويتفرج فيها .. هي مافيبالهاش بالكاميرا .. وكان جات تحب تقابلو راهي كلمتو باش يجيها ... ووساعت عينيه وهويتفكر وقتلي جاه معز البارح يحكي معاه هو نساها محلولة !!! ضرب راسو على يدو ... اكيد ..اكيد راها ... راها وخطط لكل شي ... مشالها بلعاني للدار باش هو يراه ويجي يجري ... يعني وقتلي مشا كان يستنى فيه باش يقلو الكلام هذاكة ....وهو كيف البهيم طاح في الفخ متاعو .. وضربها ..ضرب حب حياتو .. ضربها وقريب لا قتلها وماخلهاش تفسر ولا تبرر شي .. غيرتو العمياء عليها خلاو عينيه تظلام وقتها .. غشو وقهرتو الكل فرغهم فيها هي ... وهي .. هي من طيبة قلبها حتى وهي مضروبة ودمها يجري مشات لولدو تسكت فيه وتقلو ماهوش يضرب فيا ... من حنيتها ومن صبرها ... تحملت الوجيعة نهار كامل وساكتة باش ما تزيدش تفجعو .. ماشكات الحد .. حتى كيف كلمت حياة كانت مشغوبة عليه !!! حتى بعد اللي عملو فيها تحيرت عليه .. تحيرت عليه خاتر تحبو هو .. تحبو هوبرك.. ..

الحلقة الخامسة والعشرون
حياة تمسحلها في وجهها بقطنة وتتحسر ..وهي راقدة عالفرش ...يوسف يلعب بحذاها ...ما حبش يبعد ..نهارين تو وهو لاصق فيها ...وما يحبش يكلم بوه ..بلي حاولت معاه شي ...
-بصراحة!!قالتلها حياة وهي تلم في الدواء والقطن ..هاني نعرفو محمود اكثر من عشرين سناء ..اما يعطيه كسرة في يديه ...وه ؟ حتى الحيوانات ما يتضربوش هكا ؟ اشبيه هبل ؟ والله لاعاد نعقلو وليت !!عمري ماتصورت يعمل عملة كيفما هكة!!!
تنهدت وتكات راسهاعالمخدة ...حست بالدموع على طراف عينيها ...ماعادش تحب تبكي ...يزيها ما بكات ...الحاجة الوحيدة الي تحمد عليها ربي انو صغيرها اللي في كرشها منع ...راسو راس هم كيف امو ...قد ماكلا على راسو قعد مكبش في الدنيا ...محمود نهارين ما شافتش وجهو ...حياة قالتلها راهو نادم وباش يموت بالندم وما عندوش وجه باش يقابلها ...هذيكة طبيعتو ...في عوض كي غلط يجي يطلب السماح زاد هرب وخبا وجهو ...يعني بالطريقة هذية باش يحلو المشكل؟ هو لتو لا سمعها ..يعني قعد كلام معز بالنسبة ليه هو الصحيح ...حتى كان ندم على ضربو ليها اما في مخو الفكرة مازال كيما هي بالنسبة ليه!!
-هاني حضرتلها كل شي ...غدوة الصباح انشالله تقصد ربي هي وجو لتونس
طبس راسو وقعد في كرسيه يلعب بالستيلو فو ق الطاولة ويسمع في صاحبو وهو موش معاه جملة
-تو مازال حسابك مع ناجية كيف باش تروحلها هكاكة ؟ قد ما داوينا مازال وجهها مدمدم!!
-افف امان توفيق ماتزيدش تكمل على مابيا انت زادة !!وزيد ثبتلي من الطبيب بخصوص السفر ..انا مستحيل نخليها تمشي كان فما حتى واحد بالماية خطر عليها !!
غزرلو توفيق بغزول – والله مافما خطر عليها كان انت!! خلي تمشي تنفس المرا فوتها ..تحب تروح تبعد من منظرك !!
ضرب عالطاولة بيديه بعصب وبدا يصيح – كلكم درتو عليا تو ؟كلكم وليتو تكرهوني ؟ ..توفيق راني عشير عمرك !! ولا لخرى مرتك ولات تدور وجهها عليا كيف تراني ..خلي عادة من ولدي وليت بالنسبة ليه الوحش اللي يقرا عليه في القصص !! علاش ماتحبوش تفهمو علاش ؟
شنوة تحب نفهمو شنوة ؟اه ؟ شنوة ؟ ضربتها خاتر غاير عليها ؟ ضربتها على خاتر لاخر جرحلك كرامتك كيف قالك نعرفها قبلك موش هكا ؟ رجعت وقتها الراجل الشرقي الي يحب يملك الانثى ليه هو وحدو ..مايلزمهاش تعرف لا قبلو لا بعدو ..ما يلزمهاش تعيش كان كيف تعرفو هو كهو ...تفكير ذكوري بحت ...اناني ..
- اي اناني ..اناني ...انا اناني ..نحبها ليا انا وحدي ..توفيق انا اللي علمتها كل شي ..تعرف شنية معنتها علمتها كل شي؟وحتى كان كبرتها في فمي ...حتى البوس علمتها انا كيفاش تبوس ...
طبس راسو ووطى من صوتو ...توفيق حس بوجيعة في كلامو
-توفيق الاحساس اللي حسيتو معاها بعمرو ..بعمرو لا حسيتو في حياتي ...كانت بين يديا كيف الطفلة الصغيرة اللي تاخذ في دروس ..حبيتها ...حبيتها وعاللخر زادة ..!! حتى كريستين ...كيف عرفت خديجة نسيتها جملة ..كايني ماكانتش موجودة في حياتي ..عشرة خمستاش سنا نسيبتها معاها ..ام ولدي نسيتها تي هو ولدي ..ولدي اللي خذيتها بالاساس باش تربيه وليت نغير منو ..تتصور ..نغير من ولدي ..كيف تعنقو ولا تتلهى بيه نغير ..نغير!! ..فماش اكثر من هكة حب ؟ فسرلي توفيق فسرلي اش تسميه هذا ؟ غطى راسو بيديه وقعد ساكت ...ماعادش عندو ما يفسر ..الي فما الكل قالو ..قعدو شوية ساكتين وبعد تكلم توفيق بالشوية
- هاني باش نحكيلك اللي صار وخليفتي على ربي !
هز راسو وغزرلو
- شنوة باش تحكيلي ..؟فما حاجة مانعرفهاش انا؟
- مع انو حياة حلفتني باش مانحكيش اما ...اما والله سخفتني ..حالتك تسخف بلحق
- تكلم ماتزيدش توترني .!! حلفتك حياة ؟ ولان عاملة حزب معارض حياة ؟
- هههه ...
- باهي احكي !!
-

-في بالك بمرتك قارية هندسة كيفنا؟ 
قعد يغزرلو باهت -شكون اللي قارية هندسة؟
-مرتك ..مرتك قارية هندسة كيفنا !! 
- اش تحكي انت؟ انا هندسة ؟ وقعد يتذكر نهارت اللي هزها للمكتبة والكتب اللي شراتهم ..وقتها قعد باهت فيها اما ما عطاش الامر اهمية ...وقتها موش مركز على الحكايات هذوكة ...كان تفكيرو هو وقتاش يروح باش يرقد معاها ...يا ولا احوال ...قداش طلع بهيم الزح ..عاود غزر لصاحبو وقالو 
-كمل توفيق كمل ...هاني طلعت مانعرف شي انا 
- والله هاذي موش غلطتها ..انت ماحاولتش تعرفها !!!
-نعرف نعرف ..كمل اش كنت باش تقول 
- تعرفت على هاك الساقط في الكلية ..اول مادخلت تقرى ...جاية ما فاهمة شي وزيد موش في بلادها ...هو حسسها بالامان ويعامل فيها بالباهي 
حس الدم طلعلو وهو يسمع فيه ..
- من غير تفاصيل ..احكي 
- لا ماتخافش ..ماهو نعرف تفكيرك انا ...مامسهاش بلكل !! ماهو هذا اللي تحب توصلو؟ ومن اصلو ماحبتوش ..هذا اللي حكاتو الحياة ...كانت تسخايل روحهاتحبو اما طلعت غالطة 
قعد يضرب على الطاولة بالستيلو وهو متوتر 
-حاصل من غير ما نطول ...بعد اربعة سنين مع بعضهم صوحاب ...بدات اللسانات والكلامات ..وفما جماعة من بلادها جاو يقراو بحذاها ..مشاو عاودو لبوها ...جاها كشاكشو خارجة وهي في عامها لاخر ...ضربها ..وبطلها من القراية .. وكانت هي حلمها انها تكمل القراية ..هذاكة كان املها باش تخرج من الهم اللي عايشتو في دارهم ...هربت للكلب معز ..طلبت منو يكتب عليها الصداق باش بوها ماعادش يولي عندو حتى سلطة عليها ...وتكمل قرايتها ...قالها على شرط نرقد معاك ...
