بقلم جهاد التابعي : جواب من مراته التانية
 |
| بقلم جهاد التابعي : جواب من مراته التانية |
شبكة كنان الاعلامية جواب من مراته التانية
ازيك يا سلوي، أنا بيري طبعا عارفه اسمي، زي ما عارفه شكلي، وبقيتي حتي شبهي بعد ما اللي حواليكي قالولك الحقي روحي غيري لون شعرك وانفخي واشفطي وقطعي في جلدك عشان تبقي شبهها وأحلي عشان أنتي السبب، مش قالولك كده برده..
عارفه إنك بتكرهيني، والدم بيغلي في عروقك لما بس بتفتكريني، وعارفه إنك مبتنسينيش ولا لحظة أصلا من يوم
ما عرفتي، عارفه إنك بتشمي ريحتي علي هدومه، وإنك أول ما بتحضنيه بتفتكريني وبتفقدي كل رغبه في كل شيء، عارفه إني طول الوقت خيالي واقف بينك وبينه.
عارفه يا سلوي أنا بكتبلك ليه؟
عشان مش عايزاكي تزعلي، مش عشان بحبك، بالعكس أنا بغير منك، بغير منك عشان كان عندك الفرصة في الحياة إنك تعيشي مخدوعة ، إنك تاكلي بتنجان علي إنه عسل وترضي غرورك بالفكرة، لكن أنا كنت شايفة الزاوية الأقرب للواقع غصب عني طول الوقت، بس بكتبلك عشان أقولك متزعليش، أنا مخطفتش منك راجلك، احنا الاتنين بنتقاسم ربع راجل، بيقولوا الراجل الواحد يجوز
!يتقسم علي 4 ، بس مش عارفه الربع راجل هنقسمه أنا وانتي ازاي.
ربع في كل حاجه، هو قالك طبعا إنه اتجوزني عشان مش عايز يخونك في الحرام، بس هو معايا مبينفذش الحلال برده حتي، شرط الحلال العدل، هو بيقولك أنتي إنه بيعد معايا أكتر عشان عروسه جديده، وبيقولي أنا إنه معيشك في شقه تمليك في منطقة راقيه، وأنا إيجار علي كف عفريت في منطقة شعبيه عشان انتي أم العيال، مع إنه حارمني أجيب عيال عشان أعيش، بيقولك إني أحلي منك وإنك بقيتي خارج نطاق الخدمه، وأنتي بتفتكري إنه بيفاضل بيني وبينك، لاء متقلقيش بعد شهرين جاله تخمه مني برده، وبقي بيقارني بموديل كليب ، وبعدين بعد المقارنه بيشتمها عشان عارف إنه مش هيطولها زينا، لما اتجوزك عملك فرح وجابلك شبكه وفستان، بس قالي أنا مش هعملك كده عشان بحافظ علي مشاعر أم العيال، ههههههه شفتي المحافظه، جوزنا مش متدين متناقض ولا حاجه، أصل مش لوحده، جوزنا شرعه الوحيد هو انبساطه، بيعمل اللي يبسطه في الحلال والحته اللي تبسطه في الحرام، وبيفكه من حقوق الناس في الحالتين، زيك برده يا سلوي وزيي ، ما احنا أصل الظاهر كلنا بقينا مشوهين ولايقين علي بعض خلاص، فاكره أما اتصلتي بيا أول ماعرفتي وقعدتي تدعي عليا وتقوليلي حسبي الله ونعم الوكيل، بتستخدمي الدين عشان تتخانقي معايا، مع إنك من عشر سنين اتجوزتي نفس الراجل، لما كانت معاييره في الاختيار مختلفه واتجوزك عشان اقنعتيه إنك متدينه جدا جدا وبتنفذي الدين بحاذافيره ،بس الظاهر ساعتها مقولتيلوش ماعدا التعدد، متقوليش التعدد حلال لو في ظروف عند الست الأولي، لا وعند الراجل وعند الست التانيه، انتي بس اللي عايزه تنكري وتبقي متناقضة زي جوزنا، وزيي أنا كمان، مش بقولك
لايقيين علي بعض.
أنا مش هحكيلك علي تفاصيل الظروف اللي خلتني أضطر اتجوزه، لأنها مهما كانت صعبه وغير إنسانيه، فهي منتشرة ومتكرره زي الكابوس الماسخ حوالينا طول الوقت، أنا مش حاله خاصة أنا واحده من آلاف،
اطلعي بصي من البلكونه، قبل الفجر، مش هتشوفيني لاء، أنا في الوقت ده هبقي في حضن جوزك، اللي بقي جوزي برده، بس هتشوفي حد شبهي، هتشوفي راجل محتاج بس عنده بقايا كرامه نفسه عزت عليه يمشي يشحت الضهر في العلن بالطريقة المباشرة،، هتشوفيه وهو بينبش في شنط الزباله، وبيطلع بواقي سندوتشات وبياكل اللي ينفع يصلب طوله منها،مش معني إنه بياكلها إنها عاجباه علي فكره هو كان يتمني ياكل سندوتشات معموله عشانه مخصوص وطازه وسخنه، بس الظروف، وحتي لو كان هيشارك سندوتشات مع حد مكنش يتمني إنه يبقي بيشارك بواقي سندوتشات في صندوق الزباله ، اندهي عليه يا سلوي قوليله بتعمل كده ليه، ملكش حق تاكل بواقي سندوتشات عيالي ، روح اشتغل يا عم، هيقولك الحقيقه، هيقولك إن الشغل الوحيد المتاح قدامه 24 ساعه والأجر برده بواقي سندوتشات بس ربع ربع ربع الكمية. الواقع مخيف يا سلوي،
أنا بعتلك وأنا عارفه إنك ممكن توريله الجواب، وتقوليله : بص اللي اتجوزتها عليا شايفاك ايه، بس ساعتها هنكر، ولما هتخليه يقرأ إني هنكر ، هنكر إني قلت إني هنكر، وهقوله وده كلام برده ياسيد الرجاله، ده أنت كتير علينا، ده أنا مش مصدقه نفسي إنك بقيت جوزي، وهو هيصدق، وهينكر كل اللي قراه علي نفسه، عشان هو عايز يشوف نفسه راجل ونص .. وأنا وانتي عارفين ..إنه مجرد
ربع راجل .
جهاد التابعي