- توفيق تو نرمال انت؟ تحكي على مرتي راهو ؟؟؟ ومن العصب والغزول تكسر الستيلو ما بين ايديه ..الساقط الكلب ..الحيوان .. 

- اي نعرف انا قاعد نفسرلك راهو 
- باهي كمل 
- قاتلو نكتبو الصداق وبعد مانتخرجو نعرسو ..قلها مانصبرش عليك حتى نتخرجو ..حسها كايني غنيمة وجاتو ليديه ...فرصة واستغلها ...وعلى خاطر شرفها ..رجعت لدارهم وبطلت قرايتها وكلات السطاكة لين فدت ..
ماينجمش يفسر اللي حسو تو؟ الظلم اللي عاناتو ما يوتوصفش ...كانت صغيرة وحدها تواجه في الدنيا ...كانت مكبشة في شوية امل باش تنجم تعيش...وصابرة ...قد ماسطكتلها الدنيا وهي صابرة ...تو حس قداش ضلمها !!حط راسو على الطاولة ...حس بالفشلة ...بالتعب ..حس بانكسار كبير ...بجرح كبير عملو هو بيناتهم ...كان وقف دقيقة ...دقيقة وحدة سمعها فيها ...راهو ماصارش هذا الكل ...
وسافرت خديجة ...رجعت لتونس ...من غير ما تشوفو ..لا جاء شافها ولا سلم على ولدو ..كان مخبي روحو وما يحبش يواجههم ...وهي حبت تراه ...تعرف اللي هو باش يخلط لعرس اختو ...اما حبت تشوفو ...تشوف عينيه كيف يغزرولها ...عينيه هوما اللي يقولولها شنوة يحس وقتها ...حطت ايدها على كرشها وتبسمت .. ولدهم ..ولدهم اللي بناوه ببرشة حب ..مكبش في الدنيا ...تعرف الي صار بيناتهم شرخ كبير ...اما مع الوقت ...يمكن مع الوقت تتداوى الجروح ..
جمعة تعدات عليه بعد ما سافرو ..كل يوم يروح للدار ساق القدام وعشرة لتالي ...الدار مافيهاش مرتو مايحبش يدخللها ...كرهها ...دارو كرهها .. كان ملهي روحو بالخدمة ..مايروح كان ميت بالتعب ...يمشي طول يرمي روحو في الفرش ويرقد ...ناجية كلمتو وسمعتو مايكره
-يا ساقط يا واطي ...هكا ربيتك انا؟ تضرب مرتك ..تضرب مرتك ياهامل ؟ وبرشة كلام قعد يسمع فيه وساكت ..ماعندوش ما يقول عندها الحق ...ماهوش راجل هو ...ماهوش راجل ..كيف حط يدو عليها ..ظلمها ..كسرها ...ذلها ...ااحمدااله كيف قعد ولدو حي ... حاجة باش تربطهم مع بعضهم طول حياتهم ...قعد عالcanapeواتكي بحوايجو ...حل التلفزة وبدا يدور من قناة القناة ...قعد شوية ...وبعد قام ...مشا للشان قعد يغزر للcdههه مكثر متاعهم لام كلثوم ...ماكانش يسمعها قبل من وقت اللي جات خديجة وهو يسمعها ..الحاجة اللي تتغرم بيها مرتو يتغرم بيها هو زادة ...حط cdومشا اتكى مرة اخرى ...وقعد يسمع ...اول مرة يركز على كلمات الغناية اللي تقول
حيرت قلبي معاك وانا بداري واخبي قلي اعمل ايه وياك ولا اعمل ايه ويا قلبى ...بدي اشكيلك من نار حبي ...بدي احيلك علي في قلبي...واقولك عاللي سهرني واقولك عاللي بكاني ...وصورلك ضنا روحي ...وعزت نفسي منعاني ...عزت نفسي منعاني حس كايني لغناية تعبر على احساسو هو وقتها
بدات دموعو هابطة ...حط راسو بين يديه وقعد يبكي ...هز التليفون وتكلم ..قعد ينوقز ..ينوقز وبعد هزت قعد ساكت وهي ساكتة ..تسمع في بكاه وساكتة
- ناجية؟ (قعدت تسمع فيه ) ...ناجية توحشتها ...توحشت مرتي ...ناجية رجعهالي ...رجعلي مرتي .تعبت ..تعبت ...ولدك تعب يا ناجية ..تعب ..سامحني ..ناجية جاوبني ؟
- ما تبكيش !! جبت راجل انا ..ماتبكيش ...تحب ترجع لمرتك ؟ قص تسكرة وايجا بحذاها ...ايجا لعرس اختك واقف معاها ..مرتك وولدك يستناو فيك ...غلطت ..؟ الرجال كلها تغلط اما مرتك بنت اصل وشريفة ..انا امك موش صغيرة واللي تعدى على حياتي موش شوية ..وقتلي خطرتهالك ..خطرتلك الممو ..خترلك اللي تصونك وتصونلك عرضك في غيابك وفي حضورك ..ايجا كب على راسها واطلب السماح منها ..وتو تسامحك ...مرتك ماتخليكش ..
قعد يسمع فيها ويبكي ...كان محتاج لكلامها ...كلامها يعطيه القوة ...يعطيه الطاقة ..كلامها يرتحو ..يعرفو باغلاطو ..كلام امو يفيقو على روحو ... .

الحلقة السادسة والعشرون

قامت خديجة دايخة كيما العادة .. وخواطرها دايرة .. مشات طول لتوالات ردت .... حاسة بالبيبي قاعد يكبر كل يوم في كرشها .. مسحت على كرشها وقعدت في حافة الفرش ..تتفكرفي بوه ...تبسمت وحدها وهي تتفكر في لهفتو عليها.. عشقو وغرامو اللي يخرجوها من سينتها ..تتذكر لمست ايديه لحنينة وهي تتعدى على بدنها الكل...حست برعشة قوية في بدنها الكل وتزوغيبة ...قداش محتاجتو في الوقت هذا ؟ قداش محتاجة لحنيتو ولغزرة عينيه كيف يذبلهالها ...تدوخ ..هبطت دمعة من عينها مسحتها بصوابعها ... هزت يديها وعنقت روحها بقوة ..حست بالبرد ..مع انو الطقس ربيعي ودافي حست بالبرد .. ماتحبش تتفكر اللي صار ماتحبش ... تحب تمحيه من مخها .. تحب تفقد الذاكرة متاع اللحظة هذيكة ..تحب محمود يرجعلها .. يرجعلها محمود متاعها .. محمود لحنين اللي يخبيها في حضنو وينسيها في كل شي ... قامت تشوف في وجهها في المراية ..تو جمعتين تعداو على الحكاية وجهها ماعادش فيه حتى اثر متاع ضرب .. بدات جروحها تبرى .الا جرح قلبها مازال .. اللي في يديه الدواء ماجاش .. هرب حتى هو من المواجهة ....لا يحب يقابلها ولا يكلمها .. حتى كيف يسال عليها ولا على ولدو يكلم اختو سناء ..خاتر امو ماعادش تحب تهز عليه وهو خايف منها زادة .اول ماوصلت لتونس وجاو تعرضولها في المطار تفجعو كيف شافوها هكاكة ...امو قريب تندب وجهها وقعدت تسال فيها اش صار ماحبتش تجاوبها ... يوسف هو اللي حكالهم ... أي ههه يوسف فضح بوه .. قود بيه لامو ..وبعد حكاتلهم هي اللي صار الكل .. الحق امو وقفت معاها وكلمتو سخسختو وهو حاستو سكت ما جاوبهاش .... تعرف اللي هو ندم ..لكن شنوة الفايدة ؟ كانت باش تموت بين يديه هي وولدها ...كان موش يوسف وقتها راهي الله اعلم اش صارلها ؟
تسمع في دقان الباب وبعد دخلت سناء
-صباح الخير خدوج
- صباح الخيرياعروسة
- اش من عروسة بربي ؟ والله حسيتو مساط العرس ؟
قامت ومشات عنقتها
- علاش اللطف ؟ ماعادش تقول هالكلام موش باهي راهو ؟
- بربي كل واحد مطيش في شيرة والجو مكهرب .. حتى خويا الكبير اللي معملة عليه هاو هارب بعملتو !!
- تو يجي خوك ماعندو وين يمشي ..احنا بطبيعتنا حتى قبل ما تصير المشكلة متفاهمين باش نجي انا بعد هو يخلط .. تهنى ...
- انشالله والله انشالله .. هيا امي قاتلك ايجا افطر قبل مايبداو الحركة
هبطو مع بعضهم يلقاو امو وولدو قاعدين في الفيراندا .. من وقت اللي جات بحذاهم وهوما هازينها على كفوف الراحة ..حتى يوسف لاهيين بيه هوما .. جابو مرا بالذمة باش تتلها بالدار .. كل يوم دلال وشهاوي ولهاوي .. واموحاستها فرحانة بالحبالة اكثر حتى منها هي ..
- هاو الطحان باش يجي اليوم من السفر ..قالتلهم ناجية وهوما يفطرو .... (حست طول بفوارة قوية وبدنها سخن ورعش فرد وقت وقلبها ولا يدق ..يدق ..يديها ولات ترعش هبطتهم تحت الطاولة باش مايفيقوش بيها ..حست بريقها نشف ..شربت كاس ماء وراسها مطبس )
- يا بلحق ؟ فرحت سناء إياه تو فرحتي باش تكمل !!
- قال يوصل هوني مع الخمسة متاع العشية
- وقتاش كلمك هو ؟
- غزرتلها تقحرلها
- اش يهمك انت وقتاش كلمني ولا كيفاش ؟ واسمعوا هاني نقلكم ماتوريوهش اللي انتوما فرحانين بيه ؟
- يا؟ امي علاش تي ساعة والله متوحشتو وغزرت لخديجة وهي يعلم بيها ربي اش حاسة وقتها ؟ خوف مع الفرحة مع وجيعة ..كل شي تخلط مع بعضو ..
- أي ماهو نعرفك انت رهدانة ..باهي مانيش نحكي معاك انت انا ..نحكي مع اللي مدنقسة راسها من قبيلة !!
- معايا انا امي ناجية ؟ وهزت راسها غزرتلها وجها احمر باش يطرشق من الحشمة
- أي معاك انت !!.. اسمعي هو ماهو نادم عاللي عملو .. كلمني قالي يحب يرجعلك

عينيها زغللت بالفرحة وقلبها تحسو تنطر من بقعتو
- ماتفرحيش برشة ..قالتلها امو بعصب .. غزرتلها باهتة ..هاني انبه عليك باش يجي يزلبحك بكلمتين ويطلب السماح تمشيش ترجعيلو تجري كاينو لا صار ولا كان ؟
- وه ؟ ام..امي ناجية ؟ ياخي شوية اللي عملو هو ؟
- أي لا عليا انا الكلام هذا ؟ تي انت يبدى يكلم في سناء وانت نحسك باش تتنطري من بقعتك وتدخلي في وسطو التليفون ماني نعرفكم بنات تو ..باللي يعمل فيكم الراجل ..يجي يذبللكم عويناتو ترجعو كاينولا صار ولا كان ..!!
غزرتلها سناء واطرشقت بالضحك
- والله كلامها صحيح هههه!!؟ يامي خلي الطفلة ترجع لراجلها اش مكولفك انت
- لا دخلني !! وعاودت تلفتتلها .. بعد اللي عملو فيك يجي يدحنس عليك وتبيتيه عروس ؟ ماتت بالحشمة وطبست راسها..وقعدت تسمع فيها -ماترخصيش روحك .. هاني قتلك ... احقريه جملة باللي يكلمك ويقربلك ... مفهوم ؟
عملتلها براسها أي وهي ماتحبش من داخل .. افف تحبو يطلب السماح وترجعلو ..توحشتو توحشتو .. ياربي توحشتو ..اما كلام امو صحيح يلزمها تشد روحها .. أي يلزمها تشد صحيح ..
تلفتت لامو سالتها
- باهي ..باهي كيف يشد صحيح اش نعمل ؟
- ابعدي عليه ...اهربي من قدامو .. خليه هذاك داه عندي ..ماترجعيلو كان كيف نقلك انا ..سمعتيني ولا لا ؟
- باهي امي ناجية ..باهي .. ومشات بحذاها حطت راسها في صدرها وعنقتها ..ربي يخليك ليا انت امي والله ..كان جات وحدة أخرى راهي وقفت مع ولدها وجات معاه هو غالط ولا موش غالط ..
- انا مانحبكش رخيصة ...نحبك تكوني مرا فحلة .. يقدرك ويحترمك ويعملك الف حساب ..مايستسهلكش .. ويولي في كل مشكلة يحط ايدو عليك بسهولة وانت تسامحي .. لا ..ردي بالك ؟ هذا لمصلحتك ولمصلحتو عيش بنتي ..
تنهدت وزادت عنقتها وسناء قعدت تضحك وتدكك عليها
-أي أي تبع كلام ناجية تو تربح ؟ ههه.. تو يمشي يصوحب عليك وناجية مازالت ماقالتلكش ارجعلو هههه
وجهها صفار وهزت راسها تغزر لناجية تضحك
- بلحق امي ناجية ؟
- يابهلولة تصدقي فيها ؟ هو كان ماجاش يموت عليك ويغير عليك يصير هذا الكل ؟ تدكك هذيكة .. انا نقلك ولدي روحو وعقلو فيك اما يلزمو قرصة .. يلزمو ينحي التصعصيع متاعو ....مازال الوقت طويل قدامكم ..اذا كان في اول مشكلة ضربك هكة مالا كيفاش مبعد ؟ تهني موش باش نخليك برشة .. المهم اسمعي كلامي فهمتي عيش بنتى ؟
- اممم .باهي باهي ..
الخمسة ونص دخل محمود لدارهم يلقى الصالة فارغة .. دخل فاليجتو وبدا يعيط
-يا يا .. وينك؟
-خرجتلو مرامن الكوجينة قعدت تغزرلو باهتة .. مرا في الاربعينات هكاكة
- الا ناجية الفوق ترتاح راهي .. انت سي محمود؟
- أي انا .. ومرتي ولدي وينهم ؟
-خرجو مع العروسة يقضيو في قضيات من قبيلة ..تو عدك بيهم جاو ..
تنرفز وبدا يطلعلو لعصب
-يقضيو في قضيات ؟ علاه مافيبالهمش بيا جاي ياخي هوما ؟
والله مانعرف سي محمود ؟
-شكونك انت ساعة ؟
- انا جابتني الا ناجية باش نعاونها في الدار..تحب حاجة نعملهالك .. كانت تكلم فيه مربوثة ... قد ماتصورتو ماستخايلتوش مزيان لها الدرجة .. سبحان ربي اش خلق ؟
-لا شي .. طلعلي الفاليجة لبيتي هاني طالع لامي نسلم عليها
طلع الدرجات يجري كيف وصل قدام بيت امو وقف متردد وخايف ... ههه في 37 سنة و مازال خايف من امو ..دق الباب ودخل بالشوية .. يلقاها متكية في الفرش وتسبح ... هزت راسها وغزرتلو .. لا ضحكتلو ولا فرحت بيه كيما العادة قربلها .. جاء لفرشها وقعد مدلها يديه
- ناجية ؟ توحشتك ياناجية ؟ ماكش باش تسلمي على ولدك ؟
هزت يدها واعطاتو كف ... طبس راسو وقعد ساكت ..
- باهي بردتي قلبك تو ؟ قالها بالشوية وقرب لحضنها عنقها وباسلها راسها سامحني ياناجية سامحني نعرف روحي غالط
- غالط ؟ غالط ياطحان ؟ باش تقتل مرتك وولدك في كرشها وركبت بو صفير للطفل وتقلي غالط ؟ اه ؟ تكلم عاد حل فمك ؟
- ماعندي مانقول والله غالط ... خرجت من سينتي ياناجية الله غالب ... الكلب ضربلي على الوتر الحساس ..والغيرة عماتلي عينيا ..
هزت صبعها تهدد فيه
- اسمع هاني ننبه عليك ...والله مازلت تحط ايدك عليها لا عاد نخليك تشوفها حياتك الكل فاهم ولا لا ؟
- باهي كيفاش باش نمسها انا كيف مانحطش ايدي عليها .؟ . قالها يتبسم ويتمقعر
دورت راسها
-والله لاتحشمها ؟ مصح رقعتك .. هاني نبهت عليك ... مرتك بنت اصل ماكانش والله على هاك الدمديمة اللي الدمدمتها راهي شكات بيك غادي راهم دكوك في الحبس باش تشعف !!
- نعرف ..نعرف ياناجية والله نعرف ... بنت اصل وشريفة ونظيفة ...انا هو الساقط .. تي انا خسرت الناس الكل على ها العملة المشومة اللي عملتها .. الناس الكل كرهوني ..تي ابداها من ولدي ..لصحابي ..ليك انت ..الناس لكل دارت عليا !!
سمع حس ولدو يضحك وصوت سناء تعيط
- يا ظاهرلي محمود وصل ؟
غزرلامو وباسلها يدها
- امي باش نهبط نسلم على مرتي..قلي ربي معاك وارضى عليا يامي ؟
- برا ولدي ربي يسهللك... و يهديك
خرج يجري ساقيه اعلى من راسو .. هابط من الدروج وقلبو ولا يدق .. خايف .. خايف لا تولي تكرهو وماتسامحوش ... عرضتو سناء هي الأولى جات تجري تعنق فيه ..ترمات في حضنو تبوس فيه
- يا ..حمودة توحشتك توحشتك ... عنقها وعينيه تفركس على مرتو وولدو ... راهم واقفين وسط الصالة ..يغزرولو الاثنين .. ولدو شادلها يدها ومتخبي وراها وهي ...هي محلاها .... محلاها .. لابسة سروال دجين وبودي ازرق زاد حلاها شعرها محلول وطويل كيما يحبو ... حس بدنو الكل يرعش ومتشوقلها .. قداش توحشها ..توحشها ..باس سناء وهبط الدروج بالشوية وعينيه مغروسة في عينيها ...

الحلقة السابعة والعشرون

قعدت تغزرلو يقدم وقلبها الكل يرجف .....بدنها...بدنها بدا يخون فيها ويحن ليه ... بدنها ماذابيه يتنطر ويمشيلو .. توحشت صدرو ...توحشت غزرت عينيه ..لمست الحنية متاع يديه ...عينيها معلقة في عينيه قربلها .... قلبها من قوة الدقان حاستو خرج سايي ...
- شنية حوالك خديجة ؟ سالها بصوت رقيق وحنين نبرت صوتو فيها ندم وحسرة ...
- لا ...لاباس وتنهدت ... طبست راسها بلعت ريقها وتمهمشت مالقات ماتقول ... جبدت يوسف من يديه وحطتو قدامو ..يوسف ماتوحشتش بابا؟ موش باش تسلم عليه ؟ ...قعد يغزرلو بشوية خوف وشوية وحش ..صغير وينسى .. وعاود غزر لخديجة ... تبسمتلو وقاتلو براسها أي ...مشا لبوه وعنقو ... طبس محمود وقعد في القاعة وحطو في حضنو وقعد يبوس فيه ويعاود
- يارجال !!! بو زينك يا رجال .. توحشت بابا انت؟
- امممم توحثتو !!
- حتى انا توحشتك توحشتك ..
في الوقت هذاك هربت هي تجري .. دخلت لبيتها وخلاتهم مع بعضهم .. ماعادش تنجم تغزرلو ماعادش ... كل شي فيه يجبدها .. كل شي يخليها تنسى اللي عملو... اتكات عالفرش وبدنها لكلو موجوع من الاشتياق .. حطت راسها ..شوية وعاودت قامت .. بدات تمشي وتجي .. حست روحها هبلت ...اش باش تعمل تو ؟ اش باش تعمل ؟ تلفتت تلقى فاليجة محمود محطوطة على جنب .. حلت لخزانة تلقى حوايجو مصففيين ...صارهو ناوي باش يرقد هوني ؟ .. كاينو لا صار ولا كان ؟ ..من الغزول هزت يديها وبدات تفرغ في حوايجها وتخرج فيهم البرة ... دق الباب ودخل ... قعد يغزرلها وقربلها سالها
-فاش تعمل ؟
- نلم ..نلم في حوايجي باش نهزهم لبيت يوسف .. !!!

- علاش باش تهزهم لبيت يوسف ؟ قربلها لين حست النفس متاعو في وذنيها .. غمضت عينيها ...على شعرة وباش يمسها .. بعدت عليه شوية
- باش نرقد غادي .. ونخليك انت على راحتك
زاد قربلها وقف وراها ...ياربي !!ياربي معادش تنجم !! حط يديه على كتافها وبدا يعدي فيهم بالشوية عليهم .. تنهد وحط دقنونتو على كتفها ... وحط يديه على يديها من قدام . اععععععععععععععع
- شكون قالك انا باش نلقا راحتي وانتي موش معايا ؟ قالها بصوت ضعيف وواطي ... وتنهد ..انفاسو دغدغلها في وذنيها ... بدنها سخن سخن لين معادش ... دورها ليه بالشوية ووقف مقابلها وباقي شاددها ... هزلها راسها وهي تحس في ريقها نشف ووجهها ماعادش حاسة بيه من قوة السخانة والفوارة اللي طلعتلها .. قاعد يذبللها في عينيه .... يذبللها في عينيه !!! تذبيلة كلها حنية وشوق ...ياسر عليها ياسر ... هبطت عينيها جاو فوق صدرو ..كان لابس مريول اخضر والفلس متاعو محلولة ... قعدت عينيها معلقة غادي تغزر للشعر متاعو ... وهو..هو تبسم بالشوية كاينو فاهم الصراع والحرب اللي عاملتها مع روحها ..فرح ...فرح خاتر حس اللي هي متشوقتلو كيما هو متشوقلها ... فرح خاتر عينين مرتو نظرة الحب ماتنزعتش منهم .. باللي صار هي مازالت تحبو .. مايحبهاش ترجعلو خاترها بنت اصل وتأدي في واجبها معاه ..يحبها ترجعلو خاتر تحبو ..تعشقو .. تعشقو كيما هو يعشقها ..تنفس بالقوي وطبس عليها .. ريحتو ..ريحتو ... اههههه ... غم عليها قلبها ... بعدت روحها ومشات تجري للتوالات .. خلط عليها يجري .
. مفجوع ..يلقاها ترد ...
- اشبيك خديجة لاباس ؟
غسلت فمها وهي باقي مطبسة على اللفابو
-لاباس لاباس ... ريحة البارفان متاعك .. اه
-شبيها ريحة البارفان ؟ هذيكة متاع العادة اللي ديما نعملها ؟ وقربلها وقف بحذاها
-شبيها ؟ ماعادش تعجبك ؟ ماك كنت تموت عليها؟
مسحت فمها وخرجت وهي خواطرها تحس فيهم دايرين
- من..من الوحم ...برشة حاجات ولات تقلقني ...
- اه اه وي فهمت .... ظاهر فيه ولدي باش يتعبك ؟...قالهالها بالشوية وبصوت فيه برشة اغراء ...وزاد كمل على مابيها كيف قالها
- خاليني نمشي ندوش ونرجعلك ... ننحي ريحة البارفان ... ...حتى جال دوش مانعملوش كان تحب ...نخلي كان ريحة بدني اه اش قولك ؟ مع الاحاسيس الي حستها لكل حست زادا بالنفس ضياق عليها ...باش تتخنق ... قريب باش تبدى تعيط من الرغبة من غير مامسها .. لازمها تهرب لازمها ... بدات تتحرك ماشية للباب وجاوبتو
- و...وانا اش عندي فيك ؟ أ..أمورك ..تحب تغسل كيفما تحب وباللي تحب ؟
مشا يجري وقف قدام الباب وسكر عليها تفجعت
- محمود .؟ محمود فاش تعمل ؟
سكرو وغزرلها ..كانت عينيه تلمع وشاعلة كيما بدنو
-شنوة تو ؟ باش نقعدو نلعبو لعبة الفار والقطوس انا وياك ؟
-اش تقصد ؟ وبلعت ريقها الناشف
- نقصد اللي انا توحشتك ..توحشتك توحشتك .. يعلم بيا ربي كيفاش عديتهم الجمعتين هاذم بلا بيك ... يمكن جهنم ارحم منهم .. خديجة ماحبيتش نوريك وجهي ولا نكلمك ... نعرف العملة اللي عملتها خاية برشة ... نعرف اللي انا في لحظة شكيت فيك .. مع انو ماكارنيش نشك خاتر .. خاتر اناعارف ومتاكد اللي كل شي تعلمتوانت في العلاقة بين الراجل والمرا كان من عندي انا .. من عند راجلك ( وتنهد)...نعرف اللي انا وجعتك .. خنت ثيقتك فيا كيف وعدتك باش نحميك ..باش نحطك في عينيا .. وقتها عينيا تعماو ..تعماو على كل شي ..
شدتها غصة البكاء وبدات تشهق
- انت ماخلي..ت..ني..ش حتى ح..ت..ى نفس..رلك ... ع..م.ري ..م..ا تصو..رتك...با..ش ..تص..د.ق..ع.عل..يا.­.اي كلمة ؟
وغطات وجهها بيديها ودموعها تجري
قربلها شدلها يديها هبطهم وحطلها راسها في صدرو
- ماتبكيش خديجة ..(كان صوتو موجوع ) ماتبكيش ... ماعادش نحب نشوف الدموع في عينيك ...
- كنت نسخايل روحي نسيت الدموع .. كنت نسخايل روحي نسيت الوجيعة ... نسيت الظلم ...في لحظة رجعتهوملي الكل ... والمرة هذي حسيتهم اقوى من أي مرة في حياتي ... كانو منك انت ... (وهزت راسها تغزرلو وتبكي .. عينيه بالدموع وفيهم زادة برشة وجيعة ) منك انت ؟ انت اللي كنت قطعة من روحي ..قطعة من قلبي ... انت اللي عطيتك كل شي ... قص عليها
- ماعادش تقول كنت ماعادش تقولها ؟ ..مازلت وباش نقعد قطعة من قلبك ومن روحك .. كيما انت قطعة من روحي .
. انت روحي ..انت روحي ياخديجة .. وزاد كبس عليها عنقها !!
- كان جيت روحك راك... راك ماعملتش فيا هكاكة .. راك ما قتلتنيش بالحياة ؟
- اللطف عليك ..سامحني سامحني سامحني ....سامحني ...وهز يدو اللي كانت ترعش ... يدي هذي نقصها كان مازالت تضربك ... يدي هذي مانحطها كان باش تعنقك (وعنقها)... باش تمسحلك على شعرك (وبدا يمسحلها على شعرها ويبوس فيه) باش تهزك ...( وبدا صوتو يضعاف وولا يتكلم كاينو يوشوش) وهزها يد في كتفها وايد في ساقيها ... حطها فوق الفرش بالسياسة ... حطلها راسها عالمخدة وهي مازالت غارسة راسها في كتفو ...ودموعها هابطة ...بعدلها راسها بالشوية وحس مريولو تنفخ بدموعها ... قعد على ركايبو فوق الفرش قدامها وهي تغزرلو وعينيها مزغللة .. تبسملها ونحى مريولو ...حس عينيها وساعت ...وبدات تتحرك باش تقوم ...شدها رجعها ..وحط شفايفو على دموعها ...خرج لسانو وبدا يلحسلها فيهم ..لسانو دافي وسخون على وجهها كل ما يعديه على بلاصة تحس بدنها الكل تكهرب ... بدات لكلها ترعش وتإن وهو باقي مكمل على مابيها ..ماخلى حتى بلاصة ماعداش عليها لسانو..وذنيها ..رقبتها ..وجهها ...فمها .... ماعادش تنجم تتحرك ..جمدت ... وينك ياامي ناجية وينك ؟ ايجا منعني ... ماعادش نجم ..وكاينو ربي استجاب لدعاها ..سمعو الباب يدق
- مدام خديجة قاتلك اللا ناجية ايجاو باش تتعشاو
ماصدقت لربي بدات تتحرك باش تقوم وهو عاود رجعها .. حصرها بين يديه وبدا يوشوشلها
-نكملو عشانا هوني بعد نهبطو نتعشاو ...
بدات تدز فيه بيديها شي ..ماتحلحزش .. مالقات معاه حتى حل .. قاتلو بدلال وغش
-محمود ؟ .. مازلت موجوعة منك !! مازالت مابراتش جروحي ...
طلع فوقها وقعد يبوس فيها بكل رقة وحنية
- تاو نداويهملك ...(وهزلها يدها باسلها كفها بالشوية وعدى شفايفو على صوابعها وعاود هبط لرقبتها )وهز راسو
- كل جرح نداويهولك وحدو ..وكل وجيعة نبردهالك .. نوعدك ما يوفى الليل الا ما تكون بريت ...
غمضت عينيها وسلمت ... تنهدت ..مافماش فايدة ..ماتنجمش تقاومو اكثر من هكة ..
-هامدام خديجة ؟..هاسي محمود ؟..( رجعت تعيط وتدق فايزة البون ) اللا ناجية قالتلكم ايجو تو ... الناس راهم جو .. ورجعت تدق بالقوي ...لين فد هز راسو
- اففف شبي سماها هاذي ؟ ياخي مهبولة ؟ وبدا يعيط ..قلها هانا جايين ..فوتنا
- قاتلي ماترجعي كان ما يجو معاك ..
-نعم ؟ وقامت هي تضحك .. غزرلها بغزول وهبط من الفرش ومشا حل البا ب شوية .. قعدت المرا واقفة مبهمة تغزرلو ..صدرو عريان وسروالو فلستو محلولة ... حشمت
- شنوة ؟ قالها بغش باش تشدنا واحد منا وواحد منا وتهبطنا ولا كيفاش ؟ برا قول لناجية ماعينهمش في العشا
تربثت المرا وقاتلو
- لا خاتر سي محمود قاتلك الجماعة جو
- جماعة شكون اللي جو ؟
- والله مانعرف ؟..قاتلي قلو يجي يقابلهم ..جماعة العرس ..وين نعرف انا ؟
نطر يدو وعقد حواجبو والمرا تغزرلو باهتة في زينو
- باهي برا اقلب منظرك ..تو نخلط عليك
- سامحني ها سي محمود مشني انا والله اللا ناجية
- باهي باهي
وسكر الباب بقوة ورجعلها ... قعدت فوق الفرش شادها الضحك على منظرو وحالة وجهو
-حرام عليك ههه اش مدخلها المغبونة ؟
رجع قعد فوق الفرش
- دين أمها كبشت كي القرنيطة ( الشي اللي مافيبالوش بيه اللي امو تبعث فيها بلعاني خاتر تعرفو باش يقنعها ووصايتها الكل باش تمشي خسارة )وعاود رجعلها .. اش كنا نحكيو ؟
دزتو شوية بعدتو ووجها احمر من الغصرة
- يزي عاد ههههه كان باش نزيدو شوية باش يجينا البريقاد المرة هاذي !!
عدى يدو على شعرو وحك لحيتو بتوتر ...
- اففف طيرتهالي والله !! وباسها من خدها بوسة دافية وحنينة .. ماعندك وين هاربة مني ..قالها بصوت فيه برشة اغراء ...الليل مازال طويل ..طويل برشة ...تو ندوش وننحيلك ريحة البارفان اللي مقلقتك ...وتو نرضيك ...نرضيك ... حتى لين تقول يزي ..
وقام من الفرش غمزها وتبسم ومشا للدوش ... قعدت عينيها التبع فيه لين دخل للدوش كيف المسحورة .. حست بروحها وقلبها دخلو معاه ..يتبعو فيه ..يرفرفو وراه ... اهههه يلعن بو قلبها المراق قداش تسامح وتنسى بسهولة !!!!


الحلقة الثامنة والعشرون
شدها من يدها وشبكهم في بعضهم وتبسملها ...تبسيمة ذوبتها...هي تعشقو ...تموت عليه وزاد الوحم جاء عليه هو...هههه حتى وهي في قمة جروحها كانت تستنى فيه باش يجي يعنقها ويقلها ما صار شي ...بداو يهبطو الدروج بالشوية ..كانت بيت الفطور مليانة بالضيوف .. ولادعمهم وولادهم ..دوبة مادخلو الناس الكل قامت تسلم عليهم وتهني فيهم بالصغير..كان وجهها في وهج ..وعينيها تلمع ...ماكانش ينجم ينزع عينيه من عليها ..موش عارف اما يحس الحبالة زادتها زين على زين .....طول ماهي قاعدة في السهرية كان هو شاد جنبها شادلها يدها ...خايف لا تبدل رايها وتهرب منو ...وهي طول ماهي قاعدة كانت مطبسة راسها وما تحبش تغزر لحماتها ...كانت حاشمة منها خاتر ماسمعتش كلامها واول ماذبللها عينيه سامحتو...ماكانتش تنجم تقلها اللي قلبها وبدنها تقواو على ايرادتها ...خذلوها ...خلاوها ضعيفة قدام وجودو هو قدامها .... تحبو تحبو تحبو ...مافماش كلمة تعبر اكثر من هكة ...
جاه تليفون ..هز يدو من ايدها وعقد حواجبو قام مشا يحكي بعيد ....قعدت عينيها اتبع فيه وهو يمشي ويجي يحكي ...تلفتت تلقى ناجية تغزرلها ...عاودت طبست راسها حاشمة ....حاسة بالذنب ...قد ما وصاتها الزح ! يلعن بو ها الحب قداش يرخص ....جاء يوسف بحذاها ..طلع فوق حجرها واتكى بدا يجيه النوم ...عنقتو وبدات تبنن بيه ...والجماعة بداو مروحين ...جاء محمود رجع قعد بحذاها
-اشبيك بطيت في التليفون ؟
-لا امور خدمة نفض فيها ...(حاستو سارح بعيد في مخو )
-خدمة تو في الليل ؟
تبسملها وغزر لولدو
-ماعنديش وقت انا للخدمة ...هاو رقد يوسف هات نهزو هيا نطلعو حتى انا جاني النوم !!
وهزو بين يديه وقعد واقف يستنى فيها باش تطلع قدامو ...قالتلهم تصبح على خير من غير ماتتلفت ...وتحس في عينين حماتها باقي وراها ....
بدلت ليوسف وحطتو في فرشو وهو مربع يديه يستنى فيها ...وهي تتمهطل وتضيع في الوقت ...
-مازلت؟ سالها وجاء وقف بحذاها
- ك...كملت ...
شدها من يدها وقفها وبدا يهز فيها للباب وهي تجبد في روحها ...وقف يغزرلها باهت
- اشبيك ؟ وقربلها ...شدها من كتافها وعاود هاك الغزرة متاعو اللي تسحرها ..اشبيك حبي ؟ماتوحشتنيش؟
بلعت ريقها ووجها احمار وبدات ترعش ...عاود قربلها لين لسقها وهزلها شعرها بالشوية ويحط فيه في شفايفو
-موش تفاهمنا قبيلة ؟ متوحشك انا !(قالها بصوت ضعيف) متوحشك عاللخر ...ماعادش ننجم نشد روحي ونصبر اكثر من هكة صدقني ..!!
انفاسو رجعت تدغدغ في وذنيها ووقف ما حبش يتحلحز يعرف اللي قربو ليها هو نقطة ضعفها ...مايخليهاش تخمم..
- اسمع هيا نمشيو لبيتنا ونحكيو غادي ...خلي يوسف راقد .داكور ؟
قاتلو اي براسها ...شدها من ايدها وهزها لبيتهم ...سكر الباب وتلفتلها ...كانت مربوثة ومتوترة وموش قد بعضها وكان لازم يطمنها ...عنقها حطلها راسها في كتفو
- اشبي حبي الصغرون ؟ اشبيك حبي؟ اهه ؟شنوة مقلقك ؟ ريحتي ؟
عملتلو براسها لا وبدات دموعها هابطة بالشوية حتى لين ولات تبكي ..
غزرلها باهت ..هزها حطها عالفرش وقعد بحذاها ...بدا يمسحلها في دموعها ..
-ياخي اش فما ؟ اش صار للدموع هذي الكل ؟ خديجة ندمت انك سامحتني؟
-لا !!
عاود قربلها وتنهد ..عنقها ...عصرها بين يديه ..قعد يعدي في يديه على ظهرها ويهدي فيها كيف الطفلة الصغيرة
-سامحني خديجة ...سامحني خاتر مافهمتكش وما دللتكش كيما تستحق !!سامحني خاتر ما حاولتش نعرفك قبل العرس ...ما عديتش فترة خطوبة كيما تحلم بيها اي طفلة ...(وهزلها راسها باسلها شفايفها بكل حنية ) سامحني خاتر ما سالتكش على حياتك قبلي انا ..هذي كانت غلطتي خاتر ماعرفتكش!! ما سالتكش!! ماكنتش نعرف اللي انت قريت هندسة ..وماحاولتش باش نعرف ..وتنهد
- انت ...انت خذيتني باش نربيلك ولدك ...مربية اما تكلفتلك صداق ...قعرة ...وبهيمة ..( كانت تتكلم بوجيعة ) غزرلها باهت وهز حواجبو ...حط جبينو على جبينها وعنقها
-سامحني !!قد ما باش نقلك سامحني شوية ...وقتلي قلتو الكلم هذاكة ماكنتش نسخايلك تسمع فيا ....صدقني كنت نكذب على روحي ...نكذب ونحاول نصدق كذبتي ...من اول ما ريتك في داركم ...حتى وانت لابسة حوايج لا علاقة ..وتبسم يذكر فيها ...مانعرفش وقتها شنوة اللي خلاني نوافق عليك ....تبسيمتك وقتلي غزرت لولدي ..تبسيمتك سحرتني ...(عاود عنقها بقوة) ماحبيتش نصدق وقتها ...اما حبك .. حبك سرح فيا بالشوية بالشوية ....خذا راحتو حتى لين ملكني جملة ...مانتصورش روحي نهار ...نهار نعديه من غير ما نغزر لعينيك ...عينيك اللي احلى من لون الليل ..
ورقدها ...وجاء بجنبها ...بدا يعدي في يديه على بدنها ...لمستو كيف الحرير ....خفيفة وتسحر
بدات تذوب بين يديه ...غمضت عينيها وخلاتو يسرح في بدنها ..سلمت روحها للاحساسها ...لقلبها ...حستها احلى ليلة عداتها معاه من بعد ليلة عرسها ...احلى واروع ليلة ..شيخها لين ماعادش ...نساها في جروحها لكل وداواها كيما وعدها ....
في وسط الليل ...كانت يديه معنقتها...حست روحها متقلقة ...قامت تجري مشات ترد ...قام في جرتها ...حستو واقف مبهم عينيه فيها خوف
- لاباس ؟ كان صوتو بالنوم وتاعب ....(حتى هو لا ارتاح ولا خلاها ترتاح ههه)
- لا..لاباس ..كيف العادة ...اشبيك قمت ؟
شدها عنقها بالشوية ...كانت لابسه nuisette noir قصيرة زادت شعلتو ....مع بدنها زاد سمن شوية ..زاد حلا اكثر ...رجعها اللفرش ...حطلها راسها عالمخدة وباسها بوسة خفيفة ...
- ريحتى بالردان .(.قاتلو بالشوية وهي تتبسم بدلال وهزت ساقيها زاد هبل .)...ههه ريض تو ماشبعتش ؟
دورها ليه على جنب جبدلها بدنها ليه بقوة لصقو في بدنو وكان صوتو مليان رغبة
- مانشبعش منك انا !!! وباسها ...مانشبعش من مرتي ...وهز راسو غورلها متحير..اما ؟ اما مافماش مشكلة مع البيبي زعمة كيف نرقد معاك ؟
- لا...مفامش مشكلة !!اما فما مشكلة مع امي ناجية !!
- ناجية؟ سالها باهت اش مدخلها ناجية ؟
حكاتلو عاللي صار بينها وبين امو . .وكيفاش هي ما سمعتش كلامها
- صار هي تخدم في مخها معايا عزوزة الستوت ؟ وشدو كريز متاع ضحك ...ضربتو من كتفو بالشوية
- تضحك؟ اش باش نعمل معاها انا تو؟ والله ماني عارفة كيفاش باش نقابلها غدوة؟
شدها من دقنونتها وقربلها وجها بالشوية ليه ..غزرلها ببررشة حنية وبرشة حب
-انت ماكش تعمل في الغالط ! انت تحب راجلك وماتصبرش عليه كيما هو ما يصبرش عليك .. ما عندكش علاش باش تحس بالذنب ...كانك على ناجية خليها عليا ..انا نعرف داها ...ههه ....شكنا نعملو قبل ماحكينا على ناجية؟ ...وضحك وعاود حطها تحتو ..
في الصباح قام بكري ... كانت روحو راقدة ...مرتاحة ..في فمها تبسيمة محلاها ..وتذكر ليلة البارح ...سرح مخو فيها ...باش تهبلو ها المخلوقة ...باش تخرجو من عقلو ...قد ما يرقد معاها ويقول شبعت ..يحس روحو ما شبعش !! بدل حوايجو بالشوية باش مايفيقهاش ...جبد ورقة كتب عليها وهو يغزرلها ...تبسم وحطها بحذاها ....باسها من جبينها وخرج ...
مشا للكوجينة ....يلقا امو برك قاعدة تشرب في قهوتها ..الستة ونص متاع الصباح مازال مافاق حد ...كان هاك المطروشة اللي وين تراه تحل فمها باهتة
- صباح الخير سي محمود
- صباح الخير ..اعملي قهوة .
- حاضر سي محمود وقعدت تغزرلو ...
مشا وين قاعدة امو شدها من كتافها وباسلها راسها ..
-صباح الخير نجوتة!! هاك قمت بكري ؟
-وانا مستانسة نقوم مخر ؟ انت كيف السبة قمت بكري وسيبتها البهلولة متاعك ؟
غزرلها والطرشق بالضحك ...جابتلو فايزة القهوة حطتها قدامو وهو شعل سيقارو ...مد ساقيه لقدام وقالها
- سيب الطفلة ناجية ...ماتعبيلهاش مخها بافكارك ...وتلفتلها ...البارح راقدة معايا وتقول ترتكب في جريمة ...خايفة منك ...
- صار هي حكاتلك ؟ ودوحت راسها ...لا وفا عليها الراي هذيكة ...ماعادش فيها امل !!
نفخ سيقاروه وشرب من قهوتو وتبسم
- تشك في قدرات ولدك هههه ؟ لشكون طلعت انا ؟ وحك راسو
- العزري اقوى من سيدو ..قاتلو بغزول ....ولا وزيد قودت بيا ؟
- ههه ماقودتش ...قتلك خايفة منك ...قلتلها تو نتصرف معاك ...ههه ناجية مازلت خايفة عليها مني ؟
- لا ...نعرفك ماعادش تعمللها شي ...البكاء اللي بكيتو ليلتها عليها ...خلاني نعرف اللي انت باش تخمم الف مرة قبل ماتحط عليها ايدك ولا تجرحها ...اما حبيت نعملك قرصة صغيرة..
- هههه مانفعش معايا هههه وباسها من جبينها ...ماتخافش يا نجوتة ...نحطها في عينيا وشوية هاك المخلوقة ...انت تعرف ..واكثر وحدة تعرف اللي انا الي ضعيف قدامها موش هي ...وقام
-وين ماشي ؟
هابط لتونس
-وه؟ ياخي تو وقت تونس ؟ اليوم الحمام متاع اختك راهو ؟
غزرلها عينيه مزغللة بالضحك
-اي اش معنتها ؟ باش نلبسلك فوطة بلوزة وندورلك بكانون البخور ؟ وانا اش مدخلني في الحمام ؟ كنشس نمشي ندخل معاهم ههه؟
- دا على لونك ياسر ضامر !!اش ماشي تعمل في تونس ؟
- فما واحد لازم يخلص!! كيما خلصت انا ومرتي وعينيه سرحت بغل
- شنوة ؟ ماشي باش تعمل المشاكل ؟ هكا في فرحة اختك ؟ ماكش ماشي لحتى بقعة ماكانش تو نقول لمرتك؟
طبس عليها وباسلها خدها
- ماكش باش تقول لمرتي نعرف ..وما تخافش ناجية ...راك جبت راجل ما يخليش ثارو ...وقت الفطور انشالله نكون هوني ...وخرج
- باهي كلمني ..
عمللها بيدو باهي ...
بدات تحل في عينيها بالشوية ...تشم في ريحة الورد في خشمها ...حلتهم ..تلقى وردة حمرا فوق مخدة محمود ...تبسمت وهي تتفكرفي ليلة البارح ...تنهدت وشدتها بيدها تشم فيها ...لقات تحتها ورقة ...تنفضت جات قاعدة هزتها وحلتها تقرا فيها ." انت يا احلى من العسل يا ابن بدن مانيش شاعر باش نقعد نتغزل بيك نحب نقلك حاجة وحدة يا مرتي ..نحبك ونعشقك ونموت عليك وروحي و عقلي فيك يا مدام محمود بن رمضان سامحني
قعدت تقرا وتعاود تقرا وتعاود ..حاسة روحها طايرة طايرة .. طايرة من الفرحة ...ماعادش تحب تصدق فرحتها ..ولات خايفة ...خايفة لا تفرح تتنكس ...دموعها هبطو ...عاودت اتكات ...وعنقت مخدتو..زادت كبست عليها وفي يديها الوردة والورقة وقعدت تشم فيها ...تشم في ريحتو ...ريحتو في بدنها الكل ...في خشمها ...ريحتو ماتملش منها ..غمضت عينيها تتفكر في لمستو الحنينة ..في غزرتو ...في شفايفو ..في تعنيقتو ...ياربي ..يا ربي ماتحرمنيش منو ...راهو هو روحي ...ياربي راني تعبت ...ماعادش نحب نعيش نهار بل بيه ! بلا لمستو وبلا لهوتو بيا .نحبو نحبو نحبو ...
كيف خرجت من بيتها لقات الحركة والزغاريط وريحة البخور ...سناء تحضر في روحها للحمام ...مشات للصالة تفركس على محمود ما لقاتوش ...تلقى حماتها قاعدة ونساء دايرين بيها ...سلمت عليهم ومشات باستها ووجها احمر وحاشمة ...طبست راسها وقعدت بحذاها ساكتة ...حتى باش تسالها على راجلها حشمت
- برى للكوجينة افطري وعبي كرشك بلقدا ...قالتلها حماتها وتحكي معاها عادي
- با..باهي تو نمشي ..وينو محمود ؟
- خرج من بكري ..قال عندو قضية يقضيها تو يجي !!وطبست عليها توشوشلها ..ماشبعتيش منو محمود متاعك ؟ ههه وتزيدي تقودي بيا ؟ انا هي اللي نستاهل؟
- غزرتلها برعب
- - يا امي ناجية والله لاقودتها ؟
- حطت يدها على كتفها وتضحك
- - نفدلك معاك ...ربي يهنيكم بنتي ...انت لا محالة مريوحة ليه وما فيكش دوا...هههه ..اما حتى هو وعدني ماعادش يذيك حتى بكلمة
- تنهدت وتبسمت وباستها
- -عيشك امي ناجية ربي يخليك في ظهري ديما !!
- -ويخليلك راجلك وولادك ويبقي عليكم الستر ...نوقز تليفونها تلقاه محمود ..قامت تجري مشات للكوجينة وجها احمر ومغصور تقول واقف قدامها
- -ا..الو الو روحي صباح الخير وين مشيت ؟
- صباح الخير يابنينة (ويضحك) عندي قضية نقضيها ونرجعلك ..ماشية للحمام ؟
- لا امي ناجية قاتلي ماتمشيش موش باهية سخانة الحمام في شهور الوحم !!
- اممم معنتها كيف نروح نلقا الدار فارغة فيها كان انت؟
- امم يمكن
- جو ...خلي نكمل اللي بديتو البارح ههه
- زيتشي من البلادة ؟ ماتعبتش ياخي ؟
- تحكي بجدك ؟ اش عملت انا حتى نتعب ؟ ههه تي انا قاعد نسايس فيك ماكانش راك شفت التعب على قاعدة ؟
- محمود (قالتلو بدلال) حشمتني امان اسكت؟
باهي للا هاني باش نسكت لقيت لورقة والوردة
اممم لقيتهم محلاهم ...مانيش مصدقة !!هههه حاسة روحي في فيلم مصري قديم ..هههه رومنسية وورد وشعر اش مازال اخر ؟
مازال فترة هاك الروب الطوال المدورين هذوكم متاع سندريلا ما دخلنلهمش !!
متاع فارس الاحلام .ههه حتى انا نحلم بيها الفترة هذيكة متاع الامير اللي يجي على حصان ابيض ويهزني ههه ...اما انا عندي فارس احلامي محلاه ومابنو ...ماكنتش نحلم باش نلقى خير منو جملة جملة !!!
اهههه ياميمتي قلبي ...كان ماجاش موعد مهم راني رجعتلك تو نوريك الكلام الحلو اللي مانسمعو كان من بعيد ...ههه من قريب مانشوف كان البكاء والدموع ...وانا نعنق ونسكت هههه
ماعادش تشوف بكأء منو هكا انشالله يا ربي !!
- ههه باهي ياروحي باش نعلق تو ..تو نجي فيسع انشالله
هبط من الكرهبة ..قعد يقرى في العنوان ...هذا هو اللي عطاهولو ...بالاص قديم في المروج ...طلع الدروج بالزربة ...وقف قدام باب ودق ...حط يديه في مكتوبو قعد يستنى تحل الباب بالشوية ...كان واقف بحوايج الدار ...شعرو مازال مفرعس ...عينيه وساعت ووجهو لخلخ وهو يرا فيه قدامو
-سي ...سي محمود ؟
كان لابس lunettede soleil نحاها حطها في مكتوبو بالسياسة وهو يغزرلو بدم بارد ...دزو من كتفو ودخل ..
-اي ...سيدك محمود يا زبلة ...!!!
سكر الباب ولاخر من الصدمة ماتحركش ..جمد في بقعتو ...
-اي عاد ؟ تكلم يا بطل ؟ اش مازال عندك ماتقول على مرتي ؟
بدا يتحرك بالشوية خايف من الهدوء متاعو
-سي محم..مود ..المرة لخرى ..اا.ا
-هاني نسمع فيك تكلم ؟ وسخلي وذنيا بكلام الطحين متاعك ؟...اش مازال باش تقول على مرتي يا ولد الهجالة ...بالكشي تسخايلني ماركة كسوة وكرافات وقربيطة ...اه ...جايني تتهدد عليا في داري ...توسخلي في عرض مرتي
..هذاك اللي قدرك عليه ربي ؟ ...تحارب مع النساء كيف ماقديتش روحك مع الرجال ؟ (وزاد قربلو) وتزيد تهرب تسخايلني معادش باش نلقاك؟ هههه في كرش حوتة نجيبك انا !!! ماني قتلك ماتعرفنيش؟ شفت كل دمعة هبطت من عينيها ...باش يهبطو عليك انت ضرب تو ...وهجم عليه على غفلة ....عطاه بونية على جداقو طيحو وبرك عليه طاح يضرب ..يضرب يضرب لين لاخر ماعادش فيه ...وين يتفكر الضرب االي عطاه لمرتو على خاترو يزيد ينزل عليه ...حتى لين خرجلو دموماتو شرتلة ....ودهش ...شدو من كتافو ورماه دايخ ...عينيه زرق من الضرب ...وشفتو مفلوقة ...على قد ما يغزر لوجهو على قد ما قلبو يبرد ...طبس عليه ووشوشلو
- وماعندك ملتعملي ...تو تخرالي فيه ...العنوان عطاوهولي صحابي يخدمو في الحاكم ...كنت ننجم نخليهم هوما ولا غيرهم يجيو يدقدقوك هنا ...اما انا حبيت ثاري وثار مرتي ناخذو بيدي هاذي ..وهز يدو اللي ضرب بيها مرتو ...وعطاه كف ...زاد دوخو ...
خرج وصل للباب ...يسمع فيه يان ويعيطلو ...وقف وماتلفتلوش ...ماعادش يحب يشوف خليقتو ..
-سي محمود ...قالو بالشوية ...الطريحة هاذي ....كان لازم ناكلها ليا برشة ....وقتلي خليتها ...مرتك ...مرتك اشرف من الشرف بيدو ...سام...سامحني ...
- نعرف ..نعرف اللي مرتي اشرف من الشرف ...وخرج ...حس بدموعو هبطت دموع ندم وحسرة ....
نهارت العرس ...جاء الطقس دافي وسخون كان شهر ماي ...العرس في وتيل في الحمامات ...العروسة من الصباح وهي في الحجامة ...وخديجة باش يخلطها محمود بحذاها ...في الثنية قعد يوصي فيها باش ماتعبش روحها ...كان يضحك عليها وشايخ ...وجهها بدا يدور ويسمن ...قالت ناجية كيف المرا تزيان معنتها حبلة ببنية ..وهي موش زيانت برك؟باش تخرجو من عقلو اصل ههه مع بدنها زاد تعبى شوية ..ياحبيبي عالزمن ...ماعادش ينجم يبعد عليها ...
بدات السهرية ...وبدات لعباد تجي ...كانت لابسة روبة نوار المرة هذي قصيرة شوية ههه وقتلي شافها بدا يعارك يعارك بعد سكت ....قالها ميسالش ...عرس اختي وانسي القصير ..محلاه ومحلا غيرتو عليها ...هو اللي كان يفتق بالزين ...لابس سمكينق في النوار ومبدل كوب متاع شعرو ..يرعب يرعب ...ماعادش تنجم تبعد عينيها عليه ...قعدت هي وناجية ويوسف في طاولة قريبة من العروسة ...هو يمشي ويجي عليهم ...كل مرة يسلم على حد ...طبس عليها ..قالها- محلاك ومحلا مشطتك ....ليلتك زرقة ليوم ههه
طبست راسها من الحشمة ...كانت لامة شعرها لكلو كعكة كبيرة ومهبطة خصلات مع بانسو في عينيها ..وماكياج موش غامق ...العروسة والعروس مصدرين غزرتلهم وتفكرت ليلة عرسها ...تعدات كيف المنامة ...لا فرحت بيها ولا فهمتها ...هزت عينيها تلقاه يغزرلها ويضحك ...كان حاط ايدو في مكتوبو ...طويل ...وهرة ...ازين واحد في الصالة بدون مبالغة ...النساء لكلها عينيها عليه ...اما هو عينو عليها هي كهو ....كانت الفرقة تغني والعباد تشطح ..مشا للمنصة ..قعد يحكى مع جماعة الفرقة ....بعد هز الميكرو ووقف ...سكتو الناس الكل وقعدو يغزرولو ...طبس راسو وضحك ....غزرلها وعض على شفايفو ...كانت باهتة فيه ...
- بون سوار الناس الكل ...نحب نرحب بيكم ...ونشكركم على وجودكم معانا تشاركونا فرحتنا ....
بدى التصفيق والتزفير ...سكتهم بيديه
- هههه مازال مازال...وغزر لاختو ...نحب نهني اختي ونقلها انشالله ربي يتمم عليها ...ونقلها اللس هي خذات راجل...(ضحك طارق وبايبالو) وهبط ...بدا يمشي وين قاعدين هوما ...بدا قلبها يدق ...يرعش ..عينيها علقت في عينيه ....تبسملها ووقف قدامهم ....
- نحب ناخذ شويه وقت من عرس اختى باش نخصصو لروحي ...نحب نشكر فيه المرا ...المرااللي جابتني ...ومشا لامو باسها من راسها ...الحب الاول في حياتي ...هههه امي واختي وصاحبتي ...نحب زادة نشكرها خاتر خذاتلي المرا اللي تمنيتها حياتي كاملة ...وغزرلها ...غزرلها بكل حنية ...المرا اللي قد ماباش نوفيلها حقها مايوفاش !!! المرا اللي سكنت في روحي وولات هي روحي .(وبدات لعباد تصفق وتعيط وتقولو بوسها )
-ههههه مرتي حشامة ما تحبش البوس قدام لعباد ...قعدت تغزرلو مبهورة ...موش مصدقة وجها حمار ووهج ...كمل هو يحكي....
- نحب نهديلها ...نهديلها حاجة هي تحبها ...هههه ..نهديلها مقطع من غناية ام كلثوم ...( حطت يديها على وجهها وعينيها زغللت بالدموع ...تلفتت لناجية تلقاها حتى هي متاثرة ...ناجية القوية متاثرة ؟)حط يدو كيف مايعمل المايسترو وضحك مرة اخرى ...وبداات الموسيقى ..قعدت تغزر للصالة ...للعباد ...للعروسة ...لقاتهم لكلهم متاثرين ....قربلها ..شدلها يدها ووقفها قدامو ...مشاها بالشوية ووقفها في ويط البيست وبدا يغني ...وهي بدات تبكي
هات عينيك تسرح في دنيتهم عينيا
هات ايديك ترتاح للمستهم ايديا
ياحبيبي تعالى
ياحبيبي تعالى
وكفاية اللي فاتنا هو فاتنا ياحبيب الروح شويا
(وعنقها حطلها راسها في عنقو كبس عليها ...عينيه دمعت وباقي يغني...هزت يديها ودورتهم عليه وقعدت حاضنتو )
اللي شفتو ابل ماتشوفك عينيا عمري ضايع يحسبوه ازاي عليا
انت عمر ى
كمل الغناية ...موش عارف كيفاش كملها ...كانت دموعو سابقتو .دور يديه عليها وقعد معنقها ...معنقها ...موش عارف قداش وهو معنقها ...يسمع كان في التصفيق..الصياح ..التزغريط ...هبطت سناء تجري ...تعن
فيهم وتبكي- علاه هكة حرام عليكم ...برشة حب برشة .فسدتولي ماكياجي ...هزلها راسها لقاها باقي معنكشة فيه ..وجهها تبلبز بالدموع ..اما مازالت مزيانة ..وباش تقعد مزيانة لاخر عمرو ...ضحك ودموعو هابطة
- نحبك ...نحبك ...نحبك يااحلى قصة حب في حياتي

شارك الموضوع

مواضيع ذات صلة